Gjykata Themelore në Prizren, Departamenti i Krimeve të Rënda, ka caktuar masën e arrestit shtëpiak në kohëzgjatje prej një muaji ndaj të pandehurit A.D., për shkak të dyshimit të bazuar se ka kryer veprën penale “Asgjësimi i materialeve të votimit”.
Sipas njoftimit të gjykatës, masa mund të zgjasë deri më 7 korrik 2026.
“I pandehuri nuk guxon që të largohet nga vendbanimi pa lejen e Gjykatës, si dhe i ndalohet të kontaktojë me personat me të cilët ai nuk jetojnë apo janë të varur nga i pandehuri”, thuhet në njoftim.
Gjykata ka bërë të ditur se në rast të shkeljes së kësaj mase, ndaj tij do të caktohet paraburgimi.
“Nëse i pandehuri e shkel masën e arrestit shtëpiak, ndaj të njëjtit do të caktohet masa e paraburgimit”, thuhet më tej.
Sipas gjykatës, nga provat e mbledhura deri në këtë fazë ekziston dyshimi i bazuar se më 7 qershor 2026, i pandehuri në cilësinë e anëtarit të KQZ-së, në qendrën e votimit në shkollën “Sharri” në Jabllanicë të Prizrenit, ka keqpërdorur detyrën dhe autorizimet e tij lidhur me procesin zgjedhor.
“Me datë 07 qershor, i pandehuri në cilësinë e anëtarit të KQZ-së, në keqpërdorim të detyrës, pozitës dhe autorizimeve të tij lidhur me zgjedhjet në qendrën e votimit në shkollën ‘Sharri’ në Jabllanicë – Komuna e Prizrenit, me qëllim që të pengojë vijueshmërinë normale të zgjedhjeve, dhe pengimin e shprehjes së lirë të vullnetit të qytetarëve, i pandehuri A.D., i merr dhe i fsheh gjashtë (6) fletëvotime të zbrazëta duke bërë shqyrjen e fletëvotimeve nga blloku i fletëvotimeve, të cilat pastaj i fsheh, duke keqpërdorur detyrat, pozitat dhe autorizimet lidhur me zgjedhjet”, thuhet në njoftimin e gjykatës.
Megjithatë, gjykata thekson se pretendimet do të vlerësohen gjatë zhvillimit të procedurës penale.
“Kurse a do të argumentohen këto fakte do të vlerësohet në fazat e mëtejme të procedurës penale”, thuhet në njoftim.
Gjyqtarja e procedurës paraprake ka shqyrtuar kërkesën e Prokurorisë së Shtetit për caktimin e paraburgimit, por ka konstatuar se ajo është e pabazuar.
“Gjyqtarja e procedurës paraprake, ka vlerësuar kërkesën e Prokurorisë së Shtetit për caktimin e masës së paraburgimit, dhe pretendimet e palëve gjatë seancës dëgjimore, si dhe nga shkresat e lëndës dhe provat materiale, ka gjetur se kërkesa për caktimin e masës së paraburgimit është e pabazuar”, thuhet në njoftim.
Sipas gjykatës, arresti shtëpiak është masë e mjaftueshme për të siguruar prezencën e të pandehurit dhe zhvillimin e papenguar të hetimeve.
“Duke marrë për bazë të gjitha faktet dhe rrethanat konkrete, Gjykata e vlerësoj masën e paraburgimit si të rëndë, në anën tjetër me masën e arrestit shtëpiak, do të sigurohet zhvillimi i pa penguar i procedurës hetimore”, thuhet në njoftim.
Mbikëqyrja e zbatimit të masës së arrestit shtëpiak do të bëhet nga Stacioni Policor në Prizren.
Kryeprokurori i Prokurorisë Themelore në Prizren, Petrit Kryeziu ka pritur sot në një takim pune përfaqësuesit e Departamentit të Thesarit të Shteteve të Bashkuara të Amerikës, Joseph W. Burke, këshilltar për Krime Ekonomike në kuadër të Zyrës së Asistencës Teknike, si dhe, Norman Richard Smith, këshilltar për Krime Ekonomike në të njëjtën zyrë.
Në njoftim shtohet se, gjatë takimit u diskutua për forcimin e bashkëpunimit ndërinstitucional në luftimin e pastrimit të parave, identifikimin, hetimin dhe ndjekjen efektive të veprave penale financiare, si dhe avancimi i bashkëpunimit ndërinstitucional për adresimin e formave të sofistikuara të kriminalitetit ekonomik.
‘’ Gjatë diskutimeve, fokus i veçantë iu kushtua luftimit të pastrimit të parave, përfshirë sfidat në identifikimin dhe hetimin e rasteve, gjurmimin e pasurisë së kundërligjshme dhe forcimin e kapaciteteve profesionale për ndjekjen efektive të këtyre veprave penale. Po ashtu, u diskutua për rëndësinë e bashkëpunimit ndërinstitucional dhe shkëmbimit të praktikave më të mira ndërkombëtare në këtë fushë’’, thuhet në komunikatë mes tjerash.
Komunikata:
Kryeprokurori i Prokurorisë Themelore në Prizren priti në takim pune përfaqësuesit e Departamentit të Thesarit të SHBA-së.
Prizren, 09 Qershor 2026 – Kryeprokurori i Prokurorisë Themelore në Prizren, z. Petrit Kryeziu ka pritur sot në një takim pune përfaqësuesit e Departamentit të Thesarit të Shteteve të Bashkuara të Amerikës, z. Joseph W. Burke, Këshilltar për Krime Ekonomike në kuadër të Zyrës së Asistencës Teknike si dhe z. Norman Richard Smith, Këshilltar për Krime Ekonomike në të njëjtën zyrë.
Gjatë takimit u diskutua për forcimin e bashkëpunimit ndërinstitucional në luftimin e pastrimit të parave, identifikimin, hetimin dhe ndjekjen efektive të veprave penale financiare, si dhe avancimi i bashkëpunimit ndërinstitucional për adresimin e formave të sofistikuara të kriminalitetit ekonomik.
Gjatë diskutimeve, fokus i veçantë iu kushtua luftimit të pastrimit të parave, përfshirë sfidat në identifikimin dhe hetimin e rasteve, gjurmimin e pasurisë së kundërligjshme dhe forcimin e kapaciteteve profesionale për ndjekjen efektive të këtyre veprave penale. Po ashtu, u diskutua për rëndësinë e bashkëpunimit ndërinstitucional dhe shkëmbimit të praktikave më të mira ndërkombëtare në këtë fushë.
Kryeprokurori shprehu mirënjohjen e tij ndaj pjesëmarrësve për vizitën dhe bashkëpunimin konstruktiv, si dhe ndaj Ambasadës Amerikane për mbështetjen e vazhdueshme ndaj Sistemit Prokurorial të Republikës së Kosovës, e cila ka ndikuar në ngritjen e kapaciteteve profesionale dhe forcimin e efikasitetit në zbatimin e ligjit.
Nga ana e tyre, përfaqësuesit amerikanë shprehën gatishmërinë për vazhdimin e bashkëpunimit me institucionet e drejtësisë në Kosovë, me qëllim të fuqizimit të mekanizmave për parandalimin, hetimin dhe ndjekjen e suksesshme të pastrimit të parave, krimeve financiare dhe formave të tjera të kriminalitetit ekonomik.
Takimi u vlerësua si një mundësi e rëndësishme për thellimin e bashkëpunimit profesional dhe shkëmbimin e përvojave, në funksion të forcimit të sundimit të ligjit, rritjes së efikasitetit në luftën kundër pastrimit të parave dhe mbrojtjes së integritetit financiar e institucional.
Kryetari i Bashkimit Demokratik në Prizren, Zafir Berisha, ka reaguar pas deklarimeve të fundit të kandidatit të PDK-së për kryeministër, Bedri Hamza, duke e akuzuar atë për mungesë të leximit të realitetit politik dhe për tentim të shmangies së përgjegjësisë për rezultatin zgjedhor.
Ai tha se konferenca e fundit e Hamzës tregoi se ai ende është larg profilit të një lideri politik që kupton qartë mesazhin e votuesve.
Sipas tij, Hamza është munduar t’ua atribuojë të tjerëve përgjegjësinë për rënien e votave, ndërsa ka shfaqur gatishmëri për marrëveshje politike me kryeministrin në detyrë, Albin Kurti.
“Dje duhej ta uronte Vetëvendosjen për rezultatin dhe të zotohej se do të qëndrojë në opozitë, aty ku e kanë vendosur qytetarët me votën e tyre”, ka shkruar Berisha.
Ai ka kritikuar edhe kryetarin e Prizrenit, Shaqir Totaj, duke thënë se “po përpiqet t’i ikë përgjegjësisë për disfatën zgjedhore dhe po mbështet qëndrimet e Hamzës lidhur me mundësinë e bashkëpunimit me Kurtin”.
Berisha ka komentuar gjithashtu qëndrimet e liderit të LDK-së, Lumir Abdixhiku, dhe presidentes Vjosa Osmani, për të cilët tha se angazhimin politik e kanë të lidhur me interesa personale.
Në fund, ai ka theksuar se çdo bashkëpunim eventual me Kurtin, me arsyetimin e tejkalimit të krizës institucionale dhe politike në vend, mund të pranohet vetëm në një rrethanë.
“Çdo bashkëpunim eventual me Albin Kurtin mund të tolerohet vetëm nëse Ramush Haradinaj zgjidhet President i Kosovës”, ka deklaruar Berisha./pp/
Kryetari i Komunës së Prizrenit, Shaqir Totaj, ka thënë se procesi zgjedhor i 7 qershorit tregoi edhe një herë maturinë e lartë demokratike të popullit tonë dhe aftësinë e institucioneve për të organizuar zgjedhje të lira, të qeta dhe sipas standardeve më të larta evropiane.
Ai ka përgëzuar të gjithë akterët që morën pjesë në këtë proces.
“Rezultatet preliminare flasin qartë, VV ka dalë partia e parë dhe për këtë e përgëzojmë. Megjithatë qytetarët kanë dhënë mesazhin e tyre të prerë: Kosova ka nevojë për bashkëpunim, stabilitet dhe një qeverisje efikase. Asnjë parti nuk mund të ecë përpara e vetme; prandaj, është koha që t’i ulim tensionet elektorale dhe t’i lihet vendi dialogut të përgjegjshëm politik. Pres që të gjitha partitë, e posaqërisht VV të sillet konform këtij mesazhi të marrë nga qytetarët”, ka shkruar Totaj në “Facebook”.
Ai ka thënë se si subjekte politike, e kanë detyrimin kushtetues dhe moral ndaj vendit që të shmangim çdo jostabilitet të ri të institucioneve.
“Ftoj të gjithë liderët e partive parlamentare të angazhohen menjëherë për gjetjen e një konsensusi të gjerë për zgjedhjen e Presidentit të ri dhe formimin e shpejtë të një ekzekutivi stabil me mandat të plotë katërvjeçar. Kosova përballet me sfida të mëdha ekonomike dhe gjeopolitike që nuk presin. Interesi i shtetit dhe i qytetarëve tanë duhet të qëndrojë mbi çdo interes të ngushtë partiak”, ka shkruar Totaj.
Sot bëhen tetë vjet nga ndarja nga jeta e Fadil Vokrrit, figurës më të shquar të futbollit kosovar dhe njërit prej sportistëve më të rëndësishëm në historinë e vendit.
Në përkujtim të kësaj date, Federata e Futbollit e Kosovës ka kujtuar kontributin e jashtëzakonshëm të Vokrrit, i cili jo vetëm që shkëlqeu në fushën e blertë si golashënues dhe bartës i fanellës me numrin 9, por luajti rol vendimtar edhe në zhvillimin institucional të futbollit kosovar.
Sipas FFK-së, Vokrri besoi në ëndrrën e Kosovës edhe në kohët kur ajo dukej e paarritshme, duke punuar pa u ndalur për ta bërë realitet. Kontributi i tij kulmoi me anëtarësimin e Kosovës në UEFA dhe FIFA, një arritje historike për futbollin e vendit.
“Numri 9 në fanellën e tij simbolizonte golat, suksesin dhe lidershipin”, thuhet në njoftimin e FFK-së, e cila thekson se trashëgimia e Vokrrit mbetet e gjallë dhe frymëzuese për brezat e rinj.
Tetë vjet pas ndarjes së tij nga jeta, Fadil Vokrri vazhdon të mbetet simbol i krenarisë, suksesit dhe identitetit të futbollit të Kosovës.
“Përherë në kujtimet tona. Përherë Legjendë”./PrizrenPress.com/
Drejtoria e Bujqësisë në Komunën e Malishevës ka njoftuar fermerët se Ministria e Bujqësisë, Pylltarisë dhe Zhvillimit Rural ende nuk e ka hapur afatin për aplikim për subvencionet për vitin 2026.
Përmes një njoftimi publik, drejtoria u ka bërë thirrje fermerëve që të mos marrin për bazë informatat e pakonfirmuara që mund të qarkullojnë në rrjetet sociale apo në burime të tjera jozyrtare.
“Ju njoftojmë se Ministria e Bujqësisë, Pylltarisë dhe Zhvillimit Rural ende nuk e ka hapur afatin për aplikim për subvencionet për vitin 2026”, thuhet në njoftim.
Nga Drejtoria e Bujqësisë kanë theksuar se çdo informacion zyrtar lidhur me hapjen e thirrjes për aplikim do të publikohet me kohë përmes kanaleve zyrtare të informimit.
“Për këtë arsye, ju lusim të mos merrni parasysh informata të pakonfirmuara që mund të qarkullojnë në rrjete sociale apo burime të tjera. Sapo të hapet thirrja zyrtare për aplikim, do të njoftoheni me kohë përmes kanaleve zyrtare të informimit”, thuhet më tej në njoftim.
Në fund, Drejtoria e Bujqësisë ka falënderuar fermerët për mirëkuptimin dhe bashkëpunimin, duke kërkuar që të gjitha informacionet lidhur me subvencionet të ndiqen vetëm nga burimet zyrtare.
KB Bashkimi ka vazhduar me kompletimin e skuadrës për sezonin 2026/27, duke zyrtarizuar afrimin e Arian Azemit.
“Mirë se vjen, Arian Azemi! Ariani është zyrtarisht pjesë e KB Bashkimit me kontratë 2-vjeçare”, ka njoftuar klubi prizrenas, raporton PrizrenPress.
Azemi bëhet një tjetër emër i ri në radhët e portokallinjëve, teksa Bashkimi po vazhdon përgatitjet për edicionin e ardhshëm. Më herët, klubi ka prezantuar edhe përforcimet Adrio Bailey dhe Divine Myles, si dhe ka konfirmuar vazhdimin e bashkëpunimit me Valon Bunjakun, Lejson Zeqirin dhe Shannon Shorter.
Me këto lëvizje, nënkampioni i Kosovës po vazhdon ndërtimin e ekipit për sfidat e sezonit 2026/27./PrizrenPress.com/
Prizreni nikoqir i një turneu ndërkombëtar, mbi 250 sportistë dhe delegacione nga disa vende do të marrin pjesë
Nën organizimin e KFV Kalaja Master, në Prizren do të zhvillohet një prej ngjarjeve më të veçanta sportive dhe kulturore gjatë periudhës 10–14 qershor 2026, kur do të organizohet një turne ndërkombëtar në kuadër të aktiviteteve për shënimin e Ditës së Çlirimit të Prizrenit.
Organizatorët bëjnë të ditur se turneu synon të shndërrohet në një traditë të përvitshme, duke e pozicionuar Prizrenin në hartën e aktiviteteve të rëndësishme sportive ndërkombëtare.
Ekipe nga Kosova, Turqia dhe Bosnja e Hercegovina
Në turne do të marrin pjesë ekipe veterane nga Kosova, Turqia dhe Bosnja e Hercegovina. Nga Turqia pritet pjesëmarrja e pesë skuadrave, ndërsa një nga mysafirët më të veçantë do të jetë Ekipi i Futbollit i Parlamentit të Turqisë (Meclis Tak?m?), i përbërë nga deputetë dhe politikanë turq.
Sipas organizatorëve, pjesëmarrja e tyre përfaqëson një shembull të diplomacisë sportive dhe forcimit të marrëdhënieve miqësore ndërmjet Kosovës dhe Turqisë.
Përveç ekipeve pjesëmarrëse, në Prizren pritet të qëndrojnë edhe delegacione diplomatike, përfaqësues institucionesh, biznesmenë dhe mysafirë të tjerë nga vendi dhe rajoni.
Impakt në turizëm dhe ekonomi
Ardhja e më shumë se 250 futbollistëve dhe delegacioneve të tyre pritet të ndikojë drejtpërdrejt në rritjen e turizmit dhe zhvillimin ekonomik lokal. Sektori i hotelerisë, gastronomisë dhe bizneset e tjera vendore pritet të përfitojnë nga numri i madh i vizitorëve gjatë ditëve të turneut.
Organizatorët vlerësojnë se kjo ngjarje do të krijojë mundësi të reja bashkëpunimi dhe investimi mes pjesëmarrësve.
Program i pasur sportiv dhe kulturor
Aktivitetet do të nisin më 10 qershor me ceremoninë zyrtare të hapjes dhe pritjen e delegacioneve pjesëmarrëse.
Më 11 qershor do të zhvillohen ndeshjet e fazës së grupeve, ndërsa më 12 qershor ekipet ndërkombëtare do të vizitojnë qendrat historike të Prizrenit. Në mbrëmje është paraparë një gala mbrëmje me program kulturor dhe gastronomik.
Gjysmëfinalet do të luhen më 13 qershor, ndërsa finalja e madhe e turneut do të zhvillohet më 14 qershor. Po atë ditë është planifikuar edhe një ndeshje miqësore ndërmjet Ekipit të Parlamentit të Turqisë dhe përfaqësuesve të Parlamentit të Kosovës ose Kuvendit Komunal të Prizrenit.
Pjesëmarrje e personaliteteve politike dhe institucionale
Në këtë aktivitet ndërkombëtar pritet të marrin pjesë edhe zëvendëskryeministri në detyrë dhe kryetari i klubit, Fitim Damka, nënkryetari i Komunës së Prizrenit, Kujtim Gashi, drejtoresha e Kulturës, Rinisë dhe Sportit, Ajlen Shishko-Hajdari, si dhe ministrja në detyrë për Komunitete dhe Kthim, Emilija Rexhepi.
Përmes kësaj ngjarjeje, organizatorët synojnë ta promovojnë Prizrenin si qytet të sportit, kulturës dhe mikpritjes, duke kombinuar historinë, traditën dhe futbollin në një festival ndërkombëtar, me mesazhin se sporti mbetet një nga urat më të fuqishme që lidh popujt dhe kulturat.
Për një krim ka përgjegjësi individuale dhe drejtësia duhet ta përcaktojë atë. Por për klimën e urrejtjes, përçarjes dhe normalizimit të dhunës në një shoqëri, përgjegjësia është kolektive. Kjo është pyetja që duhet t’i bëjmë vetes pas çdo tragjedie: çfarë klime kemi ndërtuar së bashku?
Vdekja e një të riu është një plagë e rëndë për familjen, miqtë dhe shoqërinë. Drejtësia do të përcaktojë përgjegjësit për këtë ngjarje tragjike.
Por përtej fajit individual, duhet të reflektojmë mbi rolin që secili prej nesh, institucionet dhe diskursi publik kanë në formësimin e mjedisit ku jetojmë. Ndërsa drejtësia merret me autorin e krimit, ne duhet të shqyrtojmë ndikimin tonë në krijimin e një mjedisi ku urrejtja normalizohet dhe respekti për tjetrin zbehet.
Sot jetojmë në një kohë kur gjuha e urrejtjes, etiketimet dhe përçarjet janë bërë pjesë e përditshmërisë. Kundërshtari politik nuk shihet më si dikush me mendim ndryshe, por si armik që duhet poshtëruar. Fyerjet dhe nxitja e ndasive shpesh paraqiten si forcë, ndërsa dialogu dhe respekti si dobësi. Në një ambient të tillë, urrejtja gjen terren për t’u përhapur.
Paramendoni sikur natyra të vepronte si disa politikane. Çdo vit stinët ndryshojnë katër herë, ashtu si në demokraci ndryshojnë qeveritë dhe pushtetet. Por sikur natyra të zemërohej me çdo ndryshim dhe të kërkonte jetë njerëzish sa herë që vjen pranvera, vera, vjeshta apo dimri? Bota do të ishte e pabanueshme. Natyra e kupton se ndryshimi është pjesë e jetës. Vetëm ne njerëzit arrijmë ta shohim mendimin ndryshe si arsye për përçarje.
Prandaj nuk mjafton të dënojmë krimin pas tragjedisë; duhet të marrim përgjegjësi për klimën që krijojme çdo ditë. Secili zgjedh nëse do të ushqeje urrejtjen apo respektin, do të përhapë fyerje apo dialog, do të normalizoje përçarjen apo vlerat që na bashkojnë. Le të fillojmë nga vetja: nga fjalët që përdorim në publik, në rrjetet sociale dhe në jetën e përditshme, nga mënyra si flasim për ata që mendojnë ndryshe dhe nga shembulli që u japim të rinjve.
Vetëm duke refuzuar gjuhën e urrejtjes dhe duke mbrojtur kulturën e respektit mund të ndërtojmë një shoqëri më të sigurt dhe më njerëzore. Sepse kur mbillet urrejtje, herët a vonë korrim dhimbje; kur mbjellim përgjegjësi, mirëkuptim dhe respekt, krijojmë kushtet që tragjedi të tilla të mos përsëriten.
