Shumë shpejt pritet që Gjykata Speciale të ngrejë aktakuzat e para për ish-pjesëtarët e UÇK-së, për të cilët dyshohet se kanë kryer krime gjatë luftës së fundit në Kosovë. Kjo pasi Marrëveshja ndërkombëtare mes Kosovës dhe Mbretërisë së Holandës për Themelimin e Gjykatës Speciale ka hyrë në fuqi më 4 shkurt të këtij viti, pasi është nënshkruar nga Presidentja e Kosovës Atifete Jahjaga, e cila ka njoftuar Kuvendin për nënshkrimin e kësaj Marrëveshjeje. Për hartimin e Marrëveshjes ndërkombëtare mes Kosovës dhe Holandës, ishte caktuar një ekip prej të gjitha institucioneve të Kosovës. Ndërsa pas përfundimit, ky dokument është nënshkruar nga zëvendëskryeministri dhe Ministrit të Punëve të Jashtme, Hashim Thaçi, derisa në emër të Holandës firmën e ka vënë ambasadorja holandeze në Kosovë, Gerrie Willems.

Marrëveshjet ndërkombëtare, sipas Kushtetutës së Kosovës, duhet të ratifikohen në Kuvendin e Kosovës me dy të tretat e deputetëve të Kuvendit. Neni 18 në Kushtetutën e Kosovës, pika 1, thotë se Kuvendi i Republikës së Kosovës me votat e dy të tretave (2/3) e të gjithë deputetëve ratifikon marrëveshjet ndërkombëtare për këto çështje: (1) territorin, paqen, aleancat, çështjet politike dhe ushtarake, (2) të drejtat dhe liritë themelore, (3) anëtarësimin e Republikës së Kosovës në organizata ndërkombëtare, (4) marrjen përsipër të detyrimeve financiare nga ana e Republikës së Kosovës.

Mirëpo, pika 2 dhe 3 e këtij neni ia mundësojnë të parës së shtetit dekretimin e marrëveshjeve ndërkombëtare, pastaj duke njoftuar Kuvendin për një gjë të tillë. Pika 2 e nenit 18, thotë se marrëveshjet ndërkombëtare me përjashtim të atyre në pikën 1, ratifikohen pas nënshkrimit nga Presidenti i Republikës së Kosovës, ndërsa, pika 3 e po këtij neni, thotë se Presidenti i Republikës së Kosovës ose Kryeministri njoftojnë Kuvendin sa herë që të nënshkruhet një marrëveshje ndërkombëtare../zeri/

Në Mamushë një person ka kanosur me armë zjarri një tjetër pas një mosmarrëveshje rreth një kontesti pronësor.

Policia e Kosovës njofton se i dyshuari është arrestuar dhe nga ai është konfiskuar arma e llojit EKOL Special 99 cal. 9.9 mm, raporton PrizrenPress.

Me vendim të prokurorit pas intervistimit i dyshuari është dërguar në mbajtje. /PrizrenPress.com/

Tri subjektet opozitare, VV, AAK dhe Nisma kanë thënë se do të vazhdojnë me protesta, duke kërkuar rrëzimin e Qeverisë dhe shpalljen e zgjedhjeve të parakohshme në vend.

Megjithatë, sipas tyre, vendimi për protestat e reja do të merret gjatë javës së ardhshme.

Adonis Tahiri, nga Lëvizja “Vetëvendosje”, ka deklaruar për “Zëri” se protestat do të zhvillohen brenda dhe jashtë Kuvendit të Kosovës, pasi që, sipas tij, marrëveshjet e arritura me Serbinë dhe Malin e Zi nuk mund të gjejnë zbatim në Kosovë.

“Protestat tona do të vazhdojnë brenda dhe jashtë institucioneve. Numri i të pakënaqurve në Kosovë po rritet vazhdimisht dhe paralel me të edhe numri i atyre që janë të gatshëm të protestojnë deri në largimin e këtyre pushtetarëve”, ka thënë Tahiri.

I pyetur se kur do të vazhdojnë me protestën e radhës, Tahiri thotë se opozita e bashkuar do të koordinohet për këtë çështje.

“Jemi në organizim e sipër dhe për format e ndryshme kreative të protestës, ashtu që të shtohet edhe më tutje presioni mbi pushtetarët. Ne po punojmë vazhdimisht në terren dhe po organizohemi ashtu që kundërshtimi ynë të jetë edhe më i fuqishëm dhe të rezultojë sa më shpejt me largimin e kësaj Qeverie dhe me shpalljen e zgjedhjeve të reja”, ka thënë Tahiri, duke shtuar se zgjedhja e Thaçit president nuk ka legjitimitet.

Aleanca për Ardhmërinë e Kosovës pritet që javën e ardhshme të marrë vendim rreth daljes apo jo në protesta. Deputeti i kësaj partie, Lahi Brahimaj, ka konfirmuar se të hënën pritet të dalë me qëndrim partia e Haradinajt. /Zëri/

Pas zgjedhjes së Hashim Thaçit në postin e Presidentit të Republikës së Kosovës, analistët politikë konsiderojnë se është krijuar një situatë e re e cila mund të ndikojë në agresivitetin e partive politike opozitare, por ka edhe elemente që mund të ndikojnë në ridizajnimin e kërkesave të tyre politike.

Driton Selmanaj, analist nga Instituti Demokratik i Kosovës, thotë për Radion Evropa e Lirë se tani mund të ketë një qasje më agresive të Opozitës.

“Kauzat që ato kanë ngritur për 5 muaj dhe së fundmi të artikuluar edhe me qartësisht me (kauzën kundër) të presidentit, dolën të pasuksesshme. Sidomos rasti i fundit. Kjo ndjenjë e betejës së humbur mund ta rrisë agresivitetin e tyre në veprime politike. Kjo i bie që mund të tensionohet skena politike. Mund të kemi qasje më agresive të opozitës karshi pushtetit. Kjo mund të ketë element tjetër, i cili mund të ndikojë ndoshta në rishikimin e pozicioneve politike që i kanë partitë politike opozitare karshi situatës”, thotë Selmanaj.

Edhe analisti politik, Imer Mushkolaj, thotë se situata politike mund të rrëshqasë edhe më shumë drejt një krize me zgjedhjen e Presidentit të ri.

“Konsideroj se opozita do të vazhdojë që të mos e njohë zotin Thaçi si president të vendit dhe natyrisht në një krizë të tillë politike, marrë parasysh këtu edhe paralajmërimet e opozitës se do të vazhdojë me veprimet e veta parlamentare demokratike, siç i quajnë, dhe të tjera, unë besoj se kriza vetëm sa do të vijë duke u thelluar”, thekson Mushkolaj.

Mushkolaj konsideron se të dy taborët politikë, si të partive të koalicionit qeverisë, por edhe të atyre në opozitë, duhet të mendojnë për një qasje të re për dalje nga gjendja e krijuar.

“Nuk e besoj se [opozita] do të vazhdojë ashtu siç ka vazhduar deri tash, pasi që tash ka një situatë të re. Ka një momentum të ri politik që besoj se kërkon një qasje të re nga të gjitha palët”, vlerëson Mushkolaj.

Ndërkaq, Selmanaj thotë se nëse ka ekzistuar një mundësi e vogël për të bashkuar liderët politikë dhe për të gjetur një zgjidhje për krizën, ka qenë dera e hapur në Presidencë.

Por, tash, sipas tij, edhe ajo mundësi me zgjedhjen e Hashim Thaçit president, është mbyllur.

“Krejt kjo krizë politike vjen si rezultat i rolit politik që ky protagonist ka pasur. Demarkacioni është nënshkruar nga zoti Thaçi. Çështja e asociacionit është negociuar për dy, tre vjet nga zoti Thaçi.

Keq-qeverisja në Kosovë është sinonim i zotit Thaçi dhe tash është vështirësuar jashtëzakonisht shumë qasja e opozitës te ky institucion. Unë mendoj se tash mund të kemi një rol më pro-aktiv të faktorit ndërkombëtar”, thekson Selamanaj.

Liderët e opozitës, Lëvizja Vetëvendosje, Aleanca për Ardhmërinë e Kosovës dhe Nisma për Kosovën, kanë theksuar se Hashim Thaçi, i cili në seancën e së premtes të Kuvendit të Kosovës është zgjedhur për president të ri të Kosovës, “nuk mund të jetë president i Republikës”.

Mungesa e reflektimit nga ana e liderëve të partive më të mëdha politike në Kosovë, për gjetjen e një zgjidhjeje politike rreth gjendjes së krijuar, sipas analistëve politikë, dëshmon se tash për tash, në skenën politike kosovare, nuk ka ndonjë ide se si të dilet nga kriza.

Partitë politike të opozitës e kanë kundërshtuar gjatë zgjedhjen e Hashim Thaçit president.

Ato vazhdojnë ta kundërshtojnë marrëveshjen ndërmjet Kosovë?s dhe Serbisë? në? Bruksel, të arritur më 25 gusht, për krijimin e Asociacionit të komunave me shumicë serbe, dhe atë të shënjimit të vijës kufitare me Malin e Zi. /REL/