Kryetari i Lëvizjes Vetëvendosje, Visar Ymeri, në një konferencë për media të thirrur pas ngjarjeve të djeshme kur Policia arrestoi Albin Kurtin, ka thënë se manifestimi i djeshëm ishte madhështor ku morën pjesë mbi 35 mijë qytetarë. Duke folur për aksionin e Policisë në zyrat e VV-së, ai tha se gjatë asaj kohe, askush nuk ka qenë brenda ndërtesës.

“Ai manifestim e frikësoi pushtetin. Marrëveshjet kriminale me Serbi e me Mal të Zi, dje e panë fundin e tyre dhe pushteti e përdori policinë. Pushteti tregoi që është jo vetëm shtet policor, por pushtet policor. Veprimet te zyrat e Vetëvendosjes kanë simbole të shtetit autoritar që po shkon në diktaturë. Asnjë dokument nuk kanë pasur policia për bastisje”, ka thënë mes tjerash Ymeri, raporton Koha.net.

“Kur qeveria bëhet Polici, atëherë nuk mund të jetë e popullit sepse ajo po e dhunon popullin”, shtoi më tej kreu i VV-së.

Visar Ymeri deklaroi gjithashtu se as nesër nuk do të lejojnë mbarëvajtjen e seancës së Kuvendit të Kosovës, kurse për deputeten Albulena Haxhiu tha se nuk e di nëse do të paraqitet apo jo në seancë.

Duke folur për aksionin e Policisë në zyrat e VV-së, ai tha se gjatë asaj kohe, askush nuk ka qenë brenda ndërtesës.

“Nuk ka qenë askush brenda dhe askush nuk e di çka kanë gjet e çka kanë lënë brenda Policia”, ka potencuar kreu i VV-së, ndërsa ka shtuar se “kanë mundur të gjejnë bombola gazi”.

Ndërkaq, Driton Çaushi nga po kjo parti, tha se me pretekst për arrestimin e Kurtit, ndodhi bastisja edhe arrestimet tjera.

“Kemi identifikuar 83 persona të arrestuar. 12 nga ta po mbahen ende bashkë me Albinin. Në këtë aksion është përdorur sprej, shufra gome e plumba gome”, tha Çaushi, për të vazhduar: “Sami Kurteshi është lënduar, Gani Krasniqi, ish kryetari i Malishevës, Valdrin Ahmeti është rrahur rëndë tek policia, Frasher Krasniqi është qëlluar me plumba gome, Kushtrim Demaku, Qëndrim Sahiti, Luan Hoti, Agim Otijani, Kushtrim Cakolli, Labinot Halimi kanë probleme shëndetësore”.

Në fund, Ymeri tha se subjekti që ai përfaqëson do të zhvillojë një takim me opozitën në orën 17:00 dhe më pas do të dalin me një deklaratë të përbashkët.

Diplomati shqiptar, profesori i marrëdhënieve ndërkombëtare, Lisen Bashkurti, duke komentuar zhvillimet e fundit në Kosovë, ka bërë thirrje për vetëpërmbajtje.

Bashkurti përmes një postimi që ka bërë në profilin e tij në “Facebook” ka përsëritur se të dy marrëveshjet, ajo për Asociacionin komunave me shumicë serb dhe ajo për Demarkacionin me Malin e Zi janë të paqarta.

“Për shumë shekuj nëntorët kanë qenë muaj të përgjakur për popullin e Kosovës. Por ky nëntor i përgjakur ishte ndryshe. Ishte përgjakje midis vëllezërve. Vështirë të kuptohet përse po ndodh gjithë ky konfrontim midis liderëve politikë shqiptarë. Shkaku duket të jenë dy marrëveshjet e firmosura nga qeveria Mustafa-Thaçi. Marrëveshje të paqarta, të realizuara pa transparencë, pa përgjegjshmëri dhe pa gjithëpërfshirje. Opozita e paket në numrat e saj në parlament po përdorë energjitë e saj me mjete radikale e protesta popullore jashtëparlamentare. Midis dy palëve presidentja dështoi në zgjidhjen e krizës megjithë përpjekjet e dobëta të saj. Në qendër tanimë është vënë Gjykata Kushtetuese, gjykimi i së cilës pritet këto ditë mbi kushtetutshmërinë e marrëveshjeve”, ka shkruar Bashkurti.

Ai ka kritikuar për këtë situatë që është krijuar në Kosovë, veçanërisht për marrëveshjen e Asociacionit edhe shefen e politikës së jashtme të Bashkimit Evropian, Federica Mogherini.

“Shefja e diplomacisë së dobët të BE-së, Mogherini qëndron pasive ndaj një situate që është bashkëpërgjegjëse, pasi është ndërmjetësuesja dhe garantuesja e marrëveshjeve Kosovë-Serbi”, ka deklaruar ai.

Për krizën politike në Kosovë, diplomati Bashkurti ka kritikuar edhe Tiranën.

“Tirana zyrtare hesht, sikur kriza në Kosovë të mos jetë fare agjendë alarmante edhe për të. E papranueshme. Qëndrim i qartë antikushtetues”, është shprehur Bashkurti.

Bashkurti ka thënë se më 2 dhjetor vjen në Kosovë shefi i diplomacisë së ShBA-ve dhe sipas tij, qëndrimi i ShBA-ve duket të jetë përcaktues në gjetjen e zgjidhjes së krizës në Kosovë.

Bashkurti ka kundërshtuar arrestimin e Albin Kurtit.

“A duhet që lideri simbolik dhe karizmatik i opozitës, Albin Kurti të arrestohej!? Mendoj se nuk duhej bërë ky veprim. Duket qartazi se drejtuesit e Qeverisë Mustafa-Thaçi dhe drejtuesi jogjithëpërfshirës i parlamentit kanë rënë në panik, në nervozizëm dhe qëndrojnë në prapavijë të urdhrave të prokurorisë dhe veprimeve të policisë. Vetëpërmbahuni vëllezër! Jemi një Atdhe, një popull, një histori, një gjuhë, një interes dhe një ardhmëri! Vërtetë jemi në demokraci pluraliste, por në anarki konfrontuese. Kemi kaq shume sfida ndërkombëtare, saqë vetëm me një sinergji të brendshme të fuqishme do të mund t’i përballojmë”, ka thënë Bashkurti.

Ai ka kërkuar që të lirohet Kurti, presidentja ta luajë rolin e saj kushtetues, Mustafa e Thaci të vetëpërmbahen, kurse kryetari i Kuvendit, Kadri Veseli të mbajë ekuilibër gjithëpërfshirës.

“Jam prej vitesh diplomat dhe studiues i marrëdhënieve ndërkombëtare. E them me sinqeritetin me të madh se do e kisha tejet të vështirë, mos të pamundur që ta arsyetoja përpara faktorit ndërkombëtar këtë situate politike në Kosovë. Lirojeni Albinin! Presidente luaj rolin tënd kushtetues! Mustafa-Thaçi vetëpërmbahuni!

Drejtuesi i Parlamentit mbaj ekuilibër e gjithëpërfshirje! Jemi vëllezër, kemi një Atdhe, një popull, një interes dhe një aspiratë! Vetëpërmbajtje vëllezër!”, ka porositur diplomati shqiptar Lisen Bashkurti.

Një numër i aktivistëve dhe zyrtarëve të arrestuar të Lëvizjes Vetëvendosje, janë liruar mbrëmë në orët e vona.

Në mesin e të liruarve janë edhe zyrtarët Ylli Hoxha, Frashër Krasniqi e Adonis Tahiri.

Në komunikimin që ka bërë në Facebook mbrëmë, Ylli Hoxha ka thënë se 10 aktivistë janë lënë në mbajtje, duke lënë të kuptohet se të tjerët janë liruar.

Gjatë ditës së djeshme, Policia tha se ka arrestuar 95 aktivistë të kësaj partie, përfshirë edhe deputetin Albin Kurti, të cilit i është caktuar masa 30 ditëshe e paraburgimit.