Menjëherë pas sulmeve të cilësuara si terroriste në Paris, të premtën mbrëma, ka reaguar përmes një konference për media nga Shtëpia e Bardhë, Presidenti i Shteteve të Bashkuara, Barack Obama.

“Sulmet në Paris janë një përpjekje nga njerëz të egër për të terrorizuar civilë të pafajshëm. Shtetet e Bashkuara do të qëndrojnë përherë në krah të Francës në luftën kundër terrorizmit dhe ekstremizmit dhe do të bëjnë gjithçka mundet për të dërguar terroristët përpara drejtësisë”, është shprehur Obama në fjalimin e tij.

Obama ka thënë se nuk dëshiron të spekulojë në lidhje me autorët e këtyre sulmeve në Paris, por ka njoftuar se në mënyrë urgjente edhe autoritetet amerikane kanë përshkallëzuar masat e sigurisë kryesisht në mjetet e transportit publik dhe infrastrukturën më të rëndësishme në vend, ashtu sikurse edhe shfaqjet publike, për shkak të ngjarjeve të fundit në Paris.

Një zyrtar amerikan tha se agjencitë amerikane janë duke monitoruar çdo event publik, si dhe ambasaën amerikane në Paris, ndërkohë që edhe Sekretari John Kerry është duke monitoruar situatën mbi identifikimin e mundshëm të ndonjë shtetasi amerikan mes viktimave.

Shteti Islamik (ISIS) ka marrë përgjegjësinë e sulmeve të mbrëmshme në Paris, nga të cilat humbën jetën 127 njerëz, shkruan Reuters.

Nëpërmes një komunikate zyrtare, grupi militant i ISIS-it ka thënë se ishin sulme vetëvrasëse me bomba të lidhura në trup dhe armë automatike, të organizuara në disa pjesë të qytetit, që janë sulmuar me kujdes.

Reagime për këtë tragjedi ka pasur edhe nga autoritetet shqiptare. Presidenti i Republikës Bujar Nishani, u shprehu në emër të popullit shqiptar ngushëllimet më të ndjera e të sinqerta familjarëve të viktimave, presidentit Hollond, popullit dhe Qeverisë franceze.

“Të lënduarve i uroj shërim sa më të shpejtë”, thotë Nishani. Ai denon me forcën më të madhe aktet barbare terroriste dhe ekstremiste që synojnë të trembin dhe terrorizojnë, jo vetëm Francën dhe francezët, por mbarë botën e qytetëruar dhe demokratike.

Presidenti mësohet se ka thirrur në takim mëngjesin e sotëm kreun e SHISH Visho Ajazi Lika, në të cilin mendohet se është diskutuar për rrezikun terrorist dhe masat e sigurisë në Shqipëri, pas sulmeve terroriste në Francë.

Kryeministri shqiptar Edi Rama i konsideroi luftë të vërtetë sulmet terroriste në Paris dhe shpreu mbështetjen e Shqipërisë ndaj Francës e qeverisë së saj në këto momente horrori dhe zie.

“Rroftë Franca”, shkruan Rama.

Kryetari i Kuvendit Ilir Meta dërgoi një mesazh ngushëllimi e solidariteti kryetarëve të Parlamentit dhe senatit francez, duke u shprehur i shokuar nga sulmet terroriste në Paris.

“Jemi të gjithë krah jush në këto momente kritike për të mbrojtur vlerat universale e demokratike që na bashkojnë. Terroristët nuk mund të cenojnë lirinë dhe vlerat e shoqërisë franceze”, shkruan Meta, teksa thekson se qëndrojmë pranë aleatëve në luftën e pandalshme kundër terrorizmit.

Kurse kryetari i opozitës shqiptare Lulzim Basha u shpreh se mbarë shqiptarët ndoqën të tronditur e me pikëllim të thellë pasojat tragjike të akteve të çmendura terroriste në Paris. Ai shpreh ngushëllimet për familjet e viktimave te pafajshme të masakrës barbare.

“Mendimet dhe lutjet tona janë me familjet e viktimave dhe mbarë popullin francez”, shkruan Basha.

Presidenti francez, François Hollande është shprehur se ngjarja e mbrëmshme është “akt lufte” e organizuar nga Shteti Islamik.

Hollande mbrëmë menjëherë pas ngjarjes ka vizituar hallën e koncerteve Bataclanin, ku ndodhi njëri prej sulmeve më të makabre duke thënë se Franca do të jetë e pamëshirshme në gjurmimin e terroristëve.

“Për të gjithë ata që kanë parë këto gjëra të tmerrshme dua të them se do të fillojmë një luftë të pamëshirshme”.

“Sepse kur terroristët janë të gatshëm për tmerre të këtilla, ata duhet ta kenë të qartë se do të përballen me një Francë të përkushtuar, të bashkuar, një Francë që është unike dhe nuk lejon që të luhet me të, paçka se sot jemi të trishtuar”.

“Në këto kohë kaq të rënda dhe të paqarta bëj thirrje për unitet dhe kurajo”, tha ai para se të shtonte se do t’i drejtohet parlamentit francez të hënën.

“Edhe pas këtyre plagëve, Franca do të ngrihet prapë”.