Sekretari i Lëvizjes Vetëvendosje, Dardan Molliqaj i ka quajtur të pangopur për poste Isa Mustafën dhe Ramush Haradinajn.

Sipas një deklarate të shpërndarë në Facebook, Molliqaj citohet të ketë thënë se strukturat e AAK dhe LDK’së nuk duhet lejuar liderët e tyre për të marrë pozita shtetërore.

“Strukturat dhe anëtarësia e këtyre subjekteve duhet të luajnë një rol kyç sepse udhëheqësit e tyre po i përdorin ata për t’i arsyetuar veprimet e veta të pangopshme për poste. Kam menduar edhe më parë që këta janë të uritur për poste, por me këto lëvizje janë treguar të pangopshëm”, ka thënë Molliqaj.

Lexojeni të plotë deklaratën

Lidhja Demokratike e Kosovës dhe Aleanca për Ardhmërinë e Kosovës kur e kanë bërë marrëveshjen e 10 qershorit për ndarje postesh, nga ngutia nuk kanë pasur as kohë që të konsultohen as struktura dhe as anëtarësia. Tash, udhëheqësit e këtyre subjekteve po i përdorin strukturat për të arsyeturar insistimin për ndarje postesh.

Strukturat dhe anëtarësia në LDK dhe kritikët jashtë saj, me të drejtë kërkojnë prej LDK-së që të mos shkohet assesi me PDK-në në qeverisje, sepse ne e dimë shumë mirë se çfarë i ndodh vendit kur udhëheq PDK-ja. Ne nuk kemi hyrë në këtë bashkëpunim për shkaqe postesh e as nga besimi i partnerëve të Bllokut LAN, ne jemi pjesë e këtij bashkëpunimi për t’i dhënë një kahje dhe alternativë tjetër qeverisjes. Strukturat dhe anëtarësia e këtyre subjekteve duhet të luajnë një rol kyç sepse udhëheqësit e tyre po i përdorin ata për t’i arsyetuar veprimet e veta të pangopshme për poste. Kam menduar edhe më parë që këta janë të uritur për poste, por me këto lëvizje janë treguar të pangopshëm.

Aleanca për Ardhmërinë e Kosovës përfundimisht ka konfirmuar se i ashtuquajturi Bllok tashmë është prishur.

Kjo parti më nuk dëshiron as të bisedojë për një koalicion me Partinë e Isa Mustafës.

Sipas Zëdhënësit të AAK’së, Ernest Luma, AAK ka vendosur përfundimisht të mos ketë kurrfarë bashkëpunimi me partinë joserioze LDK.

“Ju e dini që Kosova proceset në të cilat jemi dhe të cilat na presim, dhe situate që po kalojnë kërkojnë në radhë të parë formim shumë të shpejt të institucioneve.Duke mos humbur kohë dhe duke mos ndërtuar bashkëpunime mbi parimet të pasigurta dhe të hamendura sikurse është dëshmuar me Lidhjen Demokratike të Kosovës. Pra nuk e përjashtojmë asnjë variant. I vetmi variant i përjashtuar është bashkëpunimi më tutje me LDK-në pas joseriozitetit që e dëshmoi ditëve të fundit”, ka deklaruar Zëdhënësi i AAK’së, Ernest Luma për “Zërin”.

Nënkryetari i Aleancës për Ardhmërinë e Kosovës, Ahmeti Isufi, ka thënë në emisionin “Info- Box” të Radio Dukagjinit, se Lidhja Demokratike e Kosovës (LDK), do ta paguaj çmimin për prishje të njëanshme të marrëveshjes së 10 qershorit, në mes të partive të Bllokut LAN, në të cilën parashihet që i pari i AAK-së të udhëheq me qeverinë e Kosovës.

Ai ka thënë se partisë së Mustafës do t’i kthehet bumerang prishja e marrëveshjes, dhe këtë ndëshkim sipas tij, do ta merr nga elektorati dhe politika.

“Ata e bënë veprimin i cili normalisht është në kundërshtim me marrëveshjen e 10 qershorit, veprim i cili e ka epitetin e vet. Ne konsiderojmë se çdo kush që luan nga marrëveshja dhe bën veprime dyfytyrshme, e paguan çmimin e vet”, ka thënë Isufi,.

Ai ka theksuar se kur është arritur marrëveshja në mes Bllokut LAN, ka qenë me pëlqimin e liderëve të partisë dhe nuk janë pyetur strukturat e tjera të partisë (degët), e që tash sipas tij, po ndodh një gjë e tillë, pas gjashtë muajve maltretim të qytetarëve të vendit.

“Veprimi i LDK-së është një mashtrim, sepse bazohet në mosgatishmëri për të plotësuar atë që është interes i qytetarëve”, ka deklaruar Isufi, duke shtuar se do të vazhdojnë të komunikojnë me të gjitha partitë politike, brenda Bllokut , përjashtuar LDK-në, që janë të gatshme për të formuar institucionet e Kosovës.

Ndërsa i pyetur sa a janë në biseda me zyrtarët e Partisë Demokratik të Kosovës (PDK), ai ka mohuar një gjë të tillë, duke theksuar se fillimisht diskutimet do të jenë në nivel të partive të Bllokut, pastaj do të shihen edhe mundësitë tjera.

Ambasadori i Britanisë së Bashkuar në Kosovë, Ian Cliff ka theksuar se nuk i takon atij që të komentojë për këtë çështje sepse në fakt nuk është në interesin e ndërkombëtarëve që të ndërhyjnë në marrëdhëniet ndërmjet partive.

“Ajo që është e rëndësishme e për të cilën unë kam folur shumë, është fakti se partitë e bllokut tashmë janë pajtuar që ta votojnë të nominuarin e PDK-së për kryeparlamentar. Thënë këtë, nuk ka më asnjë arsye që të vonohet vazhdimi i seancës konstituive. Ajo duhet të mbahet sa më shpejt në mënyrë që të kemi parlament të konstituuar dhe pastaj të vazhdojnë përpjekjet e partive për të bërë qeverinë. Cila parti e bënë këtë neve nuk na takon që të përzihemi. Në fakt ne nuk na interesojnë zhvillimet ndërmjet PDK-së, LDK-së, AAK-së, Vetëvendosjes ose Nismës. Institucionet duhet sa më shpejt të formohen për të vazhduar me dialogun dhe integrimet evropiane”, ka thënë Cliff për Radio Dukagjinin.

Ndërkaq në pyetjen nëse Kosova ka nevojë për një qeveri gjithëpërfshirëse, Cliff ka thënë se Qeveria e kaluar nuk e ka pasur fare shumicën e fuqishme në Kuvend dhe gjithmonë ka nevojë për qeveri të fuqishme.
Megjithatë, ai nuk ka dashur të komentojë më tej rreth kësaj çështje.

“I takon PDK-së, LDK-së, Bllokut që të vendosin se kush do të jetë kryeministër se si do të duket qeveria, se si do të duket koalicioni. Neve si komunitet ndërkombëtar nuk na takon që të ndërhyjmë”, ka shtuar ambasadori Cliff.

Drejtori i Agjencisë Kundër Korrupsionit (AKK), Hasan Preteni, ka thënë se për korrupsion deri më tani janë ushtruar mbi 500 kallëzime penale, me përfshirjen e më shumë se 1 300 zyrtarëve të niveleve të ndryshme.

Preteni ka treguar se shumica e kallëzimeve penale janë pranuar nga prokuroritë, ka pasur ngritje aktakuzash, por jo edhe gjykime.

“Kemi ushtruar më shumë se 500 kallëzime penale me përfshirjen e më shumë se 1 300 zyrtarëve të niveleve të ndryshme. Shumica e kallëzimeve penale janë pranuar nga prokuroritë dhe të njëjtat kanë vazhduar me hetime penale, ka ngritje aktakuzash, por gjykime ende”, ka thënë Preteni në këtë intervistë për “Epokën e re”.

Ai ka bërë me dije se në mesin e një mijë e treqind personave të dyshuar për korrupsion ka zyrtarë të niveleve të ndryshme nga të gjitha institucionet por, sipas AKK-së, ligji pamundëson publikimin e emrave të tyre.

“Po, pohoj edhe një herë, se në mesin e atyre 1 300 emrave të zyrtarëve të lartë, ka zyrtarë të niveleve të ndryshme nga të gjitha institucionet: qendrore, lokale, gjyqësore, të pavarura dhe të tjera. Emrat ne i dërgojmë në prokurori, është obligim ligjor i Agjencisë Kundër Korrupsionit të mos i publikojë emrat e personave të dyshuar”, është shprehur Preteni, duke mohuar të ketë presion apo ndërhyrje mbi AKK-në. “Në Kosovë nuk është rrezik të luftosh të keqen. Është rrezik nëse je pjesë e së keqes”, ka theksuar ai.

Në banesat e “Ben-af-it” në qendër të Suharekës, pronari i banesës rastësisht në korridor takon një të panjohur që në dorë mbante çantën e bashkëshortes së pronarit të banesës.

Në ato momente i njëjti kishte vërejtur se dera e banesës ishte thyer dhe pa humbur kohë e thërret policinë në ndihmë, ndërkaq, vet, i vihet pas të dyshuarit.

Mirëpo i dyshuari, me gjasë nuk kishte qenë vetëm por edhe me dy të tjerë të cilët gjatë ikjes ndahen në tri drejtime. I dyshuari për vjedhje më në fund e hedh çantën në një kopsht dhe vet fshihet në një oborr.

Ndërkohë, policia kishte rrethuar zonën dhe një polic në rroba civile e kishte pritur të dyshuarin që të vijë ta marrë çantën gjë e cila pas pak kishte ndodhur.

I dyshuari kishte qenë i shkathët dhe agresiv dhe për arrestimin e tij, me informacione ndihmë kanë ofruar edhe banorët e lagjes.

Me urdhër të prokurorit të shtetit, njofton Policia e Kosovës, i dyshuari, banor i Prishtinës, është ndaluar në masën e arrestit policor.

Më tej, në vazhdën e hetimit të rastit, është gjetur një veturë “Golf IV” e braktisur, me targa 03 me të cilën dyshohet se të dyshuarit kanë arritur në Suharekë.

Në vendin e ngjarjes janë sekuestruar vegla të ndryshme si: kaçavida; çelës kallauz; leva etj.

Gjësendet e vjedhura, kryesisht stoli të arta, në vlerë rreth 1100 euro, me urdhër të prokurorit të shtetit i janë kthyer pronares. Hetues policorë po punojnë për identifikimin dhe arrestimin edhe të dy të tjerëve. /PrizrenPress.com/

Veprimet e fundit të bllokut LAN tregojnë se qëllimi i tyre për gjashtë muaj të mos krijimit të institucioneve të vendit ka qenë thjeshtë apetit për ndarjen e pushtetit.

Parimet mbi të cilat u krijua blloku paszgjedhor për një qeverisje ndryshe nga e kaluara, kanë marrë kahje tjetër meqenëse dy nga partnerët e Bllokut LDK dhe AAK po e dëshirojnë postin e kryeministrit.

Fisnik Korenica nga grupi për studime juridike dhe politike tha se veprimet e tyre të fundit dëshmojnë se qëllimi i tyre është pushteti.

“Veprimet e fundit të bllokut VLAN tregojnë qëllimin e tyre i vërtet që paskan pasur në këta muajt e fundit dhe që është thjeshtë vetëm marrja dhe ndarja e pushtetit dhe jo ndryshimi i modelit qeverisës të cilin e proklamuan me aq shumë bujë . vlerësojë që një model i tillë i tregimit të skories së tyre të vërtet përbën pjesën më të padinjitetshme të një eksperience që i ka humbur Kosovës 6 muaj dhe të një procesi të cilin kriza politike i ka kushtuar Kosovës jo vetëm në kuptimin e një destabiliteti institucional po gjithashtu edhe të një precedenti shumë të dëmshëm që mund të na përsëritet edhe viteve tjera elektorale . prandaj besoj që një mënyrë e tillë e kalkulimit e bërë nga ana e bllokut LAN nuk është treguar si asgjë tjetër po i një klime tërësisht të padinjitshme dhe të një lidershipi të papërgjegjshëm që të gjitha kalkulimet për politik në fakt i bëjnë për ndarje të pushtetit dhe asgjë më shumë”, tha Korenica, transmeton RTK.

Korenica thotë se cili do subjekt që lidh koalicion me PDK-në do të reflektojë në humbje të elektoratit.

“Prishja e bllokut tash është një fakt i pakontestueshëm. Dy partnerët si LDK ashtu edhe AAK e kanë shprehur haptas dëshirën e tyre për të qenë pjesë e një qeverie me PDK-ë , cila do qoftë besojë se do të ketë një minus të madh në elektoratin e tyre, për faktin që na paskam proklamuar qe gjashtë muaj një gjë të rrejshme dhe që ka qenë qëllimi i tyre kinse po e bëjnë një gjë të tillë për ta ndryshuar modelin qeverisës dhe jo për ti kënaqur karriget e tyre me pushtet. Cili do subjekt që do të shkojë me PDK-në ne qeverisje do të marr një minus të madh në elektoratin e saj”.

Ai thotë se në këtë kohë, partitë është dashur të fokusohen me tepër në mbajtjen e seancës konstituive për krijimin e institucioneve të vendit, ani pse moskrijimi i tyre i faturohet tërë skenës politike në vend.

Ndërkohë që Isa Mustafa po bën përpjekjet e fundit për t’ia dhënë goditjen vdekjeprurëse Bllokut Opozitar përmes disa lojërave të vogla në Këshillin e Përgjithshëm të LDK’së, ish-partnerët e tij kanë marrë masa konkrete për ta shtyrë atë drejt opozitës.

Kreu i LDK’së tentoi këto ditë t’i nxjerrë në Opozitë AAK’në, Vetëvendosjen dhe Nismën, duke bërë një marrëveshje me PDK’në. Për ta arritur këtë, ai sot planifikon “ta marrë përkrahjen” e Këshillit të Përgjithshëm të partisë së tij.

Por kjo lojë është deshifruar nga partnerët e tij.

Burime të Gazetës Express thonë se tashmë kanë filluar negociatat për dizajnimin e koalicionit të ardhshëm qeverisës mes PDK’së, AAK’së dhe Nismës.

“Blerim Shala, në emër të AAK’së dhe Nismës, tashmë është duke biseduar me z.Thaçi për dizajnimin e Qeverisë së ardhshme”, ka thënë një zyrtar i AAK’së në kushte anonimiteti për Gazetën Express.

Ai ka rikonfirmuar qëndrimin e kësaj partie që Ramush Haradinaj të jetë Kryeministër i Qeverisë PDK-AAK-Nisma dhe Minoritetet.

Në anën tjetër, ky lajm është konfirmuar edhe nga zyrtarët e Nismës për Kosovën.

Blerim Shala, Nënkryetar i Parë i AAK’së, është njëherësh pjesë e negociatave të Qeverisë së Kosovës me Serbinë që po zhvillohen në Bruksel. Gjatë këtyre viteve, duket se ai ka ndërtuar raporte mjaftë të mira me Liderin e PDK’së, Hashim Thaçin.

Zyrtari i AAK’së që foli në kushte anonimiteti për Gazetën Express, tha se gjatë ditës do të definohen shumë çështje me PDK’në. Njëherësh, ai ka hedhur poshtë çdo mundësi për kthim prapa.

“Jo, jo… Me LDK’n ka marrë fund gjithçka”, ka thënë ai.

EULEX, nëpërmjet një opinioni ka kërkuar besimin e qytetarëve të Kosovës. Ky mision ka sqaruar arsyet pse qytetarët e Kosovës, duhet t’i besojnë.

“Gjatë tri javëve të kaluara keni lexuar në gazetat tuaja dhe keni parë në TV disa akuza lidhur me veprimet e disa prej pjesëtarëve të EULEX-it. Ne nuk jemi përgjigjur në secilën prej këtyre akuzave.

Megjithatë, më lejoni të jem shumë i qartë: EULEX-i i merr pohimet seriozisht. Ne kemi politikë të zero tolerancës ndaj korrupsionit dhe unë e konfirmoj përkushtimin tim personal që ta zbatojë këtë politikë në mënyrë konsekuente.

Unë besoj që populli i Kosovës meriton t’i dijë veprimet të cilat i ka ndërmarrë EULEX-i tashmë në lidhje me pohimet e fundit kundër disa prej pjesëtarëve të tij. Nuk i kemi injoruar pohimet. Pohimet e publikuara në media janë shqyrtuar dhe janë duke u shqyrtuar plotësisht.

Pas informatave për korrupsion të mundshëm dhe duke qenë të vendosur t’i zbardhim të gjitha pohimet, shumë muaj më parë u formua një e ashtuquajtur task forcë për kryerjen e hetimeve gjyqësore, e përbërë nga një ekip i përzier i Kosovës-EULEX-it, i përbërë nga prokurorë dhe hetues policorë, shumë kohë para publikimit të këtyre pohimeve. Me fjalë të tjera, çështja është çuar përpara.

Pra, në lidhje me këto pohime, hetimi gjyqësor është në vazhdim e sipër. BE-ja është pajtuar që pjesërisht ta heqë imunitetin e një personi në mënyrë që ta mundësojë përparimin e këtij hetimi. Kjo është dëshmi e seriozitetit me të cilin është duke u çuar përpara kjo çështje. Ky proces i heqjes së pjesshme të imunitetit ka nisur këtë verë dhe ka përfunduar para publikimit të pohimeve.

Të gjithë kemi dëshirë që rezultatet të jenë të dukshme më shpejt. E vërteta është që hetimet e tilla janë komplekse dhe të vështira dhe duhet kohë që të hetohen të gjitha pistat. Por hetuesit janë duke bërë përpjekje t’i vlerësojnë faktet. Është po ashtu e vërtetë që hetimet dhe kërkimi i të dhënave nuk i publikojnë procedurat e tyre, të cilat janë në vazhdim e sipër, në forumet publike – hetimet nuk zhvillohen në publik. Njëri prej parimeve kryesore në procedurat e tilla është parimi i konfidencialitetit. Ky parim nuk i mbron vetëm dëshmitarët e mundshëm dhe personin i cili i ka bërë pohimet, por i mbron po ashtu edhe ata që prezumohen të pafajshëm deri sa të vërtetohet ndryshe, reputacioni i të cilëve mund të dëmtohet në mënyrë të konsiderueshme nga pohimet e tilla.

Të jeni të sigurt që kur të përfundojnë hetimet, EULEX-i nuk do t’iu bëjë bisht obligimeve të tij për të ndjekur çfarëdo veprimesh gjyqësore, të cilat përcaktohen nga hetimet si të përshtatshme dhe të domosdoshme. Të gjitha gjërat që i presim nga të tjerët, i zbatojmë edhe për vete.

Nëse, në të ardhmen, këto pohime vërtetohen si të pabazuara, pres që mediat të raportojnë për këtë, në mënyrën e njëjtë siç kanë vepruar gjatë raportimit për këto pohime.

Përveç hetimit gjyqësor, i cili është në vazhdim e sipër, unë po ashtu kam udhëtuar në Bruksel. I kam diskutuar hapat e mëtejshëm me Përfaqësuesen e re të Lartë Federica Mogherini, e cila javën e kaluar e ka emëruar z. Jean Paul Jacqué si ekspert ligjor të pavarur dhe me përvojë, për ta kryer një shqyrtim të zbatimit të mandatit duke u përqendruar në marrjen me pohimet për korrupsion. Siç kam thënë kur u emërua ai, unë e mirëpres shqyrtimin e mëtejshëm të marrjes me pohimet.

Në këtë çast, do të doja ta lavdërojë punën e të gjithë atyre të cilët, sikurse ne, luftojnë shumë, për çdo ditë, në të mirë të drejtësisë. Gazetarët janë pjesë e këtij grupi dhe e meritojnë respektin tonë maksimal. Si Misioni, ashtu edhe mediat përpiqen t’i mbajnë përgjegjës ata, që e rrezikojnë Kosovën përmes krimit dhe korrupsionit. Jemi në anën e njëjtë.

EULEX-i erdhi në Kosovë ta mbështesë Kosovën në ndërtimin e institucioneve të qëndrueshme dhe të përgjegjshme për sundimin e ligjit, të lira nga ndërhyrja politike. Për arritjen e këtyre objektivave, prej fillimit të tij afërsisht 10.000 ekspertë kanë punuar në EULEX, krahë për krahë me homologët e Kosovës.

EULEX-i ka mekanizma standard për t’u marrë me pohimet për aktivitetet kriminale nga pjesëtarët e tij. Së pari, pjesëtarët e stafit janë të obliguar t’i respektojnë ligjet e zbatueshme në Kosovë. Së dyti, Kodi ynë i sjelljes kërkon nga të punësuarit që ta raportojnë aktivitetin e dyshuar kriminal (për shembull korrupsionin) dhe ekzistojnë mekanizma që ata ta bëjnë këtë, madje nëse dëshirojnë edhe në mënyrë anonime. Ne nuk i fusim pohimet për aktivitete kriminale nën qilim. Së treti, nëse ekzistojnë informata të besueshme, që një i punësuar mund të ketë qenë i përfshirë në një akt të mundshëm penal, Misioni i ndërmerr hapat e nevojshëm ligjor për të siguruar që krimet e mundshme hetohen dhe gjykohen.

Si Shef i Misionit, jam i përkushtuar të sigurojë që Misioni EULEX dhe stafi i tij vazhdojnë t’i respektojnë standardet më të larta. Unë nuk toleroj aktivitet kriminal në mesin e EULEX-it, pavarësisht nga pozita apo nacionaliteti, por po ashtu nuk do ta shpërfilli prezumimin e pafajësisë dhe detyrën për t’i mbrojtur njerëzit e pafajshëm nga pohimet që mund të çojnë tek një qasje më e dobët ndaj korrupsionit jashtë EULEX-it. Kam besim të plotë në integritetin dhe profesionalizmin e stafit tim. Profesionistë të përkushtuar në kuadër të EULEX-it punojnë çdo ditë me institucionet e Kosovës dhe dyshimet që janë hedhur nga këto pohime nuk duhet të na shpërqendrojnë nga përgjegjësitë tona thelbësore dhe nga përpjekjet e përbashkëta për ndërtimin e sundimit të ligjit në Kosovë”, thekson EULEX.