Presidentja Jahjaga, në intervistën ekskluzive dhe krejt ndryshe nga herat tjera për Indeksonline, e kujton me mall kur e ka përgatitur një darkë të shijshme për vetën dhe zotëriun e parë të Kosovës, , Astritin…dhe për shumçka tjetër. Kjo intervistë është realizuar ekskluzivisht për revistën javore “Indeks Paper”, produkt i Indeksonline, dhe që jepet falas në Aeroportin e Prishtinës.
-Një specialitet të përgatitur vet, mesiguri nga kuzhina aziatike, krahas muzikës dhe zërit të mrekullueshëm të Andrea Bocellit përbënë darkën e preferuar për Presidenten e Kosovës, Atifete Jahjaga dhe bashkëshortin e saj, Astritin.

Muzika klasike mund të zëvendësohej ndonjëherë edhe me këngë qytetare shqiptare, por temat e preferuara të kësaj darke të pëlqyer nuk është lehtë t’i zgjedhësh.
Ata mund të flasin për cështjet gjinore që vazhdojnë të mbesin sfidë e Kosovës, për takimet e shumta me burrështetas dhe udhëheqëse të rëndësishme botërore, apo ndoshta edhe thjeshtëstinë dhe njërzillëkun e aktorëve më të rëndësishëm të kinematografisë botërore, Brad Pitt, Angelina Jolie apo

Leonardo Di Caprio kur Zonja Jahjaga i ka takuar.
E gjitha kjo do të ishte gati perfekte sikur këtë darkë, çifti i parë i Kosovës të ketë vërtetë mundësi ta realizojë.

Sikur të jesh president i një shteti nuk është angazhim i mjaftueshëm, muajt e fundit për të parën e shtetit të Kosovës kanë qenë një sfidë e cila ka bërë që Zonja Atifete Jahjaga të harroj kur ka kaluar kohë të lirë me familjen apo miqtë e saj.

Indeksonile: Zonja Presidente, ju lutem na përshkruani ditën tuaj, nga mëngjesi deri në mbrëmje?

Jahjaga: Çdo ditë ka specifikat e saj dhe natyrisht dinamikën e punës. E zakonshmja e secilës ditë është agjenda e ngjeshur edhe e takimeve me delegacione të ndryshme, qoftë nga vendi qoftë edhe nga jashtë vendit, por edhe e konsultave në kabinet për çështjet jo vetëm ditore. Mbi të gjitha përfaqësimi I Kosovës në botë kërkon angazhime të mëdha dhe përgatitje sepse vendi ka nevojë për konsolidimin e tij ndërkombëtar. Në rrethanat në të cilat ndodhet Kosova sot është e natyrshme që dita të jetë e ngarkuar, qoftë duke analizuar gjithë gjendjen edhe të sigurisë edhe politike, qoftë duke u përgatitur për takime me politikanët e Kosovës dhe gjithashtu edhe duke zhvilluar takime me ta. Më e rëndësishmja për institucionin është bashkërendimi dhe bashkëveprimi institucional sepse kjo mundëson veprimin e shtetit dhe gjithsesi funksionimin demokratik të institucioneve. Dua të them se pushimet gjatë ditës janë të shkurtra, shumë shpesh edhe dreka me kabinetin tim shndërrohet në drekë pune kur duhet të analizohen veprime dhe kur duhet të merren edhe vendime. Gjithashtu orari I punës është I papërcaktuar. Ardhja herët në zyre dhe dalja shumë vonë nga zyra, sepse dinamika e punës është e madhe dhe obligimet janë gjithashtu të mëdha.

Indeksonline: A ka kohë Presidentja të merret me çështje familjare, biseda me shoqëri-a është Presidentja në gjendje të pranoj thirrje prej ndonjë shoqeje që ka dëshirë të bëj bisedë private me ju?

Jahjaga: Realisht kam harruar kur kam pasur kohë për familjen time dhe mos të përmend miqtë e mi. Unë kam kohë për familjen vetëm në përfundim të ditës së punës e që zakonisht është shumë vonë. Kafet e mia me miqtë ose me familjen janë rralluar së tepërmi, dhe bisedat e mia tani janë shndërruar në biseda pune. Por megjithatë çdo moment mundohem ta shfrytëzoj që të jem pranë familjes sime.

Indeksonline: Nëse keni dy apo tri orë të lira gjatë ditës, si preferoni t’i kaloni ato?

Jahjaga: E nisët mirë pyetjen me fjalën “nëse”. Dy ose tri orë të lira gjatë ditës mund t’ju them se janë të rralla. Ju thash se dinamika e punës është e madhe dhe unë shfrytëzoj çdo moment për përgatitje. Diskutimet në kabinet për çështje të ndryshme, përveç agjendës së ngjeshur, të takimeve të shpeshta, udhëtimeve jashtë vendit, që janë udhëtime pune, janë të domosdoshme për të analizuar veprime dhe për të marrë edhe vendime më pastaj. Në çdo periudhë të lirë të kohës, sado e shkurtër të jetë, shfrytëzoj rastin të lexoj. Kohët e fundit, zhvillimet politike me marrin kohë më tepër dhe gjithashtu edhe analizat politike dhe ligjore.

Indeksonline: A keni ndonjë ushqim të preferuar? Nëse po, cili është dhe a keni dëshirë më shumë që ta përgatisni vet apo t’ua bëj gati dikush tjetër?

Jahjaga: E preferoj më shumë përgatitjen në shtëpi se sa ushqimet jashtë. Dikur kam pasur më shumë kohë dhe jam marrë më shumë me kuzhinën, kurse sot koha më mungon. Më pëlqen kur bëj një darkë të mirë dhe kur së bashku më bashkëshortin tim, Astritin, e shijojmë atë. Them sërish se kam pak, shumë pak kohë, për shkak të angazhimeve të ditës, por megjithatë çdo minutë kur më jepet mundësia kam dëshirë të përgatis ushqime qoftë tradicionale ose të provoj diçka të re. Kuzhina aziatike më pëlqen shumë.

Indeksonline: Cilat janë vendet më të preferuara për t’i vizituar nëper Kosovë dhe cili vend që tashmë e keni vizituar iu ka lënë përshtypje më shumë, dhe pse?

Jahjaga: Ju e dini se unë jam me prejardhje nga Gjakova, por realisht kam kaluar më shumë kohë në Prishtinë. E dua çdo pjesë të Kosovës, dhe kam shëtitur pothuaj çdo pjesë të saj. Më pëlqen shumë posaçërisht pjesa malore e saj, sepse shpërfaq gjithë bukurinë e shtetit. Kosova është vendi me bukuri të rrallë natyrore dhe unë e pëlqej shumë ecjen në natyrë.

Indeksonline: Keni pasur jo pak takime jo vetëm me udhëheqës shtetesh, por edhe persona të njohur nga industri të ndryshme, përfshi edhe ata të filmit. A mund të ndani me ne ndonjë moment interesant nga këto takime?

Jahjaga: Po kam takuar burrështetas të shumtë, në takime qoftë bilaterale qoftë multilaterale. Kam pasur takime të veçanta me Presidentin Obama, dhe nuk e harroj takimin e parë në Varshavë të Polonisë, pak muaj pasi u zgjodha Presidente. Gjithashtu nuk e harroj asnjë minutë të takimeve të mia me sekretaren Hillary Clinton. Çdo takim me të ka një të veçante të veten dhe unë dua ta kujtoj vizitën e saj në Kosovë, dhe mbështetjen për popullin e Kosovës e kurajon për mua dhe punën time. Gjithashtu dua të kujtoj edhe takimin me kancelaren Merkel në Dubrovnik e presidentin francez, Hollande në Lubjanë. Natyrisht nëpër gjithë këtë periudhë kohore kam takuar edhe figura të tjera të larta të politikës, Joe Biden, që më ka dhënë mbështetjen e madhe. Po e vërtetë që kam takuar edhe Angelina Jolie, Brad Pitt, Meryl Streep, Leonardo di Caprio, emra të njohur të kinematografisë botërore. Ajo që më le përshtypje është thjeshtësia e tyre, respekti dhe njerzillëku.

Indeksonline: Cilin zhanër të muzikës e preferoni më shumë?

Jahjaga: Muzika qytetare shqiptare. Por dëgjoj edhe zhanre të tjera, muzikën popullore shqiptare atë që do ta quaja burimore. Dhe nga muzika e huaj më shumë atë klasike.

Indeksonline: A keni ndonjë këngëtar të preferuar?

Jahjaga: Ka shumë që pëlqej, të gjithë artistët e mirëfilltë shqiptarë. Por këngëtari që më pëlqen më shumë, nga muzika klasike, është Andrea Bocelli.

Indeksonline: Marrë parasysh se jeni Presidentja e parë femër në Kosovë dhe në përgjithësi në Ballkanin Perëndimor, a keni një mesazh të veçant për femrat?

Jahjaga: Do të ritheksoj thënien e mikeshës sime dhe të popullit të Kosovës, sekretares Clinton: “Të drejtat e gruas janë të drejtat e njeriut”. Dhe ne duhet të luftojmë që t’i shfrytëzojmë ato. Unë nuk dua ta ndajë shoqërinë në burra e gra, sepse shoqëria përbëhet nga gratë e burrat. Në mënyrë të barabartë. Megjithëkëtë jo çdo shoqëri e ka tejkaluar çështjen e barazisë gjinore dhe as shoqëria jonë nuk I ka dhënë fund kësaj ndarjeje. Prandaj sa më shpejtë të tejkalojmë barrierat gjinore do ta kuptojmë se shoqëria e shëndoshë udhëhiqet barabarësisht nga të dyja gjinitë. E thonë se jemi gjinia më e dobët. Mund të jetë për nga fiziku, por ne – femrat – kemi dëshmuar se jemi të afta të udhëheqim me shtetin, sepse e dëshmojmë çdo ditë se udhëheqim me familjen. Ne jemi shtyllë e palëkundur e familjes, e shoqërisë dhe e shtetit.

Petrit Selimi konsideron se koalicioni PDK-LDK është në të mirë të Kosovës dhe garës ndërkombëtare për zhvillim, njohje, integrime në BE dhe në NATO, pavarësisht se dikujt mund t’i duket se liga kosovare e politikës është bërë e mërzitshme me mungesë të opozitës. Nëse shihen resurset njerëzore të dy partive, sipas tij, del se bashkimi PDK-LDK është i ngjashëm sikur Barcelona të bashkohej me Realin.

Zv/ministri në detyrë i Punëve të Jashtme, njëherësh njëri nga anëtarët e Partisë Demokratike të Kosovës, Petrit Selimi, e sheh me interes për vendin bashkimin e PDK-së dhe LDK-së në një koalicion të ri qeverisës. Në një intervistë për Tribunën, ai shpreh bindjen se një koalicion që ka rreth 90 vota në Kuvend, do të jetë në gjendje t’i çojë përpara proceset integruese si dhe të krijojë mundësi të reja për zhvillim të vendit. Selimi e pranon se asnjëra palë s’e ka pasur të lehtë ta bëjë këtë koalicion, sikundër që asnjëra palë, sipas tij, nuk ka fituar maksimumin e kërkesave. Ai ka thënë se tri pozitat kryesore në resorët e shtetit do të qartësohen ditëve në vijim se nga kush do të barten. Selimi mendon se koalicioni PDK-LDK është shumë më i moralshëm se mishmashi i marrëveshjes VLAN. Fundja, sipas tij, politikanët nuk janë as imamë e as priftërinj.

Tribuna: U nënshkrua Marrëveshja për koalicion midis PDK-së dhe LDK-së duke tejkaluar kështu ngërçin politik. Menjëherë pas nënshkrimit, pati debate se a është Isa Mustafa mandatar i qeverisë së re? Cili është në fakt formati i marrëveshjes së re?

Selimi: Me rëndësi është se u arrit një marrëveshje, kushtimisht e quajtur, e një pajtimi të madh politik midis dy boshteve kryesore të politikës kosovare. Nuk ka qenë lehtë për asnjë palë dhe asnjëra palë nuk ka fituar maksimumin e kërkesave por në anën tjetër ky koalicion nuk është kundër dikujt por pro-zhvillimit ekonomik, pro-integrimeve evropiane dhe pro-qeverisjes së mirë. Arkitektura e saktë e pozitave të larta dhe ato ministrore do të përcaktohen nga grupet punuese në ditët në vijim por është e qartë që janë tri pozita të lira, ajo e kryekuvendarit, kryeministrit dhe presidentit pas mandatit të presidentes Jahjaga. Ky trekëndësh do t’i definojë edhe rolet e liderëve të dy partive. Më rëndësi është se së bashku me minoritetet, kjo Qeveri do të ketë një shumicë e qëndrueshme që i afrohet 90 deputetëve dhe si e tillë paraqet një potencial enorm për përfundimin e shumë prioriteteve ekonomike dhe politike.

Tribuna: Ende po vërehet një dozë mosbesimi në partitë respektive kundër kësaj marrëveshjeje. Analistët e quajnë të pamoralshme nga aspekti i politikës, ndërsa në LDK ka zëra që nuk përkrahin këtë koalicion?

Selimi: Analistët e mirëfilltë të Kosovës numërohen në gishta dhe ky cikël zgjedhor dhe ngërçi kanë dëshmuar se shumë të ashtuquajtur analistë janë vetëm partizanë që ndryshojnë kapelat por që kanë agjenda subjektive. Ndërsa është e natyrshme që në PDK apo LDK të ketë njerëz që shfaqin kritika pasi që të dy partitë janë masive dhe kanë shumëllojshmëri zërash. Me rëndësi është se shumica absolute e Këshillit të Përgjithshëm të PDK por edhe të LDK kanë mbështetur këtë koalicion dhe parimet që do ta dërgojnë vendin para. Ky koalicion dhe kjo qeveri kanë mbështetje të gjerë popullore, mbështetje të fuqishme ndërkombëtare dhe mandat demokratik për reformat e vështira që presin këtë shoqëri. Sa i përket moralit dhe politikës, mendoj se ky koalicion dhe kjo marrëveshje janë shumë më të moralshme dhe shumë më lehtë e kuptueshme se mishmashi i marrëveshjes së dështuar VLAN ku ka pasur inat, sulme personale por asnjë fije morali. Tek e fundit, nuk jemi as imamë e as priftërinj por politikanë që duhet punuar për të realizuar objektivat tona programatike.

Tribuna: Megjithatë, besoj se pajtoheni se PDK duhet falënderuar shumë LDK-në për zgjatje të jetës politike dhe një mandat të ri të fituar?

Selimi: Të dy partitë duhet falënderuar njëra-tjetrën për vizion dhe guxim. Nuk ka qenë lehtë të zgjatësh dorën njëri-tjetrit për të mirën e vendit por nëse Kosova mund të bisedon me Serbinë, është e qartë që bisedat midis partive shqiptare duhen të jenë fundamentalisht më të lehta dhe më pragmatike. Nëse shohim resurset njerëzore të dy partive, del si Barcelona të bashkohet me Realin dhe ndoshta dikujt i duket se liga kosovare e politikës bëhet e mërzitshme me mungesë të opozitës por mendoj se për të mirën e Kosovës dhe garës ndërkombëtare për zhvillim, njohje, integrime në BE dhe NATO, është shumë mesazh i fuqishëm i Kosovës që ka një super-ekip të tillë.

Tribuna: Tani keni edhe Listën Serbe e cila kontrollohet nga Vuçiqi. Vetëvendosja ju ka akuzuar se do të jeni vartës të kësaj liste dhe kërkesave autonomiste?

Selimi: E kundërta është e vërtetë, që vetëm koalicioni PDK-LDK ka garantuar që Qeveria mos të jetë peng as e partive minoritare por as e nacionalistëve shqiptarë që refuzojnë dialogun dhe rrjedhimisht rrugën evropiane. Por unë nuk pajtohem që politikën ta shikojmë si proces të pengmarrjes. Duhet të jemi të gëzuar që Lista Serbe merr pjesë në institucione, që respekton Kushtetutën dhe që ka tejkaluar bllokadën mentale që kanë pasur 15 vite me rend për t’u integruar në shoqërinë tonë. Absolutisht mendoj se PDK dhe LDK mund dhe do ta gjen gjuhën e përbashkët me Listën Serbe për përfitim të të gjithë qytetarëve në Kosovë. Me vite të tëra kemi kërkuar integrimin e veriut në institucione të Kosovës dhe kjo po arrihet.

Tribuna: Cilat janë prioritetet e para të qeverisë?

Selimi: Ato janë të qarta, aprovimi një pakete ligjesh që ndoshta do të kërkojnë edhe ndryshime kushtetuese si Gjykata Speciale e Kosovës për krimet e luftës, pastaj Ligji për luftëtarët jashtë vendit, vendimet përfundimtare në udhërrëfyesin e liberalizimit të vizave, buxhetin natyrisht por edhe disa ligje tjera si Forcat e Armatosura të Kosovës. Me këtë shumicë parlamentare mund të punohet edhe në reformat zgjedhore dhe adresimin e disa mungesave të Kushtetutës që janë evidentuar në muajt e fundit. Por besoj se qytetarët e Kosovës e kanë një prioritet mbi të gjitha prioritetet ekonominë dhe krijimin e vendeve të reja të punës dhe ky do të duhej të ishte objektivi kryesor. Finishi i privatizimit të Brezovicës, TC Kosova e Re dhe disa projekte të tjera do të mund të ishin disa hapa imediatë për të sjellë konfidencë në ekonominë kosovare. Ky koalicion ofron optimizëm dhe ofron garanci që proceset e ekonomisë të tregut do të kenë shumicë e qëndrueshme në parlament që mos të na ndodhin fiaskot si dështim i privatizimit të PTK-së vitin e kaluar.

Tribuna: A keni njohuri se si u bind LDK ta bëjë një kthesë aq dramatike? A ishte vendimtar roli i Ambasadës Amerikane?

Selimi: Nuk mendoj se LDK ka bërë një kthesë dramatike, por nuk jam zëdhënës i kësaj partie. Ata gjithmonë kanë pohuar se janë institucionalistë dhe kjo marrëveshje është e tillë – që ofron garanca për institucione të qëndrueshme. As Ambasada Amerikane nuk ka pasur rol direkt, por është e qartë që ata që ja duan të mirën Kosovës si në Uashington ashtu edhe në Londër apo Berlin apo Paris, kanë përkrahur një marrëveshje që prodhon qeverisje progresive e jo që bëhet proceseve euro-integruese. Mendoj se Qeveritë perëndimore do ta përshëndesin ngrohtësisht qeverinë e re kur të votohen në Kuvend.

Tribuna: E kur do të votohet? Pse nuk thirret seanca?

Selimi: Seanca thirret për pak ditë, kur grupet punuese t’i definojnë prioritetet programatike dhe ndarjen e posteve. Kemi pritur gati gjashtë muaj, me rëndësi është tani mos të bëjmë gabime në hapa nga ngutia. Kosova do të ketë Qeveri funksionale, buxhet të aprovuar dhe program qeverisës gjatë vitit 2014 ashtu që vitin e ardhshëm të hyjmë me një cak të qartë. Dy-tre ditë plus a minus nuk janë thelbësore tani pasi që u arrit marrëveshja bashkë-qeverisëse.

Tribuna: Ju personalisht jeni përfolur si një nga personat që keni udhëhequr fushatën elektorale Misioni i Ri. A do të mbesin premtimet e 200,000 vendeve të punës vetëm boshe apo ka diçka nga programi që mund të realizohet?

Selimi: Asnjë premtim elektoral nuk është bosh por i bazuar në numra dhe të dhëna empirike. Politika është arti i të së mundshmes – një klishe ndoshta por megjithatë që flet se ne duhet të synojmë optimumin e realizimit. As presidenti Hollande, as kancelarja Merkel as kryeministri Cameron nuk realizojnë as afër 100% të premtimeve elektorale por votuesit e dinë sa i afrohesh dhe se a ka justifikim për dështime eventuale. Neve populli na dha votën sepse na shikoi fushatën si një gotë gjysmë të mbushur – me mangësi dhe dështime por edhe suksese shumë të mira që kanë prekur jetët e qindra-mijëra qytetarëve. Prandaj edhe morëm votëbesimin dhe tani këtë kapital elektoral e bashkë-investojmë me LDK në realizim të optimumit të premtimeve.