Kosovën në këtë takim pritet ta përfaqësojë kryeministri në detyrë, Hashim Thaçi, ndërkaq edhe Serbia do të përfaqësohet nga kryeministri Aleksandër Vuçiq.

Mbledhja e radhës e Këshillit të Sigurimit të Kombeve të Bashkuara do të mbahet kësaj të enjte pasdite në New York, ku do të shqyrtohet raporti i rregullt i Sekretarit të Përgjithshëm Ban ki Moon mbi zhvillimet tremujore në Kosovë. Kosovën në këtë takim pritet ta përfaqësojë kryeministri në detyrë, Hashim Thaçi, ndërkaq edhe Serbia do të përfaqësohet nga kryeministri Aleksandër Vuçiq, që do të jetë pjesëmarrja e tij e parë në këtë cilësi në takimet e Këshillit.

Në raportin më të ri Sekretari i Përgjithshëm shpreh shqetësimin përsiç thotë, ‘moskonstituimin pas zgjedhjeve të organeve udhëheqëse të Kosovës’ dhe u bënë thirrje ‘të gjitha subjekteve politike në radhë të parë liderëve të tyre që të rrisin përpjekjet në mënyrë që zgjedhjet e 8 qershorit të jenë të suksesshme.’ Raporti ishte publikuar para arritjes së marrëveshjes për koalicon qeverisës midis Partisë Demokratike dhe Lidhjes Demokratike të Kosovës dhe përfshin periudhën raportuese nga 16 korriku deri më 15 tetor.

Në raport Sekretari i Përgjithshëm poashtu thekson se brezi i tashëm i udhëheqësve politikë duhet të vazhdojë me procesin siç e quan, ‘historik të normalizimit të marrëdhënieve midis Prishtinës dhe Beogradit dhe të shfrytëzojnë mundësitë që ofron Marrëveshja për Stabilizim dhe Asocim me BE-në.’

Sekretari i Përgjithshëm në këtë raport ka falenderuar angazhimin e udhëheqësve të Kosovës për qasjen dhe zgjidhjen e çështjes së pjesëmarrjes së shtetasve kosovarë në konfliktet e huaja dhe në këtë kuadër ka përshëndetur edhe liderët e bashkësisë islame dhe të përkatësive të tjera fetare në Kosovë për distancimin nga ekstremizmi./rtk/

Gruaja e axhës e kishte kërcënuar dhe e kishte detyruar një djalë të mitur të pa nënë që të kryente marrëdhënie seksuale me të. Për RTK ai ka treguar se në moshën 14 vjeçare nisi të kërkonte nënën e tij e cila e kishte braktisur.

Dëgjojeni rrëfimin e tij për emisionin “Tema” në RTK.

“Kur i kom bo 14 vjet unë e kam kërku nanen tem masi na ka lanë nana. Arsyeja që e kam kërku është se unë jam shkelë prej një personi të familjes domethanë që ka lyp marrëdhënie seksuale prej meje edhe më ka detyru me bo marrëdhënie seksuale me bo me to”, tha ai.

“Ka qenë gruaja e axhes. Domethanë më ka hi brenda në dhomë edhe më ka thënë që duhet me bo. Edhe unë jam detyru me bo qat sen”, tregoi ai.

Dje kishte pasur zhurmë në korridoret e Komunës së Suharekës nga Asambleistët, se kush të arrinte më parë të marrë shpërblimin e tij.

9920 euro është shuma totale e shpenzuar nga Buxheti i Asamblesë Komunale të Suharekës, e cila ka shpërndarë IPAD/tablet në vlerë prej 310 euro (vlera e një tableti) për secilin asambleistë në Komunë.

31 asambleistë janë gjithsejtë, megjithëse në Kontratë janë të cekur 32.

I 32 -ti është Avni Bytyqi, përfaqësuesi ligjor i Komunës. Këtë e vërteton edhe Refki Gega Kryesuesi i Kuvendit Komunal i cili ndër të tjera shprehet se  “31 janë shpërndarë për asambleistët dhe një për Avni Bytyqin. Për këtë janë pajtuar të gjithë shefat e grupeve parlamentare”. /TherandaPost.com/

Zëdhënësi i Komunës së Prizrenit, Ymer Berisha ka mohuar se janë shpenzuar 80 mijë euro për dreka e darka zyrtare. Sipas tij, opozita po e lexon keq raportin.

“Opozita po e lexon keq raportin. Reagimet e opozitës janë krejtësisht politike dhe se po bëhen qëllimshëm në fund të vitit”, ka thënë Berisha për KTV.

Drekat dhe darkat duket të jenë aktivitetet me të preferuara të zyrtarëve komunalë të Prizrenit, rreth 80 mijë euro vetëm për një periudhë nëntëmujore figurojnë të jenë shpenzuar këtë vit.

Të paktën kështu thotë buxheti komunal për periudhën janar-shtator të vitit 2014. Këto shpenzime janë të specifikuara në këtë raport buxhetor.

Luks të tepruar dhe keqpërdorim të parasë publike, e cilëson LDK-ja këtë veprim.

Haziz Hoda nga LDK-ja ngre dyshime se komuna ka paguar edhe borxhe të viteve të kaluara, duke përfshirë edhe borxhet e fushatës zgjedhore.

80 mijë euro për dreka dhe darka janë shpenzime enorme për Vetëvendosjen. Artan Abrashi nga LVV-ja thotë se raporti i komunës lë hapësirë për dyshime se buxheti është keqpërdorur.

Në mbledhjen e dhjetë të rregullt të Kuvendit Komunal në Therandë, të mbajtur të hënën (dje),  kanë munguar shumica e drejtorëve të drejtorive komunale.

Asambleistët e Lëvizjes Vetëvendosje!, Leonard Shala dhe Zanë Basha, të cilët ishin të pranishëm në këtë mbledhje diskutuan rreth pikave të rendit të ditës. Në fillim të mbledhjes, me kërkesë të kryesuesit u hoq nga rend i ditës pika “Shqyrtimi i projekt vendimit për miratimin e taksave administrative për lëshimin e lejes së ndërtimit”, me arsyetimin se Drejtoria për Urbanizëm, Planifikim dhe Mjedis ka nevojë të bisedojë ende për këtë çështje para se kjo të votohet në asamble.

Për pikën tjetër të rendit të ditës “Shqyrtimi i projekt vendimit për formimin e komisionit komunal të aksionarëve”, përfaqësuesit e Lëvizjes Vetëvendosje! kanë ngritur shqetësimin se Lëvizja vazhdimisht po përjashtohet që të merr pjesë në komisione të tilla kaq të rëndësishme, me ç’rast edhe nuk u njoftua për së afërmi me problemet e ndërmarrjes “Ekoregjioni”. Përfaqësuesit e Lëvizjes votuan kundër në këtë pikë.

Pikë tjetër e rëndësishme ishte edhe “Infomatë për administrimin financiar të buxhetit të Komunës së Therandës për periudhën Janar-Shtator 2014”. Te kjo pikë përfaqësuesit e Vetëvendosje!-s dhanë vërejtje të shumta sidomos në kategoritë “Investime kapitale” dhe “Mallra dhe shërbime”. Në raportin e administrimit të buxhetit të Komunës së Therandës, për periudhën janar- shtator 2014, çuditërisht mungonin shumë projekte të kryera me procedurën e kuotimit. Nga gjithsej 126 kontrata të nënshkruara për periudhën janar- nëntor 2014, 70 prej tyre ishin me procedurë të kuotimit, që i bie të jenë keq menaxhim i parasë publike, por ekziston dyshimi që mund të jenë shpërblim i kompanive të afërta me partinë në pushtet. Këto kontrata u bënë publike nga asambleisti i Vetëvendosje!-s, Leonard Shala.

Lëvizja Vetëvendosje! ka bërë kërkesë në Drejtorinë e Shërbimeve Publike që të pajiset me informacione të kryerjes së këtyre projekteve si: Paramasat e projekteve; Raportin përfundimtar të punimeve; dhe Raportin për pranimin teknik të punimeve. Pasi t’i kenë edhe këto materiale, aktivistët e Lëvizjes do t’i analizojnë ato, sepse në shikim të parë vërehen shumë mjete të shpenzuara e pak punë të kryera.

Lidhur me kategorinë mallra dhe shërbime, asambleistja Zanë Basha ka kërkuar një raport se për çka janë shpenzuar këto mjete, sepse në materialin e asamblesë është cekur se sa para kanë shpenzuar drejtoritë komunale, mirëpo nuk është cekur se për çfarë produkte i kanë shpenzuar. /PrizrenPress.com/

Themelimi i Gjykatës Speciale pritet të jetë një nga detyrat dhe obligimet ndërkombëtare që ka marrë Kosova përsipër menjëherë pas formimit të institucioneve të reja.

Ideja për themelimin e një Tribunali Ndërkombëtar për Kosovën që më vonë u quajt Gjykata e veçantë apo speciale, fillimisht ishte prezantuar se ka rrjedhë në bazë të hetimeve të iniciuara nga Këshilli i Evropës që si bazë kishin dyshimet e supozuara të zviceranit Dick Marti, mbi trafikimin e organeve të serbëve nga pjesëtarët e ish-Ushtrisë Çlirimtare të Kosovës.

Pas miratimit politik nga autoritetet e Prishtinës, tani proceduralisht mbetet që institucionet e reja të krijojnë bazën ligjore për themelimin e kësaj Gjykate.

Profesori i çështjeve kushtetuese – juridike, Riza Smaka thotë se për themelimin e saj, Kosova do të ketë nevojë të miratojë bazën ligjore, pasi që një Gjykatë e tillë nuk parashihet me ligjet aktuale.

“Do të duhet të bëhet ndryshimi dhe modifikimi i Ligjit për Gjykatat dhe aty të përcaktohet ndër tjera edhe kjo Gjykatë. Më pastaj, besoj se do të duhet të bëhet një akt ligjor special që i parasheh këto dispozita tjera sa i përket juridiksionit të kësaj Gjykate dhe të miratohej në procedurë, në mënyrë që të fillojë së zbatuari Ligji për Gjykatën Speciale”, ka thënë Smaka, për Radion Evropa e Lirë.

Selia e Gjykatës Speciale është thënë se do të jetë jashtë Kosovës.

Një veprim i tillë, ishte arsyetuar edhe me punën më efikase të saj dhe shmangien nga presionet eventuale politike.

Si vend potencial për selinë e kësaj gjykate është përmendur Holanda. Ambasadori holandez në Prishtinë, Robert Bosch ka deklaruar gjatë një debati të organizuar nga Lëvizja Fol se ende nuk ka një vendim të prerë dhe se kjo çështje është në diskutim e sipër.

“Nuk është vendosur ende asgjë. Nuk na takon ne, por Bashkimit Evropian që të vendos, pasi që kemi të bëjmë me një projekt të BE-së, përkatësisht EULEX-it. Ata bisedojnë me ne e ne me ta, por asgjë nuk është vendosur ende”, ka thënë ambasadori Bosch.

Sipas tij, gjithçka në këtë proces është vonuar për shkak të mungesës së qeverisë dhe institucioneve të reja të Kosovës, të cilat pasi të formohen do ta diskutojnë këtë çështje me autoritetet e Bashkimit Evropian.

Themelimi i Gjykatës Speciale nga profesori Riza Smaka shihet si tregues i dështimit të organeve të ndjekjes penale, si atyre të dikurshme të UNMIK-ut, EULEX-it apo organeve vendore.

Profesori Smaka thotë se Gjykata Speciale, tani vjen si obligim ndërkombëtar që ka marrë sipër Kosova. Por, në fakt, sipas tij, themelimi i saj paraqet dhe imazh të keq për shtetin e ri evropian.

“Kjo Gjykatë nuk do të vinte në shprehje as si ide për diskutim, por ajo është pikërisht rezultat i dështimit të gjyqësorit. Ta zëmë se sa vrasjet kanë ndodhur në mënyrë enigmatike, shumë provokuese e irrituese dhe nuk është zbuluar po thuajse asnjë rast, pastaj nuk procedohen çështjet, nuk gjykohen, nuk ekzekutohen aktgjykimet, parashkruhen e ka raste kur zhduken lëndët dhe këto janë paradokse”, ka deklaruar Riza Smaka.

Gjykata e veçantë apo speciale, pritet të trajtojë raste të dyshuara të krimeve të luftës si dhe ato të fazës së parë të pasluftës.

Themelimi i kësaj Gjykate nga ekspertët e çështjeve penale – juridike ishte konsideruar si dështim jo vetëm i organeve vendore, por edhe autoriteteve ndërkombëtare që për këto 14 vjetët e fundit kishin punuar në fushën e drejtësisë dhe gjyqësorit në Kosovë.