Deputeti i Partisë Demokratike të Kosovës, Azem Syla, ka mohuar akuzat e prokurores Maria Bamieh se një rast penal kundër tij është penguar nga kryeprokurori Jonathan Ratel.

Ai ka thënë se këto akuza nuk janë kredibile, derisa “i ka dhënë mbështetje gjyqësorit dhe EULEX-it”.

“Tashmë një kohë është bërë rutinë e atakimeve të emrave të përveçëm nga segmentet-individët e caktuar për t’iu dhënë kredibilitet akuzave të tyre të llojeve të ndryshme. Edhe pse jo rrallë, kredibiliteti i akuzave të tilla është shumë i paqëndrueshëm dhe tendencioz”, ka thënë Syla në një deklaratë dërguar “Kohës Ditore”..

Qytetarët të cilët kanë vendosur stenta në periudhën e pasluftës në spitalet private në Kosovë kanë frikë se nuk kanë fare stenta.

Ka që kanë bërë ose planifikojnë të bëjnë koronarografi, që të sigurohen se këto spitale vërtet u kanë vendosur stenta ashtu siç u kanë thënë.

Dyshimet janë ngritur sidomos pas arrestimit të mjekëve dhe udhëheqësve të dy spitaleve private për dyshimet për korrupsion me pacientët, të cilëve është dashur t’u vendoseshin stentat. Se ka rritje të numrit të pacientëve të cilët bëjnë koronarografi ka pranuar edhe Klinika e Kardiologjisë në QKUK.

67-vjeçari A. M. nga Komuna e Malishevës para më shumë se dy vjetësh kishte kërkuar trajtim në një mjekësi familjare në Malishevë. Mjekët e kishin udhëzuar për në QKUK. Stafi i këtij institucioni e kishte orientuar për në spitalin e zemrës “Eda”, i cili është subjekt i hetimit i Prokurorisë se Shtetit…/Koha Ditore/

Ish-gjyqtari i EULEX-it, amerikani James Hargreaves, ka akuzuar ish-punëdhënësin e tij për mospunë gjatë gjithë mandatit të tij.

Hargreaves thotë se ndryshimi i ligjeve është i lehtë, por ndryshimi i kulturës sa i përket zbatimit të atyre ligjeve është proces i vështirë, ndërsa thekson se EULEX-i nuk ka bërë asgjë në këtë drejtim

“Ndryshimi i ligjeve në një shtet është shpesh gjë relativisht e lehtë; ndryshimi i kulturës sa i përket zbatimit të atyre ligjeve kurrë nuk është i lehtë. Ndryshimi i kulturës është një proces i vështirë, shumë i gjatë, i ngadalshëm dhe tejet kompleks. Deri më tani, EULEX-i nuk ka bërë asgjë për ta trajtuar këtë problem fondamental dhe tani është shumë vonë. Një përpjekje njëzetmujore, e drejtuar nga ndryshimi i kulturës, do të ishte një pikë uji në oqean”.

“Duke pasur parasysh këto pengesa drejt përmirësimeve substanciale në sundimin e ligjit në Kosovë, ashtu si edhe dështimin e EULEX-it për t’i adresuar ato gjatë gjashtë viteve të misionit të tij, çfarë roli duhet të vazhdojë të ketë EULEX-i në Kosovë, derisa mandati i tij po ecën drejt fundit?”, thotë ish-gjykatësi i EULEX-it, James Hargreaves… ./Koha Ditore/

Përfaqësuesja e lartë e Bashkimit Evropian për politikë të jashtme dhe siguri, Frederica Mogherini, ka vendosur që të emërojë një ekspert të pavarur, i cili do të merret me aferën ekorrupsionit në EULEX.
“Sot mora vendim që të emëroj një ekspert ligjor të pavarur që do e shqyrtojë implementimin e mandatit të misionit, natyrisht me fokus të veçantë në atë se si janë marrë me aludimet për korrupsion”, ka thënë Mogherini gjatë paraqitjes së parë të saj para gazetarëve.

Emri i këtij eksperti do t’i bëhet i ditur publikut së shpejti.

Ky vendim shefes së re te diplomacisë evropiane vjen pas shtimit të zërave në Bruksel se keq është menaxhuar kriza e shkaktuar pas publikimit të teksteve mbi korrupsionin brenda misionit EULEX.

Komiteti për politikë të jashtme të Parlamentit Evropian doli me komunikatë me anë të së cilës kërkohet urgjentisht zbardhja e dyshimeve për korrupsion dhe pohimeve se paska ekzistuar hetimi i brendshëm sekret, transmeton RTK.

“Korrupsioni dhe skandalet fatkeqësisht kanë ndodhur. Ajo çfarë mund të bëjë ndryshim është se si i qasemi ne këtyre gjërave. Porosia jonë është e qartë: të gjitha aludimet duhet të hetohen shpejtë nga pala e tretë e pavarur. Dyshimet se ka pasur tentime të mbulohen skandalet duhet të përfshihen në hetime”, thuhet në komunikatën e nënshkruar na kryesuesi i Komitetit për Politikë të Jashtme të Parlamentit Evropian, Elmar Brok.

Kjo komunikatë u bë pas debatit të pasuksesshëm të mbajtur mbrëmë në Parlament ku eurodeputetët dolën të pakënaqur me përgjigjet e dhëna në lidhje me aferën nga të ngarkuarit me çështje të EULEX-it në Bruksel.

Fernando Gentilini drejtor për Ballkanin Perëndimor tek kabineti Ashton dhe tani tek Mogherini si dhe Keneth Dean që merret me operacionet e BE-së thuhet se kanë dhënë shpjegime të mangëta në lidhje me skandalin.

Burimet nga takimi madje kanë treguar se përgjigjet e tyre, siç thuhet, sipërfaqësore kanë shtyrë kryesuesin që të ndërpresë sesionin duke konsideruar se i njëjti nuk po çon askund.

Prej krijimit të dy blloqeve politike parlamentare në Kosovë, dyert e sallës së Kuvendit mbesin të mbyllura për deputetët.

Përveç seancës së parë konstituive, një pjesë të së cilës e cilësoi të jashtëligjshme Gjykata Kushtetuese si dhe një seancë tjetër në të cilën dështoi PDK-ja të zgjedhë kandidatin e saj, kryesuesja e rastësishme e Kuvendit, Flora Brovina, nuk e shfrytëzoi të drejtën e saj që të thërrasë vazhdimin e seancës, raporton KTV.

Ajo shantazhoi bllokun, LDK-AAK-NISMA dhe Vetëvendosjen, me thirrje të seancës vetëm në rast të arritjes së ndonjë marrëveshje, duke iu referuar kështu partisë së saj, PDK-së.

Megjithatë, Blloku hezitoi ta ndërmarrë një veprim të tillë dhe krejt çfarë bëri ishin deklaratat pa efekt dhe organizimi i një seance në të cilën nuk morën pjesë deputetët e PDK-së.

Këtë veprim të Brovinës Vetëvendosje e quan të jashtëligjshëm. Ajo thotë se PDK-ja e bllokoi Kuvendin dhe nuk e lejoi debatin.

KTV-ja ka provuar që të flasë me disa deputetë dhe përfaqësues të bllokut, por shumica prej tyre s’janë përgjigjur.

Ndërkohë, analisti Imer Mushkolaj thotë se PDK-ja s’do të duhej të vepronte në këtë mënyrë. Ai thotë se kuvendi do të duhej të ishte i hapur dhe se deputetët do të duhej të kishin të drejtën e debatit. /koha.net/

Një vit më parë ndërroi jetë Adnan Abrashi, rrebeli i pa përmirësuseshm në rrugën e dritës. Një vit më pas në Televizionin ‘Opinion’ ku ai punoi për më shumë se 12 vjet e kemi më të çartë se një vit më parë se Adnan Abrashi vetëm fizikisht nuk është në mesin tonë. Ai me veprën e tij mbetet rrebeli i përmirësueshëm në rrugën e dritës.

Ndërsa ne të gjithë të gjallët atë ditë kur nuk do të ndalemi në rrugën e dritës atë ditë nuk do të ekzistojmë, e sa të ekzistojmë do ta mbajmë të gjallë jetën dhe veprën e Adnanit, moton e tij jetësore të përmirësueshëm në rrugën e dritës.

Vepra e tij jetësore, puna e tij në shumë segmente të jetës dhe veçanësrisht ajo në Televizionin ‘Opinion’ në ne dhe me ne janë përditë dhe në çdo hap. Na mungon, na mungojnë këshillat e tij, na mungon kurajo që ai e kishte edhe në momente të vështira, në momente që ne të tjerët I vlerësonim pa dalje. Ai e kishte zgjidhjen. Ishte ëndërrimtar I madh, optimist i papëmirrësueshëm, kritikues I ashpër, që tingëllonte si mohues, por ai ishte realist, mbi te gjitha realist. E pikturonte shumë kuptueshëm realitetin, pikturë e cila shpesh iu shkaktonte dhembje atyre që nuk e kuptonin, por ai nuk e çante kokën çka mendonin të tjerët.

Ishte zë I veçantë në publicistikën prizrenase. Jo vetëm i veçantë. Ishte zë I vetëm, jo vetëm në trajtimin e problemeve, por edhe në emërtimin me emrin e vërtet të fenomeneve dhe dukurive devijante. Adnan Abrashi nga viti 2002 deri në ditët e fundit të jetës ka punuar në televizionin Opinion, si organizator i punës.

Adnan Abrashi përveç punës në televizion me shkrimet e tij publicistike është paraqitur në shumë gazeta e revista shqiptare, duke lënë gjurmë të pashlyera në publicistikën tonë. Televizioni Opinion në nderim të jetës dhe punës së Adnan Abrashit, të premten duke filluar në orën 21 do ta mbaj një emision në të cilin do të marrin pjesë, kolegë, familjarë dhe miq të Adnanit dhe të cilët do të flasin për jetën e tij./TV OPINON/

Kryesia e Lidhjes Demokratike të Kosovës (LDK), në mbledhjen e mbajtur sot, i ka dhënë mbështetje të plotë koalicionit të shumicës parlamentare, të prirë nga Lidhja Demokratike e Kosovës.

Në komunikatën e lëshuar nga takimi thuhet se LDK-ja po punon intensivisht që koalicioni i shumicës parlamentare, si përfaqësues i shumicës absolute të popullit të Kosovës, të themelojë institucionet qeverisëse të vendit sa më parë që është e mundur.

LDK-ja vlerëson se është e domosdoshme që në vend të ndërrohet mënyra e qeverisjes dhe së Kosovës i duhet një qeveri demokratike, e përkushtuar në luftën kundër korrupsionit dhe krimit të organizuar dhe e cila do të punojë në bazë të Kushtetutës dhe ligjeve për të mirën e të gjithë qytetarëve të Kosovës.

LDK-ja vlerëson se ndërtimi i institucioneve duhet të bëhet sa më parë, me qëllim që ato të jenë funksionale dhe në shërbim të popullit të Kosovës.

LDK-ja konsideron se është e domosdoshme që procesi i themelimit të institucioneve të reja të përmbyllet sa më parë që të jetë e mundur, thuhet në kumtesën e LDK-së.