Asamblisti i LDK-së në Prizren, Qemal Krasniqi, ka ndihmuar të sëmurën Luljeta Lubovecin.

Ai thotë se këtë gjestë humanë e ka marrë në shenj solidarizimi për të sëmurët.

“Më kanë thënë se është shumë studente e zgjuar dhe kam shpreh vullnetin me i ndihmu me një pagë të asamblistit rrethe 200 euro”, shprehet Krasniqi për PrizrenPress.com

“Konkretisht pagën e muajit të kaluar ia kam dedikuar kësaj vajze për shërim”.

Luljeta Luboveci vuan nga një sëmundje e rëndë. Ajo kërkon ndihmën e të gjithë qytetarëve për të shëruar këtë sëmundje./PrizrenPress.com/

Kuvendi i Kosovës ka pak gjasa që të mblidhet edhe këtë javë, pavarësisht mbledhjes së nënshkrimeve nga blloku i partive LDK, AAK, Nisma dhe Vetëvendosje, që kjo seancë të thirret për ditën e enjte, më 9 tetor.

Partia Demokratike e Kosovës si Grupi më i madh parlamentar, që është përcaktuar me aktgjykimin e Gjykatës Kushtetuese, ka paralajmëruar se do të marr pjesë vetëm në seancën që do të thirret nga kryesuesja Flora Brovina.

Andaj, në vend të debatit që blloku i partive LDK, AAK, Nisma dhe Vetëvendosje e kërkojnë në Kuvend, PDK kërkon që negociatat të zhvillohen paraprakisht.

Zyrtarë të PDK-së të kontaktuar nga programi ynë, kanë rikujtuar se nuk ka devijim nga deklaratat që lideri i kësaj partie dhe kryeministri në largim, Hashim Thaçi i ka bërë gjatë fundjavës.

Thaçi kishte ftuar të gjitha partitë parlamentare të ulen dhe së bashku të gjejnë zgjidhje, duke parashikuar se negociatat ndër partiake do të krijonin rrethana edhe për lëshime e kompromise politike.

“Kemi pasur situata jo të këndshme edhe në të kaluarën, por gjithmonë jemi ulur, kemi diskutuar dhe kemi gjetur zgjidhjet më të mira për vendin edhe për shoqërinë. Në kuadër të këtij komunikimi të brendshëm ndër-partiak të gjendet zgjidhja, të arrihet marrëveshja dhe dihet që me marrëveshje askush nuk mund të realizon 100 për qind atë që dëshiron”, kishte deklaruar Thaçi.

Ndërkohë, grupimi i partive që synojnë t’i ndërtojnë institucionet e reja pa e përfshi PDK-në në postet udhëheqëse, kanë mbledhur 62 nënshkrime duke kërkuar që seanca të thirret për të enjten. Mirëpo, aktualisht Kuvendi nuk ka Kryetar e as Kryesi.

Andaj mbetet për interpretim se si do të procedohet kjo kërkesë e koalicionit pas zgjedhor, pasi që kryesuesja e seancës, Flora Brovina u ka kërkuar partive parlamentare që të arrijnë së pari marrëveshje para se të thirret vazhdimi i seancës konstituive.

Deputetja e Lidhjes Demokratike të Kosovës, Vjosa Osmani ka deklaruar se rrethanat e krijuara mundësojnë edhe thirrjen e seancës së me anë të nënshkrimeve.

“Neni 66 i Kushtetutës flet edhe për mundësinë që Kuvendi të mblidhet vet. Po ashtu, e njëjta Kushtetutë sqaron që përmes 40 nënshkrimeve deputetët mund të thërrasin seancë të jashtëzakonshme. Unë mendoj që bllokada institucionale që PDK-ja po e bën, e krijon atë situatë të jashtëzakonshme që na lejon neve që me 40 nënshkrime ta thërrasim vazhdimin e seancës”, ka thënë Osmani.

Në Kuvendin e Kosovës përfaqësohen edhe 20 deputetë nga radhët e pakicave.

Grupet e tyre parlamentare janë deklaruar se do të merrnin pjesë në seancën e thirrur nga opozita vetëm nëse ajo do të vlerësohet se është në harmoni me Rregulloren e punës dhe Kushtetutën.

Thirrja e seancës pa Partinë Demokratike të Kosovës është parë si një mision i pamundur edhe nga analistë të ndryshëm politik.

Marrë parasysh aktgjykimin e Gjykatës Kushtetuese, i cili i njeh vetëm PDK-së të drejtën e propozimit të kandidaturës për kreun e Kuvendit, analistët kryesisht kanë mbështetur zgjidhjen që PDK të marrë postin e kryetarit të Kuvendit, kurse blloku LDK, AAK, Nisma dhe Vetëvendosje, si shumicë parlamentare, të provoj formimin e qeverisë së re të Kosovës.

Kuvendi i Kosovës ka filluar seancën konstituive nga 17 korriku. Mirëpo kjo seancë mbetet e papërfunduar pasi që grupi më i madh parlamentar i dalë nga zgjedhjet e 8 qershorit, PDK-ja, nuk po arrin të zgjedh kryetarin e Kuvendit për mungesë të votave, përderisa koalicioni pas zgjedhor LDK, AAK, Nisma dhe Vetëvendosje, ndonëse ka krijuar një shumicë në Kuvend, nuk po gjen hapësirë kushtetuese për të marrë këtë post. /REL/

Ka kaluar një muaj që prej se është mbyllur konkursi për rektor të UPZ-së, Këshillit Drejtues ende s’ka arritur që të zgjedh rektorin e ri. Preferenca e drejtuesve të PDK-së, që me çdo kusht ta emërojnë Kadri Kryeziun si rektor të UPZ-së, duket se ka bllokuar gjithçka.

Një burim i Gazetës Blic i afërt me procesin e përzgjedhjes së rektorit të ri të UPZ-së, i ka thënë Gazetës Blic se udhëheqësit e PDK-së po e duan me çdo kush Kadri Kryeziun për rektor të Universitetit të Prizrenit “Ukshin Hoti”. Sipas këtij burimi, Këshilli Drejtues i është drejtuar edhe me një kërkesë Ministrisë së Arsimit, vetëm e vetëm që të gjejnë hapësirë ligjore, për ta zgjedhur Kryeziun për rektor.

Këshilli Drejtues edhe një kërkesë në MASHT
Se Këshilli Drejtues i UPZ-së i është drejtuar sërish Ministrisë së Arsimit për cështjen e zgjedhjes së rektorit, e ka konfirmuar për Gazetën Blic edhe kryetari i këtij këshilli, Abdulla Aliu.

Ai i ka thënë Gazetës Blic se sërish i janë drejtuar Ministrisë së Arsimit, Shkencës dhe Teknologjisë duke kërkuar sqarime shtesë se përse nuk u lejohet profesorëve me thirrjet “Profesor Asistent” të zgjedhen rektor. “Edhe më herët i kemi dërguar një kërkesë Ministrisë së Arsimit se përse nuk u lejohet profesorëve me thirrjet akademike “Profesor Asistent” të zgjedhet rektor i UP-zë. Herën e parë Ministria e Arsimit na ka kthyer përgjigje negative, se duhet të respektohet statuti i UPZ-së. Mirëpo, kësaj here kërkesa është më e detajizuar, për dallim nga hera e parë kur kërkesa ka qenë shumë e përgjithësuar. Jemi në pritje të përgjigjes nga MASH-ti”, ka thënë ai për Gazetën Blic.

Sipas tij, javën tjetër me gjasë do të marrin përgjigje nga ana e MASHT-it. Sipas Aliut, në rast se MASH-ti thotë se duhet të respektohet Statuti, pra që për rektor kanë të drejtë vetëm ata profesorë me thirrjet “Profesor ordinar” dhe “profesor i asocuar”, atëherë ne do të procedojmë tutje, sepse i kemi në garë tre kandidatë që e kanë këtë thirrje.

Megjithatë, Aliu nuk e ka përjashtuar mundësinë që edhe të anulohet konkursi.
I pyetur se a po insistohet që përmes ndryshimit këtyre kërkesave t’i mundësohet që Kadri Kryeziu të zgjedhety rektor, Aliu ka thënë se nuk flet me emra të veçantë.
“Në UP lejohet që rektor të zgjedhet edhe kandidati me thirrjet profesor asistent. Këtë po e kërkojme edhe ne, në mënyrë që të jetë një garë me cilësore, e jo vetëm me tre kandidatë”, ka thënë ai.
Sërish përgjigje negative?!

Në anën tjetër, një burim brenda Ministrisë së Arsimit i ka thënë Gazetës Blic se kjo kërkesë ende nuk është shqyrtuar, por me gjasë do të marrë përgjigje negative, për faktin se nëse lejohet një gjë e tillë do të ishte kundërligjore. “Pranimi i kësaj kërkese do të ishte në kundërshtim me statutin e UPZ-së”, ka thënë ky burim.

Ndërkohë, para disa ditësh, kur Këshilli Drejtues i ishte drejtuar me kërkesën e parë MASHT-it, këshilltari i ministrit Buja, Arbër Morina i kishte thënë Gazetës Blic se vetëm Kuvendi i Kosovës mund ta ndryshoj statutin, prandaj ai kishte kërkuar që të respektohen procedurat.
“Statutin e ka miratuar Kuvendi dhe vetëm Kuvendi mund ta ndryshoj atë, natyrisht me iniciativë të Ministrisë së Arsimit”, kishte thënë ai. Ai kishte mohuar se ka interferim të politikës në zgjedhjen e rektorit të ri.

Problemet që i ka Kadri Kryeziu me statutin e UPZ-së, e kanë favorizuar shumë kandidatin tjetër, Ramë Vataj, i cili ka qenë deputet i PDK-së në legjislaturën e kaluar, por që më 8 qershor dështoi të marrë votat e mjaftueshme.

Një burim i Gaztës Blic brenda UPZ-së, ka thënë se Vataj edhe pse është nga PDK, tani për tani nuk ka edhe shumë mbështetje nga udhëheqësit e partisë në pushtet që të marrë postin e të parit të UPZ-së.
Pos Kadri Kryeziut e Ramë Vataj, në garë për të parin e UPZ-së janë edhe: Lirak Karjagdiu, Isuf Musliu, Gani Gjini, Florije Govori-Fejzullahu, Fahredin Shabani dhe Nagip Skenderi, i cili një kohë ishte edhe sekretar i përgjithshëm në Ministrinë e Punëve të Jashtme. /Gazeta Blic

E para e shtetit të Kosovës ka mundësi të shkojë në kryeqytetin serb, Beograd më 1 nëntor nëse i përgjigjet pozitivisht ftesës së Komisionit Evropian për të marrë pjesë në një takim të Komisionit Trelateral.

Arber Vllahiu, këshilltari i lartë i Presidencës i ka thënë Klan Kosovës se thirrja është bërë dhe se “tashmë po diskutohet mundësia që Jahjaga të shkoj në Serbi”, porse Vllahiu e ka sqaruar se ende nuk ka vendim zyrtar.

Merret vesh se në takim janë të ftuar kryeministri serb Aleksander Vucic, si dhe ai i Shqipërisë, Edi Rama.

Nuk dihet, nëse në këtë tubim po qe se ndodh Kosova do të prezantohet si shtet i pavarur me simbolet e tij, kjo pasi që as Serbia e as 5 shtete anëtare të BE-së nuk e pranojnë Kosovën shtet të pavarur.
Sipas zëdhënësit Vllahiu, ftesa për vizitën në Beograd është bërë në emër të Presidentes së Republikës se Kosovës.

Zyrtarja e parë e shtetit të Kosovës që e ka vizituar Beogradin, ka qenë ish ministrja e Integrimit evropian, Vlora Çitaku e cila vjet në qershor ka marrë pjesë në një debat të organizuar nga një organizatë jo qeveritare serbe.

Një video e postuar para pak vitesh tregon se edhe Kosovën e kanë vizituar UFO’t. Derisa po filmonte qytetin e bukur të Prizrenit, syri i kamerës ka hasur në një objekt në formë elipse për të cilin xhiruesi dyshon se është një pjatë fluturuese.

Se çfarë është në të vërtetë ai mjet nuk dihet, megjithëse kjo nuk është hera e parë që mjete të tilla janë incizuar nëpër Kosovë.

Vonesa në krijimin e institucioneve qendrore të Kosovës, kur po bëhen katër muaj që nga përfundimi i zgjedhjeve të përgjithshme, ka vështirësuar punën në shërbimin diplomatik të Kosovës.

Në së paku pesë ambasada të Kosovës në shtete të ndryshme të Evropës, për më shumë se dy muaj nuk janë bërë pagesat për objektet me qira dhe pagat e zyrtarëve, që punojnë në këto ambasada.

Një zyrtar që punon në njërën nga ambasadat në Evropën perëndimore, ka thënë se stafi në atë ambasadë është duke kaluar periudhë të vështirë si pasojë e mungesës së mjeteve financiare. “Ka dy muaj që nuk kemi marrë pagesat për rroga dhe ato për qira dhe kjo ka filluar të paraqesë problem për stafin”, ka thënë burimi i “KALLXO.com” nga një ambasadë e Kosovës në një shtet perëndimor. “Me sa jam i informuar, nuk është vetëm ambasada jonë në këtë gjendje. Janë edhe disa të tjera nëpër Evropë që po përballen me problem të njëjta”, është shprehur burimi, emri i të cilit është i njohur për redaksinë.

Bëhet fjalë për misionet diplomatike në Berlin, Vjenë, Paris, Bernë dhe Romë.

Ministria e Punëve të Jashtme e Kosovës ka pranuar se në pesë ambasadat nuk janë kryer me kohë pagesat për paga dhe qira.

Sipas ministrisë, deri te kjo situatë është arritur në mungesë të rishikimit të buxhetit të vitit 2014. “Për shkak të mosrishikimit të Buxhetit të Kosovës, praktikë kjo e paraparë edhe me ligjet në fuqi në gjysmën e dytë të këtij viti, kemi pasur vonesa dhe vështirësi të vogla në ekzekutimin e pagesave për qiratë dhe pagesat e stafit lokal në pesë misione diplomatike”, ka qenë përgjigja e MPJ-së.

Rishikimi i buxhetit ndodh në mes të vitit, por për shkak se Kuvendi i Kosovës është jofunksional, një gjë e tillë nuk ka ndodhur deri më tani.

Vendimi i fundit që deputetët e Kosovës kishin marrë daton në muajin maj, kur ata vendosën që vendin ta dërgojnë në zgjedhje të jashtëzakonshme.

Që nga ajo kohë, Partia Demokratike e Kosovës, në njërën anë, dhe koalicioni paszgjedhor i përbërë nga Lidhja Demokratike e Kosovës, Aleanca për Ardhmërinë e Kosovës, Nisma për Kosovën, dhe Lëvizja Vetëvendosje, në anën tjetër, janë zhytur në garën për ta marrë postin e kryeparlamentarit, duke vonuar në krijimin e institucioneve qendrore.

Por, edhe pse sipas ministrisë problemi me pagesat “tashmë është tejkaluar”, pasi kanë thënë se Ministria e Financave ka nisur të mërkurën proceduar për ekzekutimin e mjeteve të nevojshme, burimi me të cilin ka kontaktuar “KALLXO.com” ka thënë se nuk e ka marrë pagën ende.

Në anën tjetër, Ministria e Financave ka thënë se e ka pranuar një kërkesë të tillë nga MPJ, por është ende duke e trajtuar atë. “[Kërkesa e MPJ-së] është duke u trajtuar dhe kjo do të realizohet duke u bazuar në procesin e rregullimeve buxhetore të tremujorit të fundit”, është thënë në përgjigjen e Ministrisë së Financave.

Megjithatë, MPJ nuk duket të jetë e brengosur nga këto vonesat, sepse sipas tyre e gjithë kjo situatë nuk ka ndikuar “fare punën dhe funksionimin normal të misioneve diplomatike”.

Njohës të çështjeve ekonomike i kanë thënë “KALLXO.com” se mosrishikimi i buxhetit do të sjellë pasoja të mëdha në funksionimin e sektorëve të caktuar të ekonomisë si pasojë e vendimeve të ekzekutivit pa mbulesë financiare.

Alban Hashani, thotë se në mungesë të rishikimit buxhetor, qeveria nuk arrin të përmbushë politikën e saj fiskale dhe ndryshimet që kanë ndodhur ndërkohë.

Sipas tij, qeveria e ardhshme do të jetë e shtyrë të operojë me buxhetin të cilin e përfundon mandatin kjo qeveri. “Ky buxhet, edhe pse është dizajnuar duke përcjell rregullin fiskal, në mungesë të mekanizmave të kontrollit që janë paraparë në kudër të kuvendit nuk është imun ndaj keqpërdorimeve eventuale që rezultojnë si pasoj e mungesës së një mbikëqyrje të kujdesshme”, ka shtuar Hashani.

Zyrtarët e LDK’së dhe AAK’së e shohin të pamundshme idenë e nënkryetarit të PDK’së, Enver Hoxhaj, që ngërçi politik të tejkalohet ndërmjet PDK’së, LDK’së dhe AAK’së.
Nënkryetari i PDK-së, Enver Hoxhaj, ka propozuar si ide për dalje nga ngërçi politik një marrëveshje me një bazë sa më të gjerë, ku do të përfshiheshin PDK-LDK-AAK .

“Receta ime do të ishte që në situatën që jemi duhet të kemi një marrëveshje me një bazë sa më të gjerë. PDK së bashku me Lidhjen Demokratike dhe Aleancën të shohin mundësinë të nxjerrin vendin nga ngërçi politik ku ka hyrë. Së dyti të kemi një qeveri që duhet të adresojë reformat më kritike për çështjet më të rëndësishme në vend”, ka thënë Hoxhaj.

Por anëtari i Kryesisë së LDK-së, Sadri Ferati, ka thënë për “Epokën e re” se në këtë fazë tashme kur partitë e bllokut kanë arritur një marrëveshje një koalicion PDK-LDK ose edhe me AAK-në siç ka propozuar Hoxhaj është i pamundshëm të ndodhë.

Edhe anëtarja e Kryesisë së AAK-së, Donika Kadaj-Bujupi ka thënë se blloku tashme ka arritur një marrëveshje me të cilët përjashton PDK-në si partnere. Ajo ka thënë për “Epokën e re” se ngërçi mund të tejkalohet me partitë e bllokut.

“Nevoja për të sjellë një qeverisje ndryshe në Kosovë nuk lë asnjë hapësirë që PDK-ja të jetë brenda sepse atëherë nuk do të ishte ndryshim. Vendi ka nevojë për një reformë substanciale në politika ekonomike, luftim të varfërisë, korrupsionit, klientelizmit si dhe mënyrave të tanishme të qeverisjes duhet t’u vijë fundi. Përndryshe, Kosova nuk mund të vazhdojë tutje, sepse në shumë segmente po prapakthehemi”, është shprehur ajo.

Në fshatin Zatriq të Rahovecit është sulmuar me një mjet të fortë. Policia e Kosovës raporton se viktima nga ky sulm fizik ka pësuar lëndime trupore.

“Viktima ka raportuar se pas një marrëveshje i dyshuari e ka sulmuare një mjetë të fort. Viktima ka pësuar lëndime trupore dhe i njëjti ka pranuar tretman mjekësor”, raporton Policia e Kosovës.

Policia është duke hetuar rastin./PrizrenPress.com/

Partitë opozitare në Prizren, presin që Gjykata e Apelit do të konfirmojë dënimin e kryetarit të Komunës, Ramadan Mujës dhe ish-drejtorëve të tij.
Asamblisti i LDK-së, Haziz Hodaj thotë se subjekti i tij politik është i bindur në fajësin e Ramadan Mujës. ”Sigurisht presim konfirmimin e dënimit”, thotë Hodaj.

Edhe asambleistja e Lëvizjes Vetëvendosje! në Prizren, Drita Millaku thotë se Gjykata e Apelit duhet të forëcojë vendimin e Gjykatës Themelore në Prizren, për dënimin e kryetarit Muja dhe ish-drejtorët e tij. “Shpresojmë që Gjykata e Apelit nuk do të tregohet e njëanshme dhe nuk është uzurpuar sikur Gjykata Kushtetuese nga PDK- ja”, thotë Millaku për “PrizrenPress”

“Vetëvendosje! pret që Gjykata e Apelit t’i forcoi edhe më shumë akuzat dhe të jep vendimin meritor”.Sipas saj, Gjykata e Apelit duhet të veprojë më shpejt në marrjen e vendimit të kryetarit të Prizrenit, Ramadan Mujës.

“Prizreni që një vit nuk ka kryetar e as qeveri. Në këtë qytet po vepron vetëm anarkia ku secili drejtor merr vendime krye në vete dhe vendimet e tilla janë shumë të dëmshme për qytetarët e Prizrenit”.

Gjykata e Apelit, javën e kaluar ka caktuar kolegjin e gjyqtarëve që do të merren me shqyrtimin e ankesave të mbrojtjes së kryetarit të Prizrenit Ramadan Mujës dhe ish drejtorëve të tij.

“Seanca nuk është caktuar ende”, ka konfirmuar thënë zëdhënësi i Gjykatës së Apelit, Arbër Jashari.

Kryetari i Prizrenit, Ramadan Muja, së bashku me pesë zyrtarë tjerë komunalë, më 13 mars, u gjetën fajtorë dhe u dënuan nga Gjykata Themelore e Prizrenit, për veprat penale të keqpërdorimit të detyrës dhe autoritetit zyrtar.

Muja, për katër pikat e aktakuzës, u dënua me burgim prej dy vjetësh, me kusht që ai të mos kryejë vepra tjera penale gjatë 3 vjetëve. Ai po ashtu mori edhe dënimin plotësues, ndalimin e ushtrimit të funksioneve publike në kohëzgjatje prej 30 muajsh.

Minir Krasniqi, ish-drejtor i Administratës Publike u dënua me 1 vjet e 6 muaj burgim me kusht që për dy vjet të mos bëjë vepër tjetër penale. Edhe Krasniqi nuk ka të drejtë të ushtrojë funksione publike për 18 muaj.

Kadri Ukimeri, ish-drejtor i Gjeodezisë dhe Sadik Paçarizi, ish-drejtor i Urbanizmit u dënuan me 8 muaj burgim me kusht që për 2 vjet të mos bëjnë vepër tjetër penale.

Avni Ademaj, ish-drejtor i Gjeodezisë dhe Kadastrit u dënua me 5 muaj burgim me kusht që për 1 vit të mos shkaktojë vepra tjera penale.

Historik i shkurtër i rastit Muja

Procedura ndaj Mujës dhe të tjerëve, ishte nisur më 25 mars të vitit 2013, për të përfunduar në marsin e vitit 2014.Muja dhe të tjerët akuzoheshin se kishin bërë keqpërdorime me prona komunale dhe të menaxhuara nga Agjencia Kosovare e Privatizimit.

Gjykimin e udhëhoqi kryetari i trupit gjykues nga radhët e EULEX-it, Vladimir Mikula.

Mozbatimi i veprimit të Gjykatës Supreme

Në vitin 2006, Gjykata Supreme kishte shpallur Komunën e Prizrenit si pronare legjitime të parcelave të tokës me numër 8617 dhe 8619 që kanë sipërfaqe prej 0.20.65 dhe 0.06.22 hektarësh. Të dyja kanë vlerë rreth 50 mijë euro.Për tri vjet rresht, nga 1 korriku 2008 deri më 29 nëntor 2011, Muja së bashku me Kadri Ukimerin, në cilësinë e Drejtorit të Gjeodezisë, nuk kanë ekzekutuar këtë aktgjykim, thuhet në pikën e parë të aktakuzës.

Edhe pse avokati publik i Komunës së Prizrenit kishte njoftuar Kryetarin e Komunës, përmes një memorandumi që vendimi i Supremes duhej ekzekutuar, Muja kishte urdhëruar Kadri Ukimerin të bënte të kundërtën.

Sipas aktakuzës, Muja “ka urdhëruar Ukimerin që të mos bënte ndryshimet e duhura në shënimet kadastrale që do ta bënin Komunën e Prizrenit pronare të ligjshme të parcelave tokësore”.

Meqenëse toka nuk ishte kthyer në pronësi të komunës, nga veprimet e kryetarit të komunës dhe drejtorit të gjeodezisë kanë përfituar Minir Krasniqin (i pandehur tjetër në këtë rast), M.Q dhe J.A.
Dhënia e tokës “Gulistanit”

Pika e dytë e aktakuzës përfshin periudhën nga 24 nëntori 2010 dhe 11 shkurt 2011, gjatë së cilës kohë Muja së bashku më Minir Krasniqin, drejtor i Administratës dhe Avni Ademajn, ushtrues detyre i Drejtorit për Gjeodezi, kanë vepruar në bashkëkryerje që t’i sjellin dobi pasurore Qendrës Edukative Arsimore “Gulistan”.

Të tretë në mënyrë të paligjshme kanë marrë në posedim parcelën e tokës me numër 800/2 me sipërfaqe prej rreth 50 mijë metra katrorë në vendin e quajtur “Boka Boka” me vlerë prej 100 mijë e 600 eurosh.

Toka ishte e regjistruar në emër të Organizatës Punuese të Pylltarisë “Sharri” dhe administrohej nga AKP-ja, andaj komuna nuk mund ta posedonte.

Në mënyrë që të administronin me të, nën organizimin e Mujës, Krasniqit dhe Ademajt, toka kishte kaluar nga AKP-ja në pronësinë e komunës së Prizrenit brenda një dite.Tokën e AKP-së Muja e mori në posedim më 24 nëntor 2010, kur kishte lëshuar vendimin 01/730. Të njëjtin ditë, Minir Krasniqi kishte kërkuar nga Avni Ademaj që të bënte ndryshimet e nevojshme në kadastër të cilat ishin bërë nga ky i fundit po atë ditë.

Kështu, tre muaj pasi kishte marrë paligjshëm tokën e AKP-së, më 11 shkurt 2011 Komuna ka nënshkruar kontratë më Qendrën Edukative Arsimore “Gulistan” me të cilën në mënyrë të paligjshme i jepej kësaj të fundit toka e AKP-së në shfrytëzim për 40 vjet pa kompensim.

Tokë edhe për fabrikën “Kamila”

Pika e tretë e aktakuzës tregon që Muja kishte vazhduar të merrte veprime të paligjshme kur bëhej fjalë për shfrytëzim pronash.

Në periudhën kohore nga 15 dhjetori 2010 deri më 14 prill 2011, Ramadan Muja dhe Sadik Paçarizi, drejtor i Drejtorisë për Urbanizëm, kanë tejkaluar kufijtë e autorizimive të tyre, kur i dhanë tokën publike fabrikës së çokollatës “Kamila”.

Me vendim të Mujës fabrikës i është ndarë toka prej 20 mijë metrash katrorë, në vlerë prej 40 mijë eurosh, në formën e shfrytëzimit pa pagesë, pa i ndjekur procedurat përkatëse ligjore. Pika e fundit e aktakuzës, ka të bëjë me ndërprerjen e përfaqësimit të ekspertëve të gjeodezisë në lëndët e gjykatës.

Sipas aktakuzës së prokurorisë, kryetari Muja me nxjerrjen e një konkluzioni më 2 gusht 2012, të cilën për nënshkrim ia kishte ofruar drejtori i Administratës Minir Krasniqi, kishte ndaluar përfaqësimin e ekspertëve të gjeodezisë në gjykatë.

Ndërsa drejtori i Gjeodezisë dhe Kadastrit, Abdullah Tejeci, në bazë të këtij konkluzioni i kishte urdhëruar ekspertët që të mos përfaqësojnë në gjykatë, kështu që ishte bërë bllokimi i lëndëve gjyqësore për gjashtë muaj rresht./PrizrenPress.com/