Pas vendimit të Ramadan Mujës për pezullim të pozitës së kryetarit të Prizrenit, nuk janë pezulluar edhe pakënaqësitë e të tjerëve që dëshirojnë dorëheqjen e tij.

Kryetari i “Ec ma ndryshe”, Hajrullah Çeku, thotë se nuk do ta pranojë një vendim të tillë, por do të vazhdojnë të kërkojnë dorëheqjen e Mujës edhe të nesërmen me anë të protestës, që, thotë se do të jetë paqësore.

“Nuk do ta pranojmë këtë farë lloj vendimi i cili nuk ka kurrfarë bazë ligjore”, tha Çeku për emisionin InfoMagazinë në Klan Kosova, citon lajmi.net.

“Ju e shihni edhe në tekstin e vendimit askund nuk thirret vendimi në ndonjë bazë ligjore. Sepse, nuk ka bazë ligjore”.

“Pezullimi për ne nuk do të thotë kurrgjë. Të njëjtën kohë për neve është një përpjekje e kryetarit Muja për ta evituar aktin e dorëheqjes”.

“Dorëheqja si akt moral ishte dashur të vije në fillim por nuk ka ardhur, megjithatë, ne ende presim”.

Në anën tjetër, eksperti i pushtetit lokal, Besnik Tahiri, cilëson veprimin e kryetarit të Prizrenit, si një veprim nga i cili ligji për qeverisje lokale nuk njeh një nen të tillë.

“Kjo është një problematikë shumë e rrallë. Këtu duhet të reagojë Ministria e Pushtetit Lokal. Ajo që dihet saktësisht është që një kryetar i cili nuk ushtron detyrën e tij pa arsye Komuna duhet të shkojë në zgjedhje”.

“Në këtë rast kryetari është në mes të dy pozicioneve, të dorëhiqet, ose ta shfrytëzojë zbrazëtinë ligjore, nenin 56 piken e, do të thotë, kryetari duhet të lirojë detyrën e vet deri sa ka një vendim të ligjit e cila është 30 ditë”.

Tahiri ka thënë se pezullimi i detyrës së tij, nënkupton mosshkuarja në punë, e cila bie ndesh me interesat e qytetarëve, të cilët dhanë votën për një kryetar aktiv.

“Ajo që duhet të ruhemi dhe të kemi kujdes është në çështjet që rregullohen me ligj si kjo të mos lënë hapësirë për interpretimin më ndryshe”.

“Muja është ngutë, është veprim i ngutshëm”, tha Besnik Tahiri për emisionin InfoMagazinë në Klan Kosova.

Me veprimin e tij për pezullim të postit të Kryetarit të Prizrenit, Ramadan Muja e ka zënë pa përgatitur edhe partinë e tij.

Sekretari i Partisë Demokratike të Kosovës (PDK), Basri Musmurati, i kontaktuar nga Express, ka thënë se nuk mund të komentojë konkretisht për këtë çështje.

“Dëgjova që Ramadan Muja e ka pezulluar pozitën e tij, por zyrtarisht nuk kemi marrë ende diçka. Pa marrë një njoftim zyrtar për këtë veprim të tij, ne nuk mund të komentojmë as si parti e as si Ministri e Administratës së Pushtetit Lokal kurrgjë.”, ka thënë Musëmurati, i cili njëherësh është edhe Zëvendësministër i Pushtetit Lokal, shkruan Express.

Ramadan Muja sot ka marr vendim që të pezullojë pozitën e tij prej Kryetari të Prizrenit, pas protestave të shoqërisë civile që nisën kur ai u shpall fajtor nga gjykata për korrupsion. Shoqëria civile dhe partitë që e përkrahin këtë protestë në Prizren thonë që pezullimi i pozitës është veprim që nuk e njeh ligji, dhe për më shumë, thonë që është veprim i pamjaftueshëm- ata kërkojnë dorëheqjen e Mujës.

Lëvizja Vetëvendosje! Në Prizren, vlerëson se pezullimi i postit është vetëm një mashtrim i radhës i Ramadan Mujës. Sipas kësaj lëvizje pezullimi nuk është dorëheqje.

“Të nderuar qytetarë të Prizrenit,sot mbas vetëm 2 dite protestash të përmasave të vogla qytetarët e Prizrenit me guximin e tyre arritën që kryetarin e inkriminuar me gjyq ta detyrojnë të kërkoj rrugëdalje prej situatës ku është gjet me papërgjegjësinë e tij”.

“Ai sot ka nënshkruar një shkresë me të cilën deklaron se pezullon ushtrimin e detyrës së tij deri në përfundimin e procesit personal të ankesave për vendimin gjyqësor ndaj tij”.

“ LVV në Prizren dëshiron të njoftojmë opinionin se ky vendim i tij është një mashtrim i radhës, me anë të së cilës dëshiron të përfitoj në kohë, posaçërisht kur dihet se ai nesër do të ballafaqohet me protesta qytetare për të cilën e kan përkrahjen tonë të plotë”.

“Vlerësimin tonë e bazojmë në faktin se Pezullimi nuk është njëejtë si dorëheqja – kur thotë se e pezullon (teknikisht ngrirje) të pozitës derisa procesi gjyqësor vazhdon. Kjo nuk është mjaft, sepse ai në çdo moment mundet të pezulloj vendimin për pezullimin e pozitës. Teknikisht ai qysh mbasnesër mund të kthehet në pozitën e të parit të qytetit.

Që mos të krijohet huti në opinion, dëshirojmë të konfirmojmë se nesër në ora 12 do të jemi së bashku me Ju në Shadërvan, në përkrahje të protestave të qytetarëve të Prizrenit. Nesër së bashku do ta përcjellim mesazhin tonë qytetarë shkelësve të ligjit,thuhet në komunikatën e Qendrës së VV-së në Prizren”. /PrizrenPress.com/

Dega e Lidhjes Demokratike të Kosovës, në Prizren konsideron se veprimi i fundit i te dënuarit Muja, për t’u vetpezulluar nga detyra zyrtare është i pabazuar ne ligj, dhe si tillë përbenë shkeljen ligjore te radhës.

LDK konsideron se e vetmja rruge qe i ka mbet të dënuarit Muja , është dorëheqja sa me parë, nga pozita e te qenurit kryetar i Komunës se Prizrenit.

“LDK iu bene thirrje te gjithë anëtarëve dhe simpatizantëve, që më 19.03.2014(e mërkure), të dalim te sheshi “Shatërvan” nga ora 12, dhe te protestojmë ne mënyrë paqësore , kundër regjimit kleptokrat që është instaluar ne Komunën e Prizrenit”, thuhet ne komunikaten e LDK’se

M. Gashi është dënuar me 2 vjet burgim nga Gjykata Themelore në Prizren. Afërdita Kicaj, zyrtare për Informim Publik në Gjykatën Themelore të Prizrenit, tha se Gashi është shpallur fajtor për shkak të veprës penale të mashtrimit, nga neni 261 paragrafi 2 të KPK dhe e ka gjykuar me 2 vjet burgim efektiv.

”Vepra penale ka të bëjë me mashtrim e që vlera e saj është 162.600,00 euro”, tha Kicaj. /PrizrenPress.com/

Kryetari i Prizrenit, Ramadan Muja, ka marrë vendim të pezullojë postin e kryetarit të Prizrenit.

“Duke respektuar vendimet institucionale,dhe dinjitetin tim si kryetar i bindur në pafajësinë time, deri në vendimin e Gjykatës së Apelit pezullojë punën time si kryetar i Prizrenit”, thuhet në komunikatën e Mujës, lëshuar për media.

Ai tha se me këtë vendim dëshiron t’i japë mundësi organeve të drejtësisë që të shqyrtojnë rastin në mënyrë të pavarur.

“Besoj në mirëkuptimin e qytetarëve për vendimin tim që kam marrë”/PrizrenPress.com/

Vazhdojnë reagimet e partive politike dhe organizatave në vend rreth arrestimit të protestuesve në Prizren, të cilët kërkonin dorëheqjen e kryetarit të Komunës, Ramadan Muja.

Përfaqësues të Institutit Demokratik të Kosovës (KDI) kanë thënë se Ramadan Muja dhe zyrtarët e tjerë të Komunës së Prizrenit, të shpallur fajtor nga Gjykata Themelore e këtij qyteti, duhet të japin dorëheqje të menjëhershme, pasi në këtë mënyrë do të respektohen gjykatat në Kosovë.

Aleanca për Ardhmërinë e Kosovës duke iu referuar zhvillimeve të fundit në Komunën e Prizrenit, vlerëson se pushteti në largim duhet të jetë i kujdesshëm dhe të mos përdorë çdo mjet për të mbrojtur të keqen që e ka ndërtuar vetë me vite, thuhet në një kumtesë të AAK-së.

“AAK fton që pushteti në largim të mos e përdorë Policinë e Kosovës për të rrahur protestues. Të drejtën e protestës nuk duhet tentuar ta ndalin këta që keqqeverisen për vite me radhë. As në Prizren dhe as në Kosovë. Pushteti në largim duhet ta dijë se ndërrimi i pushtetit është bazament funksional i demokracisë. Kushdo që ka tentuar ta mbajë pushtetin me aparate të dhunës, ka dështuar. Pushteti në largim synon të krijojë situata të rënda të sigurisë, prandaj edhe protestuesit duhet të jenë të kujdesshëm dhe të mos përballen me Policinë”, theksohet më tej në reagimin e AAK-së.