-6.2 C
Prizren
E enjte, 9 Shkurt, 2023

Ambasada e ShBA-së në Prishtinë: Pavarësia e Kosovës është fakt

Ambasada amerikane në Prishtinë ka thënë se qëllimi i Shteteve të Bashkuara të Amerikës (ShBA) është që ta mbështesë Kosovën që të bëhet pjesë e strukturave evropiane dhe euroatlantike, duke theksuar se “pavarësia e Kosovës është fakt”.

Ky reagim në “Twitter” vjen pas një lajmi se llogaria e Ambasadës amerikane në këtë rrjet social kishte “pëlqyer” një postim të një media serbe që fliste për çnjohjet e pavarësisë së Kosovës, të pretenduara nga presidenti serb, Aleksandër Vuçiq.

“Llogaria zyrtare në ‘Twitter’ e Ambasadës amerikane nuk e ka ‘pëlqyer’ qëllimshëm asnjë postim në ‘Twitter’ në 24 orët e fundit. Siç e kemi thënë edhe më herët, kur ne duam të artikulojmë një qëndrim, ne e bëjmë përmes kanaleve zyrtare, deklaratave, e jo përmes ‘pëlqimeve’ në rrjetet sociale”, është thënë në sqarim.

Ambasada ka shtuar se kundërshton në mënyrë kategorike “çdo përpjekje për të vënë në pikëpyetje pavarësinë dhe sovranitetin e Kosovës”.

Presidenti i Serbisë, Aleksandër Vuçiq, gjatë një konference për media më 4 janar, ka deklaruar se është duke pritur nga shteti i dhjetë, që sipas tij, të tërheqë njohjen e pavarësisë së Kosovës. Ai nuk e ka specifikuar se për cilin shtet bëhet fjalë.

Vuçiqi ka pretenduar se nëntë shtete veçse kanë tërhequr njohjen e Kosovës: Somalia, Burkina Faso, Gaboni, Esvatini, Libia, Guniea, Antigua dhe Barbuda, Shën Lucia dhe Maldivet.

Sipas Ministrisë së Punëve të Jashtme dhe Diasporës janë 106 shtete që deri më tani e kanë njohur pavarësinë, që autoritetet e Kosovës shpallën më 2008.

Serbia edhe në të kaluarën ka pretenduar se shtete të ndryshme kanë tërhequr njohjen e Kosovës.

Ndërsa në bazë të marrëveshjes që palët arritën në Shtëpinë e Bardhë më 4 shtator 2020, Serbia ishte pajtuar që për një vit të ndalonte përpjekjet për të lobuar kundër pavarësisë së Kosovës, ndërkaq Kosova ishte pajtuar që brenda kësaj periudhe të mos aplikonte për anëtarësim në ndonjë mekanizëm apo institucion ndërkombëtar, shkruan “Rel”.

Edhe pas skadimit të këtij moratoriumi, Shtetet e Bashkuara u kanë bërë thirrje palëve që të vazhdojë respektimin e tij.

Ndryshe, Kosova dhe Serbia zhvillojnë dialog me ndërmjetësimin e Bashkimit Evropian, që e mbështet edhe ShBA-ja. Dialogu thuhet se ka për qëllim që të përmbyllet me një marrëveshje ligjërisht të obligueshme. Por, palët kanë qëndrime të kundërta sa i përket përfundimit të procesit që ka nisur më 2011. Përderisa Kosova kërkon që një marrëveshje përfundimtare të përfshijë njohjen reciproke, Serbia kërkon një zgjidhje kompromisi – pa specifikuar se për çfarë kompromisi bëhet fjalë.

Më Shumë

Shtatë raste të dhunës, dy prej tyre në Prizren

Policia e Kosovës ka njoftuar së në 24-orëshin e fundit janë raportuar për shtatë raste të dhunës në familje. Ku dy prej tyre ishin në...

LDK-ja tërheq votat që Erion Veliaj të shpallet “Qytetar Nderi” i Prizrenit

Anëtarët e LDK-së në Kuvendin e Komunës së Prizrenit, i kanë rënë pishman që kanë votuar për shpalljen “Qytetar Nderi” të kryebashkiakut të Tiranës,...

Lajmet e Fundit