Komuna e Prizrenit këta muaj e fundit ka bërë një mori përurimesh dhe ka vërë një numër gurëthemelesh, të cilat domosdo se qytetarët i kanë gëzuar, por, siç ndodh rëndom, projektet e këtilla zvarriten dhe qytetarët pak ua shohin hairin. Opozita prizrenase nuk pajtohet me mënyrën se si përurohen projektet dhe pastaj nuk e shohin dritën për një kohë të gjatë.
Kreu i degës së LDK- së në Prizren, Haxhi Avdyli, ka theksuar se në bazë të pasqyrës së buxhetit të komunës vërehet që ka një numër të madh të projekteve të reja, derisa ka projekte të tjera që po zvarriten me vite.
“Kjo tregon që Komuna e Prizrenit punon në stihi dhe vetëm për fushatë, e më pak për interesin e qytetarëve. Projektet madhore, si shkolla, shtëpi kulture e tranzitet kanë mbetur në gjysmë për shkak të papërgjegjësisë së Komunës, e në anën tjetër bëhen shtrime rrugicash e trotuaresh sa për qëllime elektorale”, është shprehur ai për “Kosova Sot”.