Qysh në fillim të muajit janar, e para e vendit, pritet të themelojë me dekret Komisionin, i cili do t’i pranojë të gjitha kërkesat për falje. Më pas, ky Komision, do t’’i rekomandojë Presidentes për faljet. Mirëpo, për çdo falje, varet ekskluzivisht nga Presidentja.
Presidentja e Kosovës, sikurse edhe herëve tjera, me 17 shkurt, bënë faljen e të burgosurve, sipas kompetencave që i jep Kushtetuta.
Ndërkohë, udhëheqës të Institutit të Kosovës për Drejtësi, shpresojnë se edhe këtë vit do të ketë falje në bazë të ligjit.
Pasi, vite me parë nga ish presidentët kishte pasur shkelje të rënda, duke falur persona që nuk i plotësojnë kriteret sipas ligjit.
Selim Selimi, këshilltar ligjor i Presidentes, Atifete Jahjaga, tha për Kosovapress, se Presidentja, tashmë, dy herë ka shpallur falje, në bazë të kompetencave që i jepen asaj nga Kushtetuta dhe ligji në fuqi, por edhe rregullores së brendshme të zyrës së Presidentes.
“Tash, Presidentja, është në planifikim të formimit të Komisionit për Falje, Komision që Presidentja e formon, gjithashtu, me dekret dhe, i mbledh personat që kanë të bëjnë me faljen, të institucioneve të ndryshme dhe ai Komision i shqyrton të gjitha kërkesat një nga një dhe ai Komision i propozon Presidentes numrin që i plotësojnë kushtet ligjore dhe kushtet që janë të rregulluara me legjislacionin sekondar dhe, pastaj, Presidentja e ushtron kompetencën e saj kushtetuese dhe i fal personat që janë propozuar”, tha ai.
Megjithatë, ka pasur shumë kritika se ish presidentët kanë falur në mënyrë të kundërligjshme persona të burgosur që nuk i plotësojnë kriteret ligjore. Por, Selimi thotë se i burgosuri duhet t’i plotësojë kriteret për të paraqitur kërkesën për falje. Mirëpo, ai thotë se nuk do të ketë falje në kundërshtim me ligjin.
“Më herët, në faljen e parë, ka pasur persona, në faljen e dytë jo. Por, vepra penale e vrasjes nuk përjashtohet nga këto kritere për t’u falur, janë disa kategori tjera që kanë të bëjnë. Por, kriteret e rëndësishme janë pendimi i të burgosurit, pastaj aftësia e të burgosurit për t’u risocializuar më tutje, pasi që të tregojë në kërkesën e tij apo saj se i burgosuri e meriton një falje të tillë, një kompetencë që i është dhënë Presidentes. Pra, veprat penale janë të përfshira, përveç të disa kapitujve specifik që janë veprat penale kundër rendit kushtetues, veprat penale kundër shtetit e tjera”, thotë Selimi.
E, në anën tjetër, Betim Musliu nga Instituti i Kosovës për Drejtësi, shpreson se edhe këtë herë, Presidentja do ta shfrytëzojë institutin e faljes duke respektuar plotësisht ligjin, siç e ka bërë edhe në dy herët e kaluara.
“Unë shpresoj që ajo që është ndërtuar nga Presidentja Jahjaga do të vazhdoj, nuk do të ketë kufizime në numrin e personave që duhet falur. Duhet falur ata persona, të cilët e meritojnë faljen të bazuar në kritere, të bazuara në ligj. Por, krejt kjo varet nga vullneti individual dhe nga pushteti i jashtëzakonshëm që ka Presidenti, sepse falja nuk është e drejtë e të dënuarit, por e Presidentit”, thotë Musliu për Koosvapress.
Musliu, thotë se duke parë fillet e zbatimit të institutit të faljes në Kosovë, atëherë, sipas tij, është një pasqyrë jashtëzakonisht e keqe se si është zbatuar ky institut në Kosovë. Kjo, sipas tij, për shkak se në vitin 2009, 2010 dhe 2011 ka pasur të dënuar, të cilët janë falur në kundërshtim me kriteret dhe me ligjin për falje.