Kosova është vend me bukuri të rralla natyrore, dhe historike. Një ndër qytetet më të rëndësishme që po bëhet vend tërheqës për t’u vizituar nga turistët, është edhe Prizreni me histori dhe bukuri natyrore.

Lidhja e Prizrenit, Kalaja, Lumëbardhi, objektet e kultit dhe Prevalla, po e bëjnë këtë qytet të vjetër një prej destinacioneve më të preferuara në Kosovë.

Prizreni i bukur këto ditë të ftohëta është bërë atraktiv për vizitorë nga Shipëria, Spanja si dhe nga Japonia, raporton KosovaPress.

Alberto Nicolau nga Spanja i cili kishte ardhur me partneren e tij për ta vizituar këto ditë Prizrenin, është shprehur për KosovaPress se ajo çka po e bënë të veçantë këtë qytet, është Kalaja e Prizrenit dhe objektet fetare. Ai tha se Prizreni ka vende dhe objekte të bukura që është e nevojshme të promovohet edhe më shumë për turistët e huaj.

Ndërsa, partneres së Albertos, Roser Nicolau, pamja përreth qytetit me pyje dhe ambienti i pastër, iu duken interesante. Përveç kësaj, ajo tha se në qytetin e bukur në Prizren po ndihet edhe mjaft e sigurt.

Turistja tjetër, e quajtur Silva nga Japonia, që sapo kishte mbërritur në Prizren, kishte dalur për ta “eksploruar” qytetin.  Silva theksoi se në këtë qytet të vjetër, objektet historike dhe fetare, të gjitha në një vend, janë pak metra larg njëra- tjetrës.

E Uetuuru Kambato nga Afrika, një sportist i cili luan në Klubin e futbollit “Liria”,  thekson se tërheqës për të është Shatërvani. Kambato, ka shprehur interesin edhe të jetojë në Prizren.

Për turizmin në këtë qytet folën edhe nga Shoqata e Turizmit dhe nga Drejtoria e Turizmit në Komunën e Prizrenit. Ramadan Tarashaj nga kjo drejtori thotë se numri më i madh i turistëve është nga Shqipëria dhe vendet tjera. Sipas tij, institucionet përkatëse në Kosovë duhet ta promovojnë sa më shumë turizmin, pasi që  sipas tij, Prizreni dhe vendet tjera kanë potencial për këtë sektor.

Ndërsa, kryetari i shoqatës së turizmit “Educo”, Veron Tara, ka theksuar se që prej pandemisë Covid-19, Prizreni është vizituar nga mbi një milion turistë. Tara ka thënë se në Prizren nuk ka më sezon, pasi që sipas tij vizitohet gjatë 12 muajve të vitit.

Sipas Agjencisë së Statistikave të Kosovës, përveç Prizrenit, edhe Prishtina dhe Peja mbesin vendet më të vizituara në Kosovë.

Katër shtëpi të fshatit Leskovec, të komunës së Prizrenit, janë të rrezikuar nga rrëshqitja e dheut. Kjo gjendje është krijuar pas fillimit të punimeve në rrugën Prizren-Tetovë, thonë banorët e këtyre shtëpive. Rrezikshmëria është rritur çdo ditë e më shumë, thotë Hajredin Berisha, pasi edhe rruga e asfaltuar nuk është më.

“Kompania e cila është duke vijuar punimet në rrugën Prizren- Tetovë, ka bërë disa gjana që na ka sjellë deri në këtë gjendje. Punimet po vazhdojnë, premtime na kanë dhënë qysh para dy muaj e gjysmë, se do të sanohen gjërat, por janë duke shkuar në gjendje më të rrezikshme”, tha për RTK-në, Hajredin Berisha, pronar i njërës prej shtëpive.

Pas kaq muajsh, banorët kërkojnë ndalimin e punës, deri në rehabilitimin e shtëpive.

“Kemi tentuar t’i ndalim edhe punimet e kompanisë, jo t’i ndalim që të mos vazhdon rruga, por t’i ndalim që të sanohen dhe të rehabilitohen familjet. Toka është e jona, është afër dy hektarë e kemi babë e babgjysh”, vijoi tutje Berisha.

Për këtë rast është njoftuar policia rajonale, ndërsa drejtori i Inspektoratit, Islam Ukimeri, bën të ditur se, disa herë ekipet kanë dalë në terren, ndërsa po e monitorojnë situatën.

“Dje që e kemi marrë informatën nga policia, kemi dalë në vendngjarje e kemi konstatuar gjendjen dhe rrezikun që është shkaktuar atje, e kemi njoftuar Drejtorinë e Emergjencave, tani kur jemi duke folur inspektorët janë në terren dhe janë duke rrethuar objektet e rrezikuara”, tha Ukimeri.

E kontaktuar nga RTK, drejtoresha për Emergjenca dhe Shpëtim, Ramize Sinani-Shala, tha se në terren kanë dalë ekipet e gjeodezisë, që do të verifikojnë shkaqet e rrëshqitjes së dheut, e më pas do të merren masa.

Nga Ministria e Infrastrukturës nuk janë përgjigjur lidhur me këtë çështje./rtk/