Seanca përgatitore sipas padisë së çerdhes ”Yllka” ndaj të paditurës Komuna e Prizrenit, ka nisur sot në Gjykatën Themelore të Prizrenit.

Përfaqësuesit e paditëses avokat Urim Vokshi dhe avokat Leutrim Syla, prezantuan në seancën e sotme qëndrimet e tyre rreth padisë, ndërsa për Komunën e Prizrenit nuk u paraqit askush.

Avokatët e palës paditëse propozuan që shqyrtimi të vazhdojë edhe pa prezencën e përfaqësuesit nga Komuna e Prizrenit.

Avokati Urim Vokshi deklaroi se ”…ngelim në tërësi si pranë padisë për pengim posedim, dhe kërkojmë nga Komuna e Prizrenit, që të mundësohet shfrytëzimi dhe posedimi i papenguar i pronës dhe i objektit, për çka në vitin 2010 është nënshkruar një kontratë ndërmjet palëve për shfrytëzimin e objekti me kohë 20+10 vite”.

Më tutje avokati i propozoi gjykatës provat nga ana e tyre që duhet të administrohen dhe të analizohen për të ardhur deri te vendosja e çështjes.

Gjykatësi i rastit Atdhe Berisha, i aprovoi shumicën e provave të propozuara, pos disa kërkesave që nuk kishin relevancë me çështjen.

Shqyrtimit kryesor u caktua me datë 13 nëntor.

Çerdhja Yllka përmes një komunikate kishte njoftuar se kishin pranuar një aktvendim nga Gjykata Themelore në Prizren për masë mbrojtëse të përkohshme karshi këtij objekti nga Komuna e Prizrenit për mos mbylljen e kësaj çerdhe.

Ky institucion përmes njoftimit kishin deklaruar se besojnë në drejtësinë në Kosovë dhe në këmbënguljen e tyre.

Ndryshe me datë 20 gusht zyrtarë komunal nga Komuna e Prizrenit kishin kërkuar mbylljen e menjëhershme të çerdhes, e cila vepron në kuadër të kolegjit “Mehmet Akif”.

Inspektorati i Komunës së Prizrenit kishin kërkuar që të lirohet objekti i çerdhes dhe shkollës fillore “Yllka” në këtë komunë, e cila vepron në kuadër të Kolegjit “Mehmet Akif”.

Ndërsa, drejtori i Drejtorisë së Arsimit në Komunën e Prizrenit, Skender Susuri për KALLXO.com e kishte konfirmuar se kryetari Mytaher Haskuka dhe Drejtoria e Administratës kanë marrë vendim për lirimin e objektit të kopshtit dhe shkollës “Yllka”.

“Kjo nuk ka të bëjë me Drejtorinë Komunale për Arsim, është një vendim të cilin e ka marrë kryetari i Komunës në konsultim me drejtorin e Administratës. Sepse ajo çerdhe i ka mbi 10 vite që nuk menaxhohet nga Drejtoria Komunale për Arsim. Ata kanë pasur një marrëveshje në vitin 2007 mes Administratës komunale, kryetari të komunës dhe menaxhmentit të çerdhes sepse s’kanë mund me mbulu me buxhet atë dhe ka kaluar në partneritet publiko-privat. Me sa e di unë pastaj ia kanë dhënë Mehmet Akifit. Marrëveshjet mes tyre nuk janë përmbajtur”, tha Susuri./kallxo.com/

I akuzuari për sulm ndaj personit zyrtar gjatë kryerjes së detyrës zyrtare, Faredin Cena, është deklaruar i pafajshëm në seancën fillestare të së enjtes në Gjykatën Themelore në Gjakovë, dega në Rahovec.

Pas leximit të aktakuzës nga prokurori Enis Gashi, i akuzuari ka thënë se nuk e ndien veten fajtor për akuzën me të cilën ngarkohet, duke shtuar se ai nuk e ka kryer këtë vepër penale.

I akuzuari deklaroi se ato që thuhen në aktakuzë nuk janë të vërteta, duke mohuar ta ketë goditur të dëmtuarin Afrim Cena.

Ai ka thënë se kishte shkuar vetëm për të sqaruar se pse ishte bastisur makina e tij.

“Pasi që më kanë futur në stacion pesë-gjashtë prej policë kanë filluar të më godasin edhe pse unë i kam pas duart e lidhura”, ka thënë i akuzuari, duke shtuar se gjatë seancës së shqyrtimit kryesor dëshiron të ballafaqohet me të dëmtuarin.

Gjykatësi Ilir Rashkaj, pas deklarimit të palës mbi fajësinë, tha se për seancën e radhës palët do të ftohen me ftesa të rregullta.

Ndryshe, në aktakuzën e Prokurorisë Themelore në Gjakovë të ngritur më 20 qershor 2014, Faredin Cena akuzohet se në stacionin policor në Rahovec ka sulmuar personin zyrtar, policin Afrim Cena pasi që ishte i nervozuar që policia kishin kontrolluar veturën e tij.

Sipas aktakuzës, ai më 10 shtator 2012 rreth orës 15:45, nën ndikim të alkoolit shkon në stacionin policor ku fillimisht i ofendon policët me fjalët “o majmun, kush janë ata majmun që bëjnë kontrollin e automjetit tim e unë nuk lejoj të bëhet një kontrollim i automjetit”.

Në aktakuzë thuhet se në momentin që i dëmtuari Afrim Cena me qëllim të qetësimit i tërheq vërejtjen i akuzuari e sulmon fizikisht dhe e godet me grusht në nofull, e nga goditja i dëmtuari pëson lëndime të lehta trupore.

Gani Zogaj, banor i Prizrenit po ankohet për një shtyllë elektrike afër shtëpisë së tij që sipas tij paraqet rrezik për jetesë.

Zogaj tha se ka kohë që ka problem me shtyllën elektrike, e cila sipas tij po e rrezikon qëndrimin në shtëpi edhe pse ai jeton përkohësisht në Kosovë.

Lidhur me këtë problem, Zogaj tha se e ka paditur KEDS-in.

“Kam bo disa herë kërkesë, por nuk kam marrë përgjigje, e kam marrë tash një avokat tu mendu që ai më kryen punë, por edhe ai nuk më ka kthyer përgjigje, padinë ma ka dërgu përmes telefonit, nuk më ka thirrë me shku me marrë”, tha Zogaj.

Zogaj tha se kjo shtyllë elektrike po i shkakton probleme edhe me fqinjtë.

Këtë padi Zogaj e ka bërë para dy vitesh dhe prej atëherë po vazhdon ta ketë problemin ende.

Zëdhënësi i KEDS-it, Viktor Buzhala tha për Kallxo.com se kjo padi nuk ka shkuar te pala e paditur, që në këtë rast është KEDS në Prizren.

“KEDS nuk ka pranuar asnjë vendim të gjykatës qe ju i referoheni për rastin në fjalë. Madje, lidhur me këtë rast gjykata nuk ka vepruar ende, pasi që neve si palë e paditur nuk na ka arritur as padia në fjalë. Prandaj nuk ka as vendim meritor nga gjykata në fjalë”, tha Buzhala për KALLXO.com.

KALLXO.com ka kontaktuar me Gjykatën Themelore në Prizren, ku sipas zëdhënëses së gjykatës kjo padi ka shkuar në gjykatë dhe është në proces.

“Kjo lëndë është në punë, është në proces” ka thënë Afërdita Kicaj, zëdhënësja e gjykatës në Prizren për KALLXO.com.

Avokati i Gani Zogajt, Nexhat Elshani tha se KEDS nuk po e pranon padinë me arsyen se shtëpia e Zogajt është ndërtuar pasi që KEDS ka vendosur aty shtyllën.

“Rasti është në procedurë dhe jam duke u munduar vet për këtë proces, KEDS nuk po e pranon padinë, as nuk po don me dhanë dëmshpërblim as me e heq shtyllën dhe tash jam duke u marrë personalisht me këtë, pasi që edhe ju më keni telefonuar kam vendosur të merrem vet”, tha Elshani për KALLXO.com.