Me një hapje të jashtëzakonshme si asnjëherë më parë që ka përfshirë edhe publikun përmes muzikës me këngë të grupit legjendar “Nirvana”, ka nisur edicioni i 17 i Festivalit ndërkombëtar të “Dokufestit” që sivjet ka për temë reflektimin.

Eroll Shporta hapi festivalin me një fjalim thumbues duke ironizuar me situatën aktuale politike në Kosovë.

“E rëndësishme është që edhe sivjet Dokufesti ka filluar me bereqet. Krejt kjo falë motit me reduktime 4 orë diell, 2 orë shi, u shpreh”, ka thënë Shporta që thumboi edhe politikanët me një tjetër pjesë të fjalimit të tij.

“Si mëlmesë, vetëm për ju mysafirë, kemi emëruar nja 30 zyrtarë të lartë për flladitje, vetëm e vetëm që ju të kaloni sa më mirë”, ka thënë ai.

“E juve ju mbetet vetëm një gjë: të vini ashtu sikurse jeni. Sikurse programi i larmishëm i Dokufest. Hajdeni edhe nëse ju pëlqejnë reflektimet me rreze të gjata, të shkurta, kombëtare apo ndërkombëtare. Nëse jeni gra, fëmijë, pleq, të rritur, radikal, të thjeshtë, të butë, të mençur, sidomos të mençur, apo thjesht dëshironi të reflektoni ‘në temë të lirë’. E ashtu qysh jemi, këtu sonte, ju thërras që ta bëjmë një hapje si asnjëherë në DokuFest”, ka thënë Shporta derisa në sfond filloi kënga “Come as you are” e grupit Nirvana.

Fjalimi i plotë i hapjes së ceremonisë së Dokufestit:

Zonja dhe Zotëri, njerëz të Dokufestit

Mirëmbrama

Me siguri ju kujtohem nga viti i kaluar, pata ardhë nga e ardhmja por mbeta këtu. Arsyja është se nuk mujta me marrë vizën. As termin skom mujt me bo.

Tu prit për një termin tek Ambasada e së Ardhmes në Kosovë, e shfrytëzova rastin me bo dicka që rrallë herë e bëjë: me reflektu mbi dhe për vetën.

Por reflektimi doli të jetë më i zorshëm sesa marrja e vizës. Sidomos kur reflektova për vetën në raport me të tjerët, e pash që nuk jam kërkah. Kam mendu se jam më i bukri, por jo, po flitet se Dua Lipa është më e bukur se unë…FAKE NEWS, FAKE NEWS!

E rëndësishme është që edhe sivjet Dokufesti ka filluar me bereqet. Krejt kjo falë motit me reduktime 4 orë diell, 2 orë shi. Për këtë qeshtje jemi në bisedime për shkëmbimin e rreve me diell dhe së shpejti do të vijn rezultatet pozitive ku reduktimet priten të bëhen së paku 8 me 2.

Përveq nisjes me bereqet, Dokufest ka edhe një risi tjetër. Organizimi sivjet ka arritur kulmin e menaxhimit. Përpos vullnetarëve do të kemi edhe zëvëndësvullnetarët. Secili vullnetar do ta ketë nga një apo më shumë zavëndës. Pse vullnetari me u kujdes për bileta e mos me pas një zavëndës që shkon me ble naj ujë a naj qebap.

Si mëlmesë, vetëm për ju mysafirë, kemi emëruar nja 30 zyrtarë të lartë për flladitje. Krejt kjo, vetëm e vetëm që ju të reflektoni sa më mirë, sa më thellë dhe me nxjerrë produkt nga ky reflektim.

E juve ju mbetet vetëm një gjë: të vini ashtu sikurse jeni. Sikurse programi i larmishëm i Dokufest. Hajdeni edhe nëse ju pëlqejnë reflektimet me rreze të gjata, të shkurta, kombëtare apo ndërkombëtare. Nëse jeni gra, fëmijë, pleq, të rritur, radikal, të thjeshtë, të butë, të mencur, sidomos të mencur, apo thjesht dëshironi të reflektoni “në temë të lirë”.

E ashtu qysh jena, këtu sonte, ju thërras që ta bëjmë një hapje si asnjëherë në DokuFest.

So, Come as you are and sing with us…

….I’ll be your mirror…

Ministri i Kulturës, Rinisë dhe Sportit, Kujtim Gashi, ka vizituar sot Komunën e Dragashit ku është takuar me kryetarin e komunës së Dragashit, Shaban Shabani.

Nën shoqërimin e deputetëve të Kuvendit të Kosovës që vijnë nga Regjioni i Prizrenit, Luljeta Veselaj-Gutaj, Duda Balje dhe Nezir Çoçaj, ministri Gashi e kryetari Shabani kanë nënshkruar dy memorandume bashkëpunimi, ndërtimin e palestrës sportive në Dragash, në vlerë financiare prej 700 mijë euro dhe ndërtimin e stadiumit në Dragash në vlerë prej 100 mijë euro.

Projekti i ndërtimit të palestrës sportive, në bazë të memorandumit, do të implementohet në dy faza. MKRS do të ndajë 200 mijë euro për vitin 2018, ndërkaq për vitin 2019 do të ndajë 500 mijë euro. Ndërsa, për projektin e stadiumit, ministria do të ndajë 100 mijë eurot e parapara në vitin 2019.

Me këtë rast, Ministri Kujtim Gashi, tha se MKRS-ja po investon në infrastrukturën sportive ashtu që të përmirësojë kushtet për të rinjtë e Kosovës që të merren me sport. “Sigurisht që edhe kjo vizitë është në kuadër të vizitave që po bëjmë nëpër komunat e Kosovës me qëllimin që t’i ndihmojë ato veçanërisht komunave të vogla që kanë më pak buxhet”, tha ministri Gashi.

“Bashkë me deputetët jemi sot këtu edhe për ta konfirmuar mbështetjen për kryetarin e komunës. Jam i lumtur që kemi arritur deri te konkretizimi i marrëveshjes për palestrën sportive i cili ka pasur fat të keq të mos ndërtohet deri tani. Kryetari ka pasur vazhdimisht kërkesë për ndërtimin e stadiumit të qytetit. Jemi pajtuar që edhe ky projekt të përfundojë dhe ai do të filloj në vitin 2019. Kemi pasur edhe një kërkesë nga deputetja znj. Balje për të investuar në vendbanimet që banojnë komuniteti boshnjak në këtë zonë. Edhe aty do të kemi një teren sportiv në mënyrë që ky komunitet të jetë pjesë e të gjitha aktiviteteve sportive që zhvillohen në komunën e Dragashit”, ka thënë mes tjerash ministri Gashi.

Ndërkaq, Kryetari i komunës së Dragashit, Shaban Shabani, e falënderoi ministri Gashi për angazhimin e tij për investimet në komunën që ai udhëheq dhe tha se sot ndjehen të nderuar si Komunë e Dragashit pas kësaj vizite të këtij delegacioni të zgjeruar. “Memorandumet që nënshkruam sot me ministrin Gashi janë dy projekte madhore për Komunën e Dragashit, projekte që do të rrisin nivelin e aktiviteteve sportive dhe gjithsesi do të krijojnë kushte më të mira për sportistët tanë” u shpreh kryetari.