Gjykata Themelore në Prizren i ka caktuar masën e paraburgimit në kohëzgjatje prej 30 ditëve, të akuzuarit për sulm, Afrim Nikoqit. Kërkesa për caktimin e një mase të tillë u bë nga prokurorja Elfete Purova.

Në seancën e mbajtur të mërkurën, prokurorja Purova konsideroi se janë plotësuar kushtet ligjore që të akuzuarit t’i caktohet masa e paraburgimit, pasi që i njëjti dyshohet edhe për një vepër tjetër penale.

Një kërkesë e tillë u kundërshtua nga mbrojtësja e të pandehurit, avokatja Elvane Gjini, e cila për këtë seancë ishte e angazhuar sipas detyrës zyrtare. Sipas saj, një kërkesë e tillë nuk është e bazuar në prova. Avokatja Gjini kërkoi nga gjykata që ta refuzojë kërkesën e prokurores Purova, duke marrë parasysh faktin se është hera e parë që i mbrojturi i saj po akuzohet për një vepër penale.

Pas dëgjimit të prokurores dhe avokatit mbrojtës, gjykatësi Gani Kastrati mori vendim me të cilin të pandehurit Afrim Nikoqi i shqiptohet masa e paraburgimit prej 30 ditëve. Sipas tij, pasi që Nikoqi është shtetas i Republikës se  Shqipërisë, mund të arratiset, dhe kjo do të vështirësonte procesin gjyqësor.

Ndryshe, Nikoqi akuzohet se me 24 prill 2017, në rrugën “De Rada” në Prizren,  përkatësisht afër stacionit të autobusëve, me dashje përdor forcën ndaj të dëmtuarit Barbaros Sojhadi. Këtë e bën në atë mënyrë që fillimisht e ndalon të dëmtuarin dhe kërkon nga ai që ti blejë dy qofte. Sojhadi i tregon të pandehurit se nuk ka para, duke i thënë se nëse nuk beson lë ta kontrollojë. Në atë moment i pandehuri i drejtohet me fjalët “qiti paret”, e më pas e grushton në fytyrë, por nuk i shkakton lëndime të dukshme trupore.

Me këto veprime i akuzuari Afrim Nikoqi pretendohet se ka kryer veprën penale “sulm” nga neni 187 paragrafi 1, të Kodit të ri Penal të Republikës së Kosovës. Sipas këtij kodi, vepra në fjalë është e dënueshme me gjobë ose deri në tre vite burgim./betimiperdrejtesi/

Mbi 200 kg drogë marihuanë janë konfiskuar në operacionin e zhvilluar dje e sot në rajonin e Gjakovës dhe Ferizajt.

Policia e Kosovës në një konferencë për media ka prezantuar drogën e konfiskuar gjatë një operacioni të zhvilluar dje në rajonin e Gjakovës dhe sot në rajonin e Ferizajt.

Sipas Policisë, në Krushë të Madhe janë konfiskuar 134 kilogramë marihuanë, ndërsa në fshatin Bibaj 108 kilogramë.

Lidhur me këtë rast janë arrestuar 9 persona. Shtatë janë dërguar në mbajtje e dy janë liruar në procedurë të rregullt.

Kjo është sasia më e madhe e drogës e konfiskuar gjatë një operacioni që nga dhjetori i vitit të kaluar, kur Policia në pikën kufitare Dheu i Bardhë kishte kapur 240 kilogramë marihuanë, e cila besohej se ishte e destinuar për Zvicër.

Për shkak se mungoi avokati Hajrip Krasniqi, u shty seanca e gjykimit të rreshterit policor Nuredin Begolli.

Në çështjen penale ku akuzohet rreshteri policor Nuredin Begolli për keqpërdorim të informatës zyrtare, seanca u shty pasi që mbrojtësi i tij avokati Hajrip Krasniqi nuk ishte i pranishëm.

Rreshteri Begolli arsyetoi mospraninë e avokatit të tij, ndërsa kërkoi shtyrjene seancës.

“Edhe pse e kam thirrur avokatin Esat Gutaj që ta zëvendësojë mbrojtësin e autorizuar Hajrip Krasniqi, i cili është i zënë me një gjykim tjetër në Ferizaj, unë mendoj se duhet të shtyhet ky shqyrtim kryesor për një ditë tjetër, pasi që mbrojtësi im ka propozuar dëgjimin e zyrtarit policor dhe sigurisht ai e din edhe qëllimin gjatë propozimit të këtij dëshmitari” , deklaroi i akuzuari Nuredin Begolli.

Në sallën e gjykimit ishte prezent edhe avokati i përgjithshëm shtetëror Heset Mazrekaj, i cili informoi gjykatën se në kuptim të Ligjit për Avokaturën Shtetërore jam i autorizuar për përfaqësim të autoriteteve publike dhe buxhetore të Republikës së Kosovës në proceduat gjyqësore.

Mazrekaj erdhi në gjykatë në bazë të ftesës e cila i ishte dërguar nga majori Çlirim Hajdini, i cili është i propozuar si dëshmitar nga mbrojtësi Hajrip Krasniqi.

Pasi që trupi gjykues konstatoi se nuk janë plotësuar kushtet ligjore për mbajtjen e shqyrtimit kryesor, seancën e shtyu më 25 maj.

Rreshteri Nuredin Begolli akuzohet nga Prokuroria e Shtetit se në tetor të vitit 2015 duke punuar në Stacionin Policor “Alfa” në Prizren ku kishte qasje në informacione, keqpërdori informatën zyrtare që personi tjetër të përfitojë.

Sipas aktakuzës, duke vepruar në bazë të kërkesës së qytetares A.K. gjatë bisedave telefonike nëpërmjet rrjetit viber e njofton atë për numrin e veprave penale dhe të kundërvajtjes të kryera nga Deli Hoxha.

Këto informacione që konsiderohen zyrtare më pas kanë ndikuar në prishjen e raporteve në mes të të dëmtuarit dhe qytetares A.K.

Në dhjetor të vitit të kaluar, rreshteri Begolli u deklarua i pafajshëm./kallxo.com/