Qëndrimi i Listës Serbe për shndërrimin e FSK-së, në Forca të Armatosura po vazhdon të mbajë peng shndërrimin e kësaj force në ushtri. Ndonëse, Qeveria e Kosovës, e ka ndarë buxhetin e nevojshëm për transformimin e FSK-së, deputetët e listës Serbe po vazhdojnë të bllokojnë ketë proces.

Deputeti i LDK-së, Anton Quni është optimist se bashkë me SHBA-në dhe NATO-n do të arrijnë t’i sigurojnë serbet se Ushtria e Kosovës, nuk do të jetë rrezik për ta, por do të ofrojë më shumë siguri për paqen në Kosovë dhe rajon.

“Në kushtet e rritjes së kërcënimeve globale sidomos nga terrorizmi botëror dhe faktorë të tjerë destabilizues dhe cenues të paqes globale, nevoja që edhe Kosova të ketë Ushtrinë e vet është shumë e madhe. Nëpërmjet Ushtrisë, Kosova realizon marrëdhënie të reja me partnerët strategjikë dhe me NATO-n. Në këtë aspekt, FSK i ka kapacitetet për t’u shndërruar në FA dhe me ndihmën e NATO-s dhe SHBA-ve do të vazhdojë të rrisë kapacitetet e saj mbrojtëse”, ka deklaruar Quni për Indeksonline.

Quni thotë se është për tu përshëndetur vendimi i Kongresit Amerikan, i cili detyron Administratën Amerikane që të angazhohet dhe ta ndihmojë Kosovën për t’u përgatitur për Programin e Partneritetit për Paqe dhe për anëtarësim në NATO.

“Kjo do të thotë se SHBA-të do të angazhohen në të gjitha fazat që nga shndërrimi i FSK-së në FA e deri në pranimin e Kosovës në NATO. Për Kosovën partneriteti me SHBA-të edhe në fushën ushtarake është shumë i rëndësishëm për sigurinë e saj dhe për të hapur perspektiva të integrimeve dhe të përfshirjes në agjenda të rëndësishme ndërkombëtare”, ka theksuar Quni.

Për shndërrimin e FSK-së në Forca të Armatosura kërkohen 2/3 e votave të dyfishta në Kuvendin e Kosovës./Indeksonline.

Deputeti i Kuvendit të Kosovës nga radhët e Aleancës për Ardhmërinë e Kosovës (AAK), Bali Muharremaj, ka thënë se opozita nuk është fajtore për dështimet e Qeverisë.

Në një intervistë dhënë gazetës “Epoka e re”, ai ka vlerësuar se koalicioni qeverisës PDK – LDK i ka sjellë shumë dëme shtetit të Kosovës.

“Ne nuk mund t’i kalonim projektet që i humbnin territor Kosovës dhe që do ta fusnin Serbinë brenda në Kosovë nëpërmjet ‘Zajednicës’. Ky koalicioni i ka sjellë shumë dëme Kosovës. Demarkacioni me Malin e Zi dhe ‘Zajednica’ janë dy projekte që i kanë marrë shumë kohë Kosovës. Mandej premtimi për qindra mijëra vende pune ka kaluar në heshtje dhe shumë çështje të tjera që qytetarët po i shohin çdo ditë drejt dështimit”, ka deklaruar Muharremaj, duke shtuar se Qeveria aktuale, përveçse nuk ka bërë asgjë në luftimin e krimit dhe korrupsionit, nuk e ka realizuar as premtimin për krijimin e vendeve të reja të punës.

“Askush nuk i ka ndaluar të punojnë për ta ndalur krimin dhe korrupsionin por, siç po e shihni, asgjë nuk është bërë në atë drejtim. Vendet e punës nuk janë askund, përkundrazi shumë qytetarë ikën nga vendi si rezultat i këtyre dështimeve”, është shprehur ai.

Ndërsa sa i përket demarkacionit me Malin e Zi, Muharremaj ka thënë se debati i mirëfilltë në mes të njerëzve kompetentë është zgjidhja kryesore për këtë çështje. Megjithatë, ai ka thënë se është e rëndësishme që nuk ka kaluar versioni aktual i demarkacionit.

“Demarkacioni, ashtu siç ka qenë, nuk do të kalonte. Ju e keni parë kundërshtimin e fortë të popullit në rrugë dhe vendosmërinë e opozitës e, po ashtu, edhe të shumë deputetëve të pozitës, prandaj nuk u hodh në votim. Debati i mirëfilltë në mes të njerëzve kompetentë është zgjidhja kryesore”, ka theksuar Muharremaj.

Në këtë intervistë deputeti i AAK-së ka folur edhe për sondazhet e fundit sa i përket renditjes së partive politike. Ai ka thënë se ato janë bërë vetëm sa për të sjellë huti në mes të njerëzve. Në këtë kontekst, Muharremaj ka thënë se gjendja e Aleancës në terren është shumë e mirë pasi, sipas tij, AAK-ja është parti stabile.

“Gjendjen në terren e kemi shumë të mirë. Ne jemi subjekt stabil tash e shumë vite. Mendoj se diskutimet e fundit rreth atyre sondazheve janë vetëm sa për të sjellë huti mes njerëzve. Vota do të ndryshojë shumëçka në zgjedhjet e ardhshme”, ka theksuar Muharremaj. /Epoka e re/