Kryeministri Isa Mustafa, së bashku me partnerët e koalicionit (PDK), pritet të bëjë riformatim të Qeverisë, me ç’rast do ta zvogëlojë edhe numrin e ministrive.
Ndonëse nuk kanë saktësuar se kur pritet të nisë një gjë e tillë, përfaqësues të ekzekutivit kanë thënë se riformatimi patjetër do të ndodhë, madje një nxitëse në këtë drejtim do të jetë edhe posti vakant i ministrit të Integrimit.

Ndonëse njohësit e çështjeve politike në Kosovë kanë rekomanduar që Ministria e Integrimit Evropian të shkrihej në një dikaster të Ministrisë së Jashtme, kjo Ministri do të vazhdojë të funksionojë si e pavarur edhe më tutje.

PDK-ja e LDK-ja, të gatshme për riformatim

Për riformatimin e Qeverisë dhe strukturimin e saj janë pajtuar të dy partitë e mëdha të koalicionit, PDK-ja dhe LDK-ja.

Zëdhënësi i Qeverisë së Kosovës, Faton Abdullahu, ka thënë për “Zërin” se Qeveria do ta realizojë riformatimin, mirëpo nuk ka dhënë hollësi rreth Ministrisë së Integrimit Evropian, sado që ajo është pa ministër qe disa ditë. “Riformatimi si synim nuk është përcaktuar se do të bëhet detyrimisht brenda një kohe të caktuar, por është pajtim i partnerëve të koalicionit se do të bëhet gjithsesi. Kjo edhe do të ndodhë”, ka deklaruar ai, duke mos saktësuar se kur pritet të ndërmerret një vendim i tillë. /Zeri/

Njohësi i proceseve politike, Belul Beqaj, ka thënë të martën se zgjidhja më e mirë është shtyrja ose rishikimi i procesit të demarkacionit me Malin e Zi.

Në një intervistë dhënë gazetës “Epoka e re”, ai ka thënë se opozita nuk do ta pranojë arbitrazhin ndërkombëtar për shkak se ndërkombëtarët janë deklaruar paraprakisht pro kësaj marrëveshje.

“Realisht zgjidhja më e mundshme që ka gjasë për të ndodhur (krahas shtyrjes) është rishikimi dhe rivlerësimi i tërë procesit, ngaqë opozita nuk besoj se mund ta pranojë arbitrazhin ndërkombëtar për shkak se ndërkombëtarët janë deklaruar paraprakisht pro kësaj marrëveshje. Nga kjo rezulton se ndikimi i tyre në mënyrë implicite do të bartet edhe në Gjykatën Ndërkombëtare, pavarësisht se gjykata prezumohet politikisht e paanshme”, ka deklaruar Beqaj.

Sipas tij, tash deputetët do ta kenë më të lehtë për ta refuzuar marrëveshjen e demarkacionit ngaqë argumenteve kundër saj po i shtohet edhe argumenti i koncesioneve të Listës Serbe.

“Në fakt, pas arsyetimit të kryeministrit pse e ka tërhequr marrëveshjen për demarkacionin nga mbledhja e fundit e Parlamentit, jo vetëm te deputetët e opozitës, por edhe te deputetët mbështetës, nëse tek ata ka mbetur pak ndërgjegje politike, do të kenë më lehtë për ta refuzuar marrëveshjen ngase dilemave dhe argumenteve të shumta kundër marrëveshjes po i shtohet edhe argumenti i koncesioneve të Listës Serbe, pavarësisht se a është apo jo e vërtetë”, është shprehur Beqaj.

Ai ka vlerësuar se nuk do të jetë e habitshme nëse opozita do ta refuzojë thirrjen për takim të kryeministrit Isa Mustafa ndonëse, sipas Beqajt, do të ishte racionale të takoheshin.

“Pengesë shumë serioze janë deklaratat e kryeministrit, i cili e thirr opozitën në dialog, duke gjykuar se vlerësimet e komisionit qeveritar janë të pakontestueshme. Nuk do të habiteshim nëse opozita e refuzon këtë thirrje, ndonëse do të ishte racionale të takoheshin”, ka theksuar Beqaj.

Ai ka thënë se nëse nuk kalon demarkacioni duhet të shkohet në zgjedhje të reja, edhe pse, sipas Beqajt, zgjedhjet nuk nënkuptojnë zgjidhje të demarkacionit dhe të asociacionit.

“Qeveria është përgjegjëse edhe nëse kalon, por edhe nëse nuk kalon. Kjo domosdoshmërisht nënkupton zgjedhjet e reja. Ndonëse zgjedhjet e reja nuk nënkuptojnë zgjidhje të këtij dhe problemit të ‘Zajednicës’, por gjithsesi pas zgjedhjeve eventuale, roli i LDK-së do të margjinalizohet shumë”, ka thënë Beqaj. /Epoka e re/

Ish kreu i Lëvizjes Vetëvendosje, Albin Kurti, paralajmëron se çështja e Demarkacionit mund të sjell sërish luftë në Kosovë brenda 5 viteve.

“Kufiri është çështje e ndarjes së territorit. Nuk kemi tokë për të falur. Në atë tokë është derdhur gjak dhe ne s’kemi gjak për të falur. Thaçi dhe Mustafa të japin dorëheqjen. Në 4-5 vitet e ardhshme ka gjasa të ketë përsëri luftë”, tha Kurti nga Tirana, gjatë takimit të sotëm me kryefjalë demarkacionin me Malin e Zi.

Kurti ka deklaruar se shtyrja e këtij vendimi nga ana e qeverisë së Kosovës i ka shpëtuar vendit 8200 hektarë tokë:

“Më datën 1 shtator është arritur një sukses i madh, pasi kemi shpëtuar 8.200 hektarë. Nuk mund të kesh kufi pa pasur territor. Me marrëveshjen e Thaçit e Mustafës ne kemi një kufi të ri, jo demarkacion. Mali i Zi e ka dashur Qafën e Kaçorrit dhe dëshiron të vijë edhe më thellë për planet e tij. Marrëveshja me Malin e Zi është një marrëveshje kapitulluese për Kosovën. Falënderojmë qytetarët për protestat. Kemi arritur ta zmbrapsim koalicionin qeverisës. Shteti i Kosovës vazhdon të jetë në azil“, tha ai. /Syri.net/

Të martën është mbajtur mbledhja e radhës së Kolegjiumit të Drejtorëve në Prizren, në të cilën janë miratuar një numër i konkluzioneve.

Pas mbledhjes së qeverisë lokale , zyrtari komunal për informim, Ymer Berisha, ndër konkluzionet e miratuara nga ky takim që është drejtuar nga kryetari Muja, ka veçuar lejimin e shpalljes së tenderit sipas propozimit të drejtorisë së Shërbimeve Publike, për elektrifikimin e Kompleksit “ Europa” dhe të objektit të ri të shkollës së mjekësisë i cili më në fund pritet të vihet në funksion gjatë muajit shtator.

Zyrtari Berisha më tej njoftoi se, në të këtë takim është miratuar edhe propozimi i DKRS-së që me komuna në shumë prej 2500 eurove të mbështes politikat rinore konkretisht aktivitetin “ Java e Rinisë 2016” ,që kanë për qëllim fuqizimin e rolit të të rinjëve, theksoi ai. Në mbledhjen e sotme të ekzekutivit komunal është marrë vendim që të mbështetet manifestimi kulturor “Takimet e Gjeçovit 2016” në shumë prej 2000 eurove, ndërsa me 2500 euro të përkrahen aktivitetet për shënimin e “Ditës së Boshnjakeve” me 2500 euro. Ndërkaq, persona me aftësi të kufizuara do të punojnë përkohësisht në drejtori të ndryshme komunale gjatë muajit tetor, i cili njihet si muaj i personave me nevoja të veçanta./TV Prizreni/

Avokatja Donika Dobruna tregon për masat ligjore që mund të merren ndaj prindërve qe lejojnë martesat në moshë të mitur.

Ajo thotë se është tmerruar me rastin e martesës ndërmjet 13 vjeçarës dhe 14 vjeçarit në Malishevë.

Avokatja Dobruna tregon për lajmi.net se sipas Kodit Penal të Kosovës, prindërit që lejojnë apo shtynë personat e mitur në martesë mund të dënohen ndërmjet 5 deri në 20 vjet burg.

“Përderisa në botë luftohet dukuria e martesave të hershme të vajzave, në Kosovë ajo pranohet si diçka normale dhe nxitet madje. Sa për info, sipas nenit 247 paragrafi 2 i Kodit Penal të Kosovës, prindi, prindi adoptues, kujdestari apo ndonjë person tjetër që ushtron autoritet prindëror, që i lejon ose e shtyn personin në mes të moshës 14 dhe 16 vjet që të bashkëjetojë në një bashkësi jashtëmartesore me personin tjetër, dënohet me dënim me burgim nga 5 deri në 20 vjet. Kur kjo vepër penale kryhet ndaj personit nën moshën 14 vjet, kryesi dënohet më së paku 15 vjet burgim”, thotë Dobruna.