Kërkesa e presidentit të vendit, Hashim Thaçi, për përfshirjen e Shteteve të Bashkuara të Amerikës (ShBA) në procesin e dialogut ndërmjet Kosovës dhe Serbisë, është komentuar në mënyra të ndryshme nga analistët politikë.

Njohësi i çështjeve politike, Driton Lajçi, ka thënë për “Epokën e re” se është e nevojshme përfshirja e Shteteve të Bashkuara të Amerikës (ShBA) në fazën finale të dialogut të Brukselit ndërmjet Kosovës dhe Serbisë.

“Shtetet e Bashkuara të Amerikës kanë qenë të përfshira në një mënyrë në dialogun ndërmjet Kosovës dhe Serbisë sepse normalizimi i relacioneve ndërmjet këtyre dy vendeve nëpërmjet dialogut është një prej kritereve që janë vendosur edhe për Serbinë edhe për Kosovën. Pra, Asambleja e Përgjithshme e OKB-së ka nxjerrë një rezolutë për fillimin e dialogut Kosovë – Serbi, e cila është mbështetur nga ShBA-ja. Por, tash paraqitet si nevojë që ShBA-ja të përfshihet në fazën finale të dialogut. ShBA-ja duhet të jetë në këtë dialog për faktin se finalja apo krejt brumi i këtij procesi duhet të jetë një material për një rezolutë në Këshillin e Sigurimit, e sponsorizuar nga ShBA-ja, në mënyrë që Kosova të jetë anëtare e OKB-së. Kështu e shoh rolin e ShBA-së dhe përfshirjen e tyre në fazën finale të dialogut”, ka thënë Lajçi.

Kurse njohësi tjetër i çështjeve politike Behxhet Shala ka deklaruar për “Epokën e re” se kërkesa për përfshirje të ShBA-së në dialog ka për qëllim mbulimin e dështimit të këtij procesi. Por, sipas tij, ky proces nuk mund të arnohet as me ShBA-në, as me ekip të unitetit.

Përfaqësues të koalicionit PAN kanë bërë të ditur se deri në fund të kësaj jave do të konstituohet Parlamenti dhe do të votohet edhe qeveria ”Haradinaj”.

Me shumë gjasë seanca e Kuvendit do të ftohet për nesër. Në anën tjetër, lëvizja ”Vetëvendosje” dhe LDK-ja thonë se Qeveria e re do të dirigjohet nga Beogradi, shkruan sot Zëri.

Koalicioni PAN, të cilit së fundmi i është bashkuar edhe AKR-ja, po vazhdon të zotohet se këtë javë do ta zgjedhë kryetarin e Kuvendit dhe do ta votojë Qeverinë.

Madje, si datën më të afërt për vazhdimin e seancës PAN-i po e përmend datën 7 shtator (ditën e nesërme), ndërsa një ditë më pas, sipas tyre, do të votohet ekzekutivi i ri. Por pavarësisht se kryesuesi i seancës, Adem Mikullovci, ka bërë të ditur se është në pritje të përgjigjes së PAN-it për seancë, këta të fundit ende nuk kanë treguar se kur janë të gatshëm për vazhdimin e saj.

Ndërkohë as Lista Serbe deri më tash nuk ka dalë publikisht në përkrahje të bërjes së Qeverisë nga PAN-i. Nga ana tjetër, LVV-ja dhe LDK-ja kanë konsideruar se Qeveria e ardhshme nuk do të jetë assesi jetëgjatë.

Policia e Kosovës sot shënon 18 vjetorin e themelimit. Më 6 shtator të vitit 1999, Misioni i OSBE-së në Kosovë, në pajtim me Rezolutën e Kombeve të Bashkuara 1244, ka hapur Shkollën e Policisë dhe ka filluar trajnimin e kandidatëve për pjesëtarë të Policisë së Kosovës.

Gjenerata e parë e kandidatëve për pjesëtarë të këtij Shërbimi filloi trajnimin në këtë qendër më 6 Shtator 1999. Kjo gjeneratë numëroi 176 pjesëtarë, të cilët me sukses përfunduan trajnimin dhe pastaj filluan ushtrimin e veprimtarisë policore në tërë territorin e Kosovës si policët e parë të këtij Shërbimi.