Xhavit Kelmendi, vëllai i Enver Kelmendit, personit nga Malisheva që u gjet i vdekur pasi fillimisht ishte shpallur i zhdukur, beson se vëllanë e tij, Enverin, e ka mbytur dikush për t’ia marrë paratë që i kishte me vete.

Xhavit Kelmendi ka treguar se, tashmë i ndjeri, Enveri ishte një person që merrej me këmbimin e parave dhe se në momentin kur është zhdukur kishte rreth 30.000 euro vlerë të parave me vete, para këto jo vetëm monedha euro, por edhe franga dhe të tjera.

Megjithatë, Xhaviti thotë se vëllai i tij nuk kishte probleme me askënd ndaj edhe nuk ka se në kë të dyshojë.

Xhaviti ka treguar për Ora e Fundit në Klan Kosova se njeriu i fundit që kishte pasur kontakt me të ka qenë një koleg i tij, i cili e kishte thirrur në telefon rreth orës 11:00 të dielën. Ai ka thënë se kishte dëgjuar një zhurmë që vinte nga telefoni i Enverit.

Pas kësaj, tashmë i ndjeri, nuk është përgjigjur në telefon edhe pse qasje ka pasur deri rreth orës 16:00.

Ndërsa policia në Malishevë kanë treguar për Orën e Fundit se ende nuk kanë të dyshuar, porse ajo që dihet është se në viktimën është përdorur forcë nga një mjet i fortë.

“Viktima është gjetur në makinë pa shenja jete. Trupi është dërguar për obduksion në Prishtinë. Dyshohet për vdekje të dhunshme, është përdorur forcë me mjet të fortë dhe rasti cilësohet si vrasje e dyshimtë”, ka thënë Halil Morina, komandat i Policisë në Malishevë.

Morina nuk ka mundur të tregojë nëse janë gjetur para në veturën e viktimës, apo jo, sepse “tashmë vetuar gjendet në stacionin e policisë në Gjakovë”.

Komandanti i policisë së Malishevës, që thotë se e ka njohur viktimën, ka deklaruar se ia ishte një njeri i respektuar në Malishevë dhe se nuk ka pasur precedent penal në polici. /KlanKosova/

Një numër i madh i rasteve penale të cilat janë në shqyrtim të Prokurorisë së Shtetit presin kryerjen e ekspertizave ligjore, shumicën prej të cilave Prokuroria detyrohet që t’i dërgojë jashtë vendit për ekzaminim për shkak të mungesës të ekspertëve vendorë në fusha të caktuara, sidomos në çështjeje të forenzikës dhe në ato të mjekësisë.

Përveç mungesës së resurseve profesionale për zbardhjen e rasteve nga ana e Prokurorisë, ekzaminimi i ekspertizave ndërkombëtare përbën edhe një kosto të lartë financiare për organin e akuzës.

Sipas Prokurorisë, dërgimi i ekspertiza jashtë vendit bëhet për arsye se një numër i rasteve nuk mund të realizohen në Kosovë. Sipas Hekrem Luftiut, nga Këshilli Prokurorial, shumica e ekspertizave e të cilat dërgohen jashtë vendit kanë të bëjnë me natyra të ndryshme të cilat janë jashtë profesionit të prokurorëve.

“Në raste të caktuara kur kemi të bëjmë me ekspertiza që nuk mund të realizohen në Kosovë, atëherë me qëllim që Prokuroria të ketë informacione sa më të plota lidhur me rastin konkret i dërgon jashtë Kosovës për ekspertizë”, ka thënë Luftiu.

Sipas tij, ekspertiza kërkohet për çështje që nuk janë të natyrës ligjore por të çështjeve forenzike, mjekësisë dhe shkencave tjera për të cilat kualifikimi kërkohet jashtë natyrës profesionale të prokurorëve.

“Nuk ekziston kategori specifike për ekspertizë ndërkombëtare. Qëllimi i Prokurorit të Shtetit është zbardhja e rastit dhe marrja e dënimit meritor”, ka thënë Hekrem Luftiu nga Këshilli Prokurorial i Kosovës. (Zëri)

Autoritetet shtetërore kritikohen për neglizhencë dhe paaftësi. Ndonëse ka pasur fakte të shumta, drejtësia kosovare nuk arriti ta adresojë këtë çështje asnjëherë. Edhe ndonjë padi individuale, si në rastin e “Kosova Sot”, nuk u trajtua kurrë nga gjykatat e Kosovës.

Asnjëra nga qeveritë e pasluftës në Kosovë, përfshirë edhe Qeverinë aktuale, duke mos anashkaluar edhe UNMIK-un dhe EULEX-in, së bashku me drejtësinë kosovare, asnjëherë deri më tani nuk treguan vullnetin apo mbase edhe nuk kanë guxuar nga dikush jashtë që ta bëjnë një akuzë dhe një padi për krime dhe dëme lufte kundër Serbisë. Përmes kësaj padie synohet kompensimi i dëmeve nga Serbia në ekonominë dhe pronat e qytetarëve të Kosovës, që kapin shumën miliarda euro që janë të shkaktuara qëllimshëm nga aparati shtetërorë serb dhe kriminelët e saj në Kosovë, shkruan gazeta Kosova Sot.

Kësisoj, pra, edhe 17 vjet pas luftës pushtetarët tanë kanë dështuar plotësisht në adresimin dhe gjykimin e krimeve dhe dëmeve të luftës, që i kishte bërë Serbia gjenocidale në Kosovë. Ndonëse për këtë i patën të gjitha mundësitë dhe faktet që të ushtrojnë padi penale e civile, e madje me mundësitë edhe për akuzën për gjenocid të Serbisë ndaj qytetarëve të Kosovës, kjo deri sot nuk ka ndodhur. Kështu të paktën vlerësojnë analistët dhe njohësit e kësaj fushe, të cilët edhe kanë apeluar që nga kryetari i shtetit, kryeministri dhe kryekuvendari, duke kërkuar nga ata që ta urdhërojnë Kryeprokurorin e Shtetit, Aleksandër Lumezi, ta caktojë një ekip të veçantë të prokurorëve për ta marrë seriozisht këtë çështje.

Anëtarësimi në Konventë, parakusht për ngritjen e padisë për gjenocid

Analistët njëherësh thonë se ngritja e një padie të tillë ndaj Serbisë, përveçse ndihmesë për drejtësinë, do të ishte edhe një satisfaksion moral për familjarët e viktimave, invalidëve të luftës dhe për familjaret e 1700 të pagjeturve nga lufta e fundit.

Zyrtarë të Prokurorisë dhe Qeverisë së Kosovës për disa ditë me radhë nuk kanë dhënë përgjigje lidhur me çështjen që po trajtohet. Ndërkaq, këshilltari i Edita Tahirit, kryenegociatore e Kosovës me Serbinë, Gazmir Raci ka thënë se për këtë çështje gazeta duhet t’i drejtohet Ministrisë së Drejtësisë.

Ndërsa në përgjigjen e zyrtarëve të Ministrisë së Drejtësisë, nëpërmes Zyrës për Informim, thuhet se Ministria e Drejtësisë është e gatshme dhe ka vullnetin të përgatisë padinë për gjenocid ndaj Serbisë pranë Gjykatës Ndërkombëtare të Drejtësisë, një gjë e tillë mund të bëhet nëse ka vullnet dhe përkushtim politik nga aktorët e tjerë institucionalë.

“Parakusht për një gjë të tillë është aderimi i Republikës së Kosovës në Konventën për parandalimin dhe ndëshkimin e krimit dhe gjenocidit të bërë në vitin 1948. Ndërkaq, kompetente për një veprim të tillë është Ministria e Punëve të Jashtme”, thekson MD-ja.

Në vazhdim të përgjigjes së MD-së, thuhej se Ministria e Drejtësisë është e gatshme dhe në dispozicion të plotë për të ndihmuar në procesin e aderimit të Republikës së Kosovës në Konventën për parandalimin dhe ndëshkimin e krimit dhe gjenocidit të vitit 1948.

“Për një veprim të tillë, ka fakte të mjaftueshme dhe mund të bëhet me funksionalizimin e mëtejmë të Institutit për Krime të Luftës, i cili vepron në kuadër të Ministrisë së Drejtësisë, gjë e cila është një prej prioriteteve kryesore të Ministrisë. Njëherësh, me një bashkëpunimin dhe koordinim më të mirë në mes institucioneve të Republikës së Kosovës që kanë të bëjnë me sektorin e sundimit të ligjit, mbledhja e fakteve do të intensifikohej, me ç’rast krijohet një bazë e fuqishme faktike për të ngritur padi kundër Serbisë pranë Gjykatës Ndërkombëtare të Drejtësisë”, vijon më tej përgjigjja e MD-së.  (Kosova Sot)

Ambasada e Gjermanisë ka ripërsëritur se vetëm atëherë kur të plotësohen kriteret e vëna nga Bashkimi Evropian, mund të liberalizohen vizat.  Sipas tyre Komisioni Evropian ka propozuar liberalizimin e vizave për Kosovën, deri në miratimin e këtij propozimi nga Parlamenti Evropian dhe Këshilli, Kosova do të duhet të ratifikojë Marrëveshjen e kufirit me Malin e Zi dhe të fuqizojë luftën kundër krimit të organizuar dhe korrupsionit

Ambasada e Gjermanisë dhe Zyra e Bashkimit Evropian në Kosovë pos demarkacionit kërkojnë edhe luftimin e krimit të organizuar dhe korrupsionin si kushte për liberalizimin e vizave.

Për Ambasadën gjermane në Prishtinë, çështja e demarkacionit mes Kosovës dhe Malit të Zi është qartësuar përfundimisht përmes komisionit ndërkombëtar të krijuar nga ish-presidentja e vendit, i cili duhet të plotësohet si kriter, për të mundësuar liberalizimin e vizave. Në anën tjetër, zyra e Bashkimin Evropian, bën me dije se zgjidhja e çështjeve të kufirit për secilin vend, duhet të bëhet në fazë sa më të hershme të procesit integrues. /Zëri/

Mëngjesi i sotëm për pjesëtarin e Policisë së Kosovës, Blerim Kuçi nga Shiroka e Suharekës mund të ketë qenë fatal.

Rreth orës 04:00 të mëngjesit të sotëm, shtëpia e Blerim Kuçit ka marrë flakë për shkak të instalimit të rrymës.

Toger Afrim Sylaj, ka thënë për “Zeri.info”, se përveç dëmeve materiale nuk ka të lënduar.

Sylaj ka treguar se si ka ndodhur e gjithë ngjarja.

“Rreth orës 03:50 të mëngjesit të datës 12.09.2016, stacioni policor në Suharekë ka marrë informatë për një incident zjarri në Shirokë, në paralagjen e Suharekës. Bëhet fjalë për shtëpinë e zyrtarit policor, Blerim Kuçi, e cila është kapluar nga zjarri që dyshohet se ka ardhur si pasojë e intaslimit të rrymës nga kati përdhes. Zyrtarët policorë kanë qenë të parët ata të cilët kanë dalë në vendin e ngjarjes dhe kanë ndihmua në shuarjen e zjarrit dhe më pas kanë ardhur zjarrfikësit edhe ka arritur që të lokalizohet zjarri dhe nga e gjithë kjo ka vetëm dëme materiale në katin përdhes”, ka treguar Sylaj.

Ai ka thënë se nuk ka pasur lëndime serioze nga kjo fatkeqësi. Mirëpo, vetëm një fëmijë i moshës 15-vjeçare është asfiksuar për shkak të tymit, por që gjendja e tij shëndetësore tani është mirë.

“Nuk ka pasur lëndime serioze në njerëz, përveç një djali të moshës 15 vjeçare i cili për shkak të tymit është ngufatur (asfiksuar), dhe është dërguar në ambulancën e qytetit dhe ka marrë trajtimin e nevojshëm dhe tani gjendja e tij shëndetësore është e mirë dhe është jashtë rrezikut”, ka deklaruar Sylaj për “Zeri.info”.

Ai po ashtu ka treguar se ende nuk dihet vlera e dëmeve të shkaktuara nga kjo fatkeqësi, por që, Sylaj tregoi se, Kuvendi Komunal e ka nj fond të posaçëm për raste të tilla.

“Për momentin nuk i është ofruar asnjë lloj ndihme për shkak se është ditë feste, ditë pushimi. Unë personalisht kam biseduar me zyrtarin policor dhe e kam ftuar që nesër të vij në zyrë dhe të pyetet e ti rregullojmë dokumentacionet e nevojshme e më pas do të shiqojmë mënyrat dhe format të cilat do t’ia adresojmë Kuvendit Komunal i cili ka një fond të posaçëm për kësi raste”, ka treguar toger Afrim Sylaj. /Zeri.info/