Deputeti i Kuvendit të Kosovës, Zafir Berisha, ka thënë në Ora e Fundit në Klan Kosova se termi “komb kosovar” është qesharak dhe se nuk ekziston diçka e tillë.

Ai madje deklaroi se Kosova është vetëm krahinë e Shqipërisë dhe se asnjëherë nuk është hequr dorë nga bashkimi kombëtar.

“Të merrem unë me këtë termin që disa e kanë shpikur, sepse s’kanë punë tjetër, njëfarë termi më duket termi ‘kombi kosovar’ kjo është më shumë se qesharake, vetëm me të shkuar në mendje e lërmë ta thuash, aq më keq që diçka e tillë të trumbetohet”, ka thënë Berisha.

“Ne jemi shqiptarë, që jetojmë në krahinën e Shqipërisë, që quhet Kosovë. Dhe, sot ose nesër, herët apo vonë Shqipëria do të jetë një dhe meqë sot rrethanat e politikës globale na kanë pozicionuar ashtu siç na kanë pozicionuar, kjo nuk nënkupton që kemi hequr dorë nga ideja e Shqipërisë natyrale”.

“Përse duhet të heqim dorë nga kjo?”, ka pyetur Berisha duke u vetëpërgjigjur. “Asnjë komb s’ka hequr dorë”.

“Ne edhe nënë edhe babë e kemi Shqipërinë. Kur them Shqipërinë e kam fjalën për Shqipërinë, Kosovën, shqiptarët në Maqedoni e deri në Çamëri”, ka thënë ish-ushtari i Ushtrisë Çlirimtare të Kosovës.

Heshtja graduale e zërit të subjekteve politike opozitare, të cilat para një viti patën filluar që krahas organizimit të protestave për kundërshtimin e dy marrëveshjeve, asaj për Asociacionin dhe Demarkacionin, kërkonin zgjedhje të jashtëzakonshme, nga pozita dhe analistët politikë po shihet si një argument që flet qartë se në Kosovë nuk do të ketë zgjedhje të jashtëzakonshme, por ato do të mbahen sipas ciklit të paraparë,shkruan gazeta Kosova Sot.

Ky ndryshim në qëndrimet e padeklaruara politike tani vjen si pasojë e përqendrimit të të gjithë spektrit politik në pritje të Gjykatës Speciale dhe askush nga partitë nuk e ka interesin të shkojë në zgjedhje të reja pa u pastruar skena politike, kur edhe pritet një furtunë arrestimesh nga kjo Gjykatë. E, ndërkohë mund të bëhet edhe Reforma zgjedhore. Kjo pritje shihet si opsioni më real, pasi tani kjo formë po u leverdis edhe ndërkombëtarëve, të cilët llogarisin në pastrimin e skenës politike me veprimin e Gjykatës, por edhe Prokurorisë vendore Speciale, që mund të dërgojë shumë “peshq të mëdhenj” në burg, prandaj në zgjedhje të reja do të kishte edhe ndryshime të mëdha përfaqësimi. Deputeti Adem Salihaj, nga LDK-ja, një skenar të tillë e sheh si më të përshtatshmin, dhe më realin të mundshëm, që skena politike e Kosovës të pastrohet nga strukturat kriminale, kurse institucionet e reja të ndërtohen nga njerëz me duar të pastra.

“Është indikativ që as opozita tash nuk është insistuese për zgjedhje të jashtëzakonshme. Mendoj se vërtet mund të jetë arsye pritja që Gjykata Speciale do ta bëjë një spastrim të Kosovës nga elementët e shumtë kriminalë,të cilët asnjëherë nuk kanë lejuar që të mbahen zgjedhjet të mirëfillta dhe demokratike. Një spastrim eventual, që do ta bënte Gjykata Speciale,do të krijonte një ambient më të përshtatshëm dhe një mundësi që qytetarët të mund të vendosin pa shantazhe e presione, pa mashtrime dhe pa manipulime e vjedhje votash, siç ka ndodhur gjithnjë, në të gjitha zgjedhjet tona”, tha Salihaj për “Kosova Sot”.

Pastrimi i listave

Një pritje e tillë vlerësohet pozitivisht edhe nga analistët politikë dhe njohësit sfidave nëpër të cilat kanë kaluar deri më tash proceset zgjedhore në shtetin e Kosovës. Analisti politik, Fadil Lepaja tha për “Kosova Sot” se është shumë e pritshme që në zgjedhjet e radhës të kemi lista shumë më kredibile zgjedhore, nëse vërtet subjektet politike presin një proces të tillë dhe vendosin që përfundimisht të pastrojnë radhët e veta nga figura që janë ndesh me ligjin.

“Ky mbase do të ishte edhe versioni i dëshiruar nga qytetarët e Kosovës, me shpresën se njerëzit e dyshuar për krime të mos kenë as gjasa të kandidohen për poste me përgjegjësi në këtë vend. Se çfarë do të arrijë të bëjë Gjykata Speciale mbetet të shohim, por sido që të jetë, një fushatë zgjedhore e parakohshme do të pengonte në konsolidimin e saj si dhe opinionin tashmë të pajtuar me faktin se kjo Gjykatë mundet të jetë përpos antikrim edhe mënyrë për të hequr prej politikës një numër të madh të figurave autoritare të kësaj skene”, tha Lepaja për “Kosova Sot”.

Edhe Ilir Fetahu, ish- anëtar i KQZ-së, thotë se Kosova po hyn në një situatë serioze, prandaj nuk është në interes të vendit që tani të shpiket kriza dhe të shkohet në zgjedhje të jashtëzakonshme.

“Kosova duhet të mendojë për zgjedhje të rregullta dhe kredibile, kurse pa paragjykuar në rolin e Gjykatës Special duhet të vetëdijesohet vetë spektri politik që në këto zgjedhje të përfshijë në lista zgjedhore vetëm ata kandidatë që kthejnë besimin e qytetarit edhe në politikë edhe në institucione, sepse përfshirja e deritanishme në listat zgjedhore e njerëzve që ishin në konflikt me ligjin ka krijuar në masë të madhe edhe një mosbesim të qytetarit në politikë, por edhe në institucionet ku të tillët kanë zënë vend si të emëruar nga politika”, tha Fetahu për “Kosova Sot”.

Dikush duhet të burgoset

Se zgjedhjet e jashtëzakonshme nuk janë më prioritet i asnjë subjekti politik, edhe për shkak të mosmbështetjes ndërkombëtare, e sheh këtë situatë edhe analisti politik Arsim Haziri. “Sot, e tërë skena politikë, sikur po shihet ashiqare, gjendet në ankth të rëndë në kuptimin se kush do të jetë objekt trajtimi i Gjykatës Special, kush nga kokat politike e kush nga niveli i dytë. /Kosova Sot/

Dymbëdhjetë vjeçari U.R ka mbetur prapa në lëndën e Gjeografisë. Ai ndjek mësimet në shkollën fillore “Dëshmoret e Kabashit” në fshatin Korishë të Prizrenit, por ka më shumë se 1 muaj që nuk e ndjekë lëndën e Gjeografisë, tek mësuesi Ramadan Ukaj.

Babai i U.R e ka marrë këtë vendim, raporton Insajderi.

Ai pretendon se mësuesi Ukaj ia rrahu fëmijën me shuplakë në orë të mësimit.

“Unë mora vendim që djali mos ta vazhdoj shkollën mirëpo me ndihmën e kujdestarit dhe kryetarit të fshatit jam bindur që djali të vazhdojë shkollën por orën e arsimtarit Ramadan Ukaj nuk do ta mbanë deri sa të marrë masa shteti”, ka thënë Avdi Rexhaj.

Ai i ka dërguar gazetës Insajderi një video në të cilën mësuesi Ukaj shihet teksa e godet me shuplakë djalin e Rexhajt, U.R. Në videon e incizuar sipas Rexhajt, nga shokët e klasës së djalit të tij, shihet sesi mësuesi e godet me shuplakë.

Por versioni i videos të cilën e kanë bërë shokët e tij, e që Rexhaj e paraqet si fakt, është i xhiruar në versionin e ngadalshëm (slowmotion). Rexhaj thotë se nxënësit kanë incizuar në këtë mënyrë që ta përdornin videon për tu tall me djalin e tij.

“Është bërë në këtë formë sepse nxënësit kanë menduar të bëjnë humor se si mësuesi po i bërtet shokut të tyre. Nuk e kanë pritur as ata që do ta godas”, ka thënë Rexha.

Rasti ka ndodhur me 30 shtator, mirëpo Rexhaj ka paraqitur këtë rast vetëm pas një jave.

“Arsyeja është se drejtori i shkollës e ka angazhuar të punojë në oborrin e shkollës që të heqë dhe, pasi që ora ka filluar, nxënësi është vonuar 2 minuta dhe arsimtari e goditë me shuplakë”, rrëfehet Rexhaj për Insajderin.

Mësuesi dhe drejtori i shkollës mohojnë akuzat. Thonë se fëmija e i Rexhës përpos që nuk është angazhuar të punojë në oborrin e shkollës as nuk është goditur.

Madje drejtori e quan videon montazhë.

“Ky rast ka ndodhur para dy jave dhe ajo video është vetëm një montazh, që ia kanë bërë shokët e klasës dhe se arsimtari nuk e ka goditur por vetëm ia ka mbështet dorën tek qafa”, ka thënë drejtori i shkollës.

“Pasi që e kam shikuar videon unë menjëherë kam shkuar tek drejtori për tu informuar në lidhje me atë se cfarë i ka ndodhur djalit tim, mirëpo drejtori i shkollës më akuzoi se është montazh videoja”, ka thënë Rexhaj.

Kur Insajderi e pyeti drejtorin nëse mësuesi ka raportuar për këtë rast, ai tha të jetë i informuar por nuk e kanë marrë seriozisht akuzën pasi nuk ka fakte.

Njëjtë thotë edhe mësuesi Ramadan Ukaj.

Bile ai jep fjalë të forta kur mohon ta ketë goditur nxënësin.

“Ta kisha bërë atë veprim unë do ta lija ditarin menjëherë” ka thënë Ukaj nëpërmjet telefonit.

Por babai i 12 vjeçarit thotë se nuk do të ndalet derisa drejtori i shkollës ta pranojë të vërtetën dhe mos ta fsheh këtë që ai e quan “krim”.

“Dua që së paku të kërkoj falje, përndryshe fëmijën nuk e kthej në atë orë të atij mësuesi”, ka thënë Rexhaj. /Insajderi.com

Në degën e AAK-së në Prizren, edhe këtë të premten ka pasur aderime të reja. Rreth personave 30-të kryesisht të rinj prizrenas i janë dorëzuar nga lideri i AAK-së, Ramush Haradinaj, librezat e anëtarësisë. Në zyret e degës së AAK-së në Prizren, sot i janë dorëzuar librezat e anëtarësisë rreth 30 prizrenasve kryesisht të rinj, të cilët kanë shprehur deshirën e tyre për të qenë pjesë e këtij subjekti politik. Pjesë e kësaj ceremonie ishte edhe lideri i AAK-së, Ramush Haradinaj, kryetari i degës , Lulzim Kabashi dhe zyrtarë të tjerë.

Kreu i AAK-së, Haradinaj, falënderoi aderuesit e rinj që shprehen vullnetin për të qenë pjesë e organizmit politik që ai e drejton, duke thënë se me këtë ngjarje po dëshmohet se AAK po rritet dita ditës në Prizren, për siç tha ai qëllimit të të gjithë neve për të ndryshuar situatën e rëndë që ka kapluar këtë komunë dhe për të ruajtur vlerat që ka Prizreni, theksoi ai. I riu, Besmir Likaj, pas aderimit në këtë subjekt politik tha se ndjehet shumë i emocionuar për këtë çështje, dhe shtoi se besimi dhe respekti ndaj liderit të AAK-së, Ramush Haradinaj, ka ndikuar që ai të aderojë në këtë subjekt politik. Gjatë ditës së sotme Ramush Haradinaj dhe drejtuesit më të lartë të AAK-së në Prizren, kanë vizituar edhe fabrikën për prodhimin e paketave “ Semir Pack”, ndërsa do të vizitojnë disa familje në Korishë, lagjen Arbana dhe në Shpenadi…/TV Prizreni/

Grupi për monitorimin e rekomandimeve të dhëna nga Zyra e Auditorit të Përgjithshëm (ZAP) për vitin 2015, ka mbajtur të premten mbledhjen e dytë të radhës.
Në takim, përveç anëtarëve të grupit për monitorimin e rekomandimeve, kanë marrë pjesë edhe zyrtari për regjistrimin e aseteve, kryesuesit e komisioneve për regjistrimin inventarizimit të pasurive jofinanciare komunale dhe kryesuesi i Komisionit për vlerësimin e pasurisë jo financiare komunale. Lulzim Sylejmani, drejtor i Drejtorisë për Buxhet dhe Financa dhe kryesues i Grupit për monitorimin e rekomandimeve të dhëna nga ZAP-i, ka kërkuar nga zyrtari për regjistrimin e aseteve dhe kryesuesit e komisioneve që të raportojnë se deri ku kanë shkuar me regjistrimin e aseteve dhe pasurisë komunale. Drejtori Sylejmani u ka thënë kryesuesve të komisioneve dhe zyrtarit të regjistrimit të aseteve që t’i njoftojnë me kohë anëtarët e grupit për monitorimin e rekomandimeve, në rast të ndonjë ngecje në kryerjen e punës së tyre.

Avdullah Kryeziu, drejtor i Drejtorisë për Ekonomi, Zhvillim dhe Turizëm, anëtar i grupit për monitorimin e rekomandimeve të dhëna nga ZAP-i, ka thënë se “pas marrjes së raportit final nga ZAP-i, me kërkesë të kryetarit, kemi formuar dy komisione – atë për regjistrimin inventarizimin e pasurive jo financiare komunale dhe komisionin për vlerësimin e pasurisë jo financiare komunale”. “Pas formimit të këtyre dy komisioneve, në vazhdimësi jemi duke u marrë me të gjeturat e ZAP-it dhe të dy komisionet po ashtu edhe zyrtari për regjistrimin e aseteve komunale është duke e bërë një punë të mirë që besoj që kjo punë e tyre do të ketë edhe rezultat”, ka thënë ai.

Për regjistrimin e aseteve komunale ka folur Asllan Mazreku, zyrtar përgjegjës për regjistrimin e aseteve, i cili ka thënë se “është duke u vërejtur që komisionet janë duke punuar dhe këto komisione, kanë filluar të sjellin edhe materiale dhe deri në fund të vitit mund të them se do të kemi një pasqyrë shumë më të mirë sa i përket regjistrimit të pasurisë komunale”.

Esat Hoti, kryesues i komisionit për vlerësimin e pasurisë jo financiare komunale, është shprehur se pas marrjes së vendimit për emërimin në këtë komision, të gjithë anëtarët e komisionit e kanë filluar punën. “Besoj se angazhimi ynë si grup do të këtë edhe rezultatet e veta”, ka theksuar ai.
Ekrem Bytyqi, kryesues i komisionit për regjistrimin inventarizimin e pasurive jofinanciare komunale, ka thënë se “deri më tani mund të them se është bërë rreth 90 % e këtij regjistrimi dhe shumë shpejtë, si kryesues i këtij komisioni, do të dalim edhe me raportin final”. “Numri total i inventarit të regjistruar deri me tani është 3958, 247 janë jashtë përdorimit, kurse 3711 janë në përdorim”, ka deklaruar ai.

Qamil Sylka, anëtar i komisionit për vlerësimin e pasurisë jofinanciare komunale ka thënë se pas fillimit të përdorimit të programit e-pasuria, është duke u bërë komunikimi i mirë me zyrtarin për regjistrimin e aseteve, pasi në mënyrë i elektronike i dërgohen të dhënat këtij zyrtari.

Kryetari i ri i OVL-UÇK-së, Hysni Gucati, më të marrë këtë post është shprehur se listën e veteranëve e ka fryrë vetë Qeveria, e jo komandantët apo organizatat e dala nga lufta. Ai tha se qeveritarët kanë sjellë mbi 3 mijë emra për t’i bërë veteranë, për të cilët Gucati pati thënë se nuk e dinë ku kanë qenë në luftë.

Rexhep Selimi, deputet nga radhët e Vetëvendosjes, njëherit dhe ish luftëtar i UÇK-së thotë se Komisioni për verifikimin e listave është komision qeveritar, por përbërja e atij komosioni është nga njerëz me përgjegjësi të tanishme, por edhe të dikurshme në hierarkinë e UÇK-së.

Dhe sa i përket deklaratës së kryetarit të OVL-UÇK-së, për çështjen e “fryerjes” së listave të veteranëve, Selimi tha se i vjen mirë që kanë filluar edhe organiztat e tilla të merren me këto lista.

“Më vjen mirë që kryetari i sapozgjedhur e ka identifikuar si problem të madh fryerjen e listave. Mirëpo ai e ka rastin tani që të reagojë dhe të veprojë”, ka thënë ai për InfoPress.

Ai po ashtu thotë se në pothuaje me ligjin aktual kryetari mund të jetë shembulli më i mirë se si bashkëpunohet me drejtësinë, duke i denoncuar për vepër penale kushdo që ka dëshmuar rrejshëm dhe përfiton paligjshëm nga statusi i veteranit apo invalidit të luftës.

“Sa i përket ligjit për veteranët e UÇK-së, patjetër që ka nevojë për amandamente ashtu siç në kohën e procedimit ne i kemi dhënë vërejtjet dhe sugjerimet tona. Deri atëherë mund të fillojë pastrimi i listave edhe në përputhje me ligjin aktual”, nënvizoi Selimi për Gazetën InfoPress.

Shemsi Syla njëri nga anëtarët e komisionit për verifikimin e listave, të Zonës Operative të Karadakut,dha dorëheqje nga kjo pozitë për arsye se ishte i pakënaqur me procesin e verifikimit të listave,e cila sipas tij kishte deformime, zvarritje e neglizhencë.

Syla në deklaratën e tij kishte pati thënë se po terhiqet nga ky proces për shkak se ky i fundit e kishte parë të pamundur mbajtjen e premtimit që e kishte bërë se do t`i përmirësonte të gjitha gabimet në lista, dhe nuk do t`i hynte në hak askujt.

“Edhe pse nuk jam pajtuar me daljen e atyre listave, atëherë kam marrë përgjegjësi, jo vetëm si anëtar i komisionit, por mbi të gjitha edhe si organizator dhe drejtues i luftës, në pozitën e ish-zëvendëskomandantit të Zonës Operative të Karadakut. Por, duke e parë të pamundur realizimin e këtij premtimi, detyrohem që tani e tutje të mos jem më pjesë e këtij procesi”, kishte thënë Syla

Syla thotë për Infopress se përkrah ligjin për vlerat e luftës së UÇK-së, edhe pse dihet se ky ligj ka mangësi, paqartësi e edhe lëshime e gabime, por thotë se ka shpresuar se me angazhim ato do të tejkalohen e korrigjohen me akte nënligjore, gjë që nuk ka ndodhur. Këtë proces sipas Sylës nuk e rrezikon vetëm ligji i paqartë, por edhe qasja joadekuate në mënyrën e verifikimit nga ana e atyre që kanë pasur për obligim ta bëjnë një gjë të tillë.

“Unë nuk besoj se kjo qeveri dhe kjo klasë politike do të veprojë , sepse ata janë fajtorët e këtyre shkeljeve. Ata e kanë të kapur edhe prokurorinë edhe drejtuesit e ligjit sot në Kosovë, vetëm pas rrezimit të kësaj qeverie dhe ardhjes në pushtet të një qeverie parimore mund të anulojë si të tërë këtë verifikim dhe pastaj te krijojë komision të besueshëm dhe zbatues te ligjit me përpikeri”, ka thënë ai për InfoPress.

Përfaqësuesi i organizatave të dala nga lufta e Ushtrisë Çlirimtare të Kosovës (UÇK), Xhavit Jashari, tha se procesi i verifikimit është proces që ende nuk ka përfunduar,dhe sipas tij po shihet që nuk do përfundojë njëherë. Ai për këtë gjë thotë se fajtor në njëfarë mënyre është Qeveria, e cila nuk po merret më seriozisht me këtë çështje dhe nuk po e përshpejton këtë proces duke u mbështetur në Ligjin për Veteranët e UÇK-së.

“Qeveria është ajo që obligohet me ligj që të zbatojë të drejtat e këtyre kategorive dhe ta zbatojë në përpikmëri ligjin për vlerat e luftës,dhe të mos ndërhyjë as në lista e as në proceset tjera të Komisionit Verifikues të listave të Veteranëve të UÇK-së”, thekson Jashari për InfoPress.