Kryetari i Komunës së Malishevës, Ragip Begaj, sot në mbledhjen e rregullt të Këshillit të Drejtorëve, ka përsëritur kërkesën e tij në raport më drejtoritë përgjegjëse, që projektet të përfundojnë me kohë dhe të mos ketë vonesa.

“Nuk dua që projektet të realizohen gjatë fushatës zgjedhore, por të përfundojnë mundësisht para kohës së planifikuar dhe asgjë të mos lidhet me fushatën zgjedhore në tetor”, ka thënë Begaj.

Përndryshe, gjatë raportimit të drejtorëve të drejtorive, u bë e ditur se “ka filluar shenjëzimi i rrugëve brenda qytetit, por për shkak të shiut është ndërprerë dhe do të vazhdoj në ditët në vijim”, tha në raportin e tij drejtori i Shërbimeve Publike, Milazim Morina.

“Për shkak të reshjeve të shiut është ndërprerë edhe fushata e korrje shirjeve, e cila pritet të përfundoj brenda dy ose tri dite”, ka raportuar drejtori për bujqësi, Murat Hoxha, i cili gjithashtu tha se gjatë kësaj jave, përfundojnë të gjitha procedurat dhe nga java e ardhshme, pritet furnizimi i fermerëve me motokultivator, projekt i drejtorisë së bujqësisë.

Ndërsa drejtori për buxhet dhe financa, Vesel Krasniqi, duke prezantua raportin gjashtë mujor, tha se buxheti është realizuar sipas planifikimit, e sidomos pjesa e shpenzimeve në investimet kapitale, ku projektet janë realizuar sipas planifikimeve. Sa i përket realizimit të projekteve, u tha se janë duke vazhduar punimet në të gjitha projektet kapitale dhe deri më tani nuk ka vonesa.

Në mbledhjen e sotme, gjatë raportimeve të drejtorive, u tha se po vazhdojnë përgatitjet për organizimin e festivalit folklorik “Oda e Llapushës”, edicioni i katërt. Po ashtu, në këtë mbledhje u tha se edhe shërbimet komunale janë në vlugun e punës, sidomos në ofrimin e shërbimeve për qytetarët, e në mënyrë të veçantë për mërgimtarët.

Përgatitje janë duke u bërë edhe për fillimin e vitit të ri shkollor 2017-2018, ku janë planifikuar të hapen katër objekte të reja shkollore. /PrizrenPress.com/

Administrata e Kuvendit të Kosovës është e gatshme kurdo që i kërkohet ta përgatisë seancën konstituive. Akoma nuk ka datë të saktë se kur do të ndodhë kjo gjë.

Madje ajo do ta bëjë publik këtë veprim edhe në faqen zyrtare të Kuvendit. Kështu ka thënë për Gazetën Express, Ismet Krasniqi, sekretar i përgjithshëm i Kuvendit të Kosovës.

Sipas Krasniqit, mbetet vetëm të bëhet thirrja e seancës.

“Thirrja (data) e seancës konstitutive është e rregulluar me Kushtetutën dhe Rregulloren e Kuvendit, pra nuk është në mandatin e Administratës”, ka thënë ai për Express.

“Sa u përket përgatitjeve për seancën konstituive për Legjislaturën e Gjashtë të Kuvendit të Republikës së Kosovës, Administrata e Kuvendit është e gatshme të ndërmarrë të gjitha veprimet e veta logjistike, në çdo kohë kur kërkohet nga ajo”.

“Pra, në momentin kur kërkohet nga Administrata, edhe përmes ueb-faqes së Kuvendit, do t’i bëjë publike veprimet qe do të ndërmerren”.

E pasi të mbahet seanca, do të ndodhë edhe votimi i Qeverisë. Kështu bëjnë të ditur përfaqësuesit e koalicionit PDK-AAK-Nisma (PAN), të cilët thonë se seanca e parë e Kuvendit pritet të mbahet gjatë kësaj jave.

Sipas tyre, kandidat për kryekuvendar nga koalicioni më i madh i dalë në zgjedhjet e 11 qershorit, pritet të jetë lideri i PDK-së, Kadri Veseli.

Mirëpo, ndonëse është raportuar se ka deputetë të AKR-së, të cilët do ta votojnë Qeverinë në krye me Ramush Haradinajn, zyrtarë të këtij subjekti kanë thënë të vendosur se asnjë deputet i AKR-së nuk do ta bëjë një gjë të tillë.

Ata madje kanë theksuar se nuk do ta votojnë as kandidatin për kryeparlamentar nga radhët e PAN-it, Kadri Veseli. Por pavarësisht kësaj, përfaqësuesit e PAN-it kanë ritheksuar sërish se i kanë numrat e nevojshëm për ta bërë Qeverinë.

Gazmend Qorraj, i cili është profesori i parë dhe i vetëm në Kosovë që mban titullin “Jean Monnet Chair” për Integrime Evropiane në Universitetin e Prishtinës, ka thënë se Kosova duhet të kërkojë njohje nga Serbia dhe Bosnja e Hercegovina si parakusht për zbatimin e suksesshëm të Zonës Ekonomike Rajonale në Ballkanin Perëndimor.

Në një intervistë dhënë për gazetën “Epoka e re”, Qorraj ka theksuar se edhe pse BE-ja konsideron se duhet shtuar bashkëpunimi në Ballkanin Perëndimor, sipas tij, nuk ka klimë bashkëpunimi ndërmjet vendeve të Ballkanit. Ai thotë se problem shumë i madh në zbatimin e Zonës Rajonale Ekonomike do të jetë se kush e implementon këtë plan.

“Kosova medoemos duhet ta shfrytëzojë këtë rast që t’i kërkojë BE-së njohjen nga Serbia dhe Bosnja e Hercegovina në mënyrë që të realizohet suksesshëm ky projekt, përndryshe projekti ose ideja do të zbatohet vetëm parcialisht dhe përfitime do të kenë vetëm vendet e tjera të Ballkanit, por jo edhe Kosova. Si mund të realizohen projektet e mëdha kur njerëzit nga Kosova, qoftë në nivel biznesi, qoftë në nivel akademik, nuk mund të qarkullojnë në Serbi dhe Bosnje, madje as në BE, dhe pa e anashkaluar faktin se selia e RCC-së është në Sarajevë”, ka thënë Qorraj.

Sa i përket Zonës Rajonale Ekonomike, ai ka thënë se institucionet e Kosovës duhet të koordinohen dhe bashkëpunojnë më mirë.

“Mendoj se Kosova duhet të emërojë një zyrë koordinuese, respektivisht një koordinator dhe një grup ekspertësh që do t’i koordinojnë aktivitetet, projektet dhe të gjitha iniciativat lidhur me Zonën Ekonomike Rajonale dhe, po ashtu, të kërkohet përgjegjësi dhe punë nga një mekanizëm i tillë, në mënyrë që përfitimet të jenë evidente”, është shprehur profesori Qorraj. (Epoka e re)