Prizreni gjatë ditës së sotme ka shënuar temperaturën prej 37 gradë Celsius, duke u bërë kështu edhe qyteti me temperaturën më të lartë në Kosovë.

Këto temperatura të larta kanë ndikuar edhe në shtimin e pacientëve në spitalin e këtij qyteti.

Drejtori i Spitalit të Prizrenit, Dr. Afrim Avdaj ka thënë se këto temperatura që siç i ka quajtuar ai ishin tropikale kanë shtuar sidomos numrin e pacientëve, veçanërisht atyre me sëmundje kronike dhe fëmijëve.

“Numri i përgjithshëm i pacientëve që kanë kërkuar ndihmë është 100 persona, prej tyre 47 janë të pranuar në spital, numri i të pranuarve është 10 pacientë në repartin e Pediatrisë, 4 prej tyre në repartin e Kirurgjisë, të tjerët janë shtruar në reparte të tjera”.

Sipas tij, fluksi më i madh i pacientëve është i atyre me sëmundje kronike, me hipertension dhe me diabet.

Dr. Avdaj ka thënë në Kosova Direkt të Klan Kosovës se për fat të mirë nuk ka pasur raste që kanë përfunduar me vdekje dhe se pacientëve që kanë kërkuar ndihmë në Spitalin e Prizrenit i është dhënë tretmani i duhur mjekësor.

“Janë ndërmarrë të gjitha masat por se edhe ne si staf kemi ndërmarrë masa që numri i stafit të shtohet, duke patur parasysh edhe temperaturat e larta por edhe ardhjen e mërgimtarëve tanë në këtë kohë në Kosovë”.

“Intervenimet e planifikuara mund të zvogëlohen por duhet të përcaktojmë shkallë më të lartë të gatishmërisë ndaj atyre që atakohen nga temperaturat e larta dhe të ofrojmë trajtim dinjitoz mjekësor mërgimtarëve”.

Drejtori i Spitalit të Prizrenit, Dr. Avdaj u ka bërë thirrje të gjithë qytetarëve sidomos atyre me sëmundje kronike, me hipertension, diabet si dhe fëmijët e personat me moshë të shtyer që t’i shmangen diellit sidomos në periudhën kohore prej orës 11:00 deri 15:00 si dhe të konsumojnë sa më shumë lëngje.

Deputeti i Nismës, Zafir Berisha, nuk sheh dallime në mes LDK-së, AKR-së dhe PDK-së.

Ai thotë se këto tri subjekte politike, për dhjetë vite, kanë vjedhur bashkë.

“Për 10 vite LDK e AKR kanë vjedhë bashkë, ose ia kanë majtë qiriun kur ka vjedhë PDK-ja”, thotë Berisha

Ai, fton LDK-në dhe AKR-në që të mos shesin moral.

“Ju hajdutë që Kosovën e keni vjedhur bashkë me PDK mos shitni moral, se jeni të njëjtët legena dhe keni përgjegjësi për fundosjen e perspektivës së Kosovës dhe mos ia leni fajin Ramushin për hajnit që e keni bë bashkë me PDK-në”, shkruan Berisha në Facebook, transmeton PrizrenPress.

“Inati i gomarit që u shprehë nga disa sot që mos të takohen me Ramushin, shkaku i PDK-së është adoleshencë politike”.

Ai thotë se LDK-AKR dhe PDK, gjatë kohës sa ka qenë Ramush Haradinaj në Hagë, bashkarisht Kosovën e kanë bërë leckë njëpërdorimshme .

Berisha nuk e kupton edhe sjelljen e Vetëvendosjes.

“Këta të VV deri diku kanë të drejtë, mirëpo nuk po i kuptoj pse nuk takohen me Ramushin,e në anën tjetër i dërgojnë ftesë për bashkëpunim LDK-së e AKR-së që kanë vjedh bashkë me PDK-në”.

Berisha thotë se partitë politike po e refuzojnë Haradinajn, për të ngritur pazarin e ndarjesë së Qeverisë. /PrizrenPress.com/

Tridhjetë e tre përdorues të drogës janë arrestuar në Festivalin “NgomFest “ në Prizren.

Zëdhënësi i Policisë në Prizren, Hazir Berisha tha se me të dyshuarit është duke u marrë prokuroria.

“Gjatë netëve sa ka zgjatur festivali, janë identifikuar e më pas ndaluar nga Njësiti antidrogë, patrulla policore dhe hetues 33 të persona, ku janë siguruar prova materiale tek të cilët janë gjetur substanca narkotike”, tha Berisha për TV Prizrenin

Sipas tij, pas ndalimi, ndaj të dyshuarve, janë iniciuar rastet në Prokurori.

Berisha tregon se te të dyshuarit janë gjetur substanca të ndryshme narkotike si: kanabis, marihuanë, por edhe kokainë,trensmeton PrizrenPress.

“ Dilerët e drogës gjatë këtyre organizimeve tregohen mjaft të zhdërvjellët”, tha Berisha.

Ai tha se policia do të vazhdojë që të luftojë këtë dukuri në Prizren.

“Të gjithë ata që kapen me sasi të mëdha të këtyre substancave të ndaluara i dërgojmë para organeve të drejtësisë”, tha Berisha.

Lënda penale ndaj ish-gjyqtares, tani avokates, Shemsije Sheholli, e cila akuzohej për keqpërdorim të detyrës zyrtare, ka arritur afatin e parashkrimit absolut.

Gjykata e Apelit, këtë rast e kishte kthyer në rigjykim, në dhjetor të vitit 2016. Mirëpo, nga janari i këtij viti nuk është mbajtur asnjë seancë, për shkak të mos prezencës së ish-gjyqtares Sheholli, në Gjykatën Themelore në Prizren.

Si pasojë e shtyrjeve të vazhdueshme, ka ardhur edhe deri te vjetërsimi i lëndës më 2 korrik 2017, ende pa u mbajtur asnjë shqyrtim gjyqësor pas kthimit të lëndës në rigjykim.

“Betimi për Drejtësi” ka kontaktuar me kryetaren e trupit gjykues, Raime Elezi, e cila ka thënë se në këtë rast penal ka marrë të gjitha veprimet të cilat i parasheh ligji, për të siguruar prezencën e të akuzuarës në shqyrtim, por sipas saj, një gjë e tillë ka qenë e pamundur.

Elezi ka thënë se e pandehura që nga janari i këtij viti ka refuzuar të marrë pjesë në shqyrtimin gjyqësor me arsye se është e sëmurë rëndë dhe nuk mund ta përballojë gjykimin.

“Betimi për Drejtësi” ka kontaktuar edhe me prokurorin e rastit, Genc Nixha, i cili ka thënë se ai së bashku më gjyqtaren e rastit, kanë përdorur të gjitha mundësitë për të mbajtur rigjykimin, por sipas tij, një gjë e tillë është pamundësuar nga e akuzuara.

Nixha ka thënë se duke pasur parasysh që e akuzuara është profesioniste e lëmisë juridike, ka shfrytëzuar të gjitha metodat për t’iu shmangur shqyrtimit gjyqësor, pasi e ka ditur se do të arrihet parashkrimi absolut.

Për më tepër, ai ka thënë se në këtë rast është urdhëruar edhe sjellja me forcë e të akuzuarës, por një urdhër i tillë nuk ka arritur ta zbatojë policia me arsyetimin se e pandehura është e sëmurë rëndë.

Ndërsa, ish-gjyqtarja Shemsije Sheholli, për “Betimi për Drejtësi”, ka thënë se është shumë e sëmurë dhe momentalisht është e palëvizshme. Ajo ka thënë se pikërisht ky rast penal, e ka sjellë atë në këtë gjendje shëndetësore. Sheholli, ka paralajmëruar se sapo të përmirësohet gjendja e saj shëndetësore, do të ndjek ligjërisht të gjithë ata, që sipas saj, e kanë dëmtuar në këtë rast.

Sheholli, tutje ka deklaruar se gjykata ka qenë tendencioze në rastin e saj, pasi që e ka dënuar me burgim, pa e administruar lëndën civile, në të cilën pretendohet se ajo ka bërë shkelje, e të cilën mangësi, sipas saj, e ka vërejtur edhe Gjykata e Apelit, për të cilin fakt edhe e ka prishur aktgjykimin në fjalë.

Për më tepër, ajo ka thënë se gjyqtarja e rastit, ka bërë shkelje, sepse ia ka dërguar policinë në shtëpi, për ta shoqëruar në seancën e 7 korrikut 2017, megjithëse pesë ditë më herët, ka arritur afati i parashkrimit.

“Betimi për Drejtësi” në vazhdimësi ka raportuar rreth këtij shqyrtimi gjyqësor.

Ndryshe, më 12 shtator 2013, Prokuroria e Shtetit ka ngritur aktakuzë ndaj Shemsije Shehollit, sipas të cilës e njëjta si gjyqtare në ish-Gjykatën Komunale në Prishtinë, ka keqpërdorur pozitën e saj zyrtare.

Sipas aktakuzës, Sheholli ka aprovuar kërkesën e paditësve, Jetullah, Sherife dhe Naim Krasniqi, me të cilën ka vërtetuar se ata janë pronar të një prone, në vendin e quajtur “Kroi i Bardhë”, pa ftuar në shqyrtimin gjyqësor, palën paditëse.

Po ashtu, sipas aktakuzës, Sheholli i ka caktuar palës së paditur, përfaqësues të përkohshëm, pa u munduar që të sigurohet se i njëjti nuk  jeton në Kosovë, por se është mjaftuar me deklaratën e paditësve se i padituri, Ustun Sylejman, është shpërngulur në Turqi.

Tutje, në aktakuzë thuhet se Sheholli, nuk i ka zbatuar ligjet pozitive që të shpallë në gazetën zyrtare, vendimin mbi caktimin e përfaqësuesit të përkohshëm, me çka i është mohuar e drejta e pjesëmarrjes në kontest, trashëgimtarëve ligjorë të të paditurit Ustun, mbesat dhe nipat e tij, Zineta, Ifeta dhe Eroll Nikoqeviq dhe Emil Popoviq.

Lidhur me këtë aktakuzë, ish-gjyqtarja Shemisje Sheholli më 27 maj 2016, është shpallur fajtore për veprat penale me të cilat ngarkohej, dhe është dënuar me 3 muaj burgim efektiv.

Ndaj këtij aktgjykimi, palët e dëmtuara dhe prokurori i rastit, kanë parashtruar ankesë në Gjykatën e Apelit, ku kanë kërkuar që të rritet lartësia e dënimit.

Po ashtu edhe mbrojtësja e të akuzuarës, avokatja Shpresa Berisha-Rexhepi, ka bërë ankesë ku ka kërkuar që të prishet aktgjykimi dhe rasti të kthehet në shkallën e parë për rivendosje.

Me 5 dhjetor 2016, Gjykata e Apelit, ka marrë aktvendim me të cilin ka aprovuar ankesën e mbrojtjes dhe e ka kthyer rastin në shkallën e parë, për rivendosje.

Sipas aktvendimit të Apelit, gjykata e shkallës së  parë nuk ka arritur që të vërtetojë në tërësi gjendjen faktike, pasi që nuk ka administruar si provë, lëndën kontestuese për të cilën bëhet fjalë në aktakuzë, ku do të vërtetoheshin nëse janë të sakta pretendimet e palës akuzuese apo asaj mbrojtëse.

Lënda penale që nga janari 2017 është tentuar të rigjykohet, por Gjykata Themelore në Prizren ka qenë e pafuqishme që të mbajë një seancë të vetme, për shkak se e akuzuara ka refuzuar të marrë pjesë në gjykim me arsye se vuan nga sëmundje e rëndë.

Nga një raport mjekësor i Qendrës Klinike Universitare të Kosovës, përpiluar sipas kërkesë së gjykatës, thuhet se e akuzuara ka refuzuar të ekzaminohet për arsye se e ka lënduar këmbën. Tutje, thuhet se nga shkresat mjekësore që përmban lënda, pacientja nuk ka probleme neurologjike për të përballuar një gjykim, ndërsa sa i përket aspektit psikiatrik dhe kardiologjik, nuk mund të përcaktohet pasi që nuk është bërë ekzaminim direkt.