Mirije Berishës iu vra bashkëshorti, Jashar Berisha, nga forcat serbe më 1999. Tashmë 69 vjeçare, thotë se është trashëgimtare e pronës dhe shtëpisë ku jeton.

Mirije Berisha thotë se e drejta e pronës po i mohohet nga dy vëllezërit e ish-bashkëshortit të saj, Miftar dhe Eqrem Berisha, raporton KTV.

Për këtë ajo ka paditur kunetërit e saj, Miftarin e Eqremin në Gjykatën Themelore të Prizrenit, dega në Suharekë.

Përkrahje për të drejtën e pronës i ka dhënë vëllai tjetër i ish-bashkëshortit të saj, i cili ka hequr dorë nga trashëgimia e kësaj prone.

Pas padisë së bërë, u mbajt seancë në Gjykatën Themelore të Prizrenit, dega në Suharekë. Në këtë seancë, avokati Naim Qelaj ka thënë se prona dhe shtëpia i takojnë Mirije Berishës.

Ndërsa, i padituri Eqrem Berisha pretendon të jetë trashëgimtar i pronës dhe shtëpisë së Mirije Berishës.

Të paditurit Eqrem Berisha i pengoi prezenca e ekipit të KTV-së për ta përcjellë këtë seancë dhe u shfaq i nervozuar me gjyqtarin Shaban Zeqiri.

Përjashtimin e ekipit të KTV-së nga kjo seancë e përkrahu edhe avokatja e tij.

Por, gjyqtari u shpreh se kjo seancë është publike dhe mediat mund ta përcjellin atë.

Mirije Berisha zotohet se këtë përballje ligjore me kunetët e saj do ta çojë deri në fund, derisa të bëhet trashëgimtare e pronës dhe shtëpisë, të cilën e ka ndërtuar së bashku me ish-bashkëshortin e saj të vrarë.

Po për të njëjtën arsye, kjo gjykatë i ka dhënë trashëgiminë e gjysmës së shtëpisë Shyhrete Berishës, e cila fillimisht ishte penguar nga kunati i saj ta shfrytëzonte atë.

Në emisionin “Përballje” – prodhim nga Telegrafi.com me gazetarin Muhamet Hajrullahu – është diskutuar rasti gjyqësor i të mbijetuarës së masakrës së kryer nga forcat serbe ndaj familjes Berisha në Suharekë, gjatë vitit 1999.
Avokati Naim Qelaj ka deklaruar se klientja e tij, në telefonatën që kanë pasur pas vendimit të Gjykatës Themelore në Prizren (Dega në Suharekë), ka qenë shumë e emocionuar që rasti i saj pas 17 vitesh ka përfunduar në dobi të saj – ani pse jo me vendim fuqiplotë.

“Gjykata në Suharekë, që nga viti 2000 është përballur me kërkesën që ajo të kthehet në shtëpinë ku ka jetuar e ku ishin kujtimet e fëmijëve e të bashkëshortit të saj”, ka thënë ai. “Ajo ka thënë se ky vendim është lajm i mirë për të, sepse po triumfon e drejta. Telefonatën u ndërpre shpejtë, për shkak të gjendjes emocionale të saj”.

Në anën tjetër, Luljeta Demolli – drejtoreshë ekzekutive e Qendrës Kosovare për Studime Gjinore – ka thënë se ky rast ka gëzuar të gjithë aktivistët që kanë lobuar për temat si ajo e së drejtës së pronës.

‘Ky rast i ka përshkruar të gjitha dobësitë në sistemin tonë të drejtësisë e në sistemin tonë shoqëror për mos njohjen e pronës që i takon gruas si pjesë e barabartë e shoqërisë dhe familjes”, ka thënë ajo.

Shyhrete Berishës, së cilës më 1999 ia vrasin fëmijët dhe burrin, më në fund i njihet e drejta mbi pronësinë e gjysmës së shtëpisë dhe të tokës në të cilën ka jetuar me familjen. /Telegrafi/

Dy shtetas kosovarë, të shpallur në kërkim ndërkombëtar, janë arrestuar në policia kufitare e Morinës.

I pari është 27-vjeçari Pajtim Shala, 27 vjeç, nga Kleqke e Kosovës.

Ai u kap në hyrje të PKK Morinë, ku gjatë regjistrimit në sistemin rezultoi shtetas “i shpallur në kërkim ndërkombëtar”, nga autoritet zvicerane, i dënuar me 2 vite e 8 muaj burg për trafik droge.

Pritet ekstradimi i 27-vjeçarit drejt Zvicrës. Materialet për këtë rast do ti kalojnë Prokurorisë së Rrethit Gjyqësor Kukës, për veprime të mëtejshme.

Personi tjetër i arrestuar është Zahir Ymeri, 29 vjeç, nga Podujeva.

Edhe ai, gjatë regjistrimit në sistem rezultoi “shtetas i shpallur në kërkim kombëtar” e pas kësaj u arrestua.

Gjykata e Rrethit Gjyqësor Kukës me vendim penal datë 14.06.2016, ka caktuar ndaj tij, masën e sigurisë “Arrest me burg”, për veprën penale “Kontrabanda me mallra të tjera”. Ai ju dorëzua Drejtorisë së policisë së Kukësit, për veprime të mëtejshme, bëjnë me dije burime nga Policia Kufitare e Shqipërisë.

Njeriu që si kryetar i Degës e riktheu AKR-në në Therandë, duke i themeluar 13 nëndegë në gjithë komunën, është shkarkuar nga presidenti i AKR-së, pas zgjedhjeve të fundit, pa asnjë vërejtje paraparake. Me shkarkimin e kryetarit të Degës nuk pajtohet kryesia e Degës, Forumi i Gruas , Forumi i Rinisë dhe 13 nëndegë të cilat largohen nga AKR-ja.

Kryesia e Degës së AKR-së në Therandë, Forumi i Gruas, Forumin i Rinisë dhe 13 nëndegë kanë dhënë dorëheqje nga ky subjekt politik. Kjo ka ndodhur pas një vendimi të presidentit të AKR-së që ta shkarkojë kryetarin e Degës Mustafë Kadriajn.

Në një deklaratë shpërndarë medieve, thuhet se Dega e ka pranuar me qetësi vendimin, sepse thuhet në deklaratë “është sa i pabazuar, po aq edhe komik”

Më tej në reagim thuhet se vendimi në adresë të kryetarit të Degës Mustafë Kadriajt ka ardhur me 07.07.2017 ndërsa është protokolluar me 28.06.2017. Brenda dokumentit është edhe një datë tjetër, Prishtinë 24.06.2017. Datat tregojnë sa jo serioz është ky vendim, sepse presidenti Pacolli ka marr vendim për shkarkim në mbledhjen e mbajtur me 30.06.2017 ndërsa është protokolluar me 28.06.2017” thuhet në reagim.

Kryesia, përkatësisht kryetarët e nëndegëve e vlerësojnë këtë vendim si aspak të argumentuar, sepse thuhet më tej në deklaratë, deri në vendimin nga presidenti i AKR-së nuk kemi asnjë vërejtje për kryetarin, e po ashtu nuk e dimë se cilat qëndrime nuk i ka përmbushur kryetari ndaj Kryesisë qendrore, si dhe cilat shkelje i paska bërë në lidhje me politikat dhe programin e AKR-së.

Sipas strukturës së Degës në Therandë Vendimi për shkarkimin e kryetarit të Degës bëhet edhe më kundërthënës kur thuhet që ai ka krijuar përçarje në degë. Përkundrazi përçarja ka ardhur nga njerëzit servilë të presidentit Pacolli, e që nuk janë as anëtarë në librin amë të AKR-së në Suharekë, siç është znj. Albena Reshitaj, e cila është pjesë e Kryesisë qendrore, njëherësh edhe nënkryetare e AKR-së, por pa i kaluar procedurat e anëtarësimit ashtu siç kanë qenë për të gjithë anëtarët në nivel të degës,e po ashtu edhe në Kryesinë qendrore. Për këtë mban përgjegjësi presidenti i AKR-së,z. Pacolli. Prandaj, ne si kryesi ia rikujtojmë presidentit Pacolli, kryesisë qendrore dhe opinionit të gjerë se problemi ardhur nga shpifjet e të përkëdhelurve të presidentit Pacolli (Albena Reshitaj dhe Alban Lumi).

Kryesia e Degës, kryetarët e nëndegëve, Forumi Rinor dhe Forumi i Gruas jemi në mbështetje të kryetarit të Degës dhe me këtë ne si degë e AKR-së jemi kompakte dhe do të vazhdojmë si strukturë, por jo me akronimin AKR” thuhet në deklaratë.

Argument tjetër që vendimi i presidentit Pacolli është kundërthënës sipas strukturës bnë Suharekë e dëshmon edhe falënderimi i presidenti Pacolli për kryetarin e Degës,z. Mustafë Kadriaj, duke e falënderuar për rezultatet dhe angazhimet në zgjedhjet e fundit, e kjo dëshmohet edhe me e mailin e dërguar nga sekretarja e Kuvendit, Mimoza Muja.

Ne deklaratën e Degës së AKR-së në Therandë është edhe letra falënderuese nga presidenti Pacolli për kryetarin e Degës në të cilën mes tjerash thuhet “Unë të jam shumë mirënjohës dhe falënderues për përkushtimin tënd. E vlerësoj shumë çdo gjë që ti ke dhënë nga vetvetja për të mirën e këtij vendi. Unë e di se përkushtimi yt do të shpërblehet, sepse ti shërbeve me sinqeritet, tregove durim dhe maturi, ishe tolerant, prandaj unë besoj se rruga jonë është ajo e duhura për popullin tonë, nuk është më e lehta, por është e vetmja”.

Në deklaratën e gjatë shpërndarë medieve jepen hollësi të punës së kryetarit të Degës Mustafë Kadriajt, i cili AKR-në në Therandë e ktheu nga gjendja inekzistente. Në zgjedhjet e vitit 2013 i kishte vetëm 118 vota ndërsa pas gjashtë muaj angazhim të Mustafë Kadriajt, pas marrjes së timonit të Degës si koordinator, në zgjedhjet e vitit 2014 AKR në Suhrekë u gjashtëfishua, ndërsa deri në zgjedhjet e fundit i formoi 13 nëndegë, me tendencë të shtrirjes edhe më të madhe në terren. Në deklaratë gjithashtu përshkruhen edhe aktivitetet e kryetarit të Degës, prononcimet e tij në media në promovim të AKR-së, si dhe aktivitetet kundër AKR-së të disa personave që janë brenda AKR-së ndërsa punojnë për të tjerët.

Në deklaratë është edhe një shqetësim i Degës për një premtim të pa mbajtur. Sipas deklaratës Shtabi qendror i AKR-së u kishte premtuar secilit vëzhgues që do ketë mbi 5 vota në vendvotim do të kompensohet me nga 50€, ndërsa si bazë do të kenë 20€.

“Pas zgjedhjeve të 11 qershorit 2017 të gjithë u kompensuan me nga 20€, pa marrë parasysh rezultatet, e ky premtim ka qenë nga Shtabi Qendror i AKR-së. Për këtë mashtrim nga qendra, ne si kryesi i kemi kaluar ditët më të vështira nga presioni i vazhdueshëm nga vëzhguesit, të cilët me të drejtë i kërkonin mjetet e premtuara.

Pra, për ne si Kryesi e AKR-së në Suharekë, AKR-ja e ka humbur të drejtën morale që të dalë para qytetarit, kështu që ky është edhe një argument më shumë që më të mos jemi pjesë AKR-së” thuhet ndër të tjera në deklaratën e kryesisë së Degës së AKR-së në Suharekë. /R.Berisha/Gazetaere.com/