Një person i gjinisë mashkullore përderisa ishte duke lëvizur me motoçikletë e tij me targa lokale në Prizren, nga pakujdesia në vendkalim të këmbësorëve ka goditur një femër.

“Viktima ka pësuar lëndime trupore dhe e njëjta është dërguar për tretman mjekësor në QKUK-Prishtinë”, njofton policia, përcjellë PrizrenPress.

Nuk raportohet për të arrestuar. /PrizrenPress.com/

Policia e Kosovës ka njoftuar se një i mitur ka gjuajtur me armë një person në rrugën “Salejdin Berisha” në Prizren, mbrëmë në orët e vona.

“Viktima mashkull K-Shqiptar raporton se pas një zënke me të dyshuari mashkull k-Shqiptar – i mitur, i njëjti ka shtënë me armë zjarri në drejtim të këmbëve të viktimës. Nuk raportohet për të lënduar. Njësitë policore në vendngjarje kanë gjetur dhe konfiskuar një gëzhojë, ndërsa i dyshuari e ka dorëzuar pistoletën e cal 9 mm”, thuhet në raport, përcjellë PrizrenPress.

Sipas policisë, me vendim të prokurorit i dyshuari pas intervistimit dërgohet në mbajtje. /PrizrenPress.com/

Policia e Kosovës ka arrestuar një person në Prizren, i cili ka kanosur vazhdimisht një person tjetër.

“Është arrestuar i dyshuari mashkull K-Shqiptar, pasi që i njëjti në lidhje me një borxh në vazhdimësi ka kanosur viktimën mashkull K-Shqiptar. Me vendim të prokurorit i dyshuari pas intervistimit dërgohet në mbajtje”, thuhet në raport të policisë. /PrizrenPress.com/

Skender Berisha, i akuzuar për vrasjen e Qamil Avdylagës, të hënën, është dënuar nga Gjykata Themelore në Prizren, me 18 vjet burgim efektiv.

Trupi gjykues i kryesuar nga gjyqtari Skender Çoçaj, përveç Skender Berishës, ka dënuar edhe të akuzuarin Shpend Berisha me 2 vite e 6 muaj burgim për lëndim të rëndë trupor dhe Agron Avdylagën, me 3 vite burgim për tentim vrasje.

Ndërsa, të akuzuarit Gjemajli Berisha dhe Drilon Berisha, i ka dënuar me nga një vit burgim efektiv për veprën penale të shkaktimit të lëndimeve të lehta trupore.

Po ashtu, ka vendosur që ndaj të akuzuarve Ramiz Avdylaga, Fadil Avdylaga, Avni Bytyqi, Nexhmedin Berisha, Sazan Berisha, Arbër Berisha, të shqiptoi dënim me nga një vit burgim për secilin, për pjesëmarrje në rrahje.

Bujar Avdylaga dhe Arianit Berisha janë liruar nga akuza e pjesëmarrjes në rrahje, për shkak se nuk është arritur të provohet një akuzë e tillë.

Skender Berisha, akuzohej se në mars 2014, gjatë një përleshjeje në mes familjeve Berisha dhe Avdylaga, ka qëlluar për vdekje viktimën, Qamil Avdylaga.

Sipas aktakuzës, i njëjti, ka qëlluar edhe në drejtim të të dëmtuarve, Veli dhe Ilir Avdylagës, duke u shkaktuar lëndime të rënda me rrezik për jetë.

Aktakuzën e ka ngritur Prokuroria Themelore në Prizren, por me kërkesë të palës së dëmtuar, e njëjta është përjashtuar, ndërsa më pas aktakuzën e ka përfaqësuar prokurori Arben Ismajli, nga Prokuroria Themelore në Gjilan.

Shkaku i konfliktit në këtë rast ka qenë një pronë, për të cilën dy familjet pretendojnë pronësinë e për të cilën, disa vite para konfliktit, në vazhdimësi, janë përballur në Gjykatë, por aktgjykimet nuk kanë mbërritur asnjëherë formën e prerë./betimiperdrejtesi/

Në gjykimin e Bernard Përlazrit, i akuzuar për vrasjen e Hekuran Morinës, më 7 shtator të vitit 2015, në Prizren, dëshmuan dy dëshmitarë, ndërsa për të tretin, Serkan Gunejn, Gjykata lëshoi urdhër-arrest.

Dëshmitari i parë, Enver Ibrahimi, me profesion mjek, tha para trupit gjykues se për rastin e vrasjes kishte dëgjuar në televizion teksa ishte në ordinancën e tij.

Ai tha se të dy palët i ka njohur ngase i kishte pasur pacientë.

Ibrahimi tregoi se në datën kritike, në orët e pasditës në ordinancën e tij kishte qenë bashkëshortja e të ndjerit Hekuran Morina, ndërsa për të tjerat tha se nuk di asgjë.

Ndërsa, dëshmitari tjetër Shefki Kurtaj tregoi se në natën kritike kishte shkuar për darkë me kolegë dhe se në momentin kur kishin ndodhur të shtënat ai kishte qenë në një barnatore aty afër.

“Jo nuk kam parë asgjë, nga qebaptorja ‘Hyska’ kam hyrë në barnatore për të marrë një kapsulë për dhëmb, kam dëgjuar krisma dhe kur kam dalë kam parë guzhvë, ka pasë shumë persona, edhe kemi shkuar për t’i dhënë ndihmë. Nuk e kam njohur askënd, nuk e kam parë askënd duke gjuajtur vetëm se nga barnatorja kam dëgjuar krisma. E kam parë një veturë xhip, ngjyrë hiri ka qenë”, tha dëshmitari.

Dëshmitari tha se e kishte parë veturën “BMW X5” që ka qenë e kthyer në drejtim të Suharekës ndërsa personat nuk i ka parë.

Por, dëshmitari Kurtaj u ballafaqua me dëshminë e tij të dhënë në Prokurori, ku kishte deklaruar se i kishte parë 4 persona të cilët kishin hipur në veturën “BMW X5” dhe duke u larguar nga brenda veturës kishin vazhduar të shtinin në ajër.

Shefki Kurtaj tha para trupit gjykues se nuk kishte dëshmuar një gjë të tillë.

Në seancën e sotme avokatit Ndrec Doda nga trupi gjykues iu aprovua propozimi për dëgjimin e tre dëshmitarëve, të cilët do të dëshmojnë për ditën kritike.

Ndërsa, po ashtu edhe prokurorit special Haki Gecaj nga trupi gjykues iu aprovua propozimi për dëgjimin e ekspertit të mjekësisë ligjore.

Seanca e radhës u caktua për 15 gusht 2017.

Në këtë rast, Bernard Përlazri akuzohet nga Prokuroria për vrasje të rëndë në bashkëkryerje.

Përlazri akuzohet se më 7 shtator 2015 rreth orës 20:28 minuta në lagjen “Bazhderhana”, në bashkëkryerje me të akuzuarit e tjerë Leonard Përlazri dhe Ambroz Përlazri (nipat e tij, të cilët gjenden në arrati), të shtyrë nga hakmarrja e paskrupullt, për shkak se kundër tij ishte duke u zhvilluar procedura penale e iniciuar nga Hekuran Morina, i shkaktuan lëndime Morinës. /Kallxo.com/