Në rrugën “De Rada” në Prizren, janë gjetur dhe sekuestruar dy qese me substancë të dyshuar narkotike të llojit marihuanë.

Me urdhër të prokurorit pas intervistimit i dyshuari është liruar, ndërsa rasti vazhdon në procedurë të rregullt./PrizrenPress.com./

Ish-deputeti i Lidhjes Demokratike të Kosovës, Hatim Baxhaku, ka folur për mos futjen e tij në listën e deputetëve në zgjedhjet e 11 qershorit. Ai thotë se i pari i LDK-së, Isa Mustafa iu hakmor, pasi ai nuk e kishte votuar Hashim Thaçin për president të vendit.

“Jam i bindur plotësisht se mos futja ime në listën e kandidatëve për deputetë është kryesisht dhe kryekëput për mosvotimin e Thaçit si president dhe qëndimet e mia për demarkacionin. Kjo është arsyeja, sepse nuk ka arsye tjetër”, tha Baxhaku për Tv Dukagjini.

‘Unë besoj se ka pasur hakmarrje. Kjo është hakmarrje padyshim. Sidoqoftë, jemi në fushatë zjgedhore dhe unë nuk do ta dëmtoj procesin dhe do ta mbështesë partinë dhe kolegët e mi kandidatë për deputetë, por partia është kapur nga disa njerëz ”, tha Baxhaku.

Eqrem Kryeziu, njëri nga bashkëpunëtorët kryesorë të Ibrahim Rugovës dhe kryetar shumëvjeçar i Prizrenit ka reaguar pas raportimeve se kryeministri në detyrë, Isa Mustafa ka refuzuar rishikimin e demarkacionit me Malin e Zi.

“Tashmë edhe opinioni i gjerë e ka të qartë se kush është Isa. Dëshmia e z. Hajredin Kuçi për refuzimin e rishikimit të demarkacionit, përkundër gatishmërisë së autoriteteve të Malit të Zi, është kyçe. Nuk i pëlqen shokut Isë një shoqëri pa konflikte. Mundësisht të ketë përplasje civile, sikur edhe pati për demarkacion”, ka thënë Kryeziu, raporton lajmi.net.

Tutje Kryeziu thotë se Lidhja Demokratike e Kosovës ka mbijetuar të gjitha sfidat më të ashpra falë raportit emocional të anëtarësisë me të.

“Partitë e reja nuk e kanë këtë cilësi, këto janë tejet pragmatike. Por a mund ta vlerësojë Isa këtë dashuri të anëtarësisë ndaj LDK-së? Në asnjë mënyrë! Ai është aty për ta luftuar, për ta ndryshuar e për ta shndërruar Lidhjen Demokratike në një Organizatë Bazë të Punës së Bashkuar. Kjo organizatë ka Këshillin e Punëtorëve, anëtarët e të cilit zgjedhen për paaftësinë për t’u marrë vesh njëri me tjetrin: modeli titist i Kullës së Babilonit. Po të lëshohej ndërkomunikimi, karakteret totalitarë nuk mund të udhëheqin. Ja! Mbi këtë koncept Isa bën lista. Vetëm në këtë mënyrë mund të vallëzojë si vedetë në krye të Këshillit të Punëtorëve të Organizatës Bazë të Punës së Bashkuar “LDK””, ka shkruar në fund Kryeziu. /Lajmi.net/

Një mashkull i moshës 76 vjeç është gjetur pa shenja jete dhe me plagë të marra në kokë sot, gjatë orëve të pasditës, në afërsi të fshatit Sallagrazhdë të Suharekës.

Vdekjen e tij e ka konfirmuar për Indeksonline, zëdhënësi i Policisë për Rajonin e Prizrenit, Vesel Gashi.
“Policia e Suharekës ka marrë një informacion se rreth 16:40 një person është gjetur pa shenja jete i shtrirë në rrugë i moshës diku rreth 76 vjeçar, me këtë rast është njoftuar ekipi i emergjencës, ekipi së bashku me mjekun kujdestar kanë dalë në vendin e ngjarjes dhe kanë konstatuar edhe vdekjen e tij”, ka thënë Gashi.

Gjithashtu, sipas Gashit, personi që ka ndërruar jetë posedonte me vete një kosë dhe kishte plagë në pjesën e kokës përderisa nuk dihen detajet dhe hetimet janë duke vazhduar nga Policia e Kosovës.

“Sipas raportit të parë bëhet e ditur se personi në fjalë ka pas një kosë me veti dhe janë vërejtur plagë të marra në kokë. Dyshohet se ka qenë duke shkuar në arë, dhe fillimisht theksohet të jetë vdekje e dyshimtë. Hetimet janë duke vazhduar edhe pse është herët të flitet rreth motiveve apo diçka të ngjashme”, ka përfunduar Gashi.

I akuzuari Patrik Berisha, në shqyrtimin fillestar të mbajtur të martën, pranoi se ka kryer veprën penale “rrezikim i trafikut publik”, dhe është dënuar me 6 muaj burgim me kusht.

Berisha, i cili për këtë proces gjyqësor nuk kishte angazhuar mbrojtës, deklaroi se ai ka qenë i pakujdesshëm dhe ka shkaktuar aksidentin.

I akuzuari, gjithashtu deklaroi se se më pas i ka ndihmuar të aksidentuarit, duke i ofruar ndihmë në spital dhe pas daljes nga spitali dhe sipas tij, nuk ka asnjë problem me të aksidentuarit.

Berisha, kërkoi nga trupi gjykues, që gjatë marrjes së vendimit, të merren parasysh këto rrethana.

Aktgjykimin dënues ndaj Berishës, e bëri gjykatësja Shpresa Emra, dënim ky i cili nuk do të ekzekutohet brenda periudhës dy vjeçare, nëse tani i dënuari Berisha nuk kryen ndonjë vepër tjetër penale.

Patrik Berisha, akuzohej se me 29 maj 2014, në Prizren, në rrugën e “Ulqinit”, duke e vozitur veturën e tij, kishte bërë ngasje të pakujdesshme dhe të pa kontrolluar, duke mos e përshtatur shpejtësinë e automjetit, me ç’rast kishte humbur kontrollin. Dhe, kur arrin në vendin kritik, me pjesën ballore, të djathtë të automjetit e godet të dëmtuarin Osman Rexhepi, i cili ishte duke lëvizur në drejtimin e kundërt. Me këtë rast lëndime të lehta trupore pëson Osman Rexhepi, ndërsa lëndime të rënda trupore pëson bashkudhëtarja në automjetin e tij, e dëmtuara, Fiza Rexhepi.

Me këtë veprim, sipas Prokurorisë, Berisha ka kryer veprën penale “rrezikim i trafikut publik” nga neni 378 paragrafi 8 lidhur me paragrafin 6 të Kodit të ri Penal të Republikës së Kosovës, i cili dënohet me burgim prej gjashtë muaj deri në pesë vjet./betimiperdrejtesi/

Anëtari i LDK-së dhe ish ushtaraku Anton Quni, duke e komentuar deklaratën e akademikut Rexhep Qosja, i cili tha se LDK-ja i ka furnizuar ndërkombëtarë me dosje kundër komandantëve, dhe kundër UÇK-së, dhe se falë saj, është themeluar edhe Gjykata Speciale, thotë se, Kosova që nga viti 1998 ishte arenë e shpifjeve, propagandave dhe dezinformatave.

Quni për Gazetën InfoPress, pohon se, të gjitha këto ishin të drejtuara kundër organizimeve më të fuqishme politike dhe ushtarake, siç ishin LDK-ja dhe UÇK-ja, me të vetmin qëllim që të mos arrihej uniteti politiko ushtarak.

“Ky skenar, që unë mendoj se, është i përgatitur në Beograd, fatkeqësisht jetësohej nga shqiptarët të cilët nuk gjenin forcë brenda vetes të besonin se nuk është e largët dita e fitores tonë për çlirim të vendit”, thotë Quni.

Por, sipas ish komandantit të UÇK-së, gjithashtu është fakt se në periudhën e luftës dhe të pasluftës në rrethana të pasqaruara u vranë, zhduken, rrahën dhe u dhunuan shumë atdhetar të devotshëm, veprimtar e dijetar, gazetar, ushtarak, etj.

“Organet tona të drejtësisë nuk arritën dhe ishin të pazot që t’i zbardhin këto ngjarje”, shprehet Quni.

“Prandaj, Gjykata Speciale është rezultat i pazotësisë sonë që ta nxjerrim në dritë të vërteten rreth krimeve të ndodhura, për ç’gjë familjaret e viktimave presin me vite dhe asnjëherë nuk pushojnë së kërkuari që të zbardhet e vërteta dhe drejtësia të vihet në vend”, potencon ish komandanti i Ushtrisë Çlirimtare të Kosovës.

“Pres që; Gjykata Speciale të zbardhi të vërteten nga ku do të kuptohej përfundimisht se cilat ishin vetëm shpifje dhe a ka te diçka apo asnjë të vërtetë rreth gjithë atyre teorive konspirative të ngritura qëllimshëm, të kuptojmë kush hartoi dosje të rreme e kush të vërteta, dhe në fund të qartësohet se kush janë ata që mbollën urrejtje në mes shqiptarëve që me forcën e pendës dhe pushkës po punonin dhe luftonin për lirinë dhe pavarësinë e Kosovës!”, përfundon Anton Quni.

“LDK-ja gjatë i ka furnizuar ndërkombëtarët me dosje plot shpifje kundër komandantëve dhe, në përgjithësi, kundër UÇK-së dhe formimi i Gjykatës speciale është rrjedhojë sidomos e këtyre dosjeve. Nganjëherë këtë punë të pistë, njerëz të saj, gazeta e portale të saj, e bëjnë edhe sot!”, ka deklaruar Akademik Rexhep Qosja.