Dje në Prizren policia e Kosovës ka arrestuar një të dyshuar , pasi që i njëjti pas përfundimit të një seance gjyqësore, e ka sulmuar fizikisht viktimën mashkull palë në proces gjyqësor.
Ngjarja ka ndodhur në lagjen “William Walker” në orët e paradites.
Me vendim të prokurorit, i dyshuari pas intervistimit është dërguar në mbajtje.
Borussia Dortmund ka zyrtarizuar marrëveshjen me talentin Mahmoud Dahoud.
Reprezentuesi U21 i Gjermanisë, Mahmoud Dahoud do t’i bashkohet Dortmundit në përfundim të stinorit pas marrëveshjes që verdh-e-zinjtë kanë arritur me Borussia Monchengladbach.
Dortmund ka paguar klauzolën prej 10 milionë eurosh për futbollistin, i cili ka qenë në radarin e shumë skuadrave tjera evropiane, transmeton KosovaPress.
“Dahoud është një futbollist shumë i talentuar të cilin e kemi përcjellë tash e sa vite”, ka deklaruar drejtori sportiv i Dortmundit, Michael Zorc. “Ai tashmë ka treguar se mund të luajë në nivelet më të larta dhe e presim me krahë hapur për sezonin e ardhshëm”. Dahoud ka nënshkruar kontratë me Dortmundin deri në
vitin 2022.
Nënkryetari i Prizrenit, Lulzim Kabashi, thotë se shkurtimi i buxhetit për “DokuFest” mund të jetë për shkak të “opozitarizmit” të organizatorëve të festivalit.
Ai ka thënë se dalja e organizatorëve të këtij festivali kundër komunës në rastin e vdekjes së Xheneta Gashit ka ndikuar që komuna të zbehë përkrahjen.
“Rënie e buxhetit për ‘DokuFest’ lidhet me shkurtimin e buxhetit në çdo sferë. Nëse do të ishte në dorën time ‘DokuFesti’ do të kishte përkrahje të madhe. Ndoshta është një bashkëpunim jo aq i mirë i ‘DokuFestit’ dhe komunës. Është krijuar një lloj opozitarizmi ndërmjet ‘DokuFestit’ dhe komunës”, ka thënë ai në Interaktiv të KTV-së.
Kabashi ka njoftuar se “DokuFesti” është përkrahur nga Komuna e Prizrenit me dhjetë mijë euro, që paraqet gati gjysmën e shumës së dedikuar nga komuna për projektet kulturore.
“Në total buxheti është zvogëluar për 20 për qind. Kjo është një nga pasojat që ka ndikuar edhe në ngjarjet kulturore”, ka thënë ai.
Kryetari i Komunës së Rahovecit, Idriz Vehapi dhe Dafina Hoxha, drejtoreshë e organizatës ndërkombëtare humanitare ASB për Kosovë, kanë nënshkruar Memorandum Mirëkuptimi për “Mbështetjen e familjeve me nevojë të Komunës për krijimin e kushteve më të mira për fillimin e bizneseve të vogla familjare”.
Aktivitetet e projektit përfshijnë: Identifikimi, profilizimin e përfituesve potencial në territorin e Komunës së Rahovecit, trajnimin e përfituesve potencial nga lista e ngushtë (5 ditë trajnim për start-up bizneset e vogla familjare), përgatitja e planeve të biznesit për përfituesit e projektit, shpërndarja e paketave të qëndrueshmërisë apo granteve në formë të mjeteve-pajis si dhe monitorimi mbikëqyrja e projektit.
Ky projekt financohet nga Ministria e Punëve të Jashtme Gjermane dhe implementohet nga Organizata Ndërkombëtare Humanitare Gjermane “Arbeiter-Samariter-Bund Deutshland e V.”(ASB) në Kosovë.
Në kuadër të Këtij projekti në Komunën e Rahovecit do të përfitojnë gjithsejtë pesë (5) familje : dy familje të kombësisë Shqiptare, dy nga komuniteti Serb dhe një nga komuniteti RAE. /PrizrenPress.com/
Lulzim Kabashi, nënkryetari i komunës së Prizrenit, thotë se po të ishte në vendin e kryetarit të komunës, Ramadan Muja, do të dorëhiqej.
Kjo për shkak se Muja po e mban postin edhe pse është i dënuar për keqpërdorim të detyrës zyrtare.
Pavarësisht kësaj, Kabashi që vjen nga radhët e AAK-së, e ka cilësuar të suksesshme bashkëqeverisjen me PDK-në në këtë komunë. Ai thotë se edhe pse Muja ka munguar në postin e tij, qeverisja e Prizrenit ishte në nivel me komunat tjera të Kosovës, por shton se Prizreni ka pasur ngecje ekonomike.
“Po të isha në vendin e Mujës, personalisht në situatë të tillë do të jepja dorëheqje”, ka thënë ai në Interaktiv të KTV-së. “Relativisht ka qenë koalicion i suksesshëm. Nuk është mirë pa kryetar, por administrata tashmë ka një traditë të punës”.
Paul Pogba pritet të mungojë në ndeshjen e së shtunës ndaj West Bromit në Premierligë.
Manchester Unitedi me shumë mundësi këtë të shtunë do të luaj ndaj West Bromit pa mesfushorin Paul Pogba, i cili është i lënduar.
Pogba tashmë ka munguar në ndeshjen e fundit ndaj Middlesbrough dhe në dy ndeshjet e Francës ndaj Luksemburgut dhe Spanjës.
Vet francezi me anë të një postimi ka falënderuar të gjithë për mbështetje dhe ka premtuar se do të kthehet shumë shpejtë.
Kur aktori Lirak Çelaj doli në debate televizive duke e proklamuar vetën si kandidat i PDK-së për kryetar të Prishtinës, ai u mor me Prizrenin duke ia vënë komunës së udhëhequr nga PDK-ja, meritat për suksesin e festivalit Dokufest. Këtë e bëri më vonë edhe vet Komuna duke e quajtur vetën bashkëorganiztore. Por kështu nuk mendojnë vet organizatorët…
Një nga themeluesit e teatrit “Oda” në Prishtinë, aktori Lirak Çelaj, mori kulturën, si temë të parë në diskutimet e tija publike nëpër media sa i përket kandidaturës së mundshme të tij për kryetar të Prishtinës, nga radhët e PDK-së.
Çelaj nisi të kritikoj komunën e Prishtinës që nuk ka bërë asgjë për kulturën dhe zhvillimin e festivaleve artistike, dhe në të njëjtën kohë i vuri merita komunës së Prizrenit, e cila drejtohet që dy mandate nga PDK-ja, për suksesin e festivalit Dokufest.
Çelaj tha në Interaktiv të KTV-së se Komuna e Prizrenit e ka bërë këtë festival të madh ashtu sikurse është tash, në mesin e 15 festivaleve më të njohura në Evropë.
Por bash për këtë vit, Komuna e Prizrenit, ka vendosur që të ulë buxhetin për këtë festival, duke i dhënë vetëm 10 mijë euro buxhet. Krahasuar me vitet e kaluara ku buxheti ka pasur më shumë sesa 15 mijë euro.
Por arsyetimi i Komunës së Prizrenit për këtë ulje nuk kaloj pa e përmendur faktin e marrjes së meritave për festivalin.
Zëdhënësi i kësaj komune tha për Kohën Ditore, të martën, se fakti që Komuna e ndihmon festivalin me logjistikë, e bënë atë bashkorganizatore të festivalit.
Por, i gjithë ky tentim i drejtuesve të PDK-së për ta paraqitur festivalin si sukses të tyre, për drejtuesit e festivalit është absurd.
“Dokufesti ia paguan Komunës çdo vit 500 euro shtesë për mbeturina, me arsyetimin se DOKUFEST-i sjellë shumë njerëz në qytet, e ata prodhojnë shumë mbeturina dhe si rrjedhojë faturën duhet ta paguajmë ne”, thotë Veton Nurkollari, një nga themeluesit e festivalit dhe drejtor artistik i tij, për Insajderin.
Ai tregon se DOKUFEST-i paguan edhe qera Komunës së Prizrenit, rreth 4 mijë euro në vit.
“Komuna, DokuFest-it ia faturon hapësirat publike! Kjo është e pa precedent edhe praktikë që unë nuk kam pa askund! Me atë logjike edhe shitësit ambulantë janë sukses i Komunës!”, thotë Nurkollari.
Nurkollari thotë se DokuFest-i do të ishte i lumtur ta ndante suksesin me një Komunë që e mbështetë dhe e sheh suksesin e DokuFest-it si të tij por “Komuna e Prizrenit fatkeqësisht nuk është e tillë”.
“Përvetësimi i suksesit të dikujt tjetër dhe me fakte diskutabile po behët normë në Kosovë dhe ne nuk çuditemi që ky fenomen po adoptohet edhe nga funksionar të lartë të PDK-së”, ka thënë Nurkollari, për Insajderin.
E sipas, Agron Demit, ish-drejtor i Institutit GAP, që ka bërë analiza mbi të hyrat që DokuFest i sjellë Komunës së Prizrenit, shuma që e kanë nda kjo Komunë është shumë e vogël për një festival të tillë.
Llogaritet se DokuFest i sjellë mbi 4 milionë të hyra Komunës së Prizrenit.
Ai tha se nuk ka dëgjuar deklaratat e Çelajt dhe të Komunës së Prizrenit, por ato i duken pa asnjë lidhje.
“Nuk besoj që DokuFest do të pranonte me qenë bashkorganizator edhe nëse Komuna e Prizrenit do t’i kish mbuluar shpenzimet e DokuFestit-t”, tha Demi.
Dokufest sjellë çdo vit në Prizren me qindra kineastë nga e mbarë bota dhe mbi 10 shikues në disa kinema të shpërndara nëpër qytet. Dyfishi i shikuesve në kinema, është ai i vizitorëve gjatë kohës së mbahet Dokufest-ti teksa kostoja e shpenzimeve të tyre gjatë qëndrimit një ditor llogaritet të jetë nga 4 deri në 11 euro për person. /Insajderi.com
Në librin me kujtime nga jeta e tij, aktori shqiptar Bekim Fehmiu ka shkruar se në një vizitë në Romë në vitin 1971 kishte biseduar me regjisorin Dino De Laurentiis, i cili e kishte sugjeruar për një rol në filmin e vitit 1972.
Megjithatë, më pas shumica e aktorëve ishte vendosur të ishin amerikanë.
Ai shkruan se e kishte përgatitur deri në perfeksion rolin e Michael Corleone, djalit të Vito Corleone. Dy rolet kryesore më pas shkuan për Al Pacinon dhe për Marlon Brandon, shkruan KultPlus.
“U takova me aktorin John Janivijevic i cili mendonte se do të luante tek “The Godfather”. Nuk u pashë më kurrë me të pas herës së parë dhe asnjëri nuk performuam rolet që deshëm e për të cilat ekzistonin fjalë se mund të ishim të përkryer” shkruan Fehmiu.
Arben Shala, njëri nga koordinatorët e ecjes në zjarr, tregon se kjo mund të bëhet vetëm nëse ke bindje të fortë shpirtërore dhe mbi të gjitha është një ndjenjë e lartë artistike.
“Me reduktimin e egos, mënjanimin e frikës nga ne dhe me tejkalimin e stresit psikik, mund të na hapen rrugët e kontaktit me nivelin e qenies sonë të vërtetë, e cila në esencë është hyjnore”, pohon për gazetën “Kosova Sot” Arben Shala.
Ai tregon se shoqata, me aktivitetet e saja nuk ka kurrfarë prapavije dhe as që udhëhiqet nga ndonjë paragjykim religjioz.
“Me moton ‘Ti besojnë vetes dhe fuqisë së paskajshme në ne”, ajo në parim e orienton aktivitetin e saj.
E udhëhequr nga këto parime të veta esenciale, kjo shoqatë, në fillimin e pranverës, afër hapësirës së Parkut të Qytetit, në orët e vona të mbrëmjes së këndshme të ditës së parë të stinës së pranverës, në Prizren, organizoi ritualin e ecjes nëpër prush”, shpjegon ai.
Temperatura e prushit duhet të jetë diku 800-1200 gradë C
Ky manifestim tradicional, këtë vit është hera e dhjetë që organizohet në Prizren.
“Në këtë ritual, përveç shumë pjesëmarrësve nga Prizreni, morën pjesë edhe anëtarët tjerë nga: Prishtina, Gjilani, Lipjani Gjakova e gjetiu. Ky rituali i ecjes nëpër prush, për herë të dhjetë dhe vetëm në Prizren, organizohet në Kosovë dhe në të gjitha trojet shqiptare. Kuptohet se, paraprakisht, për t’u përballuar kjo frikë, për shumë fillestarë, nevojitet edhe parapërgatitje e caktuar rituale. Teknika e parë që aplikohet si parapërgatitje në këtë ritual është frymëmarrja ritmike, e cila ndihmon në largimin e streseve të ndryshme nga mendja dhe trupi, si dhe teknika e meditimit, që e koncentron vëmendjen e praktikantit kah caku i qëllimit të fundit”, tregon ai.
Sipas një parashikimi, para ritualit të ecjes, temperatura e prushit duhet të jetë diku 800-1200 gradë C.
“Patjetër se hapin e parë duhet ta ndërmarrin anëtarët më të vjetër. Sipas urtësive të civilizimeve të lashta, ligji themelor dhe universal i krijimit dhe evolucionit si proces në tërësi është ligji i të kundërtave. Ky ligj mbështetet në veprimin e dy nënligjeve të tjera, që mes vete janë antagoniste: e para është nënligji i ruajtjes së qetësisë së përhershme, dhe e dyta, është nënligji i lëvizjes së përhershme”, shprehet Shala.
Shton se nga veprimi i pashmangshëm i këtyre dy fuqive kontradiktore, si rezultat krijohet produkti i ri, kurse si manifestim ndodh nxehtësia që në natyrë shfaqet si emocion, si zjarr, flakë…
“Ajo si proces, në thellësirën e brendësisë ndërton dhe riprodhon, e nëse ngacmohet në substancë, djeg, përcëllon, shpartallon dhe transformon. Pra, zjarri në përgjithësi është si manifestim në proces. Tek njeriu shfaqet si emocion, e në materie: si kallje, flakë, nxehtësi, transformim… andaj, si stereotip evolutiv në thellësinë e mendjes sonë të përsosur, përherë shkakton frikë, respekt, përulje, nënshtrim… Gjithnjë frikë si bindje, frikë si veprim”, shprehet ai.
Të mos kesh frikë nga zjarri
Sipas Shalës, të mos kesh frikë nga zjarri do të thotë të jesh pjesë e saj, pjesë e një procesi hyjnor universal të natyrës.. pjesë e tërësisë së cilës i takojmë. Ai pastaj tregon se ky organizim ishte prioritet për Adem Kolgecin, i cili ecte në prush në mënyrë shumë të qetë dhe pa asnjë ngacmim.
Kurse Gjylieta Babuni- Naqa, nga Gjakova, është shprehur për “Kosova Sot” se së pari duhet të kesh një vetëdijesim të lartë dhe pastaj natyrisht se edhe mund të ecësh në prush, edhe pse duket e pamundur.
”Besimi krijon një ndjenë të këndshme, edhe pse është një sfidë në vete. Të mos kesh frikë nga zjarri do të thotë të jesh pjesë e saj, pjesë e një procesi hyjnor universal të natyrës”, shprehet ajo.
Shton se mjafton vetëm një hap i vogël në këtë rrugë.
Kurse Shala shprehet: ”Në këtë shkrirje, një hap në drejtim të vënies së kontaktit me qenien tonë të vërtetë hyjnore. Ky hap madhështor është besimi. Besimi në veten, gjegjësisht, besimi në Zotin që është në ne. Pikërisht mu këtë besim në veten tonë dhe në vetë Zotin që është në ne, e ndërton dhe e kultivon shoqata për krijimin e njeriut të ri “Vegimi Mistik” nga Prizreni”.
Ky ritual organizohet në ditën e parë të stinës së pranverës, në ditën e rifillimit të së resë, të ringjalljes, gëzimit, lumturisë, dashurisë.
Afërdita Gashi shprehet se ky është një besim i madh në vetvete.
“Unë këtë ecje e bëj si sfidë e besimi e bën të veten“, shprehet ajo për “Kosova Sot”. Ecja në prush ka filluar me pak njerëz, kurse tash po shtohet numri gjithnjë e më shumë . (Kosova Sot)
Ministri i Arsimit, Shkencës dhe Teknologjisë, Arsim Bajrami ka marrë pjesë në ceremoninë e vënies së gurthemelit të sallës së edukatës fizike të Shkollës Fillore dhe të Mesme të Ulët “Katër Dëshmorët”, në Ratkoc të Rahovecit, njofton kumtesa ministrore.
“Me ndërtimin e kësaj salle do të krijojmë kushte për një edukim më të mirë të fëmijëve tanë, në këtë fshat, i cili padyshim e ka merituar, sepse kjo shkollë tashmë po shënon 70 vjetorin e themelimit të saj”, theksoi Bajrami.
Të pranishmit, me një fjalë rasti i kanë përshëndetur edhe ministri i Administratës Publike, Mahir Yagcilar dhe ministri i Financave, Avdullah Hoti.
Ndërsa, kryetari i Rahovecit, Idriz Vehapi ka falënderuar Qeverinë e Kosovës për kujdesin për këtë shkollë dhe zgjerimin e përmirësimin e infrastrukturës shkollore në këtë komunë, por edhe kudo në Kosovë. /PrizrenPress.com/
