Banorët e tri lagjeve në Prizren, kanë dorëzuar një peticion në Komunë, për mosasfaltimin e rrugës.

Sipas tyre, kompania që ka fituar tenderin i ka ndërprerë punimet.

“ Ne nuk i dimë arsyet e ndërprerjes së punës”, thuhet në peticionin e banorëve të lagjes “Remzi Ademaj”, “lbrahim Lutfiu” dhe “Wiliam Voker” në Prizren.

“Kjo gjendje e rrugës paraqet rrezik, jo vetëm për qytetarët, por edhe për pronarët e shtëpive dhe pronarët respektivisht”.

Banorët kanë kërkuar nga Komuna, që të marrë masa për të përfunduar asfaltimin e tyre. /PrizrenPress.com/

Në fshatin Ratkoc të Rahovecit dy shtëpi janë përfshirë nga zjarri.

Një lexues i KosovaPress ka dërguar fotografi dhe video nga vendi i ngjarjes duke konfirmuar se zjarri në këto dy shtëpi ka rënë rreth orës 10:40.

Sipas dëshmitarit që aktualisht është pranë shtëpive që janë përfshirë nga zjarri nuk është raportuar për dëme në njerëz ndërsa zjarrfikësit dhe policia kanë dal në vendin e ngjarjes.

Dëshmitari tha se shtëpitë e djegura janë të Haxhi Krasniqit, ish-polic i Kosovës që tani jeton jashtë vendit.

Nuk dihen ende shkaqet se si ka ardhur deri te djegia e këtyre shtëpive.

Kryetari i Komunës së Rahovecit, Idriz Vehapi, ka pritur në takim drejtorin e spitalit regjional të Prizrenit Afrim Avdaj, me të cilin ka diskutuar për finalizimin e projektit të qendrës së dializës në Rahovec.

Vehapi ka thënë se është punuar shumë në rregullimin e objektit ku do të vendosen aparatet e qendrës së dializës dhe se Ministria e Financave, ka lejuar që të punësohen 13 punëtorë të rijnë enkas për qendrën e dializës në Komunën e Rahovecit.

Po ashtu, kryetari Vehapi ka kërkuar që sa me shpejtë të fillohet me përgatitjen e dokumentacionit të nevojshëm, për hapjen e konkursit për pranimin e stafit të ri dhe procedurat të cilat duhet respektuar për bartjen e një pjese të stafit i cili është trajtuar në spitalin e Prizrenit.

Kurse drejtori i spitalit regjional të Prizrenit, Afrim Avdaj, është shprehur i kënaqur me punën e cila është bërë në adaptimin e objektit ku do të vendoset qendra e dializës.

Ai ka thënë se shumë shpejtë do të fillojnë me procedurat tjera të cilat kanë të bëjnë me hapjen e konkursit për pranimin e stafit të ri, të cilët do të punësohet për të punuar në qendrën e dializës që do të hapët në kuadër të QKMF-së në qytetin e Rahovecit.

Përmes një projekti të dhuruar nga ndërkombëtarët, rrugët në komunën e Dragashit janë emërtuar me një vendim nga Kuvendi i Komunës, ndërsa këto ditë ka filluar vendosja e tabelave. Mirëpo, ankesat vazhdojnë.

Fillimisht për mënyrën se si u emërtuan rrugët dhe tash së fundmi, ankesat kanë vërshuar për punimet, siç thonë banorët, shkel e shko.

“Fillimisht, kemi të drejtë të dyshojmë se si është e mundur që projektin për vendosjen e këtyre tabelave e ka fituar një ndërmarrje, e cila nuk është nga komuna jonë. Pastaj, është për të dyshuar se si kjo ndërmarrje po mund t’i kryej punimet shkel e shko, duke i ngulur shtyllat në dhe, kështu që, ende pa i vendosur tabelat, shtyllat po bien përtokë!

Duket qartë se këtu nuk ka mbikëqyrës të punimeve dhe as që i intereson dikujt se si po implementohet ky projekt. Kjo ndërmarrje e huaj do ta kryej punën dhe do t’i marrë lekët. Por, jam i bindur se këto tabela nuk do të mbesin gjatë”, ka thënë për redaksinë tonë një qytetar, i cili na ka dërguar shumë foto nga shtyllat që po bien përtokë, ende pa iu vendosur tabelat./Radio Sharri/

Sikurse në zgjedhjet e gjertanishme, edhe në zgjedhjet e prillit, ku serbët përcaktohen për kryetarin e tyre, goranët e Dragashit do të marrin pjesë. Kjo është bërë e ditur përmes listave që ka përgatitur Beogradi, e ku treva e Gorës së Dragashit konsiderohet si Komunë në vete, ashtu siç ishte krijuar në kohën e Milosheviqit. Sipas këtyre listave, në trevën e Gorës do të hapet vetëm një qendër votimi, me katër vendvotime.

Qendra do të jetë në shkollën e fshatit Vraniç, fshat ky ku edhe vepron selia e kësaj Komune paralele, e menaxhuar nga Beogradi zyrtar.

Bazuar në praktikat e mëhershme, gjithë këtë proces do ta menaxhojë OSBE-ja dhe nuk do të quhet “votim” por “grumbullim votash”. Ne fakt, procesi do të ushtrohet, sikurse në çdo votim tjetër që zhvillohet kudo në botën demokratike.

Do të ketë kuti votimi, në të cilat do të ngjitet flamuri serb, do të ketë komisionarë lokalë, vëzhgues etj. Deri më tani, askush nga autoritetet lokale dhe qendrore të Kosovës nuk është deklaruar për këto zgjedhje, ndërkohë që bartësit e këtij procesi në trevën e Gorës janë mobilizuar maksimalisht, duke bërë fushatë në rrjetet sociale./Radio Sharri/