Deputeti i LDK-së, Anton Quni duke folur për iniciativën e presidentit Hashim Thaçi për transformimin e FSK-së në Ushtri ka thënë se LDK do të preferonte që kjo të bëhej përmes Kushtetutës.

“Preferenca ynë është që transformimi i FSK-së të mos kontestohet nga asnjë skeptik i NATO-s, preferencat tona ishin që kjo çështje të drejtohet me Kushtetutë”.

“Preferojmë që kjo temë të trajtohet brenda Kushtetutës, kjo është rruga më e drejtë dhe më e sigurt që nuk mund të kontestohet askush”.

“LDK preferon që të formojë Ushtrinë e Kosovës dhe të jetë në gatishmëri të marrë pjesë në partneritet me NATO-n kudo që ka nevojë angazhimi.

“Në alternativën tjetër duhet mbështetje e partnerëve strategjikë, duhet të kemi Ushtrinë por duhet të respektojmë ligjet dhe procedurat”.

Quni që ishte i ftuar në Ballë për Ballë të emisionit Ora e Fundit në Klan Kosova ka folur edhe për refuzimin e serbëve që të votojnë për transformimin e FSK-së.

“Ne duhet t’i bindim të gjithë qytetarët, edhe ata serbë që Kosova ka nevojë për Forcat e Armatosura që do të mbrojë të gjithë qytetarët e Kosovës”.

“Këtë forcë ushtarake duhet ta bëjmë bashkërisht, duke ofruar garanci se askush nuk do të rrezikohet nga Forcat e Armatosura të Kosovës por përkundrazi do të jenë në shërbim të të gjithë qytetarëve”

Lakmia për pasurim të kundërligjshëm, përmes kapjes së të gjitha strukturave të shtetit nga klasa e tanishme politike në pushtet, në atë lokal e atë qendror, ka krijuar bindjen se kjo garniturë asnjëherë nuk do të vetëdijesohet për dëmin e madh që po ia shkaktojnë Kosovës me mënyrën sesi e administrojnë pushtetin sundues me mentalitetin puro korruptiv, nepotik e tepër kriminal. Sipas analistëve politikë, pritja që këto parti të distancohen nga e keqja që i ka kapur të gjitha, në pozitë dhe në opozitë, në pushtetin qendror dhe atë komunal, pa asnjë përjashtim, është një pritje e kotë.

Në këtë situatë të rëndë për vendin dhe qytetarët, sipas analistëve, mbetet shpresa vetëm tek ambasadorët e shteteve të Kuintit që të ndikojnë në dekriminalizimin e kësaj skene politike. Politologu Arsim Haziri thotë se, për fat të keq, duke u sunduar nga një klasë e kriminalizuar politike, Kosova plotëson të gjitha kriteret negative për të mos qenë shtet serioz dhe demokratik i standardeve të përparuara evropiane e më gjerë, shkruan gazeta Kosova Sot.

Mungon elita e përgjegjshme

Sipas Hazirit, Kosova është kapur keq nga krimi dhe korrupsioni. “Klasa e kriminalizuar politike është arsyeja fundamentale pse vendi ynë vazhdon të krahasohet me shtete me funksionimin më të dobët në botë. Kosova ballafaqohet skajshëm me mungesën e një klase të ndërgjegjshme politike, e cila do të mund të jetojë dhe të organizohet për interesin nacional”, u shpreh ai.

“Kosova, si shteti më i ri, pothuajse ballafaqohet rëndë me mungesën e një elite nacionale e të përgjegjshme karshi detyrave, të cilat kanë derivuar prej mandatit popullor. Mbi bazën e realitetit socio-ekonomik dhe politik theksoi se po të donin përfaqësitë e huaja diplomatike dhe po të thyhej miti popullor i ndërtuar për subjektet politike vendi do të kishte gjasa për të qenë në një sundim më ligjor dhe më t? drejtë”, theksoi Haziri.

Sipas tij, pa ndëshkimin e aferave “Pronto” dhe pa instalimin e një formacioni të ri politik, i cili do të mund të zbatonte vullnetin qytetar në përpikëri, ne kot do të shpresonin për një prosperim t? përgjithshëm socio-ekonomik. “Tani konsideroj se kushti dhe mundësia e vetme për ndryshimin e mënyrës së udhëheqjes janë faktori popullor dhe ai ndërkombëtar”, tha Haziri.

Shpresa të pakta për ndryshim

Sipas analistit politik Ali Hertica, shoqëria e Kosovës dhe institucionet qeverisëse nuk e kanë dhënë deri më tani as minimumin e premtimeve të tyre për politikëbërjen e subjekteve politike, për qeverisjen në interes të qytetarit dhe të krijimit të një shoqërie të ndërgjegjshme. “Kur vjen koha e fushatës elektorale premtimet e tyre nuk kanë fund, por sot çdo gjë në Kosovë po lidhet ngushtë me statusin politik dhe vetëdijesimin e skenës politike. Vetëdijesimi dhe ndërgjegjja janë dy shtylla kryesore të çdo individi apo grupi të shoqërisë demokratike”, theksoi ai.

Sipas tij, ne jemi shumë larg shkollës së kulturës politike demokratike, ngase kemi një politikë, e cila vetëm sa po e degradon shoqërinë kosovare, duke ia veshur të gjitha ngjyrat e të këqijave si shtet. “Lirisht mund të themi se Kosova po administrohet sot nga antivlerat, nga askush, që është një tmerr i padurueshëm për qytetarin. Krimi nepotik i ka tejkaluar të gjithë kufijtë e shoqërisë”, tha Ali Hertica.

Ai thotë se një iniciativë qytetare për ndryshim, me përkrahjen ndërkombëtare, mbetet shpresa e vetme e ndryshimit të kësaj gjendje. “E gjithë kjo dukuri e kapjes së shtetit ka mllefosur qytetarin, i cili tani shpresën e ka tek mbështetja për ndryshim nga vendet e Kuintit dhe ambasadorët që së shpejti do të duhej të insistonin dhe ta kushtëzonin për çdo çmim instalimin efektiv të shtetit ligjor”, tha Ali Hertica

Kosova po shkel tani në 18-vjetorin e përfundimit të luftës dhe çlirimit nga okupatori serb, por institucionet kosovare qëllimisht kanë dështuar, duke mos guxuar deri më sot ta padisin Serbinë për gjenocid dhe të kërkojnë kompensimin e dëmeve të luftës. Përfaqësues të partive politike dhe ekspertë të së drejtës konsiderojnë se ky është një dëm i madh, që po i shkaktohet shtetit të Kosovës, një lëshim i pafalshëm i politikës ndaj shtetit serb. Kjo për faktin se edhe nëse Kosova nuk e ka të drejtën, meqë nuk është anëtare e OKB-së, atëherë kjo gjë ka mundur të bëhet në bashkëpunim me Shqipërinë. Nëse Kosova do të padiste Serbinë për dëme të luftës dhe gjenocid, ajo do të ishte në pozitë edhe shumë më të favorshme edhe në bisedimet me Serbinë në Bruksel.

Deputeti i LDK-së, Adem Salihaj, thotë se ky është një dështim i madh i institucioneve të shtetit, ngase nuk kanë pasur guxim që dëmet e luftës së pakut t’i bëjnë as temë diskutimi dhe kushtëzimi edhe në bisedimet e Brukselit. “Kosova duhet të bëjë përpjekje ta akuzojë Serbinë për krimet monstruoze dhe për dëmshpërblim”, ka thënë ai.

Opozita fajëson Qeverinë

Deputeti Ismail Kurteshi konsideron se qeveritarët e Kosovës gjatë tërë procesit të bisedimeve me Serbinë, që nga viti 2011, Serbisë janë duke i dhënë llogari për çështje të brendshme të Kosovës dhe nuk janë duke i mbrojtur interesat e shtetit.

“Ata asnjëherë, për asnjë çështje, nuk kanë kërkuar llogari nga Serbia. Kurrë nuk kanë kërkuar të bisedojnë për të pagjeturit, për pozitën e shqiptarëve në Luginën e Preshevës, për sukcesionin, për invadimin e veriut të Kosovës nga Serbia e për shumë çështje e pengesa që Serbia po ia bën Kosovës. Edhe çështja e dëmeve të luftës, Fondi pensional e shumë dëme të tjera nuk bëjnë përjashtim. Pse qeveritarët tanë nuk po i hapin këto çështje vërtet vështirë është t’i kuptosh. Po një gjë dihet, ata shkojnë atje pa asnjë ide, shkojnë të bisedojnë vetëm për çështje që i kërkon Serbia, siç janë ura e Ibrit, muri përtej urës, “Zajednica” e kështu me radhë. Herët a vonë, Serbia duhet t’i kompensojë të gjitha dëmet që ia ka bërë Kosovës, por kjo nuk do të ndodhë derisa Kosovën e udhëheq kjo kastë politike”, tha Kurteshi për “Kosova Sot”.

Po aq e ashpër për neglizhencën e kësaj teme është edhe deputetja e AAK-së, Time Kadrijaj. “Zhvillimi i bisedimeve në Bruksel është dashur kushtëzuar fillimisht me këto çështjet e dëmeve të luftës dhe kompensimin e tyre, me zbulimin e fatit të viktimave të luftës, mijëra të pagjeturve”, tha Kadrijaj për “Kosova Sot”.