Dy persona janë lënduar shkaku i një aksidenti që ka ndodhur në rrugën “De Rada” në Prizren.

Policia e Kosovës njofton se sot rreth orës 11:45 si pasojë e humbjes së kontrollit një veturë e tipit Volkswagen Polo ka kaluar në drejtimin e kundërt. Si pasojë kjo veturë ka goditur një çiklist dhe një veturë të llojit Renault.

“Sipas hetuesve të trafikut, thuhet se një shofer i cili në momentet kritike po e drejtonte automjetin Volkswagen Polo e humb kontrollin mbi veturën me ç’ rast nga shiriti i djathtë kalon në të majtin dhe fillimisht me pjesën frontale të veturës e godet një çiklist, më pas përplaset në një veturë të llojit Reno që ishte e parkuar dhe më tej në një veturë tjetër të llojit Volkswagen Golf po ashtu e parkuar”, thuhet në njoftimin e Policisë së Kosovës për rajonin e Prizrenit.

Si pasojë e këtij aksidenti, çiklisti dhe shoferi i dyshuar pësojnë lëndime trupore të cilët kanë kërkuar ndihmë mjekësore.

Kryetari i Kuvendit të Republikës së Kosovës, Kadri Veseli, ka bërë nderime pranë shtatores së veprimtarit të çështjes kombëtare, Fadil Vata, në Suharekë.

Në 27- vjetorin e vdekjes së udhëheqësit të Lëvizjes kombëtare, kryeparlamentari Veseli vendosi një tufë lulesh për kujtim dhe respekt të veprës së tij heroike, përcjell AktivPress.

Fadil Vata ishte njëri nga veprimtarët dhe udhëheqësit më të devotshëm të Lëvizjes kombëtare shqiptare të viteve ’80-ta, i cili vdiq në vitin 1990, si pasojë e dhunës dhe torturave çnjerëzore që u ushtruan mbi të në kazamatet jugosllave./AktivPress

EC Ma Ndryshe në partneritet me Organizatën e Personave me Distrofi Muskulare në Kosovë, të martën kanë nënshkruar memorandumin e bashkëpunimit me institucionet dhe ndërmarrjet publike lokale dhe qendrore në Prizren për mënjanimin e pengesave të qasjes fizike për Personat me Aftësi të Kufizuara, që ka për synim një qytet të qasshëm për të gjithë.

EC dhe institucionet e ndërmarrjet publike lokale dhe qendrore janë pajtuar që të vazhdojnë bashkëpunimin në mënyrë të strukturuar në kuadër të nismës për mënjanimin e pengesave të qasjes për PAK në ndërtesat e institucioneve përkatëse dhe hapësirën publike të qytetit të Prizrenit, me synimin për t’i adresuar sfidat në qasjen fizike të PAK-ve në Prizren. Palët janë dakorduar që angazhimin e tyre ta strukturojnë në formën e një marrëveshjeje bashkëpunimi që synon ndërtimin e një qyteti pa pengesa dhe që ofron mundësi të barabarta për të gjithë.

Në veçanti, kjo nismë është në harmoni të plotë dhe ndihmon në përmbushjen e objektivave të Strategjisë Nacionale për të Drejtat e Personave me Aftësi të Kufizuar 2013-2023 dhe Strategjisë Komunale të Prizrenit për Personat me Aftësi të Kufizuar 2016-2018

Nisma për mënjanimin e pengesave të qasjes do të realizohet përgjatë viteve 2017, 2018 dhe 2019, duke filluar nga Maji 2017.

Nisma në fjalë ka dalë si rezultat i projektit “Prizreni, një qytet pa pengesa”, të cilin EC dhe OPDMK e kanë realizuar gjatë vitit të kaluar, ku qëllimi i përgjithshëm ka qenë përfshirja dhe ngritja e pjesëmarrjes së Personave me Aftësi të Kufizuara dhe të rinjve në projektimin e Prizrenit pa pengesa.

Institucionet e ndërmarrjet publike nënshkruese të memorandumit janë: Komuna e Prizrenit, Drejtoria për Shërbime Publike, Komuna e Prizrenit, Drejtoria për Urbanizëm dhe Planifikim Hapësinor , Ministria e Kulturës, Rinisë dhe Sportit / Qendra Rajonale për Trashëgimi Kulturore në Prizren, Teatri Profesionist/Shtëpia e Kulturës Prizren, Posta e Kosovës Prizren, Universiteti i Prizrenit “Ukshin Hoti”, Këshilli Gjyqësor i Kosovës / Gjykata Themelore Prizren, Këshilli Prokurorial i Kosovës / Prokuroria Themelore Prizren, Policia e Kosovës / Drejtoria Rajonale e Policisë së Kosovës Prizren, Ministria e Punës dhe Mirëqenies Sociale / Qendra për Punësim dhe Aftësim Profesional Prizren