Ministri i Arsimit, Shkencës dhe Teknologjisë, z. Arsim Bajrami dhe kryetari i Sindikatës së Bashkuar të Arsimit, Shkencës dhe Kulturës (SBAShK), kanë nënshkruar sot Kontratën e re Kolektive të Arsimit në Kosovë.

Ministri Bajrami, me këtë rast tha se, kjo Kontratë përcakton një partneritet strategjik të MAShT me Sindikatën në të gjitha dimensionet në sektorin e arsimit dhe kjo vjen si rezultat i përpjekjeve të MAShT që të rregullojë pozitën e mësimdhënësve.
“Kjo Kontratë parasheh obligimet e shtetit të Kosovës, obligimet e të gjitha komunave të Kosovës që të kujdesen që mësimdhënësit të kenë një pozitë adekuate materiale, që ata të stimulohen për të ngritur cilësinë, sepse rruga për ta ngritur cilësinë në arsim shkon përmes mësimdhënësve të përgatitur”, tha Ministri, ndërsa foli edhe për bazën ligjore që po përgatitet dhe po vazhdon të përmirësohet në të mirë të ngritjes së cilësisë në arsim, por edhe avancimin e pozitës së mësimdhënësve.

Ministri Bajrami, po ashtu theksoi se, me Kontratën e re është promovuar edhe një rol aktiv i Sindikatës në politikbërje. “Kontrata ofron një kornizë të gjerë të bashkëpunimit, jo vetëm në misionin klasik të Sindikatës që e ka çdo shtet, por edhe në një rol të ri përtej misionit, pra bëhet partner për stimulimin e mësimdhënësve, për ngritjen në karrierë, për zhvillim profesional dhe për vlerësim të performancës”, tha ministri Bajrami, ndërsa në këtë drejtim theksoi edhe faktin se Sindikata tash e tutje, ndër të tjera, do të monitorojë procesin e zgjedhjes së drejtorëve të shkollave, në mënyrë që të minimizohet ndikimi politik në këtë proces.

Ndërsa, kryetari i SBAShK-ut, z. Rrahman Jasharaj, theksoi se e veçanta e Kontratës së re në krahasim me kontratën e kaluar është se tani, përveç arsimit parauniversitar, e mbulon edhe arsimin universitar. “Ministri Bajrami dhe MAShT do të na ketë në krah në angazhimet për ngritjen e cilësisë, krahas angazhimeve për ngritjen e mirëqenies së arsimtarëve”, tha ai.

Kontrata e re Kolektive e arsimit në Kosovë përcakton të drejta të posaçme dhe obligimet e të punësuarve në institucionet publike dhe private të arsimit parauniversitar dhe atij universitar, të drejtat dhe obligimet e punëdhënësit, si dhe të drejtat dhe obligimet e palëve nënshkruese.

Shkuarja në Kalanë e Prizrenit do të jetë më e lehtë nëse ekspertët thonë se vendosja e një teleferiku nuk do të dëmtojë trashëgiminë kulturore në këtë monument.

Kështu i ka thënë televizionit publik Vjollca Aliu, drejtoreshë e Departamentit të Trashëgimisë Kulturore në Ministrinë e Kulturës.

Aliu, në Ditën Botërore të Trashëgimisë së Monumenteve Kulturore ka thënë se Ministria e Kulturës vazhdon të mbetet institucioni kryesor që po synon përmbushjen e objektivave por edhe promovimin e vlerave kulturore të Kosovës.

Ajo ka thënë se janë 4 lokalitete që vazhdojnë të mbesin në qendër të investimeve, njëkohësisht janë edhe lokalitetet më të vizituara nga turistët.

Sipas Aliut, këto janë Parku Arekologjik Ulpiana, Kalaja e Novobërdës, Lokaliteti i Brusnikut dhe Kalaja e Prizrenit. Kjo e fundit, sipas Aliut, pritet të jetë e hapur zyrtarisht për vizitorë, pasi atje po rregullohen shtigjet.

E pyetur për ndërtimin e teleferikut në Kalanë e Prizrenit, Aliu ka thënë se teleferiku është një projekt që është iniciuar nga komuna e Prizrenit dhe është shumë i nevojshëm.

“Janë komisionet në përbërje të profesionistëve që do të vendosin për vendosjen apo jo të teleferikut”, ka thënë Aliu.

Ajo ka thënë se Ulpiana vazhdon të mbetet një nga lokalitetet më të vizituara. Sipas saj, është aktualisht në realizim një projekt për infrastrukturën areko-turistike në Ulpianë. “Këtë vit po vazhdon faza e dytë e punimeve”, ka thënë Aliu.

Nga muaji qershor, sipas saj, vizitat në Ulpianë do të jenë me pagesë.

Ndërkohë në një lidhje nga Ferizaj, po për Ditën Botërore të Trashëgimisë së Monumenteve Kulturore, Ilir Bytyqi, përgjegjës në sektorin e trashëgimisë kulturore në Ferizaj ka folur për punën që kanë bërë atje më mbrojtjen e trashëgimisë kulturore.

Ai ka thënë se Ferizaj është një vend me lokalitete që nga periudha e Neolitit e deri në mesjetën e vonë.

“Mund të them se kemi një numër prej 24 monumenteve që kohët e fundit kanë pasur mundësinë të restaurohen falë UNDP-së dhe Komunës së Ferizajit” ka thënë Bytyqi.

Derisa, Drejtoresha e Departamentit të Kulturës Vjollca Aliu ka apeluar për kujdes në promovim dhe ruajtjen e vlerave të trashëgimisë kulturore.

Data 17 prill shënoi përvjetorin e tretë të vdekjes së shkrimtarit të mirënjohur kolumbian Gabriel García Márquez.

Gabriel García Márquez, i cili fitoi çmimin Nobel për letërsi, në vitin 1982, shkruante letërsi me nuanca të natyrës latino-amerikane, mirëpo ai pati një ndikim universal. Ai konsiderohet ndër bartësit më potentë të zhanrit letrar, të njohur si realizmi magjik, në të cilin gërshetohen realja dhe fantastikja. Këtë stil nuk e shpiku ai, mirëpo e përdori me aq mjeshtëri sa arriti të ndikojë tek shkrimtarët më të mëdhenj në gjithë botën, përfshirë këtu Salman Rushdie-n e Britanisë.
Në Bogota të Kolumbisë, Garcia Marquez, filloi të studionte për një karrierë në jurisprudencë. Kjo aspiratë nuk ishte jetëgjatë, sepse ai u tërhoq nga universiteti ende pa diplomuar, me qëllim të ndjekjes së ëndrrës së tij të vërtetë.

Ai filloi karrierën si gazetar, por ishte një gazetar më ndryshe, sepse nuk i pëlqente të incizonte zërin. Për Paris Review ai kishte thënë që gazetarët duhet të bisedojnë gjatë me dikë, pa e incizuar. Në fund, ata duhet të shkruajnë vetëm përshtypjet e tyre, jo fjalitë e sakta. Kjo qasje jo-konvencionale nuk ishte dhe aq premtuese për të.

Edhe pse i shprehur kundër autoritarizmit, ai përkrahte të majtën dhe ishte mik i ngushtë me diktatorin kuban Fidel Castro. Ai madje punoi për të, sipas Huffington Post, në agjencinë e lajmeve qeveritare Prensa Latina në vitin 1960. E prandaj, nuk hynte dot në ShBA. Një vizë për në ShBA i ishte mohuar për tri dekada me radhë. Kjo sepse ai përkrahte haptazi atë që ShBA-të luftonin haptazi – qeveritë majtiste. Këtë ndalesë vize e anuloi presidenti Clinton në vitin 1990, sipas New York Times.

Marquez qëndroi me të njëjtën grua, më shumë se një gjysmë shekulli. Ai u martua me Mercedes Bracha në vitin 1958. Ishte me të deri në vdekje. Është pikërisht ajo që po planifikon të botojë veprën e tij të pabotuar, Do të takohemi në gusht, sipas The Australian.

Ai shiti më shumë kopje të veprës së tij nga të gjithë, përpos Biblës, sepse vetëm Bibla ka shitur më shumë kopje në gjuhën spanjolle se Gabriel Garcia Marquez. Vetëm romani i tij “Njëqind vjet vetmi”, është shitur mbi 50 milionë kopje, i përkthyer në 25 gjuhë.

Për ta nderuar shkrimtarin e famshëm Kolumbia vendosi fotografinë e tij në bankënotën e 50 pesove në Kolumbi.

Braktisja e shkollës nga nxënësit është theksuar si shqetësim i rëndësishëm nga autoritetet komunale të Suharekës përgjegjëse për sektorin e arsimit.

Në bazë të të dhënave zyrtare del se 370 nxënës të të gjitha niveleve të arsimit parauniversitar janë të pa vlerësuar me nota gjatë vitit aktual shkollor.

Drejtoria Komunale e Arsimit e Suharekës ka shpalosur brengën në kuadër të raportimit për punën e bërë në periudhën janar-dhjetor 2016. Po ashtu ka bërë të ditur se ka obliguar shkollat që të themelonin ekipet për parandalim dhe reagim ndaj braktisjes dhe mosregjistrimit në arsimin e obliguar.