Drejtues të Gjykatës Themelore në Prizren janë ankuar se objekti i këtij institucioni gjyqësor nuk i përmbush as për së afërmi kushtet për veprimtari në përputhje me standardet e kohës.

Mungesa e hapësirave të mjaftueshme sipas tyre është një sfidë shtesë për Gjykatën e Prizrenit, sidomos për faktin se stafi mbështetës punon në kushte të vështira, shkruan sot “Koha Ditore”. Për këtë arsye në Këshillin Gjyqësor të Kosovës është dorëzuar kërkesa për ndërtimin e një objekti të ri për këtë gjykatë.

Kryetari i Gjykatës Themelore të Prizrenit, Ymer Hoxha, ka bërë të ditur se ka kërkuar nga KGJK-ja që kjo çështje të trajtohet dhe të gjejë një zgjidhe. “Kërkesën e kemi paraqitur në Këshillin Gjyqësor, që të na mundësohet gjetja e një lokacioni dhe ndërtimi i një objekti të ri modern të gjykatës me standardet që kërkon koha”, ka thënë Hoxha, duke përmendur si referencë ndërtimin e Pallatit të Drejtësisë si dhe projektet përkatëse në Ferizaj dhe në Gjakovë. Ai ka shfaqur shpresën se do të ketë mirëkuptim për këtë kërkesë, meqë Gjykata Themelore e Prizrenit s’ka hapësira të nevojshme pune.

Objekti i Gjykatës Themelore të Prizrenit qe rinovuar më 2010 me mbështetjen e USAID-it.

Pak ditë më parë KD-ja ka raportuar se 30 mijë lëndë të pakryera i kanë mbetur Gjykatës Themelore në Prizren në fund të vitit 2016. Drejtuesit e kësaj gjykate kanë theksuar se angazhimi i tyre ka qenë në nivel, porse ka sfida për uljen e numrit të lëndëve të mbetura.

Në bazë të urdhëresës së lëshuar nga Gjykata Themelore Prizren, janë arrestuar dy persona që ishin duke u kërkuar, dhe të njëjtët janë dërguar në vuajtje të dënimit në burgun e Dubravës, shkruan PrizrenPress.

Në raportin e Policisë thuhet se njëri nga ta u arrestua në rrugën “Mbreti Pleurat” në Prizren dhe tjetri në rrugën “Fetah Gega”, gjatë orëve të para të ditës së djeshme. /PrizrenPress.com/

Një baba i dhunshëm është arrestuar dje në Prizren nga Policia e Kosovës. Sipas Policisë, i dyshuari në gjendje të dehur ka sulmuar fizikisht djalin e tij, shkruan PrizrenPress.

“Është arrestuar i dyshuari  mashkull K-Shqiptar pasi që i njëjti në gjendje të dehur ka sulmuar fizikisht djalin e tij”, thuhet në njoftimin e PK-së.

Me vendim të prokurorit i dyshuari është dërguar në mbajtje. /PrizrenPress.com/

Dje në Prizren një baba e ka njoftuar policinë se vajza e tij e mitur është larguar nga shtëpia, më 14 janar të këtij viti, dhe nuk dihet asgjë për vendndodhjen e saj, shkruan PrizrenPress.

Lajmin e ka bërë të ditur Policia e Kosovës me anë të raportit 24 orësh.

“Ankuesi mashkull K-Shqiptar ka raportuar se vajza e tij e mitur, nga data e lart-cekur ka dalë nga shtëpia dhe nuk dihet vendndodhja e saj. Njësitet policore janë duke hetuar rastin”, njofton Policia e Kosovës./PrizrenPress.com/