Kuvendarët e të gjitha partive politike në Prizren,  i ka “bashkuar” arrestimi i Ramush Haradinajt.

Ata,  kanë kërkuar lirimin e menjëhershëm të Haradinajt.

Pas debatit të zhvilluar në seancën e jashtëzakonshme, Kuvendi i Prizrenit, ka nxjerrë edhe një deklaratë të përbashkët.

Në këtë deklaratë, Kuvendi i Prizrenit, nga Franca, që të shqyrtojë rastin e Haradinajt.

“Franca nuk duhet të lejojë keqpërdorimin e Interpolit nga  Serbia”. /PrizrenPress.com/

DEKLARATË

Kuvendi i Komunës së Prizrenit, kërkon nga Qeveria e Republikës së Kosovës, të vendosë si pikë prioritare heqjen e fletëarresteve për të gjithë qytetarët e Republikës së Kosovës, dhe të vendosë masa reciprociteti me Serbinë.

Kuvendi i Komunës së Prizrenit, po ashtu, kërkon nga institucionet vendore dhe ndërkombëtare që, në asnjë rrethanë të mos nëpërkëmben vlerat kombëtare siç është rasti i përsëritur disa herë me ushtarët e Ushtrisë Çlirimtare të Kosovës, të cilët krahas forcave të NATO-s, sakrifikuan çdo gjë në mbrojtje të popullatës kosovare.

Një person duke lëvizur me veturën e tij në Prizren nga pakujdesia dhe mospërshtatja e shpejtësisë së lëvizjes me kushtet e rrugës ka dalë nga rruga dhe është përplasur në murin e një shtëpie.

Policia njofton se si pasojë e aksidentit lëndime trupore kanë pësuar dy pasagjerë, një mashkull dhe një femër dhe të njëjtit janë dërguar për tretman mjekësor

Kryetari i Komunës së Malishevës, Ragip Begaj, ka pritur sot, në takim të rregullt, pjesëtarët e Liaison Monitoring Team (LMT) në Malishevë, pjesë e KFOR-it, me të cilët kanë biseduar për çështje të ndryshme të bashkëpunimit mes Komunës së Malishevës dhe KFOR-it, përkatësisht LMT-së, ndërsa e kanë vlerësuar të mirë edhe situatën e sigurisë së përgjithshme.

Fillimisht, kryetari Begaj i ka uruar pjesëtarët e LMT-së, pjesë e KFOR-it zviceran në Kosovë, për një vit të ri të suksesshëm dhe vazhdimin e bashkëpunimit të mirë mes komunës dhe LMT-së, përkatësisht KFOR-it.

Ndërsa, udhëheqësi i njësisë së LMT-së, në Malishevë, kapiteni Igor Macoratti, e ka falënderuar kryetarin Begaj, për kohën e rezervuar, si dhe për tij, i ka falënderuar të gjithë qytetarët e Komunës së Malishevës, për mirëkuptimin dhe pritjen e ngrohtë që ju bëhet si ushtarë të KFOR-it.

Kryetari Begaj e kapiteni Macoratti, gjatë bisedimit, e kanë vlerësuar lartë bashkëpunimin e ndërsjellë, si dhe e kanë vlerësuar të qetë situatën e sigurisë së përgjithshme në Komunën e Malishevës./PrizrenPress.com/

Pal Gruda dëshmoi se si është detyruar t’i paguajë dhjetëra mijëra euro grupit të dyshuar të fajdeve.

Pal Gruda ka vazhduar dëshminë në gjyqin kundër 14 personave, të cilët akuzohen për fajde e vepra të tjera të rënda penale

Gruda tha se për shkak të presionit nga Asdren Mekaj kishte kërkuar 20 mijë euro borxh për dy muaj tek i akuzuari Benson Buza. Ky i fundit ia kishte gjetur por me kushtin që për çdo muaj vonesë të paguante nga 3,000 euro. Dëshmitari tha se ka pasur raste kur për shkak të vonesave ka paguar deri në 500 euro kamatë ditore.

Për të shlyer borxhin, Pal Gruda tha se u detyrua të marrë të holla nga lokali familjar i argjendarisë.

Përveç që pagoi mbi 40 mijë euro për borxhin prej 20 mijë eurosh, Gruda tha se iu kërkuan edhe 60 mijë euro për ta lënë të qetë.

Pal Gruda, i cili në këtë rast gjyqësor që po zhvillohet në Gjykatën e Prizrenit është në cilësinë e të dëmtuarit, tha se nga Bensoni ka pasur edhe kërcënime me armë.

Pas kësaj situate, ai tha se ka pasur takim me Kastriot Kqirën, i cili i kishte thënë se personalisht do të merrej me shlyerjen e borxhit ndaj Bensonit.

Kastrioti i kishte dhënë të dëmtuarit edhe 15 mijë euro kinse për t’ i ndihmuar si shok, ndërsa më vonë ia kishte kërkuar me arsyetimin se i kishte marrë nga axha Tunë.

15 mijë eurot Gruda tha se ia kishte kthyer pas dy jave Kastriotit e më pas ky i kishte thënë se i ka pasur me kamatë prej 4 mijë euro në muaj.

Për tetë muaj rresht Pal Gruda tha se i kishte paguar nga 4, 000 euro kamatë Kastriotit, me ç’rast tha se ka pasur raste që për shkak të vonesave kamatë ditore ka paguar nga 500 deri në 1,000 mijë euro.

“Kastrioti prej meje ka marrë edhe pare edhe ari. Vlera e përgjithshme e tyre u kanë 47 deri në 50 mijë euro”, tha ai në dëshminë e tij.

Gruda tha se pas marrjes së këtyre të hollave ka qenë i detyruar nga Kastrioti që të marrë nga ai një veturë “Golf 6”, për t’ia dhënë Burim Shalës, të cilin ky i fundit ia kishte llogaritur 15 mijë euro.

“Golfin” e kishte lënë si garancë për blerjen e dy veturave, një “Mercedes” në vlerë prej 50 mijë euro dhe një “Audi” në vlerë 24 mijë euro, kështu duke i mbetur borxh Burim Shalës edhe 59 mijë euro të tjera.

Dy veturat e blera i kishte marrë Kastriot Kqira, ndërsa borxhi kishte mbetur Palit.

Pal Gruda tha se borxhin Burim Shalës ka qenë i detyruar ta paguajë prindi i tij, Zefi, për të cilin ka hartuar dokument me shkrim dhe i cili ishte deponuar edhe si provë në prokurori.

Pas pagesës së këtij borxhi, dëshmitari tha se Kastriot Kqira kishte kërkuar 200 mijë euro nga familja Gruda për t’u larë me të gjitha borxhet dhe problemet, të cilat tha se nga frika babai i tij kishte vendosur t’ i paguajë.

“Babi ka pranu me i pagu këto para… në shumën prej 200 mijë euro”, tha Pal Gruda në dëshminë e tij përmes video-linkut.

Pasi kishin paguar 200 mijë eurot, Pal Gruda tha se Kastriot Kqira e kishte thirrur për kafe dhe i kishte kërkuar edhe 550 mijë euro të tjera, me arsyetimin se gjatë kohës sa e kishte pritë borxhin e Palit, kishte hyrë borxh te axha i tij Tunë Kqira.

Në këtë takim, në ndërkohë tha se kishte ardhur edhe Tunë Kqira. Sipas dëshmitarit, Tuna kishte thënë: “laji paret se me të ardhë unë në lokal e sheh se çka bëhet aty, veç e hapi bagazhin e kerrit edhe krejt arin e zbraz aty”.

Për shkak të situatës së acaruar, Pal Gruda tha se së bashku me babanë e tij e kanë marrë priftin Don Shanin dhe kanë shkuar në fshatin Serbicë, ku ishin takuar me kryefamiljarin e Kqirajve, Gjergjin, mirëpo edhe pas këtij takimi tha se situata nuk ishte qetësuar.

Pas këtij takimi, i akuzuari Marjan Kqira tha se ishte takuar me prindin e tij Zefin, të cilit i kishte thënë se “po shkeli këmba e policisë në oborrin tim kam me të faru me krejt çka ki”.

Për shkak të kërcënimeve që kishte pasur, i dëmtuari tha se tre muaj nuk kishte dalë nga shtëpia e tij.

Në takimin e fundit që kishin pasur në kishë ishin kërcënuar nga Kqirajt, të cilët, sipas tij, kanë thënë: “Do t’ju vrasim të gjithë, ndërsa Palin do ta lëmë të fundit për t’ua trembë mizat nga varret”.

“Jemi të damtum prej këtij grupi shumë. Unë jam dëmtu edhe psikologjikisht edhe s’ jam rahat mo, edhe nga disa pjesëtarë të tyre që janë jashtë na jemi seriozisht të rrezikum. E keni pa në Prizren se çka po ju ndodhë dëshmitarëve që po i tregojnë këto raste”, tha Pal Gruda dëshminë e tij të nisur në dhjetor.

Pas dëshmisë së të dëmtuarit, në fund mbrojtja i propozoi trupit gjykues ndërprerjen e paraburgimit për të pandehurit me arsyetimin se kanë pushuar kushtet për qëndrim në paraburgim, mirëpo këtë propozim në mënyrë kategorike e kundërshtoi prokurorja Merita Binaj-Rugova.

Trupi gjykues njoftoi se lidhur me këtë propozim, në ndërkohë do të marrë vendim me shkrim.

Seanca e radhës për këtë rast do të mbahet më 27 janar.

Sipas Prokurorisë Speciale, gjatë disa viteve të kaluara, të pandehurit Tunë, Kastriot, Gjon, Marjan, Gjekson e Gëzim Kqira dhe Benson Buza kanë vepruar si grup i organizuar kriminal më qëllim të përfitimit të drejtpërdrejt të dobisë financiare, duke kryer vepra të rënda penale.

Sipas aktakuzës, Tunë Kqira i ka mbikëqyrur dhe i ka drejtuar veprimet e këtij grupi kriminal.

Grupi ka shfrytëzuar gjendjen e rëndë financiare ose papërvojën e të dëmtuarve dhe u ka dhënë para me fajde. Pastaj, duke përdorur kërcënimet e rënda, i kanë detyruar të paguajnë kamata dukshëm joproporcionale ose të kryejnë ndonjë veprim tjetër në dëm të pasurisë së tyre.

Të akuzuar në këtë rast janë: Tunë, Kastriot, Gjon, Marjan, Gjekson e Gëzim Kqira, Benson Buza, Besfort Omaj, Zyrafete Hukolli, Ragip Fazlija, Ekrem Leci, Hil Katinari, Sejdë Kaqorraj dhe Zef Oroshi.

KALLXO.com ka raportuar edhe nga seancat e kaluara të këtij procesi. Raportet mund t’i gjeni në këtë link.

Në shtator të këtij viti në emisionin “Drejtësia në Kosovë“ u trajtua rasti i fajdeve në Mitrovicë.

Për shkak të fajdeve, dy vëllezër, Murat e Petrit Mehana, kishin bërë vetëvrasje më 2011.

Ish-drejtori i shkollës së mesme “Skender Luarasi” në Suharekë, Remzi Bytyqi, ka deklaruar se ka qenë drejtor i shkollës në fjalë për 20 vite, por me ardhjen e pushtetit të ri në nëntor 2013, atij i është kërkuar nga drejtori i arsimit Sherif Berisha, që të japë dorëheqje.

Bytyqi këtë deklaratë e ka bërë të mërkurën, gjatë shqyrtimit gjyqësor të mbajtur në Gjykatën Themelore në Prizren, ku po gjykohet drejtori i Arsimit të Suharekës, Sherif Berisha, për akuzën e punësimit të mësimdhënësve, pa konkurse publike.

Bytyqi ka thënë se nuk kishte dhënë dorëheqje pasi që është frikuar se do të mbetet pa punë, andaj ka kërkuar siguri nga i akuzuari Berisha, që ta sistemojë në një vend tjetër të punës nëse dëshiron që ai të largohet nga pozita e drejtorit. Tutje, dëshmitari ka thënë se i akuzuari pasi është konsultuar me eprorët e tij politik, ia ka ofruar atij një kontratë pune si administrator në të njëjtën shkollë, pa konkurs, ku edhe tani punon.

Me rastin e nënshkrimit të kontratës së re si administrator në shkollën e mesme “Skender Luarasi”, dëshmitari ka thënë se ai kishte nënshkruar edhe një deklaratë të përgatitur nga zyrtarja ligjore e drejtorisë së arsimit, për të mos bërë ankesë për largimin nga puna si drejtor i shkollës.

Në këtë seancë ka dëshmuar edhe Egzona Kabashi, e cila ka thënë se është thirrur nga Drejtoria e Arsimit në Suharekë, për të filluar punë si mësimdhënëse në shkollën fillore “Dëshmorët e Tivarit” në fshatin Peqan.

Dëshmitarja, Kabashi, ka shtuar se kishte zëvendësuar një mësuese tjetër, e cila ishte në pushim të lehonisë, andaj kishte nënshkruar kontratë vetëm për 6 muaj dhe pas skadimit të kontratës, ishte larguar nga puna, pasi që ishte kthyer në punë sërish mësuesja e mëparshme.

I akuzuari Berisha, përmes avokatit Sehad Haliti, ka kërkuar që të dëgjohen në cilësinë e dëshmitarëve, drejtorët e shkollave të Komunës së Suharekës, për të dëshmuar se ai ka vepruar me urgjencë, sipas kërkesës së drejtorëve, në mënyrë që nxënësit mos të humbin mësimin.

Prokurori i rastit, Mehdi Sefa, ka kundërshtuar këtë propozim me arsye se drejtorët nuk janë pjesë e aktakuzës dhe se ata janë vartës të të akuzuarit si punëdhënës andaj nuk kanë kredibilitet si dëshmitarë.

Trupi gjykues, i kryesuar nga gjyqtarja Raime Elezi, ka aprovuar kërkesën e mbrojtjes dhe në mungesë të dëshmitarëve tjerë, ka ndërprerë shqyrtimin, ndërsa vazhdimin e të njëjtit e ka caktuar për 1 shkurt, 2017, prej orës 09:30.

Sherif Berisha akuzohet se duke qenë drejtor i arsimit në Komunën e Suharekës, gjatë periudhës 2014-2016, ka punësuar në shkollat e Komunës së Suharekës, pa konkurs, nëntë mësimdhënës dhe një kontabilist.

Sipas aktakuzës, i akuzuari me këto veprime ka kryer veprën penale të keqpërdorimit të detyrës zyrtare dhe cenimin e të drejtave të barabarta në punësim të personave tjerë.

Deri më tani janë dëgjuar 8 dëshmitarë, të cilët kanë dëshmuar se janë pranuar në punë, nga i akuzuari, pa konkurs të rregullt./betimiperdrejtesi/

Zojzi është një prej fshatrave të bukur të Prizrenit, por që kohëve të fundit brengos zbrazja e tij nga banorët dhe ikja e tyre në kërkim të një jete më të mirë, qoftë në Prizren apo edhe më larg. Është ky fshati i trimërisë i kuvendeve popullore për liri. Është i njohur Kuvendi te Lisat e Zojzit, ku u bashkuan burrat atdhetarë për të kundërshtuar atëbotë sundimin osman.

Aty morën pjesa burra nga Kosova e Shqipëria, nga Mati e Gruda nga Malësia e nga Presheva e Bujanovci, nga Shkodra e madje edhe nga Vlora. Ishte Rrustë Kabashi, i cili i priu kryengritjes antiosmane 1884-1885. Më 1 mars 1885, u ndërmor një sulm i kombinuar me lumjanët mbi Prizren. Qyteti u sulmua nga jugu, veriu e perëndimi. U goditën edhe muret dhe çatitë e shtëpive, por afër mbrëmjes, zjarri i armëve nisi të pakësohej dhe topat heshtën. Qëllimi i kryengritësve për të pushtuar Prizrenin nuk u arrit nga moskoordinimi i sulmeve dhe nga mungesa e armatimit. Ata u tërhoqën nëpër kodrinat rreth Prizrenit dhe nuk ndërmorën sulme të tjera. Po ashtu, edhe ushtria osmane përforcoi pikat nga mund të hyhej në qytet, por nuk kundërsulmoi. Gjendja mbeti e tillë deri më 5 mars, kur për të qetësuar situatën dhe për të ndërmjetësuar, qeveritarët e sanxhakut sollën nga Gjakova një shpurë krerësh të prirë nga Riza bej Kryeziu, kajmekam i atjeshëm dhe fistar i Rrustë Kabashit. Në atë shpurë bënte pjesë edhe Sulejman Vokshi.

Kështu mbaroi faza e parë e kryengritjes antiosmane të viteve 1884-1885, ku – siç u tha më sipër – një rol të rëndë- sishëm drejtues dhe komandues pati luajtur Rrustë Kabashi, i cili do të shquhej edhe më vonë, në lëvizjet për liri e pavarësi kombëtare. Kjo dëshmohet edhe në proceset gjyqë- sore kundër Vehbi Ymerit e Shaqir e Ali Zhurit: “Si shkuam në Zojz, banditët na dhanë ultimatum se do të prisnin deri në orën gjashtë të ditës së nesërme për sigurimin e bazave në qytet, pastaj do të hynin pa pyetur kënd”. “Ne shkuam në Poslisht, fjetëm një natë atje, këshilluam krerët e Lumës që të mos vinin në qytet, por ata nuk u bindën, sepse ishin njoftuar se edhe popullsia e kazave të tjera do të hynte atje…”, shkruan gazeta Kosova Sot.

Tronditet Porta e Lartë

Për këtë histori flet edhe Agron Hoxha. Ai rrëfen për jehonën që pati ky kuvend gjithëpopullor. “Kuvendi vendosi që pa marrë një përgjigje, përfaqësuesit nuk do të shpërndaheshin, do të qëndronin në Zojz e rrethina (Përdinasit) dhe në Poslisht (lumjanët). Mbledhja e krerëve të popullsisë së Sanxhakut (Lumës, Podrimes, qytetit të Prizrenit etj. në kuvendin te Lisat e Zojzit dhe vendimet që u morën aty tronditën pushtetarët vendorë dhe Portën e Lartë. Pushtetarët e Prizrenit, sapo u njoftuan për besën e lidhur te Lisi i Zojzit, sidomos për vendimin për të hyrë në qytet të armatosur dhe për të imponuar kërkesat e tyre, krahas masave të tjera, dërguan edhe dy delegacione, njëri në Zojz, ku qenë tubuar Pëdrimasit, dhe tjetrin në Poslisht, ku kishin zbritur lumjanët, që t`i bindnin kryengritësit të hiqnin dorë nga planet e tyre dhe të shpërndaheshin. Por, vendimet e këtij kuvendi ishin shumë të fuqishme ndër trima e popull. Kështu nga dokumentet dhe të dhënat historike fshati Zojz ka një të kaluar të lavdishme që neve si fshatarë na bën që të ndihemi krenarë dhe që në të ardhmen ta mbrojmë dhe sa ma shumë të studiojmë për historinë e fshatit tonë”, tregon Hoxha.

Dalin kundër reformave osmane

Në një rast tjetër për të kundërshtuar vendosjen e linjës telegrafike, krerët e Shtiqnit, me nismën e kryeplakut Ymer Sula, pjesëmarrës në tubimin e Lisat e Zojzit, organizuan një kuvend, i cili u shpreh kundër regjistrimit të popullsisë, sidomos të femrave, e kundër çarmatimit. Si kuvendarë njihen: Bajram Gjuta, Berë Lami, Jonuz Hajdari (i moçmi), Jonuz Hasani, Asllan Liman Muja, Sulë Shahini, Jahë Mata, Dullë Mehmeti, Sulë Voka, Shemsi Bera etj. Kuvendarët lidhën besën për t’iu përgjigjur edhe me armë çdo përpjekjeje të pushtetit për t’iu imponuar reformat. Durak Thaçi, kryetar i këtij fshati, tregon se atij kuvendi i bën jehonë një këngë popullore e shënuar që në vitet 50 të shekullit të kaluar. “Këto këngë u bartën ndër breza dhe banorët e këtushëm u ndien përherë krenarë për këtë histori”, thotë Thaçi.

Zvogëlohet numri i nxënësve

Thaçi shprehet se fshati jeton mes të kaluarës së lavdishme dhe të ardhmes së pasigurt. Ai shprehet se shqetëson veçanërisht zvogëlimi i numrit të popullsisë si pasojë e shpërnguljes nga fshati në qytet apo edhe në perëndim. Ai rrëfen se fshati Zojz përbëhet të banorë të ardhur. “Të thuash se banorët e këtij fshati janë kryesisht banorë të ardhur, por ka edhe me një rrënjë të hershme këtu”, shprehet Thaçi. Kryetari Durak Thaçi shpjegon faktin se tani fshati ka 140 familje, me rreth 1200 banorë. “Nga secila familje, shumica thuajse ka dikë që punojnë jashtë Kosove”, thotë Thaçi për “Kosova Sot”. Ai shprehet se për pasojë tani ka edhe rënie të numrit të nxënësve në shkollën e këtij fshati. Sipas tij, para 7-8 vitesh, kjo shkollë kishte 240 nxënës e tani ky numër ka rënë në vetëm 200 nxënës. Ai shprehet se ka investime të reja në fshat, por në përgjithësi ka mungesë perspektive dhe kjo është pengesë veçanërisht për të rinjtë, të cilët me çdo kusht duan të ikin nga aty.

(Kosova Sot)