Një patrullë policore është përballur me kërcënime nga vëllai i armatosur i presidentit, Hashim Thaçi, Nazmiu.

Thaçi ishte ndalur pak pas mesnate nga një patrullë në Prishtinë më 11 nëntor të këtij viti. Ai kishte armë me vete të cilën kishte deklaruar se e kishte me leje. Por, lejen nuk e kishte me vete.

Kur polici Sami Hoti kishte kërkuar që të dilte nga vetura, kishin pasuar kërcënimet ndaj tij se “do të merren masa për shkak se kishte ndalur pa arsye vëllanë e presidentit”.

Detajet e këtij incidenti shpjegohen në një raport informues të policit Sami Hoti të cilin e ka siguruar Insajderi. Raporti i shkruar në mëngjes nga polici, Hoti shpjegon arrogancën dhe kërcënimet e vëllait të presidentit Thaçi.

Polici shpjegon se së bashku me katër kolegë të tij, më 11 nëntor të këtij viti kanë vendosur një pikë kontrolli tek vendi i quajtur “Rrethi i Flamurtarit” në Prishtinë që kishte qëllim të shtimit të masave të sigurisë.

Në ora 01:00 thotë se kishin ndalur kemi ndalur një veturë te tipit VW Pasat ngjyrë e zezë me targa 01-851-11 G, drejtuesit e të cilit i ishin kërkuar dokumenti identifikues dhe dokumentet e automjetit.

Në raport thuhet se personi që ndodhej në veturë, kishte vetëm librezën e veturës që ishte në pronësi të Alban Mehmetit.

Policia i kishte kërkuar Thaçit që të dilte nga vetura duke e pyetur se a kishte diçka të dyshimtë me vete.

Nazmi Thaçi i kishte thënë se në brez ka armën me leje, model HS kalibri 9×19 milimetra me numër serik H104072 dhe me 16 fishek në karikator.

“Personi në fjalë deklaron se posedon leje për bartjen e armës mirëpo nuk e kishte me vete dhe shprehet nuk e dini ju kush jam unë se me ditë se kush jam unë nuk me kishit ndalë fare”, shkruan polici në raport.

“Unë ju drejtova se ti për mua je një qytetar i Republikës së Kosovës dhe përderisa nuk ma dëshmon me dokument identitetin tënd dhe të drejtën e bartjes se armës kjo armë është ilegale dhe ti je i dyshimtë”, ia kishte kthyer polici.

Ai në raport më tej shpjegon se për çështje sigurie, i dyshuari është shoqëruar në automjetin zyrtar të Policisë dhe përmes Alfa Kontrollit kishin kërkuar një patrullë që të asistonte në lidhje me rastin.

“Pasi e kemi shoqëruar në automjetin zyrtar i kemi lejuar që t’i telefonojë djalit të tij që t’ia sjellë dokumentet e identitetit dhe armës, atëherë i njëjti na u drejtua me fjalët se ;unë jam vëllai i Hashim Thaçit dhe nesër në mëngjes kam me i shku në zyrë të Shpend Magjunit dhe kam me e njoftua që të marr masa ndaj jush për arsye se ju e keni ndalë vëllanë e Presidentit pa arsye”, shkruan më tej në raport.

Polici ka treguar se i dyshuari ishte pyetur se a kishte përdorur alkool. I dyshuari kishte pohuar një gjë të tillë.

“Pas rreth 30 minutave djali i tij i ka sjell letërnjoftimin, patentë shoferin dhe lejen e armës. Personi në fjale quhej Nazim Thaçi i lindur me 09.02.1964 në Fshatin Burojë si dhe posedonte armë mbajtje me nr AB1212011112551. I lartshënuari i është dorëzuar Patrullës AS 102 të Stacionit Nr 4 Prishtinë. Raporti përpilohet informatat për Operativën NJSO-Prishtinë dhe stacionin policor nr.4 Prishtinë”, shkruan në raport.

Insajderi ka verifikuar identitetin e të dyshuarit. Burime nga Policia kanë thënë se bëhet fjalë për vëllanë e presidentit, Thaçi.

Ndërkohë, Zyra për media e Policisë së Kosovës ende nuk është përgjigjur rreth këtij incidenti.

Insajderi nuk ka mundur të marrë një koment nga Nazmi Thaçi./Insajderi.com

Bajram Hasani nga Nisma për Kosovën, ka reaguar ashpër pas një letre dërguar medieve nga ana e Kilajt ku e akuzonte Limajn si politikanin më të korruptuar të Kosovës.

Hasani e ka quajtur Kilajn të vogël për të folur për kryetarin e Nismës.

“Je shumë i vogël për ta kontestuar veprimtarinë e tij si në kohën e luftës dhe pas saj”, ka shkruar ndër të tjera Hasani në ‘Facebook’, transmeton ‘Indeksnonline’.

Hasani, ia ka rikujtuar Kilajt kontributin qe Limaj ka dhënë gjatë dhe pas luftës.

“Isni mos harro që Limaj i solli Kosovës dy projektet më të mëdha e kapitale që njeh historia e këtij vendi atë të autostradës që lidh Kosovën me Shqipërinë dhe aeroportin”, thuhet ndër të tjera në reagimin e Hasanit.

Sipas Hasanit, PDK do të humbë Drenasin ashtu sic e ka humbur Malishevën.

Postimi i plotë i Hasanit:

Dy fjalë për këlyshët që po lehin kundër Fatmir Limajt

Isni Kilaj je shumë i vogël për të folur për Fatmir Limajn. Je shumë i vogël për ta kontestuar veprimtarinë e tij si në kohën e luftës dhe pas saj.

Mos harro, nëse flasim për luftën e UCK-së, Fatmir Limaj është emblema e saj. Ai është legjendë e gjallë. Limaj konsiderohet si njeriu që ja solli paqen Kosovës, punoi në shtet-ndërtimin e këtij vendit e që me veprat e tij krenohet e gjithë Kosova.

Isni mos harro që Limaj i solli Kosovës dy projektet më të mëdha e kapitale që njeh historia e këtij vendi atë të autostradës që lidh Kosovën me Shqipërinë dhe aeroportin.

Mos u shqetëso, merre shtruar po ju kuptojmë se ju ka kapë ankthi i humbjes së pushtetit. Thonë që” kafsha e plagosur” është më e rrezikshme. Ju në këtë ankth nuk po e dini as çka po flisni kjo po shihet në deklaratat e juve.

Po ta kujtoj Isni se Malisheva po lulëzon pa juve dhe sic e keni e keni humbur Malishevën do ta humbisni edhe Drenasin.

Sa për ta kujtuar këtij vendi nuk i duheni më ti dhe shokët e tu që kanë vepra kriminale dhe e sollën vendin në këtë derexhe, duke i shitur edhe shokët.

Mbaje mend, Fatmir Limaj është njeriu me parimor i skenës politike, njeriu që po ndryshon mentalitetin politik në Kosovë.

Siç e i keni humbur Malishevën, do e humbisni Drenasin dhe krejt Kosovën

Zgjedhjet në Drenas kanë polarizuar skajshëm edhe politikanët e Malishevës.

Zyrtarë të PDK-së në Malishevë, duke ia përsëritur dështimet qeverisjes së Nismës në këtë komunë, kanë kërkuar hapur prej qytetarëve të Drenasit, që siç thonë ata “të mos e bëjnë gabimin që e kanë bërë qytetarët e Malishevës, duke e izoluar veten dhe komunën e tyre”.

Së fundmi, ish-kryetari i Malishevës, Isni Kilaj, i cili është kryetar i degës së PDK-së në Malishevë, ka “goditur” edhe kryetarin Ragip Begaj, për të cilin ka thënë se është në gjendje edhe të shtrembërojë për t’i hyrë në hatër shefit të ri Fatmir Limajt.

“Nëse dëshironi që për lider tuajin të keni Fatmir Limajn, ju keni zgjedhur njeriun që identifikohet me krimin në Kosovë! E gjithë Kosova e di që është njeriu më i korruptuar i politikës, njeriu më i kontestuar i luftës, njeriu që ka bërë emër në politikë dhe në luftë përmes propagandës gebelsiane, përmes linçimit e dënimit të shokëve, përmes tradhtisë e shtypjes së zërave të kundërt në luftë e paqe, njeriu që sikurse serbët humbjen e propagandojnë si fitore, ashtu siç bënë për zgjedhjet në Drenas”, ka shkruar ndër të tjera Kilaj, në llogarinë e tij në Facebook.

Këshilli Komunal për Siguri në Bashkësi (KKSB), i drejtuar nga kryetari i Komunës së Malishevës, Ragip Begaj, të enjten, ka mbajtur mbledhjen e rregullt dhe të fundit për këtë vit.

Sipas njoftimit të Zyrës së informimi të Komunës së Malishevës, KKSB-ja e ka vlerësuar të qetë situatën e sigurisë së përgjithshme dhe pa tendencë të prishjes, ndërsa në veçanti u diskutua situata e sigurisë për komunitete, ku është theksuar se nuk ka asnjë rast të evidentuar për ndonjë diskriminim apo kërcënim me motiv etnik.

Fillimisht, kryetari i Malishevës, Ragip Begaj, ka falënderuar të gjithë ata që kanë kontribuar në ruajtjen e sigurisë për të gjithë qytetarët e Komunës së Malishevës, e në veçanti Policinë e Kosovës, për angazhimin e tyre në shërbim të sigurisë për të gjithë qytetarët, pa asnjë dallim. “Në raportimin e tij, komandanti i Stacionit Policor në Malishevë, kapiteni Halil Morina, ka thënë: “Bazuar në raportet policore, ka rënie të rasteve me precedent penal dhe atë në krahasim me vitin e kaluar ka një rënie prej 32 për qind të rasteve”.

Kapiteni Morina, gjithashtu ka deklaruar se Policia e Kosovës, është përgatitur edhe për këtë fundvit, përkatësisht festimet e fundvitit, si në komunikacion, po ashtu edhe në përdorimin e mjeteve piroteknike”, thuhet në komunikatën e ZI-së. Tema të veçanta në mbledhjen e fundit të KKSB-së, sipas ZI-së ishte edhe situata e sigurisë për komunitetet pakicë dhe personat me aftësi të kufizuara.

Në raportimin e zyrtares për komunitete dhe kthim, Edona Krasniqi, theksohet se në Komunën e Malishevës, jetojnë 36 romë, 6 ashkalinj, 1 amerikan dhe 5 të padeklaruar, ku tre prej tyre janë të punësuar në sektorin publik. “Në asnjë rast nuk janë regjistruar asnjë lloj i diskriminimit etnik apo kërcënimit”, shkruan në komunikatën e ZI-së. Ndërsa për PAK-të, sipas komunikatës, kryetari Begaj, ka thënë se “komuna është përpjekur që në vazhdimësi ta ndihmojë këtë kategori të shoqërisë”. Ai ka konfirmuar se gjatë këtij viti, nga donatorët e ndryshëm, si mërgimtarët, ashtu edhe nga një kompani gjermane, janë furnizuar me karroca, të gjithë ata që kanë pasur nevojë, ndërsa një pjesë e kësaj kategorie, është e punësuar në sektorin publik.

Deputeti aktual i Kuvendit të Kosovës nga tabori opozitar, Zafir Berisha (Nisma për Kosovën), lidhur me çështjen për gazetën “Kosova Sot” tha se në këtë përbërje të tashme të Kuvendit të Kosovës, që dominohet nga koalicioni PDK-LDK edhe po të hapej debati parlamentar për luftimin e monopoleve, që e kanë përfshirë vendin në shumë sfera të ekonomisë vendore nuk do të kishte për t’u votuar nga askush.

Sipas opozitarit Berisha, ata që i kanë krijuar monopolet janë në krye të Kuvendit të Kosovës dhe institucioneve të tjera më të larta të shtetit tonë.

“Ne si popull nuk duhet të shohin madje as ëndrra se do të bëhet mirë në këtë vend, përderisa në pushtet të jenë këta injorantë”, ka potencuar ai. Me një fjalë, sipas Berishës, përderisa në pushtet të jetë koalicioni qeverisës PDK-LDK, debatet për monopolet në Kuvendin e Kosovës nuk do t’i shohim, madje as në ëndërr e lëre më se do të diskutohet në Kuvendin tonë për ndërprerjen e këtyre monopoleve.