Kryetari i AAK-së, Ramush Haradinaj, sot në tubimet me struktura dhe aktivistë në Ferizaj dhe në Gjilan, ka përsëritur domosdonë e kundërshtimit qytetar të qeverisjes së keqe në vend.

Ai ka thënë se dallimi në këtë 17 shkurt, është se opozita feston duke protestuar, ndërkaq qeveria feston duke mashtruar.

“Ne jemi të vetëdijshëm për sakrificën e brezave deri te pavarësia e Kosovës, por sot nuk jemi mirë dhe sa herë nuk kemi qenë mirë, ne kemi ditur t’i themi jo një gjendjeje te keqe’, tha Haradinaj.

Sipas kumtesës së AAK-së, Haradinaj citohet të ketë thënë se “sot jemi të zhgenjyer për mungesën e përgjegjësisë dhe llogaridhënies ndaj shkeljes së Kushtetutës dhe keqqeverisjes”.

“Ne sot jemi të pakënaqur me degradimin e vazhdueshëm të shtetit, ndërkaq qeveria po mundohet të fshihet pas dështimeve të mëdha dhe humbjes së kredibilitetit institucional edhe në ditën e pavarësisë, duke kërkuar prej nesh që të mos e prishim imazhin e shtetit në ditë feste”.

“Por imazhi i shtetit nuk prishet, pse qytetarët e vendit e ngrisin zërin kundër shkeljes së kushtetutës, kundër rrezikimit të sovranitetit e të integritetit, kundër krimit e korrupsionit; me një fjalë kundër degradimit të skajshëm, që kjo qeveri po i bën shtetit. Me këtë protestë, qytetare e paqësore, ne vetëm po i ndihmojmë imazhit të shtetit, duke e dërguar mesazhin e një shoqërie dinamike dhe të përgjegjshme, e cila din t’i thotë të mirës PO e të keqës JO”, tha Haradinaj. /Telegrafi/

Nënkryetari i Kuvendit të Kosovës, njëherë anëtari i kryesisë së PDK-së, Xhavit Haliti ka deklaruar se mbajtja e seancës së jashtëzakonshme për zgjedhjen e presidentit mund të mbahet këtyre ditëve, nëse një kërkesë të tillë e bëjnë deputetët e Kuvendit.

Megjithatë, Haliti në një prononcim për “Zeri.info” ka thënë se nuk është e domosdoshme që kjo seancë të mbahet të dielën apo të hënën.

“Në qoftë se është një kërkesë nga 40 deputetë të nënshkruar atëherë mund të mbahet mbledhja, seancë e jashtëzakonshme e Kuvendit. Mirëpo, kushti për kandidaturë është të jenë 30 nënshkrime por unë nuk e besoj se është e domosdoshme që të dielën të mbahet seancë sepse nuk është ndonjë çështje e ngutshme dhe e jashtëzakonshme të cilën Kosova e ka që ta kryej me urgjencë”, ka thënë ai.

Anëtari i kryesisë së PDK-së ka treguar, se rregullat kushtetuese thonë se së paku një muaj para se të përfundojë mandati i presidentes duhet të zgjedhet presidenti.

Ndërsa lidhur me atë se a janë mbledhur nënshkrimet për kandidaturën e Hashim Thaçit në krye të Presidencës, Haliti ka thënë se ato bëhen për pak minuta.

“Deri më tani nuk kam ndonjë ftesë për mbledhje të Kryesisë, e cila do të caktonte kohën kur mbahet seancë e tillë. Përderisa nuk kam një ftesë për mbledhje d.m.th. nuk e besoj se është e mundshme që të dielën dhe të hënën të ketë seancë, pasi që pa kaluar nëpër procedura të Kuvendit nuk ka mundësi që të ketë seancë. Nuk është problem të mblidhen nënshkrimet. Ato mblidhen për 10 minuta dhe është problem i vogël për neve”, është shprehur ai.

Më tej, Haliti i ka hedhur poshtë zërat se pas zgjedhjes së Thaçit si president i Republikë, PDK-ja do ta prish koalicionin me LDK-në e Isa Mustafës.

“Nuk e besoj se ka diçka të planifikuar, në qoftë se dikush e ka menduar këtë, janë spekulime. Koalicioni deri më tani ka funksionuar mesatarisht mirë, kur e kemi parasysh se kur ka filluar dhe si ka filluar. Tani koalicioni për tu prish duhet të jetë një arsye e madhe. Spekulimet e thashethemet që po qarkullojnë nuk iu besoj, sepse nuk jemi në ndonjë situatë e cila do të bëjë që të prishet koalicioni”, ka thënë ai.

Ende nuk dihet nëse Lista Serbe do të mbështesë ndonjërin nga kandidatët për President të Kosovës, apo do të dalin me një propozim të tyre.

Kështu ka thënë ministri i Adiministrimit të Pushtetit Lokal në Kosovë (MAPL), Lubomir Mariq, në një intervistë në televizionin publik të Serbisë (RTS), ka thënë se po e shqyrtojnë gjithë situatën në terren dhe, më pas do të konsultohen edhe me qeverinë serbe.

Ai ka thënë se janë duke biseduar edhe me kolegët e tyre në Kosovë, por edhe me BashkësinëNdërkombëtare lidhur me atë se cilin prej kandidatëve do ta mbështesin, transmeton lajmi.net.

Mariq ka bërë të ditur se këtë vendim do ta marrin pas një takimi të përbashkët me përfaqësuesit e Qeverisë së Serbisë.

I pyetur nëse do ta mbështesin kandidaturën e kryetarit të PDK-së, Hashim Thaçit për president, ai këtë e ka lidhur edhe me themelimin e Asociacionin e Komunave me shumicë serbe.