Njeriu që mban gjallë fuqinë në prapaskenë të PDK-së së pushtetshme është Adem Grabovci. Koordinon të gjitha aktivitet e paligjshme të partisë. I luten të gjithë për kryerjen e favoreve. Ai iu nënshtrohet vetëm dy vetave: Hashim Thaçit e Kadri Veselit.

Adem Grabovcin të gjithë e thërrasin “shef”. I tillë është me veprime kur është fjala për të shpërdoruar autoritetin zyrtar.

Fuqia e tij dhe strukturës së Partisë Demokratike të Kosovës dëshmohet me një seri përgjimesh telefonike që ka siguruar Insajderi. Vetëm për dy muaj, nëntor – dhjetor 2011, ai punëson qindra njerëz, zgjedh dhjetëra kryetarë e anëtarë bordesh, drejtorë ndërmarrjesh e agjencish të pavarura.

Heq nga lista njerëz që në teste dalin të parët për pozita udhëheqëse. Ndërron komisione për konkurse. Madje i anulon konkurset në ato raste kur njerëz të tij nuk marrin pikë të mjaftueshme.

Pos kësaj, Grabovci punëson njerëz të vetë në Policinë e Kosovës, zgjedh prokurorë e gjyqtarë. Mes tyre, Sali Mekajn e bën kryetar të Gjykatës së Apelit, Sylë Hoxhën e bën kryeprokuror të Prizrenit. Kërkesa të shumta për ta takuar Grabovcin bën Haxhi Dërguti, atë kohë prokuror në Prokurorinë e Qarkut të Prishtinës. Aktualisht, Dërguti është kryeprokuror i Prokurorisë së Apelit.

Gjithë këto veprime Grabovci i bën me dijeni dhe në bashkëveprim me Hashim Thaçin, president i Kosovës të cilin e quan “shef”.

Insajderi ka siguruar mbi njëmijë biseda të përgjuara telefonike të nxjerra me vendim gjykate të Adem Grabovcit, gjatë nëntorit dhe dhjetorit të vitit 2011. Ishte hetuar nga EULEX-i.

Asokohe, Grabovci, shef i grupit parlamentar të Partisë Demokratike të Kosovës hetohej për vepra penale të krimit të organizuar, shpërdorimit të detyrës zyrtare e lidhje kontratash të dëmshme. Këto veprime dyshohej se i kishte kryer gjatë kohës sa ishte zëvendësministër i Transportit dhe Postë-Telekomit.

Kjo ministri drejtohej nga Fatmir Limaj, i cili po përballet me një gjykim për vepra të njëjta penale për të cilat dyshohej Grabobvci.

Hetimi për Grabovcin ishte mbyllur në mungesë provash. Por, përgjimi i tre numrave telefonik ka zbuluar se Grabovci përdorte gjithë fuqinë dhe autoritetin zyrtar për të kryer punë në interes të njerëzve të tij, të militantëve partiakë dhe për të dëmtuar të tjerë që nuk i përkisnin linjës dhe interesit të tij.

Gazeta online Insajderi ka përzgjedhur një seri përgjimesh telefonike që lidhen me veprimet politike, ndërhyrjet në punën e Kuvendit dhe deputetëve, ndikimin ndërkombëtar mbi PDK-në dhe Hashim Thaçin dhe votimin me çdo kusht të dy ligjeve të kontestueshme atë kohë: atë për Qendrën Historike të Prizrenit dhe Ligjit për Hoqën e Madhe të Rahovecit.

Ndikimi i njerëzve të përgjuar shtrihet mbi secilin institucion të Kosovës, përfshirë pushtetet e pavarura. Ai ka ndikim mbi sistemin gjyqësor, atë prokurorial, mbi Policinë e Kosovës, mbi media siç është Televizioni Publik, disa gazeta ditore, mbi një televizion privat dhe mbi shumë gazetarë.

Grupi i tij politik kontrollon Universitetet, zgjedh për anëtarë bordesh zyrtarë të lartë partiakë si dhe cakton udhëheqës të këtyre institucioneve.

Gjithashtu, Grabobvci ka ndikim mbi biznese siç është kompania “Dukagjini” e Ekrem Llukës dhe kompaninë “Devolli Group”, asokohe pronë e vëllezërve Shkelqim e Blerim Devolli.

Ndikim dhe punësime në institucione shtetërore kanë edhe djemtë e tij, Ngadhënjimi dhe Guximi.

Në këto përgjime Grabovci zbulohet duke i dhënë listë me emra njerëzish, drejtorit të Policisë së Kosovës, Shpend Maxhuni për punësim në këtë institucion.

Insajderi do të sjell një seri bisedash të Grabovcit me Hashim Thaçi, Kadri Veselin, Shaip Mujën, Ramë Bujën, Ilhami Gashin, Hajdar Beqën, Latif Gashin, Azem Sylën, e zyrtarë tjerë shtetërorë e partiak.

Bisedat dëshmojnë veprimet dhe metodat e Thaçit për të mbajtur dhe forcuar pushtetin me çdo kusht.

Njerëzit me të afërm të tij janë Shkelqim Devolli me të cilin komunikon disa herë në ditë, Hajdar Beqën, Shaip Mujën, Ilhami Gashin e Ramë Bujën, etj.

Përgjimi zbulon po ashtu talljet e deputetëve të PDK-së me deputetët e pakicave. Serbët quhen “shkije”, ndërsa romët, ashkalitë dhe egjiptasit – “magjup”.

Insajderi ka kontaktuar me shumicën e protagonistëve, por ata kanë refuzuar të flasin për këtë çështje./Insajderi.com

Kanë mbetur vetëm edhe dy ditë deri në takimin e debatit të shumëpritur të 3 gushtit në Kuvendin e Kosovës për çështjen e Demarkacionit dhe kryeministri Mustafa nuk po ndalet së provokuari opozitën kosovare, e cila pret që ky debat të shterë të gjitha argumentet, të cilat flasin se versioni i tanishëm i marrëveshjes për Demarkacionin e kufirit me Malin e Zi është i gabuar, i dëmshëm dhe nuk duhet të ratifikohet nga Kuvendi i Kosovës, shkruan gazeta Kosova Sot.

Analistët politikë, opozitarët dhe njohës të tjerë të këtyre zhvillimeve rreth kësaj teme, konsiderojnë se tani kreu i Qeverisë së Kosovës e ka humbur durimin dhe busullën e sjelljes si kryeministër dhe se ai nga frika e betejës pa fakte për ratifikimin e marrëveshjes në dëm të tërësisë territoriale të Republikës së Kosovës, nga i cili dështim mund ta humbë edhe pushtetin për shkak të rrezikut nga prishja e koalicionit dhe shkuarja në zgjedhje të jashtëzakonshme, po bën gjithçka që është e mundur për të krijuar një situatë ndryshe, që t’i bindë edhe të tjerët të shkelin mbi argumentet që kanë ofruar dhe po ofrojnë ekspertët. Ata thonë se të dyja partitë në pushtet, PDK-ja dhe LDK-ja, po frikësohen se koalicioni mund ta humbë pushtetin në rast të mosratifikimit të Demarkacionit nga Parlamenti.

“Kur frika ekziston për humbje të debatit, fillon zhurma”

Analisti politik dhe profesori universitar, Nexhmedin Spahiu, thotë për “Kosova Sot” se afrimi i ballafaqimit të argumenteve përballë deklarimeve mashtruese të kryeministrit për një vit të tërë i kanë futur atij në palcë frikën e dështimit dhe humbjes së pushtetit, prandaj po lufton me çdo kusht ta imponojë dhe mbrojë të vërtetën e tij pa fakte, ngase, sipas Spahiut, kjo temë është ndër më të shoshiturat dhe më të argumentuarat në shoqëri.

“Kur dikush frikësohet se do ta humbë debatin, për arsye se nuk ka fakte apo argumente, ai fillon të bëjë zhurmë e të fyejë në mënyrë që të humbë sensi i debatit. Këtë po e bën Isa Mustafa.

Debati për Demarkacionin ka marrë vëmendjen e merituar për një proces të tillë për dallim prej shumë proceseve që kanë filluar pa debat meritor, siç është p.sh. fillimi i procesit të privatizimit, decentralizimit, simboleve kombëtare të Kosovës, Kushtetutës, zgjedhjes së presidentit etj. Pas këtij debati meritor, gjë që tregon se shoqëria jonë po piqet dhe se kombi ynë po ngrihet në këmbë, është më se e qartë se Marrëveshja për Demarkacion është bërë gabim. Se është bërë gabim këtë më shumë na kanë bindur argumentet e dobëta të komisionit shtetëror, të Isës e Hashimit, e sidomos argumentet e dobëta të Komisionit ndërkombëtar të Atifete Jahjagës sesa argumentet bajagi të forta të Florim Isufit, Shpejtim Bulliqit, Përparim Ahmetit, Enver Hasanit etj.”, shprehet Spahiu.

Sipas tij, kur Qeveria e bleu “një ekspert të Pavarur” (Tomorr Qelen), argumentet e tij ishin aq të dobëta sa i vunë kapakun këtij debati./Kosova Sot