Partia më e madhe në vend (PDK) e sheh të nevojshme arritjen e një konsensusi nacional për çështjen e demarkacionit me Malin e Zi, derisa LDK-ja insiston se demarkacioni shumë shpejt do të shkojë në Kuvend. Opozita ka një alternativë që kjo çështje të zgjidhet deri në shtator

Partia Demokratike e Kosovës (PDK), e cila për më shumë se dhjetë muaj e ka mbështetur Marrëveshjen për Demarkacionin e Kufirit me Malin e Zi, tani është më e rezervuar për këtë çështje.

Madje përfaqësuesit e partisë më të madhe në vend tani thonë se është e nevojshme gjetja e një konsensusi nacional, pasi, sipas tyre, përveç mospajtimeve ndërmjet partive politike parlamentare, ka mospajtime edhe brenda vetë partive. Ata thonë se nuk ka asnjë arsye që në Kosovë të këtë hidhërim në raport me demarkacionin.

Në anën tjetër, zyrtarët nga Zyra e kryeministrit thonë se Marrëveshja për Demarkacionin do të dërgohet së shpejti në Kuvend për t’u ratifikuar. /Zëri

Ndryshimi, në duart e votuesve. Populli duhet të vetëdijesohet

Pritja për zgjedhje të reja lokale dhe parlamentare është një pritje e madhe në mesin e qytetarëve të zhgënjyer në këtë klasë politike, me qëllim të përpjekjes për ndryshime pozitive në qeverisjen e vendit, duke sprovuar fuqinë dhe vetëdijesimin e popullit të stërvuajtur të Kosovës për t’i ndarë përfundimisht nga politika e konsumuar dhe për ta nxjerrë në sipërfaqe një alternativë të re të shpresës dhe ndryshimit të madh, shkruan Kosova Sot.

Analistët politikë vlerësojnë se procesi i ri zgjedhor në vend, qoftë për lokalet apo qendroret, duhet të jetë një “revolucion” demokratik i ndëshkimit me votë të klasës së dështuar politike, megjithëse akoma nuk ka një analizë të besueshme që flet se sa është i gatshëm qytetari të bëjë ndryshime të tilla dhe të nxjerrë një alternativë të re politike të besueshme dhe shpresëdhënëse për perspektivë të re.

Analisti politik, Arsim Haziri, konsideron se tani është koha dhe momenti kritik i thyerjes së stereotipave të votueseve, pasi që shpenzimi joproduktiv i kësaj klase politike ka arritur kulmin.

“Qytetarët janë ata që mund ta bëjnë ndryshimin. Por, duhet pasur parasysh se pushtetet e pasluftës kanë krijuar mekanizma, të cilët është vështirë të zhbëhen”, thekson ai.

Sipas Hazirit, rrjeti e pushteteve të pasluftës është shtrirë aq thellë, saqë nuk mund të imagjinohet.

“Kapja e institucioneve të pavarura nga qeveritë e pasluftës ka krijuar një mekanizëm për partitë, të cilët kanë qenë në pushtet. Gjithherë ka një hapësirë të vogël për të shpresuar për ndryshim, dhe njerëzit e infektuar dhe të vuajtur nga kompleksi i inferioritetit që të pozicionohen në politikë”, u shpreh më tej ai.

“Shpresa për ndryshim duhet menduar si mundësi e mundësisë, por ndryshimit duhet t’i prijnë njerëz të ndërgjegjshëm, njerëz me virtyte të larta njerëzore, intelektuale dhe morale. Një klasë me këto virtyte njerëzish mund të kthejë masën për ndryshim, pasi që edhe qytetarët e kanë humbur shpresën për ndryshim, gjithherë duke pasur parasysh klasën politike e cila udhëheq nga paslufta”, tha Arsim Haziri për Kosova Sot.

Deputeti nga Nisma për Kosovën, Zafir Berisha beson se edhe zyrtarët e shtetit amerikan tashmë e dinë se këto janë siç i quan ai, ‘pallavra’, dhe deklarata për konsum ditor, pasi, sipas Berishës, personi kyç për kriminalizimin e shoqërisë është vetë Hashim Thaçi dhe deklaratat e tij, siç tha, janë tepër të pabaza dhe jo të sinqerta.

” Kështu që, unë po dua të besoj se faktori ndërkombëtar e ka kuptuar të vërtetën e madhe rreth kriminalizimit të shoqërisë nga njerëzit e papërgjegjshëm politikë, koka e të cilëve është vetë Hashim Thaçi dhe mendoj se disa lëvizje kozmetike, që janë bërë në emër të asaj se po luftohet krimi dhe korrupsioni, janë tepër minore në raport me nevojat të cilat i ka vendi, derisa në anën tjetër është vetë partia e Hashim Thaçit, e cila ka me dhjetëra zyrtarë partiakë në institucione që janë të dënuar nga shkalla e parë e gjykatës, e drejtësisë dhe që faktikisht vazhdojnë të qëndrojnë nëpër pozita, andaj kjo d.m.th. edhe e vërteton atë që e thashë se këto deklarata janë vetëm deklarata koti”, ka potencuar deputeti Zafir Berisha për gazetën “Kosova Sot”.

Në vendkalimet kufitare Shqipëri-Kosovë qershori i vitit 2016 shënoi më shumë se gjysmë milioni – gjithsej 507886 hyrje-dalje të personave, 1.52 për qind më shumë krahasuar me qershorin 2015, kur kishte 500288 hyrje-dalje.

Policia e Kosovës bën të ditur të mërkurën për ATSH-në se në qershorin e kësaj vere në vendkalimin kryesor në Autostradën e kombit, në Vërmicë-Morinë, kishte 436301 hyrje-dalje të personave, në Qafë Morinë 47498 dhe në Qafë Prush 24087.

Në të tre vendkalimet, në qershor 2016 hyrje-dale të automjeteve kishte gjithsej 140851 vetura, 5988 autobusë e 14261 kamionë.

Këtë verë fluksi i kosovarëve drejt bregdetit shqiptar dhe përgjithësisht fluksi në vendkalimet kufitare Kosovë-Shqipëri pritet të shënojë rritje të mëtejshme në korrik e gusht krahasuar me qershorin dhe me vitet e kaluara që ishin gjithnjë me ngritje.

Gjatë tre muajve të verës 2015 – qershor, korrik e gusht, mes Shqipërisë e Kosovës kishte më shumë se 2.7 milionë (2732089) hyrje dalje të personave.

Sipas policisë kosovare, viti 2015 në vendkalimet kufitare Kosovë-Shqipëri ka shënuar rritje të fluksit të njerëzve në hyrje-dalje gjithsej 26.75% – në hyrje 30.2% e në dalje 23.3%, si dhe të automjeteve 14.1% gjithsej në hyrje-dalje – 22.1% në hyrje e 6.2% në dalje, krahasuar me 2014-ten. Ishin gjithsej 5412238 hyrje-dalje të personave dhe 1849987 hyrje-dalje të automjeteve.

Në vendkalimet kufitare Kosovë-Shqipëri, viti 2014 kishte shënuar rritje të fluksit të njerëzve për 19,312 % dhe të automjeteve për 21,883 %, krahasuar me 2013-ën.

Në fluks të rritur vere, sot në mesditë e në këto momente, në tre vendkalimet kufitare Kosovë-Shqipëri kalohet për më së shumti tre minuta, e kolonë ka vetëm në hyrje nga Shqipëria në Kosovë 30-40 metra në Morinë-Vërmicë, bën të ditur Qendra Kombëtare për Menaxhim Kufitar.

Këtë verë, në 7 korrik në kufirin Shqipëri-Kosovë u nënshkruan procedurat e përbashkëta të kontrollit kufitar në pikëkalimin kryesor nëpër autostradë Morinë-Vërmicë, në territoret respektive. Nënshkrimi u bë në anën kosovare, Vërmicë, nga dy drejtorët e përgjithshëm të policive, i Shqipërisë Haki Çako dhe i Kosovës, Shpend Maxhuni.

Në 29 qershor, qeveria e Kosovës ka miratuar vendimin për pikë të përbashkët të kontrollit kufitar me Republikën e Shqipërisë, në sezonin veror.

Në 1 korrik ka nisur organizimi i shërbimeve të përbashkëta të policimit rrugor në Republikën e Shqipërisë gjatë sezonit veror, deri në 31 gusht, sipas memorandumit të bashkëpunimit të nënshkruar në 30 qershor në Prizren nga drejtorët e përgjithshëm të policive të Shqipërisë e Kosovës, Çako e Maxhuni.