Ish-kryeministri Bajram Rexhepi ka thënë se ka pushuar aktivitetin e tij politik në Partinë Demokratike të Kosovës.
Ai ka thënë se vazhdon të jetë pjesë e kryesisë së Partisë Demokratike të Kosovës, por se ka ndërprerë aktivitetin e tij politik në këtë parti.
“Jam tërhequr nga aktivitete politike të PDK-së, por jam anëtarë i kryesisë së PDK-së”, ka thënë shkurt Rexhepi për Klan Kosovën.
Bajram Rexhepi ka qenë edhe ministër i Punëve të Brendshme në qeverisjen e PDK-së.
Instituti Demokratik i Kosovës (KDI) ka publikuar Fletënotimin i cili përmban analizë dhe notim për punën individuale të 27 anëtarëve të Kuvendit të Komunës së Dragashit dhe subjekteve politike të përfaqësuara në këtë kuvend për periudhën Janar-Dhjetor 2015.
Anëtarët që kanë treguar rezultate më të mira në të gjitha kategoritë në Kuvendin e Komunës së Dragashit janë: Samidin Xheladini (LDK) me 11.2 %, Zaim Hajredini (AKR) me 10.7 %, dhe Nexhat Isufi (BD) me 6.8 % ndërsa anëtarët që nuk kanë treguar asnjë rezultatet në të gjitha kategoritë dhe janë vlerësuar me 0 % janë: Shqipe Halili (LDK) me 0.0 % dhe Mersiha Memisi (CDU) me 0.0 %.
Gjatë seancave të mbajtura nga anëtarët e Kuvendit të Komunës së Dragashit janë ngritur gjithsej 347 çështje, prej të cilave 80 % nga fushat me interes për qytetarët e Dragashit ndërkaq 20 % e çështjeve të iniciuara kanë qenë të lidhura me aspekte procedurale të punës së organeve të Komunës së Dragashit.
Subjekti politik i LDK-së i përfaqësuar në këtë institucion prin për nga inicimi i çështjeve me gjithsej 33.4 %, të përcjellë nga anëtarët e PDK-së dhe AKR me nga 21.3 % përkatësisht 13.3 % të çështjeve të iniciuara. Lidhur me ngritjen e çështjeve, Zaim Hajredini (AKR) ka shënuar numrin më të lartë të çështjeve me gjithsej 13.3 %, i përcjell nga Samedin Xheladini (LDK) me 13 % të çështjeve të ngritura.
Anëtarët e Kuvendit të Komunës së Dragashit gjatë punimeve të seancave kanë bërë gjithsej 83 pyetje ndaj ekzekutivit të kësaj komune prej të cilave 79 % nga fushat me interes për qytetarët e Dragashit ndërkaq 19 % e pyetjeve kanë qenë të lidhura me aspekte procedurale të punës së organeve të Komunës së Dragashit.
Lidhur me numrin e pyetjeve të parashtruara gjatë punimeve të seancave pinë anëtarët e LDK-së me gjithsej 30.1 %, të pasuara nga PDK dhe VAKAT me nga 16.9 % përkatësisht 15.7 % të pyetjeve të përgjithshme. Derisa anëtarët më aktiv në parashtrimin e pyetjeve në Kuvendin e Komunës së Dragashit janë: Zaim Hajredini (AKR) 10.8 % dhe Nexhat Isufi (BD) me 9.6 % të pyetjeve të përgjithshme.
Në seancat e mbajtura në Kuvendin e Komunës së Dragashit gjatë periudhës Janar-Dhjetor 2015 ky institucion ky institucion ka miratuar Rregulloren për tatimin në pronën e paluajtshme për vitin 2016, dhe Rregulloren për mbrojtjen e të miturve nga dukurit negative. Ku krahas kësaj Samidin Xheladini nga (LDK) ka propozuar inicimin e Rregullores për menaxhimin e mbeturinave.
Qëllimi i publikimit të këtij Fletënotimi është informimi i paanshëm dhe objektiv i qytetarëve për punën e të zgjedhurve të tyre gjatë mbajtjes së seancave të Kuvendit të Komunës së Dragashit në periudhën Janar-Dhjetor 2015, notim ky i bazuar në nëntë shtylla të vlerësimit.
Fletënotimi për periudhën Janar-Dhjetor 2015 është përgatitur në kuadër të projektit “Pjesëmarrja qytetare dhe principet për një qeverisje të mirë” projekt i mbështetur nga The Olof Palme Centre (OPIC). /PrizrenPress.com
Isa Mustafës as gjatë vitit 2016 nuk do t’ia lëshojnë derën hallexhinjtë. Partitë opozitare do të jenë të parët që me anë të protestave do të kërkojnë dorëheqjen e tij dhe të Hashim Thaçit.
E gjatë janarit të drejtat e tyre me protestë pritet t’i kërkojnë edhe veteranët e luftës së Ushtrisë Çlirimtare të Kosovës.
Derisa, duarkryq nuk do të rrinë edhe pensionistët e UÇK’së. Edhe kjo kategori ka paralajmëruar protesta gjatë këtij viti, nëse Isa Mustafa dhe qeveria e tij nuk i respektojnë marrëveshjet e arritura me ta.
Një veprim revoltues ndaj qeverisë Mustafa e kanë paralajmëruar edhe mësimdhënësit.
Por, drejtues të Sindikatës së Arsimimit kanë thënë se nuk do të dalin pranë qeverisë për t’i kërkuar drejtat e tyre, ata do të hynë në grevë në të gjitha institucionet arsimore për muajin janar.
Në përgjithësi, viti i ri do të nisë me telashe të mëdha për udhëheqësit.
Kërkohet dorëheqja e Isa Mustafës
Blloku opozitar me datë 9 janar do e bëjë hapjen e fillimit të protestave. Kësaj here me kërkesën për dorëheqjen e kryeministrit Isa Mustafa, si dhe zëvendësit të tij Hashim Thaçi.
“Me 9 janar jemi të bashkuar të gjithë, jo vetëm opozita por çdo qytetar që Kosova të ketë një të ardhme të mirë dhe mos t`i pamundësohet e ardhmja në mënyrë që mos të kontrabandohet me marrëveshjet”, ka thënë shefja e grupit parlamentar të AAK-së, Donika Kadaj Bujupi.
E për muajin janar para Qeverisë pritet të mblidhen edhe veteranët e luftës së Ushtrisë Çlirimtare të Kosovës.
Ata u deklaruan se nëse gjatë këtyre ditëve nuk dalin pensionet për veteranët e luftës atëherë edhe veteranët do të dalin me protesta për realizimin e qëllimeve të tyre.
Kryetari i Këshillit për mbrojtjen e veteranëve, Xhevdet Qeriqi, në një prononcim për gazetën Fjala është shprehur se nëse Qeveria e Kosovës nuk i përfundon obligimet e saja kundrejt veteranëve të Ushtrisë Çlirimtare të Kosovës atëherë muaji janar do të jetë ai në të cilin veteranët do ti shprehin pakënaqësitë e tyre me demonstrata kundrejt Qeverisë së Kosovës.
“Ne si këshill e kemi paralajmëruar Qeverinë se në Janar do të dalim me protesta. Tashmë ka filluar shpërndarja e disa certifikatave. Por shumë veteran kanë mbetur pa to. Qeveria mos të na detyrojë që të dalim në protesta”, ka thënë Qeriqi për Gazetën Fjala.
Qeriqi ka paralajmëruar se nëse Qeveria nuk ndërmerr masa ndaj këtyre kërkesave veteranët do të mbajnë edhe protesta të tjera.
“Nëse nuk fillon me dhënien e kontributeve për ushtarët e UÇK-së atëherë dhe ne do dalim Qeveria ka filluar me ndarjen e disa certifikatave për veteranët”, ka shtuar ai.
Veteranët kërkojnë pensionet
Ndërkaq pensionet e veteranëve të Ushtrisë Çlirimtare të Kosovës, po dalin të jenë ‘mollë sherri’, edhe në mes të Organizatës se Veteranëve të Luftës së UÇK-së, si dhe Qeverisë së Kosovës. Kjo e fundit ende nuk ua ka lëshuar pensionet shumë prej veteranëve të Ushtrisë Çlirimtare të Kosovës. E OVL-e UCK-së po shprehet e ashpër kundrejt qeverisë s ai përket kësaj çështje.
Kryetari i OVL-së, Xhavit Jashari është shprehur se Qeveria e Kosovës duhet ti respektoj marrëveshjet që i ka bërë me veteranët e UCK-së. Ai u shpreh që pensionet për veteranët ende nuk kanë dalë në bankë në formë retroaktive. Jashari ka thënë për Gazetën Fjala se qeveria është e detyruar që ti respektoj marrëveshjet me veteranët.
“Nëse Qeveria nuk jep rezultate, atëherë reagimet tona do të jenë të pashmangshme. Do të detyrojmë Qeverinë që me protesta dhe demonstrata që të na i ndaj mjetet”, ka thënë Jashari për gazetën Fjala.
Edhe Këshilli Drejtues i Sindikatave të Bashkuara të Arsimit, Shkencës dhe Kulturës të Kosovës (SBAShK), ka paralajmëruar grevë në të gjitha institucionet arsimore për muajin janar, si shenjë revolte ndaj institucioneve qendrore dhe lokale të shtetit lidhur me qasjen e tyre kundrejt mësimdhënësve në të gjitha komunat e Kosovës.
Kryetari i kësaj sindikate, Rrahman Jasharaj, ka thënë për Gazetën Fjala se ka gjasa që SBASHK-u të fillojë me grevë në muajin janar.
“Nëse pensionet nuk janë përmirësuar dhe nëse Qeveria nuk e rregullon ligjin për benifitet 90-99 atëherë ne do e fillojmë edhe grevën e paraparë. Nëse Qeveria nuk e mbanë premtimin atëherë ne do ta shohim qartë se me datë 27 janar ne do ta fillojmë grevës”, ka thënë kreu i SBASHK-ut. /GazetaFjala
Si pasojë e reshjeve të vazhdueshme të shiut dhe shkrirjes së borë, në Komunën e Malishevës, ka vërshime të mëdha.
Rruga Malishevë-Duhël, është bllokuar dhe luten të gjithë vozitësit, që mos qarkullojnë në këtë drejtim, si dhe mos ta lëshojnë autostradën për tu futur në Malishevë.
Lumi Mirusha dhe shumë përroska kanë dalë nga shtretërit e tyre, duke vërshuar shumë pjesë të Komunës së Malishevës.
Është bllokuar edhe për në fshatin Gurbardh, përkatësisht ura në liqenin Mirusha.
Sipas drejtorit për Mbrojte dhe Shpëtim, Ahmet Morina, të gjitha ekipet e emergjencës dhe shpëtimit, janë në terren, duke i ndihmuar të gjithë ata që kanë nevojë. /PrizrenPress.com
Deputeti nga radhët e NISMA –së, Zafir Berisha, ka komentuar nominimin për president nga dy partitë kryesore që qeverisin vendin, Lidhja Demokratike e Kosovës dhe Partia Demokratike e Kosovës. Këto dy parti janë dakorduar që 11 shkurti të jetë data kur do të hidhet në votim në Kuvendin e Kosovës kandidati i tyre konsensual për president, Hashim Thaçi.
Ai ka thënë se më lehtë do ta kishte votuar Millosheviqin të ngjallej se sa Hashim Thaçin për president të vendit.
“Ma lehtë e kisha votu Millosheviqin me u ngjall për president të vendit se Hashim Thaçin edhe pse ai pis ka vdes. Dëmi më i madh që i bohet Kosovës është nëse një injorant asisoj si Hashim Thaçi bohet president i këtij vendi “, ka thënë Berisha për Arbresh.info.
Më tej Berisha ka shtuar se “qeverisja e tij prej vitit 2008 ka mi kushtu 50 vjet Kosovës edhe nëse zgjidhet president pasojat do të jenë 100 vjeçare nga ky njeri pakurrizor dhe ky njeri që interesin përgjithshëm e vë në favor të interesave personale” .
“Po ky njeri duhet të shkojë në burg sepse mu zgjedh president nuk e di që çfarë favori është për shtetin e Kosovës”, ka thënë Berisha.
Nga ana tjetër , blloku opozitar LVV, AAK dhe NISMA për Kosovën janë shprehur kundër votimit të Thaçit për president. Ata janë duke kërkuar dorëheqjen e Qeverisjes Mustafa dhe shkuarja në zgjedhje të reja. Blloku opozitar ka paralajmëruar protesta gjithëpopullore më 9 janar./gazeta blic/
Në rrugën “Adem Jashari” në qytetin e Prizrenit, ditën e djeshme ka ndodhur një rrahje masive mes disa personave.
Siç raporton Policia e Kosovës, tre persona të dyshuar e kanë sulmuar fizikisht me një shufër metali një mashkull duke i shkaktuar lëndime trupore.
“Viktima është dërguar për tretman mjekësor dhe sipas mjekëve gjendja e tij është stabile”, njofton Policia, transmeton PrizrenPress.
Të dyshuarit janë arrestuar dhe pas intervistimit dy prej tyre janë liruar në procedurë të rregullt, ndërsa i dyshuari i tretë është dërguar në mbajtje. /PrizrenPress.com
Gjatë luftës së Ushtrisë Çlirimtare të Kosovës në vitin 99, pjesëtarët e kësaj të fundit kishin zënë rob 8 ushtarë serb.
Ushtarët serb ishin zënë rob në Bare të Shalës së Bajgores. Pas kësaj ushtria serbe kishte dhënë ultimatum që deri në orën 15:00 të asaj dite ushtarët e saj të lirohen pa kurrfarë kushti.
Por, UÇK-ja kishte vendosur që lirimi i ushtarëve serb të kushtëzohej me lirimin e 9 ushtarëve të UÇK-së, që ishin kapur tri javë më parë.
Më vonë Agjencia e Lajmeve AP, publikoi disa video nga arkivat e saj ku aty shihet duke folur edhe njëri prej ushtarëve serb i cili thotë se nuk ishte keqtrajtuar.
“Nuk na kanë sulmuar po na kanë ndalë. Jemi çarmatosur, nuk kishte sulm fizik ndaj nesh”, dëgjohet duke thënë njëri ushtar.
Ministrja për Dialog, Edita Tahiri, ka bërë me dije se marrja e kodit shtetëror telefonik do t’i sjellë Republikës së Kosovës përfitime në planin politik, ekonomik dhe të sigurisë, si dhe të do mundësojë shërbime më cilësore dhe me kosto më të favorshme për qytetarët.
Ajo ka deklaruar se kodin e saj ndërkombëtar Kosova do ta ketë në muajin mars. Në këtë intervistë për “Epokën e re” Tahiri ka thënë se me fuqizimin e këtij kodi do të mbyllen të gjitha kodet e tjera telefonike që kanë qenë në përdorim.
“Në muajin mars Kosova e merr zyrtarisht kodin, ndërsa faza e zbatimit të këtij kodi, sipas ekspertëve të telekomit dhe autoritetit rregullator telekomunikues, kërkon një periudhë të caktuar kohore derisa të bëhet migrimi teknik nga të gjitha kodet në një kod, që nënkupton edhe ndërrimin e SIM kartelave. Pra, ajo është një kohë normale teknike derisa të bëhet kalimi në një kod telefonik”, ka thënë ministrja Tahiri.
Ajo ka folur edhe për vazhdimin e procesit të dialogut në Bruksel. Sipas saj, takimet e nivelit teknik do të fillojnë në pjesën e dytë të janarit, kurse pas tyre do të vijnë edhe takimet e kryeministrave.
“Sa i përket takimit të kryeministrave, kjo ende nuk është caktuar, pasi varet prej ftesës që do të vijë nga Brukseli”, është shprehur Tahiri.
Ajo nuk ka dashur të flasë nëse Qeveria e Kosovës do ta kushtëzojë dialogun me Serbinë. Tahiri ka vlerësuar se në këtë proces nuk pritet të kenë ndonjë ndikim kundërshtimet e opozitës.
“Gjykata Kushtetuese e ka bërë të qartë për të gjithë në Kosovë, për pozitën, opozitën dhe të gjitha institucionet, se marrëveshja për Asociacionin nuk ka dalë jokushtetuese siç pretendonte opozita, por është vlerësuar se nuk është tërësisht në pajtim me Kushtetutën, që nënkupton se Gjykata Kushtetuese ka dhënë dritën e gjelbër për themelimin e Asociacionit dhe ka kërkuar nga Qeveria që në procesin e hartimit të statutit të respektohen udhëzimet e Gjykatës Kushtetuese. Besoj se edhe opozita e ka të qartë këtë”, ka deklaruar Tahiri. /Epoka e Re
Debatet e panjohura në Parlamentin e parë shqiptar, mes Fan Nolit dhe Ahmet Zogut.
Nga debati parlamentar, kur Fan Noli jepte dorëheqjen si ministër i Jashtëm, duke mbajtur edhe fjalim brilant, si edhe debatet që pasuan pastaj në Parlament.
Fjalimi i Fan Nolit:
Është e vërtetë që ndodhesha në Tirane kur u votua ligji i intermimit të fëmijëve të dezertorëve, por nuk isha në Parlament, as mora pjesë në bisedime. Veç kësaj, nga njëra anë, Guverna jonë e zbatoi këtë ligj me një shtojcë, të dekretuar prej kabinetit pasi kisha dhënë dorëheqjen dhe, nga ana tjetër, unë nuk e atakova guvernën aq për internimin e fëmijëve të dezertorëve se sa për internimet politike pa ndonjëe faj e pa ndonjë bazë në Toskëri, ku s’kishte asnjë shenjë për lëvizje kryengritëse.
Ja disa shembuj midis të tjerash: Disa familje nga Bilishti, nga Hoçishti e nga Leskoviku u internuan me gra e me çiliminj e u munduan më kot e pa arsye larg vatrave të tyre për disa muaj. Sa për sigurinë që mbretëron anë e mbanë Shqipërisë dhe veçanërisht në malësi, më vjen keq t’i përsëris ministrit të Punëve të Brendshme që kam shumë dyshime.
Shembulli i tregtarit të thëngjillit për të cilin fola më parë është tipik për mungesën e sigurisë nën këtë guvernë. Ky tregtar ka punuar në Gurëz e në Breg të Matit njëzet vjet me radhë, përpara Luftës Ballkanike, në kohën e Luftës Ballkanike, në kohën e Luftës së Përgjithshme, në kohën e operacioneve të ndryshme, dhe në kohën e të gjithë kabineteve tonë të mëparshëm. Po në kohën e këtij kabineti, pasi e pësoi atë që iu tregova më parë, dmth pasi u plagos prej një vrasësi ku udhëtonte i përcjellë prej një oficeri të xhandarmërisë e prej një zyrtari të shtetit, tani ndodhet në kryeqytet e nuk guxon të kthehet në malësi për të shikuar punët e tij.
Ministri i Punëve të Brendshme na bëri dy shaka kur u qa se po e kritikojmë që ç’armatosi popullin e shtypi kryengritjen. Nuk e atakova se ç’armatosi popullin; por i hoqa vërejtjen mbi faktin që ç’armatosja materiale nuk arrin për të prerë kryengritjet, pa ç’armatosjen morale. Që ta them më të shkoqur, nuk arrin t’i marrësh armët një njeriu e ta bësh mik e të sigurohesh nga pusitë e tij, para se të pajtohesh me të thellësisht. Nuk e atakova guvernën se shtypi kryengritjen, por se nuk e parashikoi, se nuk kishte marrë masa për të mbrojtur kryeqytetin, se mori në qafë me qindra njerëz krejt të pafajshëm e se armiqësoi popullin e Shqipërise së Mesme pa shpresë pajtimi kush e di për sa vjet.
Ministrit të Luftës kam për t’i thënë se për veshjen e ushtarëve, nuk jemi të verbër, ne i shohim qysh janë të veshur ata ushtarë që ndodhen në kryeqytet, e që e marrim me mend sa më ligsht janë veshur ata që ndodhen në provincë. Nga ana tjetër, nuk është e vërtetë që rroga e oficerit tonë është e vogël e që s’u mbetka tjetër shpërblim përveç gradimit. Përkundrazi, rrogat e oficerëve tanë janë më të mira se në Itali e më të mira se kudo në Ballkan e në Europën Qendrore…
Sa për çështjen e shqiptarëve të Izmirit, është e vërtetë që isha ministër i Punëve të Jashtme kur bisedohej kjo çështje, po unë e lashë ndryshe dhe u mbarua fare ndryshe. Ja me pak fjalë historia e kësaj çështjeje: një nga paraardhësit e mi i kishte kërkuar qeverisë italiane mbrojtjen e qytetarëve shqiptare, atje ku nuk kemi përfaqësues e as konsull dhe, veçanërisht në Izmir. Guverna italiane e pranoi me gëzim këtë barrë dhe i kërkoi guvernës sonë hollësi mbi pasaportat dhe mbi taksat konsullore. Në një përgjigje të dhënë prej meje, e falenderonim qeverine italiane për këtë lehtësi…
Konflikti u rreptësua dhe kapërceu e marrëveshjes, kur u vendos të shkoja në konferencën e Gjenovës. Unë isha i mendjes që s’duhej bërë asnëe emërim pa pëlqimin tim nga njëra anë, dhe që, nga ana tjetër, duhej të pyetesha për çdo çështje të jashtme me rëndësi, para se të jepej një vendim. Kryeministri, i cili duhej të bëhej zëvëndës i punëve të jashtme ishte i mendjes që mund të bënte çdo veprim dhe emërim në degën e jashtme pa më pyetur fare, sa kohë ndodhesha jashtë Tiranës. Kur i tërhoqa vëretjen që unë do të shtrëngohesha të jepja dorëheqjen, sapo të behej ndonjë emërim apo veprim pa pëlqimin tim, Kryeministri më tha se mund ta jepja dorëheqjen. Duke parë se kolegët e mi, të gjithë pa përjashtim, pëlqenin pikëpamjen e Kryeministrit, e dhashë dorëheqjen time që atë minutë, i gëzuar që s’isha i nevojshëm për plotësimin e kabinetit…
Kur Këshilli i Lartë na e ktheu buxhetin me vërejtjen e arsyeshme se qysh kishte ndër mend guverna na mbulonte deficitin prej më shumë se dhjetë milion franga ar, atëhere e gjeta rastin t’u them kolegëve të mi që Këshilli i Lartë kishte të drejtë të mos aprovonte një buxhet të çale dhe shkela këmbë që buxheti të balancohej duke zbritur të prishurat sipas të ardhurave të shtetit. Asnjë nga kolegët e mi s’u bashkua me mendimin tim dhe kryeministri e shtrëngoi Këshillin e Lartë të aprovojë buxhetin me një deficit prej më tepër se dhjetë milion franga ar, pa ndonjë projekt se si do te mbulohej ky defiçit.
Shkela këmbë që në krye të thirren me një herë organizatorë të huaj për ministri të ndryshme. Vendimi u dha, por unë vura re që kolegët e mi s’kishin dëshirë dhe as nxitim që ky vendim të vihej në veprim. Provën e kini përpara sysh. Guverna jonë s’ka sjellë asnjë organizator veç organizatorit austriak të ushtriseë i cili rastisi të ndodhej këtu dhe të cilin guverna jonë s’e ka lënë të bëjë asnjë organizim…
Tani, zoti Kryetar, nemni leje të bëj disa vërejtje mbi aluzionet e bukura dhe të holla të zotit Sejfi Vllamasi për sëmundjen time misterioze e për gishtin e jashtëm si dhe për aluzionin e ministrit të Punëve të Brendshme, i cili disa ditë më parë na cilësoi zotin Gurakuqi dhe mua si mbrojtës të Mustafa Krujës.
Ju pyes ju, kujt u drejtohen insinuata dhe këto aluzione? Atyre që kanë vite e vite që punojnë për çështjen e Shqipërisë? A është nevoja të mbrohemi kundër këtyre insinuatave?
AHMET ZOGU: Davaja e Emzotit është më tepër si mbrojtje për veten e tij për dorëheqjen që ka dhënë, se sa një protestë kundër qeverisë. Sa për çështjen e buxhetit, për të cilën flet zotëria e tij nuk dua të jap përgjigje e këtë pikë ia lë zotit Kryeministër.
KRYEMINISTRI: Me gjithë që fjalët e Emzot Nolit nuk janë të drejta për shka kam edhe dëshmitarë, nuk dua të jap përgjigje. Nuk ishte nobël për zotërinë e tij të jepte dorëheqjen në një kohë aq kritike nëpër rrugë…
EMZOT FAN NOLI: Me sa e dinit ju se është kohë anormale, pse zoti ministër i Brendshëm na siguronte se nuk ka farë frike. Pra, për mua nuk ishte kohë anormale.
AHMET ZOGU: Sa për fjalët që kam thënë se çuditem se si zoti Gurakuqi dhe Emzot Fan Noli i dalin zot tradhëtarëve, kjo nuk do me thënë se ata janë tradhëtarë. Dhe i nderoj shumë si atdhetarë të mirë, por me gjithë këtë çuditem. Sa për fjalët që tha Emzoti se ne jemi çirakët e ustallarëve, dua t’i përgjigjem në një mënyre, duke kërkuar prej zotërisë së tij që mos t’i marrë për keq. Zotëria e tij është një orator shumë i mirë, por përdor pak fjalë hovarda, që në gjuhen gjermane d.m.th. spitzbube. Vimë tani në çështjen e Gurzit. Në Gurëz është një pyll shumë i madh, në atë pyll u shti një pushkë dhe u plagos një njeri, siç tha zotëria e tij. Zotëri, ç’mundet të bëjë qeveria pse në pyll shtihet një pushke? Sot një jayë, kur erdhën disa deputetë për t’u ankuar për këtë çështje, qeveria dha urdhra të rrepta për këtë pune.
Bëhen dhjete minuta pushim, pas dhjetë minutash mbledhja mbështillet prapë.
STAVRO VINJAU: Mbi fjalët e zotit ministër të Drejtësisë, kemi për të thënë se nuk është e vërtetë ajo që thotë zotëria e tij, se gjykatësit kundërshtuan, të lëshojnë punën e tyre, edhe prandaj ajo ministri u detyrua t’i kërrente prej krahu me policë. E vërteta është se me tërë veprimet e saj, ashtu edhe me këtë vepër, ajo shkeli ligjin….
(Marrë nga libri “Debat parlamentar para një shekulli” me autor Filip Rrumbullakun)
Kuvendi i Kosovës që në fillim të sesionit të punës të vitit 2016 do të ballafaqohet me shumë sfida: kthimin e normalitetit në këtë institucion, zgjedhjen e presidentit, çështjet legjislative të Gjykatës Speciale, themelimin e Forcave të Armatosura të Kosovës, etj.
Duke i pasur parasysh të gjithë këto, analistët Albert Krasniqi dhe Ilir Fetahu kanë kërkuar që përfaqësuesit e partive parlamentare në fillim të këtij sesioni të dialogojnë ndërmjet vete në mënyrë që në Kuvend të kthehet debati.
Albert Krasniqi nga Instituti Demokratik i Kosovës ka thënë për gazetën ‘Epoka e re’ se sesioni vjeshtor i Kuvendit nuk ka qenë efektiv në përmbushjen e agjendës legjislative.
Edhe analisti politik, Ilir Fetahu ka vlerësuar se sesioni pranveror do të jetë sfidues për Kuvendin e Kosovës. /Epoka e Re