Kryetarit i Komunës së Rahovecit, Idriz Vehapi, sot ka mabjtur debatin e parë publik me qytetarë të rregullt, ku i informoi për punën dhe zhvillimet e gjithmbarshëm në Komunë për gjashtëmujorin e parë të vitit 2016.

Të pranishëm në debatin e organizuar nga kryetari ishin: drejtorët e drejtorive, kryetarët e lagjeve dhe fshatrave të Komunës së Rahovecit, nxënës të ShMLP “Selajdin Mollabati-Mici”, në qytetin e Rahovecit.

Në pjesën e parë, Vehapi njoftoi pjesëmarrësit në debat, me aktivitetet dhe punët e zhvilluara, projektet që janë përfunduar gjatë gjashtëmujorit të parë.

“Është investuar në përmirësimin e infrastrukturës në fshatin Pataqan i Ulët, ku janë kubëzuar 500 metra rrugë, ka përfunduar asfaltimi i rrugës që lidh fshatrat Pastasellë-Koznik me gjatësi 3800 metra, në fshatin Sopniq janë kubëzuar 451 metra rrugë, në fshatin Kramovik, janë kubëzuar 937.99 metra rrugë, në fshatin Pastasellë janë kubëzuar 681.51 metra rrugë, në fshatin Vrajak janë kubëzuar 481.51 metra rrugë, në qytetin e Rahovecit janë kubëzuar 80 metra rrugë, ka filluar ndërtimi i trotuarit në rrugën e UÇK-së me gjatësi 1200 metra, poashtu është asfaltuar edhe rruga që lidh rrugën “Gëzim Hamza-Piktori” me rrugën “28 Nëntor”, në qytetin e Rahoveciti”, tha ai.

Sipas tij, është punuar edhe në infrastrukturë nën rrugore dhe ujë të pijshëm siç është ujësjellësi në fshatin Pastasellë, ku ka përfunduar shtrirja e gypave të ujësjellësit dhe është duke u punuar edhe në ndërtimin e ujësjellësit në fshatin Zatriq, ka përfunduar kanalizimi në fshatrat Pastasellë-Polluzhe.

Vehapi foli edhe për investimet në sektorin e bujqësisë. “Janë rregulluar rruga fushore në fshatin Zaqisht – Vreshtat – Izbisht në gjatësi 2430 m, rruga fushore Paskedo – Jolgjin – Patok me gjatësi 3381m, Rruga fushore Dacakoll – Hamoviç – Paskidol me gjatësi 3862 m, Rruga fushore afër Lumit të Bellajës në Fortesë me gjatësi 1125m. Gjatësia e përgjithshme, e rrugëve fushore të rregulluara deri me tani është 10 798 m, dhe ky projekt është projekt dy vjeçar. Ai tha po ashtu se janë ndërtuar 93 sera me participim”, (75% Komuna, kurse 25% fermeri), sipërfaqja e një sere është 150m², vlera e përgjithshme e këtij projekti është 77 000 euro”, tha Vehapi.

Ndërkaq, sa i përket sektorit te financave Vehapi tha se Komuna e Rahovecit për vitin 2016, operon me buxhet prej 11,384.998.00, të përbërë nga grandi qeveritar dhe të hyrat vetanake me këto shuma: grandi qeveritar është 10,226,984.00 euro, ndërsa të hyrat vetanake janë 1,158,014.00 euro.

“Deri me tani janë zotuar 1,450 lëndë dhe janë kryer 1,260 pagesa, shpenzimi i buxhetit në gjashtëmujorin e parë është 51.24%”, tha ai.

Në pjesën e dytë të debatit, qytetarët i bënë pyetje kryetarit kryesisht për investimet në infrastrukturë rrugore, ndriçimin publik, krijimin e hapësirave gjelbëruese, mbeturinat e ngurta, rregullimin e kanalizimeve.

Vehapi u tha qytetarëve se ka pasur investime dhe do të vazhdohet në investime të tjera të cilat janë në interes të qytetarëve.

“Investime do të ketë në qytetin e Rahovecit dhe po ashtu edhe nëpër fshatra të Komunës së Rahovecit”, premtoi ai.

Gjatë gjithë kohës sa ka zgjatur debati, përmes video projektorit, të pranishmit në debat kanë pasur mundësin që përmes fotove ti shohin aktivitetet në përurimet e projekteve dhe takimet të cilat i ka zhvilluar kryetari dhe qeveria komunale e Rahovecit, me personalitete të ndryshme si vendore edhe ndërkombëtare.

Vehapi, në mbyllje të debatit pas diskutimeve të shterura, u shpreh se ka edhe shumë për tu punuar edhe vitin e ardhshëm.

“Por gjithmonë do të shikojmë se sa do të ketë buxhet”. tha ai.

Kurse për shqetësimet, sugjerimet dhe vërejtjet e qytetarëve, Vehapi tha se ishin me vend. /PrizrenPress.com/

Rreth orës 03:05 të datës 29 qershor, Policia në Suharekë ishte njoftuar për një zjarr i cili kishte shpërthyer në parkun e qytetit gjegjësisht ishte djegur tërësisht një shtëpizë druri e ndërtuar nga Komuna e Suharekës për nevoja të qytetarëve, shkruan PrizrenPress.

“Pas inicimit të rastit, grupi hetimor ka nisur me hetimin e rastit dhe në bashkëpunim me qytetarë ka arritur që ta identifikojë zjarrvënësin dhe ta arrestojë. Në prani të avokatit është intervistuar i dyshuari i cili veprimin e kishte arsyetuar me faktin se ajo shtëpizë shfrytëzohej më vepra të pista”, njofton Policia.

Siç bëhet e ditur, pritet vendimi i prokurorit të shtetit për procedura të më tejme. /PrizrenPress.com/

Kryeministri i Kosovës, Isa Mustafa duket se ka vendosur që t’i shpërblej të gjithë ata deputetë të LDK-së që e votuan atë për kryeministër, dhe që e bën Hashim Thaçin president.

Gazeta Blic ka marrë vesh se kabineti qeveritar i drejtuar nga Isa Mustafa e ka rehatuar edhe djalin e deputetes së LDK-së, Besa Gaxherrit.

Është fjala për Ardian Gaxherrin, i cili u emërua anëtar i Bordit të Autoritetit të Aviacionit Civil.

“Ardian Gaxherri është djali i deputetes së LDK-së, Besa Gaxherrit, i cili dje u emërua anëtar i Bordit të Autoritetit të Aviacionit Civil”, tha ky burim i Gazetës Blic.

Kabineti qeveritar dje ka miratuar vendimin për emërimin e anëtarëve në Bordin e Autoritetit të Aviacionit Civil.

Pos Gaxherrit, kryetar i Bordit është emëruar Samed Dalipi, zyrtar i lartë në LDK, ndërsa anëtarë janë zgjedhur Bekim Jashari si dhe Adelina Salihu.

Ndryshe, Besa Gaxherri është ndër deputetet e LDK-së që e ka mbështetur në vazhdimësi Isa Mustafën. Madje, ajo në një intervistë të dhënë së fundi, ka theksuar se qeverisja e Isa Mustafës është më e mira që nga pas lufta në Kosovë. /Gazeta Blic