Kryetar i LDK-së në Prizren Haxhi Avdyli ka komentuar deklaratën e kryetarit të AAK-së Lulëzim Kabashi, për qeverisjen e Prizrenit.

Ai thotë se deklarata e Kabashit se koalicioni që ekziston në nivel lokal mes, PDK-së dhe AAK-së është në nivel teknik është një zbulim terminologjik.

“Koalicioni në qeverisje është vetëm politik. Koalicioni teknik qenka një zbulim terminologjik i ri që fare s’ka kuptim”, vlerëson Avdyli,shkruan PrizrenPress.

“Ose është në koalicion ose është në opozitë”.

Lulëzim Kabashi, i cili është edhe nënkryetar i Komunës së Prizrenit, i ka dalë në mbrojtje kryetarit të Prizrenit, duke thënë se Ramadan Muja po akuzohet për vepra që nuk janë të vërteta.

“Nuk ka të drejtë askush ta akuzojë për këto vepra që po flitet. Kjo është një propagandë armiqësore”, ka thënë Kabashi.

Ai ka folur edhe për koalicionin në nivel lokal mes PDK-së dhe AAK-së.

“Koalicioni që ekziston në nivel lokal mes, PDK-së dhe AAK-së është në nivel teknik dhe nuk bëhen politika të nivelit qendror”, ka thënë ai.

Avdyli thotë se AAK-ja, gjatë këtyre viteve ka qenë pjesë e qeverisjes me PDK-në në Prizren.

“AAK-ja ka qenë pjesë e kësaj qeverisje dhe do ta marrë barrën e kësaj keqqeverisje në zgjedhjet e ardhshme”, shprehet Avdyli.

“ Është votuesi që do të vlerëson secilin, sipas peshës së përgjegjësisë”.

“Si duket AAK, po e din që kjo qeverisje ishte e keqe, prandaj edhe me këto deklarata po mundohen të minimizojnë koalicionin në formë teknike dhe t’i ikë përgjegjësisë”./PrizrenPress.com/

Lëvizja Vetëvendosje! nesër ( e enjte ) do të mbajë tubim publik me banorët e fshatit Gjonaj të Hasit.

Tubimi mbahet në Shtëpinë e Kulturës “Reshat Çoçaj”, në ora 20:00.

Pjesëmarrës do të jenë deputetët, Rexhep Selimi dhe Mytaher Haskuka/PrizrenPress.com/

Dy vëllezërit, Nazim dhe Shpëtim Orllati, nga Brestovci i Rahovecit, u dënuan sot me 27 vjet burgim për vrasjen e dy vëllezërve, Petrit e Pajtim Elshani, nga po i njëjti fshat.

Gjykata Themelore në Gjakovë e gjeti fajtor të pandehurin Nazim Orllati për veprën penale “vrasje e rëndë” dhe e dënoi me burgim në kohëzgjatje prej 20 vitesh, ndërsa të pandehurin Shpëtim Orllati e shpalli fajtor për veprën penale “ndihmë në vrasje” dhe e dënoi me 7 vjet heqje lirie.

“Gjykata të akuzuarit i ka gjykuar veç e veç dhe dhe i ka gjetur fajtorë. Të akuzuarin Nazim Orllati Gjykata, gjykata e dënon me burgim në kohzgjatje prej 20 viteve, në të cilin dënim i llogaritet koha e kaluar në paraburgim nga data 8.10.2010, ndërsa të akuzuarin Shpëtim Orllati e dënon me burgim në kohzgjatje prej 7 viteve, në të cilin denim i llogaritet koha e kaluar në paraburgim nga data 8.10.2010 e deri më 11.11.2015”, tha kryetari i trupit gjykues, Nikollë Komani.

Sipas prokurorisë, ngjarja kishte ndodhur më 8 tetor 2010 në marketin “Lumi” të vëllezërve tashmë të dënuar.

Vrasjes së dyfishtë i kishte paraprirë një mosmarrëveshje e mëhershme.

Ky rast është kthyer dy herë në rigjykim.

Vëllezërit Orllati ishin dënuar me 42 vjet burgim nga Gjykata e Qarkut në Prizren, për tu kthyer më pas në rigjykim.

Nga një trup gjykues i përbërë nga EULEX-i dhe vendorët, vëllezërit Orllati shpallen fajtorë për vrasje të rëndë dhe bashkëkryerje në vrasje dhe dënohen me 28 vjet burgim.