Lëvizja Vetëvendosje nuk do ta lejoj ratifikimin e kësaj marrëveshje në Kuvend dhe për këtë do të organizoj edhe protestë të fuqishme brenda dhe jashtë kuvendit.

Ratifikimi i marrëveshjes së Demarkacionit me Malin e Zi ka mbetur njëri ndër kushtet e fundit për liberalizimin e vizave, raporton Indeksonline. Por këtë çështje partitë opozitare janë duke e kundërshtuar pothuajse tash e nëntë muaj.

Zëdhënësi i Vetëvendosjes, Frashër Krasniqi ka thënë për Indeksonline se nuk është e drejtë të kërkohet falja e mbi 8000 hektarëve tokë vetëm për liberalizim të vizave.

“Ne nuk do të lejojmë miratimin e kësaj marrëveshje. Jemi shteti që ka pritur më së shumti në rajon për liberalizim të vizave, dhe nuk është e drejtë që të kërkohet nga ne falja e mbi 8000 hektarëve. Nuk do ta lejojmë miratimin e kësaj marrëveshje dhe për këtë do të organizojmë protestë të fuqishme brenda dhe jashtë Kuvendit”, ka thënë Krasniqi.

Sipas tij, kërkesa që demarkacioni të miratohet para miratimit të liberalizimit të vizave është e padrejtë ngase nuk i është vënë asnjë shteti të rajonit.

“Kërkesa që demarkacioni të miratohet para miratimit të liberalizimit të vizave, është e padrejtë ngase nuk i është vënë asnjë shteti të rajonit. Mali i Zi, i cili sot ka liberalizim të vizave, asnjëherë nuk e ka pasur kusht që për ta marrë liberalizimin ta ketë të zgjidhur çështjen e demarkacionit me Kosovën”, ka thënë ai.

Koalicioni qeverisës i ka numrat e mjaftueshëm në Kuvend për ta ratifikuar marrëveshjen për demarkacionin me Malin e Zi, për të cilën kërkohet vota e dy të tretave të deputetëve.

Por, një gjë e tillë ende nuk dihet se kur do të ndodhë, ndonëse është kërkuar edhe nga Bashkimi Evropian që kjo çështjet të përfundojë sa më shpejtë, në mënyrë që të ecet përpara me procesin e liberalizimit të vizave. Opozita konsideron se koalicioni qeverisës po frikësohet ta procedojë këtë çështje në Kuvend.

Kuvendi i Kosovës do të mblidhet në seancë më 25 maj, por as në këtë seancë në rend dite nuk është paraparë të jetë ratifkimi i marrëveshjes për demarkacionin me Malin e Zi. Partitë e koalicionit qeverisës, ndonëse i kanë më shumë se 80 deputetë në Kuvend, nuk po e procedojnë ratifikimin e kësaj marrëveshje. Këtë hezitim, nënkryetarja e Vetëvendosjes, Fatmire Mulhaxha-Kollçaku e konsideron si frikë të koalicionit qeverisës.

“Ky koalicion e ka një shumicë parlamentare për të marrë vendime. Por ata gjithnjë janë frikësuar nga numrat, sepse shpeshherë nuk iu ka dalë llogaria ashtu sic kanë menduar. Edhe pa i penguar ata frikësohen nga vetë brenda koalicionit të tyre sepse ka deputetë që po deklarohen publikisht se janë kundër formës së tillë dhe demarkacioni ashtu siç është parashtruar nga komisioni”, tha Kollçaku për Radio Kosovën.

E në rast se ratifkimi i marrëveshjes për demarkacionin shkon në Kuvend, Kollçaku thotë se Vetëvendosje, e cila tash e sa kohë po i bojkoton seancat, do të kthehet aty për ta kundërshtuar ratifkimin.

“Ne e kemi dhënë kundërshtimin tonë në vazhdimësi dhe normalisht që do ta kundërshtojmë çfarëdo zgjidhje të imponuar, çdo zgjidhje që nuk është pyetur qytetarët, por është marrë në mënyrë të njëanshme”, tha Kollçaku për Radio Kosovën.

E analisti politik Imer Mushkolaj vlerëson se do të ishte mëkat i madh që qytetarët e Kosovës edhe më tej të mbeteshin të izoluar, për shkak të demarkacionit me Malin e Zi. Andaj ai thotë se një zgjidhje mund të gjendet me presionin e bashkësisë ndërkombëtare, jo vetëm BE-së, por edhe SHBA-së.

“Do duhej të arrihej një konsensus i përgjithshëm politik, ose në masën më të madhe i tillë, në mënyrë që kjo çështje të përfundojë, natyrisht duke mos qenë në dëm të Kosovës siç është tash”, tha Mushkolaj për Radio Kosovën.

Kryetari i Kuvendit Kadri Veseli ka thënë pas mbledhjes së fundit të Kryesisë se ratifikimi i marrëveshjes për demarkacionin me Malin e Zi nuk është ende në agjendën e Kuvendit, porse sipas tij, ajo çfarë do të ndodhë në asnjë mënyrë nuk do ta vërë në rrezik liberalizimin e vizave dhe se vendimmarrja do të jetë adekuate me interesat e vendit dhe të qytetarëve./RTK/

Në përbërjen e re të Parlamentit të Serbisë do të ulen vetëm gjashtë deputetë serbë nga Kosova e nga 12 lista sa kanë hyrë në Kuvend, tetë nga to nuk e kanë asnjë përfaqësues nga Kosova, njofton dhe ankohet gazeta e Beogradit “Veçernje Novosti”.

Pos nga pesë listat e minoriteteve, deputetë nga Kosova nuk kanë as radikalët, koalicioni me DS-në dhe Lëvizja “Dosta je bilo”.

Në klubet e deputetëve nga përparimtarët dhe socialistët (parti të Vuçiqit e Daçiqit) do të jenë nga dy deputetë , derisa Dveri-DSS dhe lidhja LDP-LSV-SDS do të përfaqësohen me nga një deputet nga Kosova.

Publicisti Shkëlzen Maliqi i ka quajtur demagogë politikë të gjithë ata që thonë se “Nuk falin tokë për vizat”.

“”Nuk falim tokë për viza!” është demagogji patriotike e radhës! Të çosh inat me botën dhe injorosh parimin e përcaktimit të demarkacionit me Malin e Zi mbi vijat kufitare dhe gjendjen administrative dhe kadastrale të Kosovës sipas kushtetutave të fundit të federatës jugosllave të vitit 1974, nuk është as mençuri e as sjellje patriotike”, ka shkruar Maliqi në një postim në llogarinë e tij në Facebook.

“Parimi i sukcesionit të një shteti të shpërbërë është ligj ndërkombëtar që obligon të gjitha shtetet e ish Jugosllavisë dhe do të vlejë edhe në demarkacionin me Serbinë. Nuk ka pikënisje tjetër racionale për çështjen”.

“Është tjetër gjë kur thuhet dhe konstatohet se kufiri i 1974 është i padrejtë ose i gabuar, jonatyror, arbitrar etj. Kjo mund të jetë platformë politike e të ardhmës së shtetit dhe partive, por jo e fiksimit ndërkombëtar të sukcesionit. Kjo do të thotë se akti i ratifikimit të demarkacionit të kufijëve adminstrativë të Kosovës të vititi 1974 nuk e përjashton mundësinë që dy shtete sovrane, të rinegociojnë dhe bisedojnë për korrigjimin e kufirit, që në ditën e parë pasi që ai të ratifikohet në kuvendet e dy shteteve”

”Kjo aq më parë që për këtë ka tregur gatishmëri edhe Mali i Zi, ku edhe nga ana e komunave kufitare të Rozhajës dhe Plavës ka pakënaqësi me demarkacionin” ka shkruar ai në një postim në llogarinë e tij në Facebook.

”Mësim për “patriotët”është vetëm ratifikimi i Marrëveshjes për demarkacionin me Malin e Zi na bën shtet sovran jo vetëm për liberalizimin e vizave por edhe për korrigjim eventual të kufijve”.