Hapi i parë i presidentit të Kosovës Hashim Thaçi, në përpjekje për të marrë rol ndërmjetësues në zgjidhjen e krizës politike në vend, duke propozuar një komision me gjithëpërfshirje politike për hartimin e Statutit të Asociacionit të Komunave me shumicë serbe, është kundërshtuar fuqishëm nga subjektet politike opozitare,shkruan gazeta Kosova Sot.

Opozita konsideron se pas interpretimit të Gjykatës Kushtetuese, që ka nxjerrë pikat më të rëndësishme të Marrëveshjes për Asociacionin në kundërshtim me aktin më të lartë juridik të shtetit, çdo përpjekje tjetër për të kërkuar bashkëpunim, sidomos për riparimin e asaj marrëveshjeje, është edhe një shkelje e re e Kushtetutës, prandaj nuk dëshiron të bëhet pjesë e një maskarade të tillë në dëm të sovranitetit dhe integritetit të shtetit. “Ne nuk do të marrim pjesë në asnjë komision që pretendon të miratojë marrëveshjen e gushtit të vitit të kaluar për Asociacionin e Komunave me shumicë serbe- Zajednicën”, është shprehur për gazetën “Kosova Sot” shefi i Grupit parlamentar të AAK-së, Pal Lekaj.

Aleanca nuk do të jetë pjesë e asnjë komisioni

Në këtë drejtim, ne jemi shumë të vendosur dhe nuk kemi se çfarë të humbim më shumë kohë. Për këtë qëndrim tonin është e njoftuar edhe Qeveria edhe opinioni publik i Kosovës – qytetarët, se AAK-ja nuk merr pjesë në asnjë komision për të vendosur diçka që është në dëm të interesit të shtetit të Kosovës, që dëmton sovranitetin dhe integritetin e Republikës së Kosovës, e që në këtë rast i jep ekskluzivitetin për të qeverisur qeveria e Beogradit me atë pjesë të territorit të shtetit të Kosovës”, është shprehur deputeti i Aleancës për Ardhmërinë e Kosovës.

Lekaj thotë se me vendimin- interpretimin e Gjykatës Kushtetuese, marrëveshja konsiderohet krejtësisht e anuluar dhe tani çfarëdo përpjekje për ringjalljen e saj do të ishte veprim akoma më i rëndë kundërkushtetues, madje i njëanshëm nga vetë zyrtarët e shtetit.

“Unë nuk besoj që ajo mund të bëhet, ju e dini që edhe Gjykata Kushtetuese e ka dhënë vendimin e saj të njohur, që është shkelur Kushtetuta, ashtu duhet të kuptohet, madje hiç më pak se në 23 nene dhe unë nuk di që mund të ketë asi trimash që mund të bëjnë një statut, i cili do të jetë në kundërshtim me interpretimin e Gjykatës Kushtetuese”, tha Lekaj për “Kosova Sot”

Ndonëse po mbushen gati 10 muaj nga votimi i Kuvendit të Kosovës për amendamentet kushtetuese, që hapën rrugën e krijimit të Gjykatës Speciale, e cila konsiderohet e themeluar nga gjysma e janarit të këtij viti, Bashkimi Evropian akoma nuk ka arritur që ta kompletojë me staf adekuat këtë institucion të drejtësisë, i cili pritet të merret me krimet e supozuara të luftës në Kosovë, bazuar në raportin e Dik Martit,shkruan gazeta Kosova Sot.

Zyrtarët kosovarë kanë deklaruar për “Kosova Sot” se për sa i takon përgjegjë- sisë së shtetit të Kosovës janë kryer të gjitha obligimet ligjore. “Kosova i ka përfunduar të gjitha obligimet e veta rreth krijimit të Dhomave të veçanta, tani është çështje e BE-së dhe Holandës për hapat e mëtutjeshëm”, tha zëvendësministri i jashtëm i Kosovës, Petrit Selimi, pa u lëshuar në detaje të tjera të këtyre përgatitjeve. Njohës të sundimit të ligjit theksojnë se nga vetë fakti që BE-ja ka hapur me vonesë një konkurs ndërkombëtar për kompletimin e stafit të punës së Gjykatës Speciale, gjasat janë që fillimi praktik i punës, arrestimet e para, të mos ndodhin para vjeshtës së këtij viti.

Disa aktakuza janë të gatshme

Avokati Tomë Gashi ka pohuar se pas hapjes së këtij konkursi procesi i aktivizimit të kësaj gjykate nuk do të mund të vonohet gjatë, por është e paparashikueshme koha se kur mund të fillojnë arrestimet e para.”Konkursi i BE-së për këtë gjykatë tashmë është publikuar dhe pritet emërimi formal i gjyqtarëve dhe prokurorëve, një pjesë e të cilëve tashmë janë intervistuar dhe mund të jenë gjyqtarë dhe prokurorë edhe të EULEXit”, tha avokati Gashi për ‘Kosova Sot’.

Ai ka pohuar se do të ishte një veprim i mirë që në këtë proces të drejtësisë ndërkombëtare, edhe ashtu të padrejtë, të mos përfshihen gjykatës dhe prokurorë nga vendet që nuk e kanë njohur Kosovën, për shkak të mundë- sisë së ndikimit politik edhe në ndarjen e drejtësisë. Gashi thotë se arrestimet që do t’i bëjë Gjykata ka gjasa që ta trazojnë edhe skenën politike në vend. “Skena politike do të trazohet shumë me fillimin e arrestimeve të para për Gjykatën Speciale, e që përafërsisht mund të ndodhë në tetor të këtij viti, por këtë më së miri e dinë vetëm prokurorët që i kanë veçse disa akuza të përgatitura për Gjykatën Speciale. Këtë sikur që dimë e ka thënë edhe prokurori i forcës speciale për hetimin, e që ka qenë Clint Viliamson”, tha avokati Gashi për “Kosova Sot”..