Një aksident ka ndodhur para pak çastesh tek vendi i ashtuquajtur “Rrethi i ri” në Prizren, raporton Indeksonline.

Sipas lexuesve të Indeksonline, një makinë e tipit Golf 4, është ndeshur me një shtyllë dhe ka dal në shiritin e kundërt.

Sipas tyre, nuk ka të lënduar nga ky aksident.

Deputeti i Lidhjes Demokratike të Kosovës dhe pjesëmarrësi në luftën e Koshares, Anton Quni ka thënë se Ministria e Mbrojtjes së Republikës së Kosovës është krijuar me dispozita Kushtetuese. Ai ka thënë për Indeksonline se Forcat e Armatosura të Kosovës kanë ekzistuar, sepse sipas tij, ka pasur një hierarki ushtarake.

“Ministria e Mbrojtjes e Republikës së Kosovës është krijuar me vendim te Qeverisë së Kosovës, sipas dispozitave kushtetuese të Republikës së Kosovës. MMRK ka ngritur kapacitetet ushtarake dhe ka ngarkuar njësitë operative me mision luftarak:

-mbrojtja e popullatës nga invadimi dhe terrori i forcave ushtarako-policore dhe paramilitare serbe;

-çlirimi i territorit të Kosovës nga po ato forca. Për këto arsye MMRK ka rekrutuar kuadrat ushtarake, ka ngritur infrastrukturën ushtarake, i ka siguruar fondet legale si dhe ka ushtruar komandimin dhe kontrollin mbi njësitë operative”, ka thënë Quni për Indeksonline.

Quni, që ishte ushtar i FARK-ut, ka thënë se personalisht është angazhuar nga ministri i mbrojtjes, dhe e konsideron si epror.

Sipas Qunit, çdo mohim i FARK-ut, është edhe mohim i Ushtrisë Çlirimtare të Kosovës.

“Unë personalisht jam ngarkuar me detyre nga ministri i mbrojtjes kolonel Ahmet Krasniqi dhe në zinxhirin komandues, ai ishte eprori im superior. Çdo mohim i rolit dhe peshës politike, ushtarake dhe historike të UÇK-së në kuadër të Forcave te Armatosura të Republikës së Kosovës është mohim i të vërtetës dhe nuk i shërben fare trajtimit korrekt të periudhës së viteve 1998 – 1999. Është e rëndësishme për vendin, për proceset që kanë ndodhur dhe po ndodhin që të thuhet e vërteta dhe të njihet kontributi i të gjithëve për të gjitha këto procese”, ka theksuar Quni.

Ditë më parë në media nënkryetari i Kuvendit dhe njëri nga udhëheqësit e UÇK-së, Xhavit Haliti, deklaroi se nuk ka pasur kurrë FARK dhe për këtë ka fakte.

Ministria e Mjedisit dhe Planifikimit Hapësinor, paralajmëron ndëshkime për të gjithë ata që ndezin goma, një dukuri kjo mjaft e shprehur në Ditën Ndërkombëtare të Punëtorëve – 1 Maj.

Ligji për mbrojtjen e ajrit ndalon rreptësisht djegien e gomave – me ligj dënohet çdo person që kryen një veprim të tillë, njofton Klan Kosova.

“Dënimi për të gjithë personat që djegin goma në hapësira publike, private dhe në natyrë është i përcaktuar edhe me anë të Udhëzimit Administrativ të për Gjoba Mandatore, konkretisht përmes nenit 16, në të cilin thuhet:

“Me 100 euro gjobë dënohet personi që djegë goma të automjeteve, ose mbeturina tjera prej gome, në hapësirat private, publike, në rrugë, ose natyrë. Djegë mbeturina të ndryshme prej letre në hapësirat publike, në rrugë, ose natyrë”, thuhet në njoftimin e ministrisë së Mjedisit.

Kjo pasi që, siç vlerësohet, ndezja e gomave në mjedis të hapur, liron dyoksinën dhe materie tjera të rrezikshme.

MMPH tërheq vërejtjen se dyoksina dhe oksidet e tjera që lirohen nga djegia e gomave dhe materieve tjera shkaktojnë probleme serioze shëndetësore, si dëmtimin e organeve të frymëmarrjes, kancerin e mushkërive, dëmton lëkurën duke shkaktuar edhe shumë probleme të tjera shëndetësore.

“Ndezja e zjarreve pa kontroll ka vënë në rrezik jetën dhe shëndetin e njeriut, pasurinë private dhe shoqërore, si dhe ka degraduar mjedisin tonë edhe ashtu në gjendje jo të mirë”.

Ministria njofton se për këtë çështje kanë angazhuar inspektorët, si dhe Policinë e Kosovës.