Policia e Kosovës njofton se një femër ka raportuar se është sulmuar fizikisht nga babai i saj, i cili sipas familjarëve ka probleme psikike, raporton PrizrenPress.
Viktima ka pësuar lëndime të lehta trupore.
I dyshuari është arrestuar dhe me urdhër të prokurorit është dërguar në mbajtje. /PrizrenPress.com/
Policia e Kosovës ka arrestuar një të dyshuar në Prizren, pasi që ka kanosur tre policë, raporton PrizrenPress.
Ngjarja ka ndodhur të martën në mëngjes ku sipas Policisë në këtë ditë i dyshuari kishte kanosur zyrtarët e Policisë.
Me urdhër të prokurorit i dyshuari është dërguar në mbajtje. /PrizrenPress.com/
Lëvizja Vetëvendosje ka njoftuar për arrestimin edhe të një aktivisti të saj.
Sipas njoftimit, mbrëmë, pas mesnate, në kufirin me Republikën e Shqipërisë është arrestuar aktivisti Lulzim Gjaka. Atij i janë caktuar 30 ditë paraburgim.
“Pushteti nuk po ndalet në përndjekjen e aktivistëve politikë. Mbrëmë, pas mesnate aktivisti Lulzim Gjaka është arrestuar në kufirin me Republikën e Shqipërisë. Atij i janë caktuar 30 ditë paraburgim. Mbajtjet e tilla të aktivistëve, konfirmojnë se ekzistenca e aktivizmit konsiderohet rrezik për ekzistencën e pushtetit”, thuhet në njoftimin e LVV-së.
“Përndjekja e aktivistëve, e cila po bëhet me urdhra politikë është e papranueshem për secilën shoqëri demokratike”.
“Tashmë, janë mbi 380 arrestime që prej nënshkrimit të marrëveshjeve të dëmshme në Bruksel dhe Vjenë. Për një shtet të drejtë, ndalimi i arrestimit të aktivistëve është hap urgjent të cilin duhet ta bëjë ky pushtet që po rrëshqet kah autoritarizmi.
“Nuk është normale që një qeveri e cila gjunjëzohet para Serbisë të vazhdojë përndjekjen e subjektit më të madh opozitar”.
“Nuk i përket normales që lideri i opozitës, Visar Ymeri arrestohet dje, për herë të tretë, dhe në pikë të natës arrestohet një qytetar, aktivist, vetëm për shkak të bindjeve të tij politike. Ne nuk mund t’i pranojmë këto taktika policore në angazhimin tonë politik”.
“Ne kërkojme ndalimin e arrestimeve të padrejta të aktivistëve. Ne kërkojmë lirimin e mënjehershëm të Lulzim Gjakës”. /PrizrenPress.com/
EC Ma Ndryshe ka publikuar Indeksin e Reformës së Transparencës Komunale, në kuadër të cilit janë pasqyruar rezultatet për 13 grupe indikatorësh relevantë që tregojnë nivelin e transparencës gjatë vitit 2015 në komunat e Prishtinës, Prizrenit, Ferizajit, Pejës, Gjilanit, Gjakovës dhe Mitrovicës.
Indeksi është lansuar gjatë konferencës, ku panelistët Ruairí O’Connell, ambasador i Mbretërisë së Bashkuar në Prishtinë, Mimoza Kusari-Lila, kryetare e Komunës së Gjakovës, Gazmend Muhaxheri, kryetar i Komunës së Pejës dhe Jeta Xharra nga BIRN-i, kanë prezantuar pikëpamjet e tyre rreth transparencës, por edhe kanë marrë pjesë në diskutime me pjesëmarrësit, që kanë qenë përfaqësues të pushtetit lokal nga komuna të ndryshme, aktivistë të shoqërisë civile, gazetarë, etj.
Në Indeksin e Reformës së Transparencës Komunale figuron se Komuna e Gjakovës ka notë pozitive në 8 nga 13 indikatorët, me dy nota negative dhe tre neutrale. Në anën e kundërt qëndron komuna e Prizrenit, e cila ka 11 vlerësime negative dhe 2 neutrale. Mitrovica ka 7 nota neutrale e 6 negative. Ferizaj ka 6 nota neutrale dhe 7 negative. Edhe Peja ka 6 nota neutrale dhe 7 negative. Gjilani ka 5 nota neutrale dhe 8 negative. Pos Gjakovës, vetëm edhe Prishtina ka nota pozitive. Prishtina ka 3 nota pozitive, 6 neutrale dhe 4 negative.
Grupet e indikatorëve që janë monitoruar dhe mbi të cilat është shkruar Indeksi janë: Kryetari, Drejtorët dhe Anëtarët e Kuvendit, Organizimi dhe funksionimi, Puna e organeve politikë-bërëse dhe vendim-marrëse, Luftimi i sjelljeve të pahijshme dhe keqpërdorimeve, Integrimi Evropian, Kontabiliteti dhe buxheti, Kontratat e prokurimit publik, furnizimit dhe granteve, Të punësuarit në administratën publike dhe organizatat/institucionet publike, Pasuria kapitale dhe jokapitale, Informimi dhe shërbimi i qytetarëve, Bashkëpunimi me shoqërinë civile, Planifikimi urban dhe Monitorimi i projekteve urbanistike.
Në kuadër të diskutimeve, ambasadori O’Connell ka theksuar se “ka nevojë për ndryshim të mendësisë së qeverisjes, pra të ketë qasje të drejtë të zyrtarëve dhe llogaridhënie para qytetarëve”.
“Mohimi i transparencës dhe llogaridhënies është fyerje e rëndë për qytetarët e një demokracie”, ka thënë O’Connell.
Kryetarja e Gjakovës, Mimoza Kusari – Lila, ka shtuar se ngritja e nivelit të transparencës dhe llogaridhënies ka qenë njëri prej synimeve kryesore të qeverisjes lokale në Gjakovë dhe gjatë dy viteve të qeverisjes ka qenë njëri prej prioriteteve. Sipas saj synim i komunës së Gjakovës vazhdon të mbetet përmirësimi i mëtejmë i nivelit të transparencës dhe llogaridhënies dhe raportet e tilla nga shoqëria civile janë një motivim shtesë për komunën e Gjakovës.
Kryetari i Komunës së Pejës, Gazmend Muhaxheri ka veçuar disa faktorë që ndikojnë në mos arritjen e standardeve të duhura të transparencës duke filluar nga kapacitetet e brendshme, por edhe rrethanat aktuale në vend.
Ndërkaq Jeta Xharra nga BIRN-i ka përkujtuar se ofrimi i dokumenteve dhe informatave nga zyrtarët pos që është obligim ligjor është edhe e drejtë e garantuar. /PrizrenPress.com/
E veshur me stilin e saj karakteristik kombinimin njëngjyrësh deri tek kapela, Mbretëresha nuk tregon moshën me kalimin e viteve.
Ajo ka shërbyer për 12 kryeministra, duke filluar me Churchill; ka qenë aty në rënien e perandorisë britanike; ka sfiduar tragjeditë e rënda të familjes së saj por edhe të kombit; dhe më 9 shtator të vitit të kaluar, Mbretëresha Elizabeth është bërë monarkja më jetëgjatë në Britani.
Ndërsa sot ajo feston 90-vjetorin. E veshur me stilin e saj karakteristik kombinimin njëngjyrësh deri tek kapela, Mbretëresha nuk tregon moshën me kalimin e viteve.
“Ajo është e shëndetshme, bën ushtrime fizike, ecën, merret me kuajt dhe nuk ka asnjë arsye që papritur të ndalet së bëri këtë aktivitet”, deklaroi Ingrid Seward, autori i “Fjalimit Mbretëror”.
Kori i “Royal Post”, ku Mbretëresha ishte e pranishme së bashku me bashkëshortin e saj, Duken e Edinburgut, e nderoi atë me një interpretim të përzemërt me këngën “Happy birthday” ku më pas mori edhe lule nga fëmijët e vegjël.
Ditëlindja e monarkes zyrtarisht festohet në muajin qershor për arsye ceremoniale, ku Buckingham Palace shndërrohet në një ambient të vërtetë festiv.
Douglas Hurd, ish-ministri i Jashtëm, e ka cilësuar Mbretëreshën Elizabeth si “gruaja e palëkundur”.
Këngëtarja e re shqiptare, Era Istrefi, nuk po i ndahet sukseseve. Pas dominimit në shumë top-lista ndërkombëtare, Era me këngën “Bon Bon” është kënga më e kërkuar aktualisht edhe në Izrael.
Sipas faqes së aplikacionit për këngë “Shazam”, “Bon bon” është kënga më e kërkuar në Izrael dhe është në mesin e këngëve më hit të vitit në botë.
Era së fundmi ka nënshkruar kontratë me kompaninë e njohur muzikore “Ultra Music”.
Qeveria kanadeze do të prezantojë vitin e ardhshëm projektligjin që do ta bënte legale shitjen e marijuanës, njoftoi Jane Philpott, ministër i Shëndetësisë i këtij vendi.
Philpott u zotua se “do të mbajë marijuanën larg duarve të fëmijëve dhe fitimin larg duarve të kriminelëve”.
Nëse projektligji do të miratohet, atëherë Kanadaja do të bëhet njëri nga vendet më të mëdha Perëndimore që do të lejojë përdorimin masiv të drogës.
Edhe kryeministri Justin Trudeau ka këmbëngulur në legalizimin e marijuanës gjatë fushatës së tij, ndërsa tani kërkon që nga fjalët të kalojë në vepra.
Megjithatë, ministri Philpott shtoi se ka ende shumë punë në finalizimin e projektligjit që pritet t’i propozohet Parlamentit në pranverën e vitit 2017 dhe deri atëherë do të mbahen shumë takime.
Për rastësi, njoftimi erdhi më datë 20 prill, ditën jozyrtare të hashashit. Aktualisht në Kanada, përdorimi i marijuanës për arsye shëndetësore është i lejuar.
Hillary Clinton, ish-First Lady e SHBA dhe aktualisht kandidate e për Shtëpinë e Bardhë, ka treguar 25 fakte mbi jetën e saj, në një intervistë me revistën US Weekly.
Më pëlqejnë mezet e lehta me speca djegës dhe vendos salsë djegëse në gjithçka.
Jam një njeri që i studioj deri në imtësi politikat, ndonëse ky është një sekret që e kam ruajtur keq. Kam takuar Martin Luther King Jr kur isha 14 vjeç. Ministri i Kishës sonë na mori për ta dëgjuar të fliste dhe unë arrita t’i shtrëngoj dorën.
Nuk arrij dot kurrë të këndoj një melodi. Mësuesja ime e korit më kërkonte që vetëm të lëvizja gojën. Dikur i këndoja time bije, Chelsea, kur ishte bebe, deri kur ajo tha: “No sing Mommy, no sing” (“Jo këngë, mami, jo këngë”). Miqtë e mi nuk e besojnë që kam kënduar në një nga emisionet e Saturday Night Live. Bill Clintoni më propozoi dy herë, përpara se të thoja po.
Unë isha Senatore e SHBA për Nju Jorkun kur ndodhi 11 shtatori, dhe ende ndiej detyrimin për të siguruar që, personat që shkuan të parët për të dhënë ndihmë, të marrin trajtimin mjekësor që meritojnë. Si Sekretare Shteti, kam shkuar në 112 vende dhe kam udhëtuar 956 733 milje. (Po, dikush i numëroi!) Babai im, Hugh Rodham, ishte biznesmen i vogël. Ai prodhonte copa për perde. Ne të gjithë e ndihmonim.
Mes ndalesave të fushatës dhe dokumentave informues që më sjellin, si dhe copëzave të lajmeve, më pëlqen të pushoj dhe të lexoj romanet e mi misteriozë.
Kur isha vajzë e re, i kam shkruar NASA-s që ta pyesja nëse mund të bëhesha astronaute. Ata më kthyen një letër, me shumë mirësjellje, ku më thoshin se nuk pranojnë vajza.
Çokollata është dobësia ime… ashtu si edhe peshqit e kuq.
Mamaja ime, Dorothy Rodham, ishte demokrate dhe babai im, Hugh Rodham, ishte republikan. Kështu që, në cdo palë zgjedhje, ata “eleminonin” votën e njëri-tjetrit.
Unë jam, dhe do të jem gjithmonë, një tifoze e Beatles. Po kështu, më pëlqen vërtetë shumë Adele.
Një prej gjërave që më pëlqejnë më shumë nga fushata janë historitë personale që njerëzit ndajnë me mua. Disa prej tyre ma thyejnë zemrën. Disa janë frymëzuese. Unë mësoj nga të gjitha. Eshtë vërtetë e rëndësishme për mua, që të mësoj në vetë të parë atë që ndodh në jetët e njerëzve.
Kur jam në Nju Jork, udhëtoj me një furgon të madh. Ka sedilje të mëdha dhe të rehatshme dhe një pajisje reale për energji elektrike. Fushatën e nisa duke shkuar me të deri në Ajoua.
Puna ime e parë jashtë shkolle ishte me Fondin e Mbrojtjes së Fëmijëve. Nuk doja të futesha në një kompani të madhe. Doja të isha avokate për fëmijët e varfër. Të punosh për t’u dhënë fëmijëve një shans më të mirë për të ardhmen, ky ka qenë fokusi im që atëherë.
Billi dhe unë pëlqejmë të dalim në shëtitje të gjata me dy qentë tanë, Maisie dhe Tally. Ishim në një nga këto shëtitje, kur presidenti Obama më telefonoi dhe më kërkoi të bëhem Sekretare Shteti.
Pyetja që më bënin më shpesh kur isha jashtë vendit ishte: “Si mund të punosh për njeriun që të mundi?” Përse e bëra? Sepse kur presidenti yt të kërkon të shërbesh, thuaj po. Nuk mund të isha më e kënaqur.
Mamaja ime më thoshte gjithmonë: “Të gjithë rrëzohen. Ajo që ka rëndësi është që të ngrihesh dhe të vazhdosh të ecësh”. Këshilla më e mirë që kam marrë ndonjëherë.
Ja një gjë që nuk do të habisë askënd: Prej vitesh i kam lyer flokët.
Dikur kisha një punë, ku prisja salmon në një fabrikë konservimi në Alaskë. Ishte po aq e bukur sa dhe tingëllon.
Një prej gjërave që kam mësuar në fushatë është se sa serioz është bërë problemi i abuzimit me substancat në vendin tonë. Jam e vendosur të merrem. Unë bëj joga. Jo aq sa duhet.
Qëndroj në kontakt me shumë njerëz nga të gjithë pjesët e jetës sime, dhe takohem sa më shpesh që mundem. Kohët e fundit, teksa isha në Chicago, takova Betsy Ebeling, shoqja ime më e ngushtë kur u rritëm në Park Ridge, Illinois.
Unë jam mbesa e një punëtori mulliri. Dhe gjyshja e Charlotte, (18 muajshe), që është mbesa më e përsosur në botë.
Shefi i Grupit Parlamentar të Partisë Demokratike të Kosovës (PDK), Adem Grabovci, ka thënë për “Zërin” se ndryshimet më të mëdha në vend kanë ndodhur pas ardhjes së kësaj partie në pushtet.
Sipas tij, deri më tani është vendosur një themel i fuqishëm për zhvillim ekonomik dhe për hapje të vendeve të reja të punës. Kurse duke i komentuar kërkesat e opozitës për zgjedhje të parakohshme, Grabovci ka thënë se para vitit 2018 nuk do të ketë zgjedhje.
“Besojmë në punën tonë, në angazhimin tonë dhe në rezultatet konkrete që kanë dalë prej kohës që PDK-ja është në pushtet. Me këtë nuk pretendoj të them se kemi bërë mrekulli, por megjithatë në Kosovë pas ardhjes së Partisë Demokratike në pushtet ka ndryshime më tepër se çdoherë më parë. Besojmë se është vendosur një themel shumë i fuqishëm për të vazhduar me suksese të reja në zhvillimin ekonomik, për hapjen e vendeve të reja të punës”, është shprehur Grabovci.
Ndërsa duke folur për mundësinë e shkuarjes në zgjedhje të parakohshme parlamentare, Grabovci ka thënë se PDK-ja nuk i frikësohet zgjedhjeve, megjithatë, sipas tij, nuk mund të ketë zgjedhje të reja para vitit 2018, pasi, sipas tij, zgjedhjet nuk mund të mbahen sa herë që kërkojnë subjektet opozitare.
“Ne nuk i jemi frikësuar dhe nuk i frikësohemi daljes para qytetarëve, jemi të gatshëm në çdo kohë që të komunikojmë me qytetarët tanë, t’i dëgjojmë shqetësimet që i kanë ata. Ne jemi deklaruar prej kohësh se nuk mund të ketë zgjedhje para vitit 2018 sepse nuk është interes i qytetarëve, i shtetit të Kosovës dhe i institucioneve të vendit. Zgjedhjet nuk mund të mbahen kur dikujt i teket. Është e sigurt se edhe po të mbaheshin zgjedhjet, opozita menjëherë do të kërkonte zgjedhje të tjera”, ka shtuar Grabovci, duke thënë se kjo parti gjithmonë vendimet i merr në bazë të interesave të qytetarëve dhe të shtetit. /Zëri/
Lideri i Aleancës për Ardhmërinë e Kosovës (AAK), Ramush Haradinaj, ka mohuar se koalicioni AAK – Nisma ka dëmtuar kauzën opozitare në vend.
Në një intervistë për “Epokën e re” Haradinaj ka thënë se ky koalicion parazgjedhor ka fuqizuar opozitarizmin në vend.
Ai ka thënë se nuk po mund t’i kuptojë pse përfaqësuesit e Lëvizjes Vetëvendosje! japin deklarime se AAK-ja, duke synuar bajraktarizmin, dëmtoi opozitën e bashkuar.
Haradinaj ka bërë me dije se bashkëpunimi në mes të AAK-së dhe Nismës ka për qëllim shtimin e presionit ndaj pushtetit për t’ia kthyer mandatin qytetarit.
“Ky koalicion është një vazhdim i një bashkëpunimi ekzistues, i cili është produkt i një rrugëtimi të deritashëm dhe i domosdoshmërisë si të jemi të bashkuar. Pra, nuk mendoj se ky bashkëpunim është ndonjë dëmtim, por ky është një hap përpara për ta fuqizuar opozitën në Kosovë”, ka thënë Haradinaj.
Ai ka treguar se koalicioni me Nismën ka për synim ta vetëdijesojë secilin qytetar për gjendjen e rëndë në vend.
“Ne jemi në rrugëtim e sipër për t’i rritur kundërshtimin dhe presionin për t’ia kthyer mandatin qytetarit. Pra, për ta vetëdijesuar secilin qytetar për gjendjen në vend. Ky është misioni ynë si parti politike opozitare dhe këtë po bëjmë”, është shprehur Haradinaj. Ai është shprehur i gatshëm për të bashkëpunuar edhe me Lëvizjen Vetëvendosje!, por mbi baza të partneritetit e jo në forma të llojit të shkrirjes së partisë.
Haradinaj ka pranuar se me këtë subjekt politik kanë dallime substanciale sa i përket ndërtimit të një qeverie në të ardhmen.
“Ne e ruajmë një konsideratë për angazhimin e pakompromis edhe të Vetëvendosje!-s dhe të Nismës, por edhe të shoqërisë civile për t’i kundërshtuar marrëveshjet e rrezikshme, për ta kundërshtuar regjimin Mustafa – Thaçi dhe për t’ia kthyer mandatin qytetarit. Pra, ne mbesim në këtë partneritet. Sa i përket vizionit se si ta ndërtojmë qeverisjen në të ardhmen kemi dallime. Ato dallime janë substanciale dhe mbetet për t’u diskutuar. Ne jemi të gatshëm për t’i ridiskutuar ato dallime”, ka thënë Haradinaj.
Ai ka treguar se më nuk është kërkesë e tij ta marrë postin e kryeministrit.
Sipas liderit të AAK-së, koalicioni me Nismën është një bosht fitues, i cili synon që Qeverinë e ardhshme ta bëjë pa njërën nga partitë në pushtet.
“E kuptoj pyetjen tuaj, por ju po e shihni se ne po shkojmë për t’i fituar zgjedhjet, pra për ta ndërtuar Qeverinë pa njërën nga partitë në pushtet. Ne vërtet po shkojmë për një opsion fitues, pra nuk po shkojmë për një fitore të pjesshme, por për një fitore të plotë në zgjedhjet që vijnë”, ka thënë Haradinaj. /Epoka e Re/