Sot bëhen 17 vjet nga rënia e 9 dëshmorëve dhe 34 martirëve në fshatin Hoçë e Vogël të komunës së Rahovecit.
Me këtë rast këshilli i fshatit organizon tubim përkujtimor, i cili do të mbahet në ora 11:00, pranë përmendores së dëshmorëve në qendër të fshatit Hoçë e Vogël. /PrizrenPress.com/
Dalja e hapur në skenën politike e disa mospajtimeve të fundit brenda bllokut opozitar LAN, sa i përket mundësisë së listës së përbashkët zgjedhore me shoqërinë civile dhe vazhdimit të mënyrës së kundërshtimit të mëtutjeshëm të Qeverisë së Kosovës, deri në detyrimin e saj për të pranuar shpalljen e zgjedhjeve të reja, po interpretohet nga analistët politikë si fillimi i përçarjes serioze pas 7 muaj të betejës së përbashkët me një kauzë unike. Kjo plasaritje në opozitë po cilësohet si një tregues, që e vulos konstatimin se në Kosovë pothuajse të gjitha partitë politike janë të njëjta, pra nuk dallojnë, sepse të gjitha janë të uritura për pushtet dhe për shkak të pushtetit janë në gjendje të sakrifikojnë asgjë, por vetëm interesat e shtetit dhe qytetareve që i kanë zgjedhur.
Me këto zhvillime analistët konstatojnë se politikanët kosovarë, qoftë në pozitë apo opozitë, po dalin pa moral politik, sepse kur i kujtojmë vetëm sharjet që ia kanë bërë njëri-tjetrit gjatë fushatave parazgjedhore, e shohim qartë se nuk kanë pasur kurrë për synim interesin e qytetarit, por e kanë pasur për qëllim vetëm pushtetin, sepse kur vjen interesi kyç për pushtet, ata nuk e kanë fare problem të bashkohen për të zhvatur për interesat e tyre klienteliste. E këtu në këtë fushëbetejë janë të njëjtë, të gjitha pa dallim, qoftë partitë në pushtet apo edhe ato të opozitës.
Kosova, si pronë e politikanëve dhe oligarkëve
Politologu Faik Krasniqi i ka thënë gazetës se kjo mënyrë e funksionimit joserioz të subjekteve politike të Kosovës, është një mundje që nuk po mund të shërohet tash e 17 vjet, dhe kjo gjithsesi shkon në dëm të interesit të qytetarit e në përfitim të klientelave politike. Mirëpo, ai konsideron se tash është momenti kyç që kjo praktikë të ndërpritet.
“Kosova prej pasluftës është bërë pronë e politikanëve dhe bizneseve oligarkike, të cilët kanë kapur çdo pore të shtetit. Dhe, me të drejtë shtrohet pyetja se a është bërë luftë për një shtet për ta kapur nga pushtetarët, apo për një shtet të barabartë për të gjithë qytetarët, që askush të mos jetë mbi ligjin. Por, deri më tash kjo klasë politike na dëshmoi që lufta e tyre ka qenë për pushtet dhe para dhe shkatërrimin e shtetit. Prandaj, pavarësisht mospajtimeve mes partive opozitare, opozita duhet të jetë më e bashkuar se kurrë dhe nuk guxon të përçahet, sepse përçarja shkatërron e kauzën e saj dhe njëkohësisht i mundëson kësaj Qeverie kriminale dhe mafioze që sa më gjatë të ngelet në pushtet”, tha Faik Krasniqi për “Kosova Sot”.
Ai ka pohuar se tani është momenti kritik, kur opozita duhet të jetë e bashkuar dhe të vendosë vija të kuqe bashkëpunimi vetëm për partitë, që janë në pushtet dhe janë të lidhura ngushtë me krimin dhe korrupsionin.
“Nëse partitë opozitare e kanë seriozisht qeverisjen në mënyrë të dinjitetshme, shkapjen e shtetit nga mafio-politika dhe largimin nga pushteti të kësaj Qeverie kriminale, atëherë duhet të jenë më të bashkuar se kurrë, duke e zgjeruar kauzën e saj me gjëra që po e shkatërrojnë këtë popull, por njëkohësisht edhe zgjerimin e saj me personalitete të respektuara në opinion, të cilët në vazhdimësi kanë qenë kundër këtyre pushtetarëve mafiozë”. /Kosova Sot/
Amnesty International ka akuzuar Turqinë se po kthen mbrapsht me forcë me mijëra refugjatë sirianë në zonat e luftës.
Nuk ka shumë që Ankaraja vulosi marrëveshjen me BE-në për të frenuar fluksin e emigrantëve drejt Europës, pakt ky që përkundrejt lëshimeve të mëdha të bëra turqve diktonte sistemin e emigrantëve atje.
Por, që prej mesit të janarit, thotë organizata ndërkombëtare e të drejtave të njeriut, mijëra sirianë janë dërguar në vendlindjen e tyre të shkatërruar nga konflikti i brendshëm 5-vjeçar, çka evidenton sipas saj “të metat e tmerrshme” të marrëveshjes BE-Turqi. Kjo e fundit e detyron Ankaranë të marrë mbrapsht të gjithë emigrantët dhe refugjatët e nisur ilegalisht drejt Greqisë në këmbim të një ndihme të bollshme monetare, udhëtimit pa viza për turqit dhe përshpejtimit të bisedimeve të anëtarësimit në bllokun europian.
Vetëm se marrëveshja në thelb mbështetet tek të konsideruarit e Turqisë një vend i sigurtë për azil, çka sipas Amnesty-së është e qartë se nuk qëndron. Grupi me seli në Londër jep dhe shifra e këmbëngul se që prej mesit të janarit, në shpërfillje të hapur të ligjit ndërkombëtar, nga Turqia janë dëbuar me forcë rreth 100 refugjatë sirianë në ditë. Shumica e të deportuarve në Siri duket të jenë refugjatë të paregjistruar, por Amnesty ka të dhëna se makineria e kthimit të detyrueshëm nuk ka përjashtuar as disa sirianë me dokumente të rregullta.
Në përpjekjen e dëshpëruar për të mbyllur kufijtë e bllokut, liderët e BE-së kanë injoruar me vetëdije faktin e thjeshtë se Turqia nuk është një vend i sigurtë për refugjatët sirianë, thote drejtori i Amnesty-së për Europën dhe Azine qendrorem John Dalhuisen, dhe çdo ditë e më shumë po bëhet edhe më pak e sigurtë, shton ai.
– See more at: http://politiko.net/akuza-turqise/#sthash.AiPBicxo.dpuf
Persona të panjohur kanë shtënë me armë në Suharekë. Policia e Kosovës njofton se rasti është lajmëruar nga një pronar i marketit.
“Viktima ka raportuar se afër një marketi ka pasur të shtëna me armë zjarri nga një veturë, të cilën nuk ka mundur ta identifikojë”.
“Njësiti policor ka dalë në vendin e ngjarjes dhe ka gjetur tri gëzhoja të cal. 7.62mm”.
“ Nuk raportohet për të lënduar”.
“ Rasti është duke u hetuar”./PrizrenPress.com/
Është caktuar masa e arrestit shtëpiak për dy persona nga Prizreni për marrje me drogë.
“Departamenti për Krime të Rënda i Gjykatës Themelore të Prizrenit vendosi që ndaj të pandehurve me inicialet B.M. dhe L.K. që të dy nga Prizreni, secili veç e veç për veprën penale blerja, posedimi, shpërndarja dhe shitja e narkotikëve, substancave psikotrope dhe analoge nga neni 273 par.1 të KP-së, duke vendosur sipas kërkesës së Prokurorisë Themelore në Prizren iu caktohet masa e arrestit shtëpiak”, thuhet në njoftimin e Gjykatës Themelore të Prizrenit.
Ndërsa të pandehurit L.K i është caktuar edhe masa e paraqitjes në stacion policor.
Masa e arrestit shtëpiak ndaj të pandehurit B.M. do të llogaritet në kohëzgjatje prej /tridhjetë ditëve prej datës 30 mars 2016 ora 13:30 dhe do të zgjasë deri me datën 29 prill 2016.
Masa e paraqitjes në stacion policor ndaj të pandehurit L.K. do të llogaritet në kohëzgjatje prej tridhjetë ditëve prej datës 30 mars 2016 prej orës 16:12 dhe do të zgjasë deri më 29 prill 2016.
“Të pandehurit dyshohen për shkelje të Kodit Penal , se gjatë kontrollit të policisë në shtëpitë e tyre me datën 30 mars 2016 në Prizren janë gjetur substancë të dyshuar për narkotik të llojit marihuan”, thuhet në komunikatë.
Eqrem Çabej
Poezia e Lasgush Poradecit ka shumë vjet që tingëllon në veshin e Shqiptarit; po e ngadalshme e si nga larg, si harpa e Eolit: vetëm në kohët e fundit, me rastin e sëmundjes së tij të rëndë, vetëdija kombëtare u zgjua, dhe fletoret janë plot me artikuj për të e për ndihmat materiale që i mblidhen.
Po sa di vetë gjer tani kurrkush nuk është marrë estetikërisht me poezinë e Lasgush Poradecit.
ga shqiptarët që kam pyetur më të shumëve u pëlqejnë do vjersha idilike si “Kroi i Poradecit”, kurse shumë të paktë i shijojnë thellësitë moderne të tija; një shenjë e cektësisë së shijes shqiptare të sotme.
Duke hedhur një vështrim mbi literaturën e Shqipërisë së re, do të shohim së pari se në gjithë rrjedhjen e jetës së saj, të gjithë përfaqësuesit e saj, i përshkon një frymë e lartë etike (morale), një shenjë kjo mjaft karakteristike. Kjo frymë kapërcen në shumë raste në zonat e religjionit.
Së dyti, ajo ndahet natyrisht në dy perioda: e para përmbledh ata vjershëtorë, në jetën dhe veprën e të cilëve midis të tjerave një ide kryesore është flaka e madhe që i ndez për lirimin e Atdheut: flasim për De Radën dhe Naim Frashërin. Doemos ideja e tyre merr forma të ndryshme në të dy: e mbajtur te De Rada, ati i vjershës shqiptare, në format e ngadalshme e madhështore të klasicizmit, te Naimi më e djegur, shfaqet më direkte. Po në thelb ideja është gjith’ ajo. Dhe religjioziteti i tyre bie dendur në rigatën e misticizmit, misticizëm katolik te De Rada, e te Naimi misticizëm oriental.
Një vend të veçantë midis periodës së parë dhe të dytë mban Fishta: te ky mbretëron jo vetëm ideja e çlirimit, po edhe fjala burrnore profetike e ruajtjes së lirisë së fituar, vëllazërimit të Shqiptarëvet të sotmë. Duke filluar, pra, idenë e lirisë nëpër heroizmat lokale, Fishta arriti të përqafojë atë që quhet ideja shqiptare. Edhe vepra e Prendushit, me ndryshimet e veta, më duket se i kushtohet po këtij misioni.
Periudha e dytë është ajo në të cilën ideja kombëtare i lë udhën idesë njerëzore: Atdheu ishte duke u liruar, ëndrra e përvëluar e shkrimtarëve të parë ishte duke u bërë realitet. Kështu, syri i poetit u hap për horizonte më të gjera, vegime më të thella. Po të marrim në dorë veprat e Asdrenit, do të shohim të shfaqur atje fillimet e kësaj periode të dytë, e cila mund të quhet perioda moderne e poezisë shqiptare, dhe gjen vazhdimin e saj në vjershat e Lasgush Poradecit. Shenjë modernizmi e Asdrenit është dhe fakti se, i pakënaqur me pasurinë e fjalëve të gjertanishme, për të endur ndjenjat e vegimet e tija në gjithë stërcilësinë e tyre, ky fillon dhe pasuron thesarin e gjuhës me xhevahire të çmueshme, fjalë e mënyra foljeje të ra, delikate e stërmagjike. Po, i ikur që prej djalërisë prej Atdheut, e duke mos mundur nga ana tjetër të ngrihej në një ide universale, vepra e tij nuk mundi të dalë e plotë dhe duket të vërtetojë fjalën e gjermanit Theodor Storm: Asnjë poet i math pa Atdhe (Kein grosser Dichter ohne Vaterland).
II.
Lasgush Poradeci na hap portën e një jetë të re në poezinë shqiptare; një frisson neuf, siç pat thënë Victor Hugoi për vjershat e Baudelaireit, lind e rritet në lëmën e këngës shqiptare, një stil i ri, të cilin do ta kërkosh më kot ndër poetët e tjerë shqiptarë, po më kot dhe ndër shkrimtarët e huaj nga shkaku i origjinalitetit që e shquan këtë poet djalosh. Këtu ndjenja e mendime që nuk kish guxuar e s’kish arritur kurrkush ndër shqiptarët e pendës t’i shfaqte, këtu një stil i munduar, i cili ndryshon nga shkrimi i një Naimi a Fishte si, bie fjala, një pjesë beethoveniane nga një mozartiane. Ky, pra, është stili modern, stil’i Lasgush Poradecit.
Ç’e ndryshon nga të parët, është thellësia… Ay është vjershëtori më i thellë që ka shkruar në shqipet: në qoftë se kjo nuk është vënë ré gjer tani, shkaku është se më të shumët nuk e kuptojnë poezin’ e tij, e cila me fjalë e mënyra foljesh fare të thjeshta, e shumë popullore, arrin të koncentrohet aq sa mundet të nxjerrë në dritë mendimet me të thella, ndjenjat më labirintike, idetë më të larta. Dhe po të këndohet Lasgushi me dashuri, do të vërtetohet thellësia e tij e pashoqe, në mos sot, nga brezat që do të vijnë.
Poezia moderne n’Europë: Në Gjermani është çudi se ka qenë një shkrimtar i lindur që më 1770, Hölderin, i cili në jetën e tij letrare fort të shkurtër ka nxjerrë harmonira që u afrohen këtyre të sotmeve. Në kohët e fundit Rilke, Stefan George e disa të tjerë janë përfaqësuesit e vjershës moderne gjermane. Në Francë filloi fryma e re me disa vjersha të V. Hugoit, e lulëzoi me Baudelaire (Fleurs du mal), Verlaine, Mallarmé, Rimbaud, Valéry etj. Në Itali, D’Annunzio e Pascoli e rritën pemën e re të vjershës moderne të mbjellë prej Carduccit. Në Rusi, prozatorët e së cilës kanë ndikuar të gjithë Europën, nga vjershëtorët, ai që mori më famë në kohët e fundit është djaloshi i vdekur, Sergej Jessenin. – Ja, pra, poetët që janë produkti i kohës moderne, bir i së cilës është dhe Lasgush Poradeci.
Një tjetër send karakteristik për të: ky nuk është poet lirik në kuptimin më të vërtetë të fjalës: nuk do të gjesh t’ëmbla e të buta melodi; më shpesh vjershat e tija janë drama dhe shumë prej syresh tragjedira të vogla: shquan prologun, aktin e parë të dramës, kulmin e dramës, pastaj si vala e detit e “Këngës pleqërishte”, bie, bie, bie, pasi pat luftuar shpirti i munduar, i munduar më kot…
Pasi pat luftuar më kot për të gjetur lumtërinë jashtë kësaj bote, për t’iu avitur idealit të paarritshim.
Po, mor mik, lëre këtë botë! Në qoftë se nuk vret veten, hidhu në ideal e mbushe shpirtin plotë me të! Një fuqi elementare mundet të krijojë një botë… Po, ah, janë të gjitha përralla! Largoju më mirë dhe ruaje jetën si murg, i vdekur i pakallur. Të pakën do ndjesh ahere “Ç’ëndërim krijovi truri”.
Më çdo varg prej pikash lot
Kur dridhesh nga hidhërimi dhe jeta t’është natë, mos u ngroh në mishin e gruas!… Përpara syrit të shpirtit tënd t’avitet forma ideale: “Me flokë përmbi supe.”
Me roba gjer për dhé
Këtë, të patruptën, pushtojë “me një magji të re”. Ja qëndrimi i Lasgush Poradecit kundrejt dashurisë, ku duken aq zotësia ashtu dhe vetijat e një vjershëtori.
Disa nga vjershat e tija nuk kuptohen, ose me shumë zor: Kush e njeh Lasgush Poradecin për s’afërmi di se ai është një adhuronjës entuziast i kulturës latine, i kjartësisë latine, një armik i obskurantizmës gjermane. Një paralelë: Nietzsches, armikut më të rreptë të “besties blonde” të muzikës së Wagner-it, i pëlqente muzika latine e Bizetsë, poezia latine e Horacit, mendimet latine e stili latin i Montaigneit. Po të pakë të mëdhenj kanë qenë aqe të munduar nga demoni i mendimeve kaotike sikur Nietzscheja. Spiegimin na e jep një dialog i Platonit: “Njeriu dëshiron atë që nuk ka vetë”. Edhe Lasgush Poradeci është larg nga të qenët një njeri “latin”.
Po moskuptimi i lehtë, të thomi errësira e disa vjershave të tija, nuk është e metë, përkundrazi një element i gjithë shkrimeve të thellë në botë, që prej poemave indiane e, nëpër Kuranin, gjer më sot. Fundi i fundit çdo thellësi ësht’ e errët. Dhe faji s’është aq i gjeniut sa i publikut mendjeshkurtër. Dante, tek i cili gjinden disa verse jo aq të kjartë, ka thënë: O voi che avete gl’intelletti sani, Mirate la dottrina che s’asconde Sotto il velame delli versi strani.
Po sikundër ndër komponistët e një stili të rëndë, ziplot, nganjëherë ndihen tingëllimet e këndshme të një scherzo-je, ashtu dhe nëpër poezitë e këtij, të gjera e plot gremina, që janë tableau-të e një fati, shfaqet dikur (sa rrallë!) një nënqeshje sublime në trioletin e lehtë si një grumbull rrezesh dielli të mëngjesit në një odë të zezë:
Këto kopshte ku fryn era
Muar ngjyrën e floririt.
Se ç’i shkel baluke-prera
Këto kopshte ku fryn era!
Kush nuk mundet nga magjia e kësaj gjuhe? Djalëri Shqiptare, këndo Lasgush Poradecin, e pastaj vdis!
Këto vërejtje le t’i shërbejnë kuptimit të poezisë së Lasgush Poradecit, të këtij djaloshi, të cilin një fat i mirë duket sikur ia ka falur Shqipërisë, që të bëhet ai shkrimtar, të cilin Shqipëria do t’ia falë njëherë botës. Po si do të zhvillohen punët, kush mund ta dijë? Lasgush Poradeci ka mjaft kohë që nuk shkruan. Perioda e djalërisë i kaloi, tash do të vinte krijimi i burrërisë. Po një sëmundje e rëndë dhe e pamëshirëshme lufton që ta shtypë… Kjo kaptinë e sëmundjes së tij është tepër tragjike, aq sa nuk mund të zgjatemi më tej: a është sëmundja shkaku i vuajtjeve të tija apo vuajtjet e tija të para qenë shkaqet e sëmundjes, këto janë probleme tepër të koklavitura. Fakti është se literatura shqiptare do fitonte shumë, ose do të humbiste shumë me Lasgush Poradecin. Ne dëshërojmë të parën. Po Fati e ka në dorë!
Edhe shqiptarët. Duhen sakrifica të mbëdha që ai të mund të mbarojë misionin e vet…
E pastaj le të ronitem, le të qaj, e le të vdes.
Graz, shkurt 1929
* Botuar së pari në “Gazeta e re”, 22 shkurt 1929.
Veprimtari i LDK-së në Prizren Ridvan Hoxha, ka alarmuar se kjo degë po shkon drejt tkurrjes.
Ai i ka bërë thirrje lidershqipit të LDK-së që të mos lejojë tkurrjen e këtij subjekti politik.
“Përvjetori i LDK-së në Prizren mbahet në Restaurant “ Kabashi” në Prizren me kapacitete maksimale 100-120 vende”, shkruan Hoxha në Facebook,transmeton PrizrenPress.
“Sipas informatës zyrtare të Forumit Rinor “100 të rinj do të antarsohen”, ndërkaq që lokacioni nuk i shkon as partive minore që nuk mund të sigurojnë vende deputetesh në Kuvendin Komunal e lërë më për të arritur 5% për zgjedhjet Parlamentare….!”.
Lidhja Demokratike e Kosovës(LDK) në Prizren, nesër shënon 26 vjetorin e themelimit. Në këtë përvjetor është paralajmëruar edhe aderime të reja.
“Nuk mbaj mend që pas 1999, e këndej që tubimet e përvjetorët e Degës së LDK-së të janë mbajtur në lokale me kapacitete të tilla të vogla”.
“ E them këtë duke marre parasysh faktin e infrastrukturës organizative të LDK-së në Prizren”
“Dega e LDK-së në Prizren ka pas 43 nëndegë nga minimum 10 anëtarë të kryesive që bëjnë 430 zyrtare, shto edhe e 101 anëtarë të Kuvendit të LDK-së , Dega në Prizren, pastaj Forumi i Rinisë, Forumi Gruas, aktivist e veprimtar-veteranë e mysafir tjerë simpatizantë të LDK-se, etj. Prandaj lindë pyetja logjik, kah po shkon Lidhja Demokratike e Kosovës në Prizren?”.
“Sigurisht se në qofte se vazhdon Dega e LDK-së, të menaxhohet nga individë të tillë , atëherë i bie që përvjetorin e ardhshëm do ta festojmë në një klasë të shkollës fillore apo të mesme”
“Si një veprimtar i Lidhjes Demokratike të Kosovës, i bëj thirrje lidershqipit të LDK-së, që të mos lejohet që ky sindrom i tkurrjes të përhapet edhe nëpër degë tjera të LDK-së, gjithandej Kosovës”.
“A po humbet kontakti me elektoratin me qellim apo pa qëllim?! “/PrizrenPress.com/
Dorian Koçi
I lindur në Shqipëri dhe i arsimuar në shkollë greke në vendlindje (në Shqipërinë e Jugut në atë kohë dhe në krahinën e Zagorisë, prej nga është autori, prej kohësh sipas së drejtës që gëzonte popullsia rum-milet kishte shkolla greke), pastaj në kolegjin francez të Kajros për të vazhduar më tej në Zvicër, Çajupi është suigeneris një rast i elitës shqiptare, arketip i shumë shtresëzimeve kulturore, të cilat të harmonizuara brenda vetes, shpeshherë nxirrnin në pah kozmopolitizmin e tyre, por që në të shumtën e rasteve iu nënshtrua nacionalizmit si një forcë lëvizëse tërheqëse e kohës.
Ai e fillon krijimtarinë e vet në frëngjisht, në tregimin “Mysafirë në Çajup”, në një gjuhë që e kish mësuar gjatë edukimit të vazhdueshëm të tij. Pavarësisht se tregimi u botua në frëngjisht, tematika e tij ishte e pastër shqiptare, madje ballkanike, pasi tema e hajdutërisë ishte një nga temat që lëvrohej më tepër në atë kohë, jo vetëm nga shkrimtarë lokalë, por edhe nga shkrimtarë ekzotikë, që shkruanin për Ballkanin. Stili i tij në frëngjisht është i përsosur dhe njohjen e kësaj gjuhe ai do ta dëshmojë më vonë dhe me përshtatjen që do u bëjë më vonë fabulave të La Fontenit në shqip. Në vitin 1902, ai boton përmbledhjen e parë poetike “Baba Tomorri”. Botimi i kësaj vepre poetike ishte një risi për publikun e paktë shqiptar, pasi së bashku me motivet romantike, fillojnë dhe marrin jetë edhe tonet realiste. Poeti i Baba Tomorrit e zbriti poezinë nga qiejt romantikë në tokë, e pasuroi frymëzimin historik të letërsisë së kohës me frymën sociale, me patosin qytetar e kritik. (Çajupi Z. A. [1997. Baba Tomorri] Parathënie nga Bulo J., Tiranë: Dituria, faqe 6) Shkrimtari dhe kritiku Mitrush Kuteli ka shkruar se Andon Zako Çajupi është Frederik Mistrali i Shqipërisë, poeti i thjeshtë dhe rustik i jetës sonë popullore. Disa nga poezitë e Çajupit përbëjnë gurë të çmuar, të cilët do të zënë një vend të ndritur në antologjinë e poetëve shqiptarë.
Pse duhet ta lexojmë Çajupin?
Nuk ka dyshim se ekziston një lidhje shumë e ngushtë midis lëvrimit të një gjuhe dhe letërsisë së kultivuar. Në këtë drejtim, letërsia shqipe, e bazuar mbi një gjuhë që ende nuk kish standardizuar alfabetin e vet, me një trashëgimi të paktë me autorë dhe tekste, nuk mund të arrinte kulme të barasvlefshme me ato të letërsive të zhvilluara. Kjo është arsyeja që kur i lexojmë sot poetët dhe shkrimtarët e Rilindjes Kombëtare, vargjet e tyre na tingëllojnë herë-herë fëminore dhe për fat të keq i anashkalojmë apo dhe nuk i rekomandojmë për të lexuar. Sigurisht që kjo mospërfillje vjen ngaqë nuk kemi dhe shkrimtarë, kritikë autoritarë që të rrëfejnë udhëtimet e tyre shpirtërore në krijimtarinë e shkrimtarëve më të hershëm dhe rrënjët e letërsisë shqipe. Në hierarkinë e letrave shqipe kemi vetëm një rast, kur Kadareja shkroi esenë e gjatë “Ardhja e Migjenit në letërsinë shqipe”, e cila mund të quhet një udhëtim shpirtëror në hapësirë dhe kohë në monopatet e letërsisë shqipe.
Gjithsesi, pavarësisht kësaj situate, në kritikën shqiptare besoj se Çajupi, si një nga përfaqësuesit e një alteregoje të brendshme të lexuesve të vet, ku gjen jo vetëm motivet romantike, pastorale e lirike, por edhe frymën kritike, sarkazmën, humorin shpotitës ndaj veseve të shoqërisë, meriton një vëmendje të veçantë për t’u lexuar dhe shijuar si tekst, si autor dhe si përfaqësues i një epoke. Në duelin midis vetëdijes romantike dhe vetëdijes kritike te Çajupi po fitonte kjo e fundit dhe kjo fitore i hapte udhën realizmit në letërsinë shqiptare të shekullit të kaluar. T’i shtrosh udhën një drejtimi të ri dhe një stili të ri, kjo nuk është një meritë e vogël për një krijues dhe ky fakt nuk përbën një episod të zakonshëm në rrjedhën normale të një letërsie, por një pikë kthese në zhvillimin e saj. (J. Bulo, Parathënie e veprave të Çajupit, Toena: 2008, fq. 24)
Si tekst, vepra e Çajupit është një dëshmi leksikore, gjë që e ka vërejtur dhe Konica, kritiku i parë i tij kur shkruan se gjuha e autorit – i cili duket se është lab (thom duket, se nuk e kam nderin ta njoh), është e fortë e hijshme, pa lule të tepërta e të panevojshme.(Faik Konica. Baba Tomorri, Vepra 1, fq. 238) Skenat e komedisë “14 vjeç dhëndër”, vërtet të paqëlluara dhe lidhura mirë artistikisht, por të rijetëzuara përmes filmit me të njëjtin titull nuk shërbejnë vetëm për të ilustruar nervin satirik, fshikëllues dhe kritik të tekstit të Çajupit, por lehtësojnë lexuesin e ri për të pasur një kalim gradual midis një bote që ka perënduar dhe realitetit të sotëm urban. Sot ka një boshllëk të madh në gjykim për të kuptuar atë që ka arritur të transformohet shoqëria shqiptare e këtij fillimshekulli dhe shoqërisë shqiptare të strukturave sociale të ngurta, fisnore e patriarkale që mbijetuan deri në mesin e shekullit të kaluar. Në këtë drejtim, vepra e Çajupit është emancipuese dhe paralajmëruese për standardet në të cilat duhet të arrijë shoqëria.
Si autor, Çajupi është inovativ, i ri dhe eksperimentues. Ky përcaktim qëndron brenda kornizave të letërsisë së lëvruar shqipe të deriatëhershme, pasi në rrafsh europian është krejt e kundërta. Ai e njeh shumë mirë letërsinë frënge, por nuk joshet dhe tundohet nga format moderniste të saj, por shkruan në mënyrë tradicionale duke zgjedhur tetërrokëshin folklorik. Përpara tij, kështu ka shkruar vetëm Naim Frashëri, që në parathënien e përkthimit të Këngës së Parë të “Iliadës”, na i dëften modelet e tij poetike, ndërsa për fat të keq nuk kemi një traktat të tillë dhe nga Çajupi. Çajupi, së bashku me Naim Frashërin, e ngrenë ligjërimin folklorik të popullsive rurale të Shqipërisë së Jugut në art, krejt në kundërshtim me rrymat e tjera të artit në Europë që më tepër rendin drejt “unit” personal dhe në këtë mënyrë, dashur pa dashur kthehen në përfaqësues të denjë të bashkësive të lira rurale prej nga kanë origjinën. Momenti sesi ky ligjërim arrin të kthehet në dominues dhe përcaktues për masat lexuese, është jo vetëm rast studimi sesi nacionalizmi përhapet nga elitat drejt masave përmes shtypit të shkruar dhe librit, por dëshmon edhe forcën e vargjeve të veta që arrijnë ta bëjnë për vete këtë masë. Në Jug të Shqipërisë, krejt natyrshëm mund të gjesh vargje të Çajupit të kënduara labçe, pa ditur ekzekutuesit e këngëve se kush është autori i vargjeve. Kjo shkrirje autor-folklor është shumë interesante për gjithsecilin që dëshiron të njohë rrënjët e kulturës së vet.
Çajupi, në veprën e vet, demonstron kurajë civile dhe përgjegjshmëri intelektuale. Ai nuk mënon të hyjë në konflikte me autorë të tjerë shqiptarë, siç është konflikti me Mithat Frashërin, të cilin e portretizon me nota satirike te pamfleti “Klubi i Selanikut”, por që sigurisht brenda kësaj satire duhet kuptuar dhe një shqetësim intelektual për fatin politik të elitave që do të qeverisnin Shqipërinë kur do të ishte e lirë. Një debat i tillë ka qenë dhe midis Konicës e Asdrenit, ku ky i fundit shkruante se “Nëse Shqipëria ishte duke fituar pavarësinë e saj … ajo mundet dhe të mos e fitonte këtë, në qoftë se të gjithë shqiptarët nuk kanë për të gëzuar të gjitha të drejtat e tyre; dhe nëse duam të ndjekim idetë e mëdha: barazi, vëllazëri, liri – atëherë ç’nevojë ka kombi të ndahet në shkallë, me zotërinj dhe skllevër? Shqiptarët duhet të jenë të barabartë midis ligjit. Titujt duhen të hiqen … Apo mos vallë besoni se aristokracia duhet të urdhërojë dhe atëherë siç bën tani?” (Skëndi S., Zgjimi Kombëtar i shqiptarëve (1878-1912) 2000: fq., 175).
Si një nga përfaqësuesit e elitës shqiptare që jetoi në kapërcyellin e Rilindjes Kombëtare dhe periudhës së Pavarësisë, Çajupi është shumë i rëndësishëm si një nga afirmuesit dhe arkitektët e ndërgjegjes kombëtare që bëri të mundur ngjizjen e kombit shqiptar. Vargjet e tij janë gjithë patriotizëm dhe nxisin një ndjenjë të sinqertë atdhedashurie, edhe pse në mënyrë të kuptueshme në kundërvënien me osmanët si në poezinë “Sulltani”, kur i portretizon këta të fundit përmes klisheve të pasqyrimit të tjetrit në Orientalizëm.
Patriotizmi i predikuar dhe i mishëruar në vargjet e Çajupit është në fakt një patriotizëm model që mund të rimerret në formën e krenarisë kombëtare, sidomos në kohët e sotme, kur identiteti shqiptar ka pësuar lëkundje të ndryshme tektonike për vlerat dhe për principet ku mbështetet. Rilindësit dhe bashkë me ta dhe Çajupi, morën përsipër dhe ia arritën qëllimit ta kthenin ideologjinë kombëtare nga një ideologji të një pakice intelektualësh në ideologji të shqiptarëve. (J. Bulo, Parathënie e veprave të Çajupit, Toena: 2008, fq. 24) Pikërisht kjo ndërthurje midis kënaqësisë estetike që duhet të dhuronin veprat e tij dhe misionit për të realizuar zgjimin kombëtar, bën që një pjesë e poezisë së tij të tingëllojë propagandistike. Por, gjithsesi, duke e parë Çajupin sa si poet po aq dhe sa intelektual të angazhuar për të realizuar lirinë politike të vendit të vet, pra në tërësi si një personalitet të formuar të kulturës shqiptare, prapë se prapë mund të pohojmë se poetika e vargjeve të tij si kur krijon vetë apo kur shqipëron, ndjell ende lexues dhe dëshirën ndaj së bukurës. Në një tokë djerrë siç ishte shqipja e lëvruar, e fundit të shekullit XIX, dhe pa ndonjë traditë të madhe në autorë dhe tekste, nuk mund të paragjykohet as Çajupi apo dhe ndonjë tjetër për mungesë të artit poetik, por të vlerësohen që hapën rrugët dhe konsoliduan një traditë letrare që vite më vonë do të sillte në skenë dhe shkrimtarë të mëdhenj.
Ja disa nga vargjet e tij më të mira kushtuar dashurisë që meritojnë vëmendje për çiltërsinë, muzikalitetin dhe ndjesitë që përcjellin.
Pika-pika bie shiu
dhe dëbora flokë-flokë,
vetëtin e fryn veriu,
breshëri kërcet mi tokë!
Le te fryjë er’ e ftohtë,
s’ka ç’më bën dimëri mua:
Dashuria më mban ngrohtë,
se pushtoj atë që dua.
Kur fryn era me tallas,
kur bie dëbor’ e shi,
sa fle njeriu me gas,
kur ka mikenë në gji
Pas rastit të modeles shkodrane Angela Martini, e cila doli pa të mbathura në New York, këngëtarja Adelina Berisha është fotografuar gjatë performancës së saj në një koncert krejt pa të brendshme, të cilat duket se i kishte harruar në shtëpi.
Ajo jo vetëm që guxoi të hiqte veshjet e brendshme, por ka mbajtur veshur një fustan super të shkurtër, që i nxirrte gjithçka në pah.
Fotot që zbulojnë pjesë “të tepërta” të trupit të saj, janë bërë publike, ndërsa nuk ka pasur ende një reagim nga këngëtarja kosovare.
Kim Kardashian është zhveshur sërish dhe këtë radhë është shoqëruar nga modelja Emily Ratajkowski.
Më herët gjatë këtij muaji, Emily u vu në mbrojtje të Kim, pasi kjo e fundit postoi një foto tërësisht nudo në Instagram dhe Twitter.
Duket vajzat kanë pasur në plan të shtojnë forcat ndaj të gjithë kritikëve duke pozuar ‘topless’ të dyja bashkë. Në një foto të shpërndarë në Instagram nga Kim, ato shihet topless dhe të pacensuruara.