Kryetari i Degës së AAK-së në Prizren, Lulëzim Kabashi, ka hedhur gazë lotsjellës në zyrën e kryetarit të Komunës, Ramadan Muja.

Kabashi, i cili është edhe nënkryetar i Mujës tha se vendimi për hedhjen e gazit është marrë nga Këshilli i Përgjithshëm i AAK-së në Prishtinë.

“Këshilli i AAK-së ka marrë vendim që gazi lotsjellës pasi që është ndërprerë në Kuvendin e Kosovës, të shpërndahet edhe nëpër komuna”, tha Kabashi.
Ai tregon se e ka pasur tepër të vështirë që të hedh gaz lotsjellës në zyrën e kryetarit Ramadan Mujës, pasi që është pjesë e keqqeverisjes së tij.

“Unë kam qenë kundër këtij vendimi, sepse me njëfarë forme edhe ne jemi bashkëfajtorë për degradimin e qytetit, mirëpo ishte e pamundur të refuzojë presionin e liderit Ramush Haradinajt”, tha Kabashi.

Kryetari i AAK-së Ramush Haradinaj,pas zgjedhjes së Hashim Thaçit, president i Kosovës, ka shpeshtuar vizitat në qytetin e Prizrenit.
Burimet e ‘PrizrenPress’-it bëjnë të ditur se Haradinaj ka kërkuar nga anëtarët e AAK-së që t’i përdorin të gjitha format kundër qeverisjes së Ramadan Mujës.

“ Mos pritini nga unë që të shkrryhem për Prizrenin. Unë kam deklaruar një herë se për mua ky është sport i vogël”, citohet t’i ketë thënë Haradinaj, anëtarëve të Kryesisë së AAK-së në Prizren.

Sipas të njëjtit burim, Haradinaj ka akuzuar kryetarin e Degës, Lulëzim Kabashin se njëanshëm ka hyrë në qeveri me PDK-në.

“Kjo ka qenë arsyeja kryesore pse është caktuar Luli me hedhë gaz në zyrën e Mujës”,tregon burimi brenda AAK-së.
Ndërkaq, kryetari i Prizrenit Ramadan Muja është shprehur i revoltuar me veprimin e nënkryetarit të tij.
Ai tha se nuk ka pritur që njeriu i cili ka kontribuar më së shumti në fitoren e PDK-së dhe në zgjedhjen e tij, në postin e kryetarit të Prizrenit, që të hedh gaz lotsjellës.

“Nuk e kam pritur gazin nga Lulëzimi”, tha Muja.

“Ai gjatë zgjedhjeve edhe pse ka qenë kandidat nga AAK-ja për kryetar të Prizrenit, më së shumti ka lobuar për zgjedhjen time”.

Muja ka ironizuar me veprimin e Kabashit.

“Ndoshta është zhgënjyer pse kryetari i tij i vërtet, Hashim Thaçi, është bërë president i Kosovës”.

Ai ka ftuar Kabashin që të heq dorë nga gazi lotsjellës.

“ E ftoj që të heq dorë nga gazi. Mos të aktrojë me këto veprime para qytetarëve,sepse nëse është degraduar qyteti, fajtori kryesor është vetë ai. Besa edhe analistët po thonë se ky veprim është i dënueshëm”.Aprilliiiiiii

Tre persona të dyshuar për vjedhje të telefonave, sot janë arrestuar në Prizren. Zëdhënësi i Policisë në Prizren Hazir Berisha tha se të arrestuarit dyshohen se me datën 19 mars në orët e vona të mbrëmjes kanë kryer vjedhje të rëndë nga një servis i telefonave celularë në rrugën “De Rada”.

“Pas identifikimit të kryerësve janë gjetur edhe dëshmitë materiale të vjedhura në lokal të cilat i janë kthyer pronarit, ndërsa të dyshuarit janë marrë në pyetje në prani të avokatëve mbrojtës dhe pas intervistave të njëjtit janë ndaluar nën masën e arrestit policor për 48 orë”, tha Berisha.

Të dyshuarit janë të njohur për policinë pasi kanë kryer vjedhje edhe herëve tjera./PrizrenPress.com/

Masakra e fshatit Pastasellë të Komunës së Rahovecit është një nga masakrat më të tmerrshme që kanë bërë forcat kriminale serbe gjatë luftës së Kosovës të vitit 1999. Në këtë masakër janë vrarë dhe masakruar 106 persona nga fshati Pastasellë dhe fshatrat tjera për rreth.

Edhe sot e kësaj dite nga kjo masakër ende ka familjarë që kërkojnë t’i kthehen trupat e më të dashurve të tyre të cilët edhe pas 17 vitesh figurojnë të pagjetur.

Në tubimin përkujtimor një fjalë rasti mbajti kryetari i Komunës së Rahovecit, Idriz Vehapi, tha se “historia e fshatit tuaj dhe fshatrave tjerë që patën fatin e njëjtë, nuk mbaroi me kaq, sepse ju u kthyet sërish për të nisur jetën aty ku e kishit lënë, por kësaj radhe pa më të dashurit tuaj”.

“Mes dhimbjesh, mblodhët fuqinë dhe ndërtuat shtëpitë, rritët fëmijët, vazhduat jetën. Të dashurit tuaj, sikur të gjithë ne, kishin ëndërruar pafund për lirinë. Ata u bënë themel i lirisë dhe i shtetit të Kosovës”.

“Në fund, dua të theksoj se Marsi nuk solli vetëm dhembje për ne. Marsi solli edhe shpresën e madhe. I solli në vendin tonë miqtë tanë më të fuqishëm NATO-n, ShBA-në, pasi që bashkësia ndërkombëtare ishte bindur se shqiptarët historikisht nuk e kanë lëshuar kurrë vendin e tyre pa luftë, e nuk do ta lëshon të gjallë as tani”, tha Vehapi.

Për masakrën e cila është bërë nga forcat serbe me 31 mars 1999, Arton Krasniqi, banor i fshatit Pastasellë, tha se kjo është njëra ndër masakrat më të mëdha, dhe më çnjerëzore që është bërë gjatë luftës së vitit 1999, duke mos kursyer as pleq dhe fëmijë. Në këtë masakër përpos vrasjes dhe masakrimit nga forcat serbe, të vrarët më pastaj edhe janë djegur.

Në këtë masakër kanë mbijetuar 13 persona. Tahir Krasniqi, i mbijetuar imasakres, tregoi për tmerrin e përjetuar ku tha se pasi që i kanë rrethuar, paramilitarët serb kanë filluar ti rrahin në mënyrën më barbare. Pas rrahjes, forcat serbe i kanë ndarë në grupe nga 30 persona dhe me pastaj kanë filluar ti pushkatojnë.

Në tubim foli edhe edhe drejtori i shkollës fillore në Guri i Kuq, Maliq Fetahu, i cili njoftoi të pranishmit se shkolla e këtij fshati mban me krenari emrin e datës së sotme 31 mars, në shenjë të përkujtimit të përjetshëm për 106 martirë. Ai falënderoi kryetarin Vehapi për përkrahjen e kësaj iniciative.

Nga një fjalë rasti në këtë përvjetor mbajtën edhe Avdullah Hoti, ministër i Financave dhe Time Kadriu, deputete në Kuvendin e Republikës së Kosovës.

Për vrasjen dhe masakrimin e 106 martirëve, deri me tani nuk është dënuar asnjë serb që ka marrë pjesë në masakrën e fshatit Pastasellë. /PrizrenPress.com/

Sot në Malishevë, është përkujtuar masakra e Burimit, ku u vranë dhe u masakruan 42 civil shqiptarë, kryesisht banorë të Dragobilit dhe Astrazupit.

Për ta përkujtuar këtë masakër, më të madhen në Komunën e Malishevës, gjatë luftës së fundit, Kuvendi i Komunës së Malishevës, ka mbajtur një mbledhje përkujtimore, dhe më pas janë bërë homazhe tek varrezat e të vrarëve dhe në vendin e vrasjes, tek “Vrella e Mëhillit” në Burim.

Në këtë përkujtim, u kërkua dënimi i autorëve dhe urdhërdhënësve, të cilët vranë dhe masakruan 42 shqiptar.

Në fjalimin e rastit, kryetari i komunës së Malishevës, Ragip Begaj tha se “të gjithë këta, dhe shumë të tjerë të vrarë, ranë për lirinë që ne sot e gëzojmë”.

“Në këtë masakër, më të madhen brenda një dite, në territorin e Komunës së Malishevës, u vranë, pleq, të rinj, intelektual e bujq, u dogjën dhe u zhdukën shumë banorë të Dragobilit dhe Astrazupit”, tha Begaj, duke e kujtuar ngjarjen më të dhimbshme, të 31 marsit të vitit 1999, masakër e cila u bë në shenjë hakmarrje ndaj luftës së Ushtrisë Çlirimtare të Kosovës dhe popullatës shqiptare dhe në kuadër të zbatimit të planit të shtetit serb, të gjenocidit mbi popullatën shqiptare.

Ndërsa, kryesuesi i Kuvendit të Komunës së Malishevës, Aziz Thaçi, duke folur në këtë mbledhje përkujtimore, kujtoi se “për këtë masakër, ku u vranë, u masakruan, disa u dogjën, të tjerë që u zhdukën pa gjurmë, nuk u zhvillua asnjë gjykim dhe nuk u dënua askush, edhe pse dikush mbanë përgjegjësi”.

“Kjo masakër, lëkundi vlerat e civilizimit dhe ata që bënë këtë masakër, duhet të dënohen nga gjykatat vendore apo ato ndërkombëtare”, tha Thaçi.

Në këtë mbledhje, kujtime ka evokuar edhe i mbijetuari i vetëm, Nuredin Morina, i cili kërkoi që kjo të mos harrohet dhe të dënohen ata që bënë këtë krim mbi popullatën e pafajshme.

“Vetëm zoti e din se si kam shpëtuar, por kërkoi që kjo të mos harrohet”, tha Morina, i cili i falënderoi të gjithë të pranishmit, në këtë mbledhje përkujtimore.

Më pas, familjarët, të afërmit, zyrtarët komunal të prirë nga kryetari i komunës së Malishevës, Ragip Begaj, përfaqësuesit e të gjitha subjekteve politike në Komunën e Malishevës, zyrtarët e Policisë së Kosovës dhe përfaqësues të organizatave të ndryshme, kanë bërë homazhe në varrezat, ku janë të varrosur viktimat e masakrës së Burimit dhe pas kësaj, është vizituar edhe vendi i ngjarjes, tek Vrella e Mëhillit në Burim. /PrizrenPress.com/

Në zonën e Marashit dhe rrugën “Enver Haradinaj” në Prizren, dje në 13:00, policia ka kapur dy të rinj, shqiptarë – shtetas të Kosovës, pasi atyre gjatë kontrollit në shtëpitë e tyre iu gjetën dhe u konfiskuan 11.32 gramë substancë e dyshuar narkotike e llojit marihuanë, pajisje për përgatitjen e substancës, një pistoletë NEW Police me një karikator me një fishek cal. 8 mm, një pistolete shkrepëse, një thikë ushtarake dhe një sprej.

Sipas raportit të Policisë së Kosovës, me vendim të prokurorit dy të dyshuarit pas intervistimit janë dërguar në mbajtje. /PrizrenPress.com/