Dy partitë në pushtet, PDK-ja dhe LDK-ja, janë duke diskutuar fshehurazi për mbylljen e listave zgjedhore

Reforma zgjedhore e nisur para pesë vjetëve pati mbetur në gjysmë, pasi nuk gjeti vullnetin e liderëve të partive politike. Tani duket se partitë në pushtet janë të interesuara që të ndodhë kjo reformë, por ashtu siç u përgjigjet liderëve të tyre. Mbyllja e listave është një opsion, e cila po diskutohet brenda PDK-së dhe LDK-së në mënyrë që të ketë një kontroll lideri dhe kryesia mbi deputetët, meqë atëherë drejtpërdrejt lideri dhe kryesia e dërgojnë kë të duan përfaqësues në Kuvend.

Burime të “Zërit” brenda LDK-së kanë thënë se tashmë lideri i kësaj partie, Isa Mustafa, ka nisur diskutimet me kryetarët e degëve rreth mbylljes së listave. Sipas këtij burimi, brenda LDK-së është diskutuar në takime të mbyllura.

“Në LDK është diskutuar me kryetarë të degëve. Është thënë se duhet të mbyllen listat, sepse atëherë kryetari dhe kryesitë e kanë kontrollin e plotë se kush hyn deputet, meqë në një skenar të tillë qytetarët nuk mund t’i zgjedhin deputetët, por votojnë vetëm partinë”, ka thënë ky burim. /Zëri/

Ish i burgosuri i grupit “Lëvizja e Lirë”, Qëndrim Rexhaj, djali i dëshmorit Xhemajl Rexha, është liruar nga burgu i Smrekonicës, ku qëndroi për katër vjet.

Rexhaj ka qenë një ndër të dënuarit e grupit të Dobrosinit “Lëvizja e Lirë”. Ai ishte dënuar me 5 vjet e 6 muaj burgim por, pas shqyrtimit nga Gjykata e Apelit, atij iu zbrit dënimi me katër vjet burgim.

Aktakuzën ndaj Rexhajt e kishte ngritur në Gjykatën Themelore të Gjilanit prokurori italian Maurizio Salustro, i cili më vonë u ngarkua me detyrë të re në Beograd, si këshilltar kryesor i zevendëskryeprokurorit për Krimet e Luftës në Serbi, Bruno Vekariq. Aktakuza ndaj tij ishte ngritur për kryerjen e sulmeve të armatosura në punktet e xhandarmërisë serbe që ndodhën në Dobrosin dhe Konçul gjatë vitit 2012. Pas lirimit nga burgu, Qëndrim Rexhaj ka dhënë një intervistë për gazetën “Epoka e re”.

Ai ka thënë se aktakuza ndaj tij ka qenë e përgatitur dhe montuar nga prokurori tashmë i njohur për montimin e rasteve gjyqësore, Mauricio Salustro. Sipas Rexhajt, tashmë Salustro, në bashkëpunim me Bruno Vekariqin, është duke i montuar aktakuzat për Gjykatën Speciale.

“Gjithçka ka qenë e përgatitur dhe montuar nga prokurori tashmë i njohur për montimin e rasteve gjyqësore, Mauricio Salustro. Salustro së bashku me të gjitha dosjet iku nga Kosova dhe tani u punësua në Beograd si këshilltar kryesor i Bruno Vekariqit, zëvendëskryeprokuror për Krime Lufte në Beograd dhe tani së bashku po i montojnë aktakuzat për Gjykatën Speciale në Kosovë”, ka treguar Rexhaj.

Ai në këtë intervistë ka rrëfyer dhe çastet sa ka qenë i burgosur. Sipas Rexhajt, çastet më të vështira kanë qenë kur gardianët e njëjtë të cilët e kishin rrahur dhe maltretuar babanë e tij dhe të burgosurit e tjerë shqiptarë në vitet ’80-ta ia mbyllnin derën edhe atij.

“Për mua ka qenë e rëndë emocionalisht të përballem me këto akuza dhe të më merret liria ende pa e shijuar mirë atë. Më të rëndat kanë qenë çastet kur ma mbyllnin derën ish-gardianët, të cilëve ua dija emrin e mbiemrin, se të njëjtit kanë pasur sjellje të dhunshme në vitet’80, kur edhe babai ka qenë i burgosur politik. Ata jo vetëm që bëjnë të njëjtën punë, por janë ngritur edhe në detyrë, punojnë si eprorë”, ka thënë ish i burgosuri dhe veprimtari i “Lëvizjes së Lirë”, Qendrim Rexhaj. /Epoka e Re/

Ramush Haradinaj nuk e hedh poshtë mundësinë e një koalicioni me PDK-në, por, siç thotë ai, me kusht që Kadri Veseli do t’i bindë se nuk është për vazhdim të kësaj logjike qeverisëse. Sipas tij, partia më e madhe në vend është përgjegjëse për kapjen e shtetit, për shkallën e lartë të korrupsionit, rritjen e kriminalitetit të brendshëm dhe rritjen e ekstremizmit fetar

Ramush Haradinaj thotë se ende është e mundur partneriteti me partitë opozitare, por, siç thotë ai, nuk është i gatshëm t’ia dorëzojë vizionin e AAK-së një subjekti tjetër politik, duke aluduar në Lëvizjen “Vetëvendosje”.

Sipas tij, Aleanca është parti e qendrës së djathtë dhe duke u bazuar në këtë e ka zhvilluar një vizion të veten se si e sheh Kosovën në planin e brendshëm dhe të jashtëm.

“Këto janë vizionet tona, të cilat nuk hezitojmë t’i ofrojmë për partneritet, por të njëjtat nuk pranojmë t’i dorëzojmë te një partner politik. Pra, ky është dallimi ynë”, shprehet Haradinaj gjatë një interviste për gazetën “Zëri”.

Gjatë kësaj interviste ai është shprehur i sigurt se zgjedhjet e parakohshme në vend do të mbahen para vjeshtës së këtij viti.

Ndërsa për mundësinë e një koalicioni me PDK-në Haradinaj ka thënë për “Zërin” se një gjë e tillë do të ishte vazhdim i logjikës së deritanishme të qeverisjes. Megjithatë, sipas tij, nëse PDK-ja në krye me Kadri Veselin arrin t’i bindë se angazhimi i tyre nuk është vazhdim i gjendjes aktuale, atëherë, siç thotë ai, çdo gjë është e mundur. /Zeri/

Edhe një kosovar është vrarë në Siri. I vrari është Hamdi (Fadil) Krusha 22 vjeçar. Lajmi është konfirmuar nga familjar të Hamdi Krushës, në kushte anonimiteti.

Hamdiu i cili e mbante emrin Sulejman El- Albani, ishte vrarë të shtunën gjatë luftimeve në Siri, që i takonte krahut të Al – Nusras.

Sipas burimeve të Gazetës Blic, familja e të vrarit, që jeton në Prizren në lagjen ‘Jeta e Re’, për rastin është njoftuar të dielën pasdite (03.04.2016), nga bashkëluftëtarë e djalit të tyre, tashmë të vrarë.

Familjarët janë njoftuar për vdekjen e djalit të tyre edhe përmes një bashkëluftëtari të Hamdiut, në Siri, gjithashtu prizrenas.

“Hamdi Krusha i takonte grupit terrorist Al- Nusra”, i ka thënë ky burim.

Mësohet se ai është varrosur në Siri. Familjarët e tij që nga e diela pasdite kanë hapur të pame për ngushëllime.

Hamdiu ishte bashkuar me luftëtarët në Siri para më shumë dy vitesh.

Ai, atje mbante emrin Sulejman El-Albani. /Gazeta Blic/

Policia e Kosovës përmes një komunikate ka bërë të ditur se ka arrestuar një person me dyshimin se ka e ka mashtruar një tjetër se do t’i bëjë një vizë për Suedi dhe për këtë i ka marr para.

“Është arrestuar i dyshuari mashkull (shqiptar) pasi që i njëjti ka mashtruar viktimën mashkull (shqiptar) duke i thënë se ka një firmë ndërtimore në Suedi dhe mund të rregullojë vizë për punë. I dyshuari nga viktima ka marr para”, thotë PK-ja.

Gjatë intervistimit, PK-ja njofton se i njëjti ka pranuar se ka marr një shumë të parave, por sipas tij ka dështuar ta rregulloj vizën. Me urdhër të prokurorit i dyshuari është dërguar në mbajtje.

Ish- deputeti i Partisë Demokratike të Kosovës dhe ish- komandanti i Zonës Operative të Llapit, Rrustem Mustafa- Remi është rikthyer në burg, për ta vuajtur pjesën e mbetur të dënimit.

Kështu i kanë thënë Gazetës Blic burime brenda Shërbimit Korrektues të Kosovës.

“Para disa ditësh Remi është rikthyer në burg, për ta mbajtur edhe pjesën e mbetur të dënimit”, ka thënë ky burim.

Remi pritet që t’i mbaj edhe 11 muaj burg.

Pos Remit, para disa ditësh edhe ish- deputeti tjetër dhe njëri prej ish- komandantëve të Zonës Operative të Llapit, Latif Gashi kishte shkuar vullnetarisht ta mbajë edhe një pjesë të burgut që i ka mbetur, pasi ishte dënuar bashkë me “Grupin e Llapit”./ Gazeta Blic