Partia Demokratike ka nisur protestën e paralajmëruar para godinës së bashkisë së Tiranës.
Qytetarët janë mbledhur në rrugën kryesore përballë bashkisë, në sheshin “Skënderbe”.
Ata kundërshtojnë projektin e bashkisë së Tiranës për parkun e Liqenit, ku do të ndërtohet këndi i lojërave për fëmijë, mjaft i debatuar.
Protestuesit kanë qëlluar me vezë e domatë godinën, teksa para hyrjes së bashkisë është vendosur një kordon policësh, raporton Top Channel.
Raportet e Auditorit të Përgjithshëm për pasqyrat financiare të vitit 2014 janë publikuar nga vetëm dy komuna fqinje të Prizrenit në ueb faqet e tyre zyrtare, derisa katër komunat tjera nuk i kanë prezantuar ato deri më tani.
Komuna e Suharekës dhe Komuna e Rahovecit janë të vetmet që kanë krijuar mundësinë për vizitorët e ueb faqeve zyrtare të tyre që të njihen me përmbajtjen e plotë të Raportit përkatës të Auditorit. Ndërsa Raporti i Auditorit nuk figuron në ueb faqet e komunave të Dragashit, Malishevës dhe Mamushës. Komuna e Shtërpcës në anën tjetër ka të publikuara raporte të viteve paraprake të Auditorit, por jo edhe atë për vitin 2014.
Raportet e nxjerra nga Zyra e Auditorit të Përgjithshëm, siç thuhet edhe në hyrjet e Raporteve të Auditimit, “promovojnë drejtpërsëdrejti llogaridhënien pasi ato ofrojnë bazë për t’i kërkuar llogari menaxherëve të çdo organizate buxhetore”. Në këtë rast, Raportet e Auditimit, ofrojnë bazë për të kërkuar llogari nga kryetarët e komunave përkatëse për mënyrën e qeverisjes së parasë dhe pasurisë publike, si dhe për të parë nëse shpenzimi i fondeve publike është në përputhje me interesin e taksapaguesve.
EC Ma Ndryshe e ka parasysh faktin se Raportet e Auditimit për këto komuna janë të publikuara dhe të qasshme për të gjithë në ueb faqen e Zyrës së Auditorit të Përgjithshëm. Megjithëkëtë publikimi i tyre edhe në ueb faqet e komunave do të dëshmonte një përkushtim të vet lidershipit komunal për llogaridhënie dhe transparencë në menaxhimin e fondeve publike.
Po ashtu konsideron se informimi i publikut për praktikat e mira por edhe të metat e komunave në menaxhimin e financave publike paraqet një tregues të rëndësishëm për nivelin e transparencës së tyre.
Duke i marrë parasysh të gjitha këto, EC Ma Ndryshe rekomandon komunat fqinje të Prizrenit që Raportet e Auditorit të Përgjithshëm t’i publikojnë në ueb faqet e tyre në vazhdimësi, sikurse që të nisin edhe praktikën e hartimit dhe publikimit të raporteve periodike mbi gjendjen e zbatimit të rekomandimeve të adresuara nga Auditori i Përgjithshëm. /PrizrenPress.com/
Kryetari i Komunës së Malishevës, Ragip Begaj, do të dalë sot para gjykatës në rastin ndaj tij që ka të bëjë me akuzën për keqpërdorim të detyrës zyrtare apo autoritetit zyrtar.
Seanca e dytë në rastin ndaj tij do të mbahet në Gjykatën Themelore të Gjakovës.
Më 17 dhjetor të vitit të kaluar, Prokuroria Speciale e Kosovës kishte ngritur aktakuzë ndaj Begajt pasi që dyshohet se gjatë muajve qershor – gusht të vitit 2014 në cilësinë e personit zyrtar ka shpërdoruar pozitën zyrtare dhe autorizimet e tij, me qëllim që një të dëmtuari t’i shkaktojë dëme, duke ia shkelur të drejtat nga marrëdhënia e punës.
Prokuroria pretendon se edhe pse i dëmtuari kishte kontratë të lidhur me Drejtorinë e Arsimit deri më 01.10.2015 si drejtor i shkollës fillore të mesme të ulët ‘Ganimete Tërbeshi’ në fshatin Astrazub, i pandehuri me dashje dhe me dijeni ka hapur konkurs pa ia ndërprerë më parë marrëdhënien e punës të njëjtit, duke e lënë pa vend pune dhe të ardhura për jetën. /Kallxo.com/
Pas një pune intensive, Policia e Suharekës ka arritur t’i bie në gjurmë të dyshuarit A. Jashari, i cili se bashku edhe me një tjetër që është në kërkim policor kishin kryer një seri vjedhjesh të rënda në Suharekë e rrethinë, raporton PrizrenPress.
Policia njofton se gjatë arrestimit të të dyshuarit i cili është kryer në Prishtinë, janë gjetur dhe sekuestruar në cilësi të provës materiale nëntë kompjuterë lap-top, një televizor “plazma” dhe një “Mikst” muzikor.
Në konsultim me prokurorin e shtetit, i dyshuari ndalët nën masën e arrestit policor. /PrizrenPress.com/
Kryetari i Kuvendit të Shqipërisë, Ilir Meta do të zhvillojë një vizitë zyrtare në Suedi me ftesë të kryetarit të Parlamentit suedez (Riksdag), Urban Ahlin.
Mësohet se gjatë vizitës dyditore Meta dhe delegacioni parlamentar që e shoqëron do të zhvillojnë takime me personalitete të larta të Suedisë.
Kryetari i Kuvendit do të pritet në takime të veçanta nga ministri i Sipërmarrjes dhe Inovacionit, Mikael Damberg, ministrja e Zhvillimit dhe Bashkëpunimit, Sabella Lovin dhe ministrja e Punëve të Jashtme, Margot Ëallstrom.
Të martën delegacioni shqiptar do të vizitojë Parlamentin e Suedisë, ku do të zhvillohen takime me kryetarin e Parlamentit, Urban Ahlin dhe me kryetarët e disa komisioneve parlamentare.
Delegacioni shqiptar përbëhet nga kryetari i Kuvendit, Ilir Meta, kryetarja e Komisionit për Politikën e Jashtme, Arta Dade, deputetët Kejdi Mehmetaj dhe Agron Duka./Shekulli.al
Deputeti Anton Quni, e quan paradoksal vendimin e Gjyatës së Nishit e cila shpalli fajotor ish- eprorët e UÇK-së, të brigadës 138 “Agim Ramadani”.
Në mesin e tyre bën pjesë edhe vetë deputeti Anton Quni.
Duke sqaruar se në 1998 ushtria serbe pësoi humbje të mëdha nga UÇK-ja, Anton Çuni thotë se me këtë vendim regjimi i Beogradit ka për qëllim të krijoj tensione në Kosovë. /21 Media/
Ish-ministri i Punëve të Jashtme, Enver Hoxhaj, peticionin e iniciuar për largimin e ambasadorit amerikan në Kosovë, Greg Delawie, e ka cilësuar sulm ndaj pavarësisë së Kosovës.
Ai në një intervistë për “Epokën e re” ka thënë se kjo tendencë antiamerikane në Kosovë nuk përfaqëson vullnetin e qytetarëve të Kosovës. Hoxhaj i ka ftuar të gjitha subjektet politike ta dënojnë këtë akt. Ish-shefi i diplomacisë së Kosovës ka vlerësuar se frymën antiamerikane në Kosovë po e nxit përplasja e disa subjekteve politike me bashkësinë ndërkombëtare.
“Çdo sulm ndaj SHBA-së është sulm mbi qenësinë dhe identitetin tonë”, ka thënë Hoxhaj.
Tri partitë opozitare, Lëvizja “Vetëvendosje”, Aleanca për Ardhmërinë e Kosovës dhe “Nisma për Kosovën”, po mobilizohen për ta penguar zgjedhjen e Hashim Thaçit president të Kosovës.
Jozyrtarisht mësohet se partnerët e koalicionit qeverisës po planifikojnë që zgjedhja e Thaçit president të ndodhë këtë të mërkurë, në një seancë të Parlamentit, të cilën gjë opozita po planifikon që të mos e lejojë.
Adonis Tahiri nga Lëvizja “Vetëvendosje” ka thënë për “Zërin” se ashtu siç kanë vepruar në seancat paraprake, njësoj do të veprojnë edhe në seancën kur pritet të bëhet zgjedhja e presidentit.
“Siç kemi vepruar edhe në seancat e fundit të Kuvendit, do të veprojmë edhe në seancën e ardhshme kur ajo të caktohet. Një president i zgjedhur në kushtet e një krize institucionale nuk mund të përfaqësojë asnjë institucion e aq më pak unitetin të cilin supozohet ta përfaqësojë edhe me Kushtetutë”, ka thënë Tahiri për “Zërin”.
Sipas Tahirit, Thaçi assesi nuk bën të jetë president i Kosovës, pasi që, siç ka thënë ai, kreu i PDK-së është një nga shefat kryesorë të nëntokës në Kosovë.
“Për më tepër, profili i Thaçit nuk bën assesi për president. Kundërshtimi i tij kap një front të gjerë shoqëror. Madje edhe shumica e elektoratit të LDK-së, që e kanë partner të koalicionit, janë kundër tij”, ka deklaruar Tahiri. /Zëri/
Demokracia kosovare në rrezik për t’u varrosur
Partnerët e koalicionit PDK-LDK dhe minoritetet kanë planifikuar, që duke e ndëshkuar opozitën me përjashtim nga punimet e Kuvendit, të gjejnë një model, të ligjshëm, sipas tyre, për ta përmbyllur tani vetëm proceduralisht zgjedhjen e Hashim Thaçit për president të vendit, pasi që afati kushtetues i skadimit të mandatit të presidentes në detyrë Atifete Jahjaga po shpenzohet.
Mirëpo, analistët politikë konsiderojnë se çdo formë antidemokratike e përpjekjes për ta zgjedhur kreun e PDK-së, Hashim Thaçi, në pozitën e kryetarit të shtetit, duke vepruar me një lloj kontrabandimi vetëm të votave të instrumentalizuara paraprakisht nga deputetët e koalicionit qeverisës, pa opozitën, vetëm sa do ta thellojë akoma më shumë krizën në vend në të ardhmen, ngase bëhet fjalë për një figurë me të cilën që tani janë ndërprerë të gjitha urat e komunikimit politik për shkak të arrogancës dhe mos durimit politik ndaj oponentëve. Në të ardhmen, për të gjitha temat e interesit nacional, që mund të bisedoheshin në tryezën e ftuar nga presidenti i ardhshëm, janë tri subjekte politike të cilat as tani dhe as në të ardhmen nuk do të pranojnë të kenë kurrfarë komunikimi më Zyrën e presidentit të Kosovës nëse Hashim Thaçi “aksidentalisht” zgjidhet në atë pozitë.
“Në rast se Hashim Thaçi zgjidhet president me vota të kontrabanduara, do të ishte një skenar i keq, sepse përveç që zgjedhja e Hashim Thaçit për president s’do të ishte bërë në mënyrë legjitime, krizën politike dhe bllokadën shtatë- mujore, do ta thellonte akoma më shumë. Kjo krizë do të mund të shpërthente edhe me revoltën e qytetarëve në rrugë. Kosovës nuk i duhet një president, që zgjidhet në këtë mënyrë dhe me skena të tilla, me skenar të pistë dhe jodemokratik. Kosova ka me qindra e mijëra probleme të tjera, sesa problemi e zgjidhjes së presidentit. Kosovës i duhet një president, që përfaqëson interesat e popullit dhe të shtetit, që zgjidhet direkt me votat e qytetarëve, e një njeri si Hashim Thaçi që këtë popull që e quan egërsirë, s’mund ta përfaqësojë këtë popull”, shprehet politologu Faik Krasniqi për “Kosova Sot”.
Kurse, analisti Ali Hertica shprehet: “Zgjedhja e Thaçit president “aksidentalisht” do të thotë një ndezje e xixës së opozitës, me çka mund të vijë edhe deri tek ndonjë situatë akoma më e keqe për shtetin e Kosovës, të them ndoshta edhe mbarimin e shtetit si shtet demokratik, sepse e gjithë kjo situatë politike, që po e përdhos shtetin është gjenerim nga të parët e kësaj qeverisjeje, e që ju ngjasojnë atyre brigadave të kuqe e që janë këta të LDK-së dhe Qavezët e PDK-së”. /Kosova Sot/
Partnerët e koalicionit qeverisës nuk po guxojnë ta zbulojnë datën e zgjedhjes së presidentit nga frika e kundërshtimeve të ashpra që pritet të vijnë nga opozita. Ata nuk e mohojnë se zgjedhja e Thaçit në krye të shtetit mund të ndodhë këtë të mërkurë, tri ditë para protestës së paralajmëruar.
Partnerët e koalicionit qeverisës po i bëjnë përgatitjet e fundit që Hashim Thaçi të zgjidhet këtë javë president.
Jozyrtarisht përmendet dita e mërkurë (24 shkurti), dita kur Thaçi do të votohet në krye të shtetit, disa ditë para se partitë opozitare ta mbajnë protestën e paralajmëruar.
Madje partnerët e koalicionit thonë se zgjedhja e Thaçit president pritet të ndodhë gjatë një seance solemne të Kuvendit të Kosovës, të cilën seancë partitë opozitare janë të vendosura që të mos e lejojnë që të zhvillohet.
Nënkryetari i PDK-së, Enver Hoxhaj, thotë për “Zërin” se ende nuk e di datën se kur do të votohet Thaçi për president të vendit, por nuk e ka mohuar se një gjë e tillë mund të ndodhë gjatë kësaj jave.
“Mendoj se kur do të jetë dita, më shumë i takon Kryesisë së Kuvendit e cila mund të vendosë në përputhje me procedurat në fuqi se kur ta thërrasë seancën. Por në anën e partnerëve të koalicionit, PDK-së dhe LDK-së, dhe komuniteteve ekziston një qartësi e plotë që presidenti mund të zgjidhet brenda një kohe të shkurtë. /Zëri/