Kryetari i Listës Serbe, Slavko Simiq tha se nuk është e sigurt nëse Lista Serbe do të marrë pjesë në seancën e Kuvendit të Kosovës, të premten, kur do të zgjidhet presidenti i vendit.

Ai ka deklaruar për agjencinë serbe “Beta” se Lista Serbe kërkon nga partnerët në koalicion PDK dhe LDK të nënshkruajnë një dokument me të cilin ata sigurohen se pas zgjedhjes së presidentit, kërkesat e Listës Serbe do të plotësohen.

Kryetari i Listës serbe, Slavko Simiq i tha agjencisë serbe “Beta” se Lista Serbe ka kërkesa, të cilat dalin nga marrëveshja e koalicionit me PDK-në dhe LDK-në, që lidhen me marrëveshjet e Brukselit, për sa i përket interesit të komunitetit serb të Kosovës, e që nuk janë plotësuar, transmeton RTK.

“Me partnerët tanë kemi pasur konsultime për sa i përket mbajtjes së seancës së jashtëzakonshme, por nuk kemi pasur ndonjë qëndrim zyrtar. Ne nuk kemi dashur që mbledhja e Kuvendit për zgjedhjen e presidentit të mbahet të premten, para se ne të definojmë disa kërkesa tona që lidhen me zgjedhjen e problemit të bashkësisë serbe në Kosovës”, ka thënë Simiq.

Ai ka deklaruar se fjala është për kërkesa për zgjidhjen e problemeve, me të cilat serbët në Kosovë ballafaqohen që nga viti 1999 dhe që edhe më tej nuk janë realizuar.

“Nuk është mirë që të merren vendime pa u definuar qëllimet midis partnerëve në koalicion”, ka thënë lideri i Listës Serbe.

“Ne kemi pasur disa konsultime me Partinë Demokratike të Kosovës dhe Lidhjen Demokratike dhe ata na kanë dhëne fjalën se do të plotësojnë kërkesat tona. Por siç mund të shihet muajve dhe viteve të fundit, fjala e dhënë (besa) nga politikanët shqiptarë ka humbur kuptimin dhe nuk do të thotë asgjë… I kam lutur partnerët në koalicion që mos ta caktojnë seancën për të premten para se ne të merremi vesh dhe marrëveshjen e arritur për zgjedhjen e Presidenti ta bëjmë përmes një dokumenti valid, i cili do të garantonte se kërkesat tona në të ardhmen do të realizohen. Prandaj, ne jemi në pritje që partnerët tanë sa më parë të tregojnë pjekuri politike dhe të na thërrasin në një takim ku do të definohen kërkesat tona dhe ato të konfirmohen përmes një dokumentit të cilën do ta nënshkruajmë së bashku”, ka nënvizuar shefi i Listës serbe, Simiq.

Nëse kjo nuk bëhet, nuk është e sigurt nëse Lista serbe do të votojë për presidentin dhe nëse do të marrë pjesë fare në seancën e thirrur për të premten, ku duhet të zgjidhet Presidenti i Kosovës, ka deklaruar lideri i Listës Serbe, Simiq.

Kosova do të shkojë në zgjedhje të parakohshme pas zgjedhjes së Hashim Thaçit si president i vendit.
Kështu deklarojnë për “Zërin” analistët politikë, pavarësisht se drejtuesit e dy partive më të mëdha politike në vend deklarojnë se do të vazhdojnë të qeverisin deri në qershor të 2018-s.

Analisti politik, Halil Matoshi, ka thënë për “Zërin” se Kosova do të shkojë në zgjedhje më së largu në vjeshtën e këtij viti.

“Nëse Thaçi zgjidhet president, ai do ta çojë vendin në zgjedhje të parakohshme më së largu deri në vjeshtë”, ka thënë Matoshi.

Edhe Imer Mushkolaj, analist, ka thënë se qëllimi i Hashim Thaçit është që të zgjidhet president dhe ta çojë vendin në zgjedhje të parakohshme, duke shpresuar se PDK-ja do ta marrë edhe Kryeministrinë.

“Qëllimi i Hashim Thaçit është të zgjidhet president dhe ta çojë vendin në zgjedhje. Dhe në këtë formë duke shpresuar se do ta marrë shumicën, do ta marrë edhe Kryeministrinë. Pikërisht për këtë shkak ai po insiston dhe po dëshiron të zgjidhet president dhe t’i mbetet atij merita që e ka dërguar vendin në zgjedhje dhe jo të lëshojë pe karshi kërkesave të opozitës”, ka thënë Mushkolaj.

As analisti tjetër politik Fadil Lepaja, nuk e ka përjashtuar mundësinë që vendi të shkojë në zgjedhje të parakohshme. /Zëri/

Kryesia e Kuvendit të Kosovës ka caktuar seancë të jashtëzakonshme për zgjedhjen e Presidentit të Kosovës.

Pas përfundimit të mbledhjes, Kryeparlamentari Kadri Veseli ka deklaruar se Kuvendi do të mblidhet këtë të premte, në orën 11:00.

Ai ka thënë se janë dy kandidatë: Hashim Thaçi dhe Rafet Rama, deputeti i PDK’së.

Sipas Veselit, ky do të jetë një moment historik dhe i veçantë, ndërsa ka premtuar se procesi do të jetë transparent dhe gjithpërfshirës.

“Të premten, në orën 11:00, Kosova do të kalojë një nga momentet më të veçanta. Kemi zgjedhjen e Kryetarit të Shtetit”.

“Pas një kohe shumë të gjatë,  patëm mbledhjen me kolegët e Opozitës. I inkurajoj ata të jenë pjesë e këtij procesi. Megjithatë, ajo që ndodhi brenda po i kalon të gjithë kufijtë e një normaliteti. Kjo që po ndodh është e re në Kosovë, por nuk është e panjohur”.

Veseli ka ftuar qytetarët të kenë përgjegjësinë për ruajtjen e familjeve të tyre.

“Ka një vendosmëri të fanatizmin për të arritur qëllimet e veta në mënyrën e vet. Kisha ftuar qytetaret familjarët që ta ruajnë njëri-tjetrin”.

“Ne nuk do të ndalemi duke thirrur Opozitën që të jetë pjesë e  vendimmarrjes në Kuvendin e Kosovës. Mirëpo, nuk do të kenë suksese ata që mendojnë se shteti ligjor në Kosovë nuk funksionin. Të na imponohet nuk ka mundur as Serbia, shtet 22 milionësh. Kur e ka tepruar, i kemi thënë mjaftë”, ka thënë Veseli.

Liderët opozitarë kanë mbajtur një konferencë për media nga sheshi i Prishtinës ku po qëndrojnë me tenda në protestë kundër Qeverisë dhe zgjedhjes së Hashim Thaçit president.

Ramush Haradinaj i AAK-së dhe Fatmir Limaj i Nisma-s për Kosovën kanë thënë se pozita po tenton ta trafikojë një seancë ilegalë në mënyrë që të zgjidhet Thaçi president.

Ata kanë bërë thirrje që shumica të mos ta bëjë këtë sepse një veprim i tillë do ta thellonte edhe më shumë krizën,njofton Klan Kosova.

Lideri i AAK-së ka thënë se nëse thirret një seancë e re deputetët do të marrin pjesë në seancë.

Kurse Limaj ka shtuar se çfarëdo që bën ky Kuvend është ilegale dhe nuk është legjitime.

Në këtë paraqitje nuk ka marrë pjesë lideri i Lëvizjes Vetëvendosje, Visar Ymeri,mungesën e tij e sqaruan kolegët e tij, ata thanë se Ymeri kishte disa takime me strukturat e partisë së tij – kështu që me marrëveshje në paraqitje për media kanë dalë vetëm dy liderët e tjerë.